Da 'eetec da saishet da imeuo qanqa'en so chegoxoguetpi so Benjamín
1So Israel le'ecpi ỹan da la'aqtac huaña ye Mispá, 'eeta': Ana qoyalepi, saishet qome da sashenaxaguet da huaroneguet na chegoxoguetpi so Benjamín. 2Qaq co'ollaq ime de'era nache se'eso nhuo' le'ecpi laỹona't huaña ye Betel, ỹauaachigui Ñim Lo'onatac 'Enauacna nache palom da nỹeetacpi, qataq nachoxoreetac nache, 'eeta':
3'Am Nataxala', maye Natamnaxala' na Israel le'ecpi, ¿ta'ainco' da huaigui de'era nam qarhuo' le'ecpi? Qataq ¿ta'ainco' taxa da qaica som 'oonolec ne'ena nhuo' le'ecpi maye chegoxoguetpi so Israel?
4Qaq so lỹa na'a'q, nache so Israel le'ecpi ñisheguem so nte'etom, nache ỹo'ot aso lca'atoxonaxalate, nache qaỹachalec asomaye aso nachetaqtaxanaqte qaỹavigaxatta da qoỹanot Ñim Nataxala', qataq aso nachetaqtaxanaqte maye qanhuaachigui. 5Huaña nache nnara't, 'eeta':
Da shenaqta ¿negue't co'ollaxa ca sa ỹalegueua'a se'eso qaraponaxac maye huaña ye Mispá?, qaq cha'aye somayepi ỹo'ot co'ollaxa so ỹan la'aqtac da ỹalauat cam sa ỹalegueua'a se'eso naponaxac.
6Nache so Israel le'ecpi ỹataqta lta'araic da laquicoxo souaxat de'era huaigui se'eso lqaỹañecpi maye chegoxoguetpi so Benjamín, nache 'enapeco': Ne'ena na'a'q huo'o so mashe qaica nam nhuo' le'ecpi maye chegoxoguetpi so Israel. 7¿Qaq ca shenaqteco' qome da sauoqo'o aca lhua nam no'onañipi ỹalleppi maye chegoxoguetpi so Benjamín? Cha'aye qomi' sanqot co'ollaxa so qara'aqtac Ñim Nataxala' da saishet da sashenaxaguet ana qoyalepi da huaroneguet namayepi.
8Nache nnattega't, 'eeta':
¿Qaq ne'ena maiche nhuo' Israel le'ecpi peta'a huo'o ca sa ỹalegueua'a co'ollaxa se'eso qaraponaxac da ñenataxai' Ñim Nataxala' maye huaña ye Mispá?
Qaq huaña nache somayepi ntoonec da ye Jabés maye huaigui ye Galaad qaica co'ollaxa ca ỹalegueua'a se'eso lta'araic naỹonaxac, 9cha'aye co'ollaq qaimeten aso lmalate da qanaloqna't so ỹalectauopi, nache qaica ca ỹalectauo som lma' se'eso 'alhua.
10Huaña nache nmasheguem so ỹalecta'a't nhuo' le'ecpi da ỹamaq so doce mil som ỹalleppi maye ỹataqta alaataxaicpi, nache qaỹamaxalec da irolec so ỹeelonec da ỹalauat 'enauac so lma' ye Jabés, ỹalegueuo qanqa'en so 'alpi qataq so ñaqpiolec 11qataq 'enauac som ỹalleppi, qataq so 'alpi maye mashe lauatapiguiñi' na ỹale.
12Nache so Israel le'ecpi co'ollaq ivira ye Jabés maye huaigui ye Galaad, nache ilalec aso cuatrocientos qa'ampi maye saxanaxa da ỹauana ca ỹale, nache ỹauega ye nanataqa' maye naña ye Silo, yem huaña ye 'alhua Canaán. 13Ime, nache nmasheguem so nhuo' le'ecpi da damaxasoxona som chegoxoguetpi so Benjamín maye hueta'a co'ollaxa añi coma' maye naña ye Rimón, da yaqto' naỹamaxate' da ỹo'ot ca nlagaxayec. 14Nache so chegoxoguetpi so Benjamín ỹe'eguelaxa so hueta'a so laỹepi Israel le'ecpi, nache somayepi ỹanem som 'alpi maye ỹachegoxotaña ye Jabés. Qalaxaye sa nalouec co'ollaxa asomayepi, nache huo'o so ichiỹaugapi.
So Benjamín le'ecpi decachiỹa so 'alpi
15Qalaxaye so Israel le'ecpi ỹataqta huo'o da lchoxonnataxanaxa so chegoxoguetpi so Benjamín, souaxat da Ñim Nataxala' huo'o so qaica naqa'en somayepi. 16Nache so nqueroxonecpi lataxala'pi so maiche nhuo' le'ecpi nnattega'to', 'eeta': ¿Chaq shenaqteco' da sauoqo'o acam sanaxam 'alpi nam ỹalleppi maye ichiỹaugapi? Cha'aye qanmatchiguiñi co'ollaxa da qaỹalauat som 'alpi maye chegoxoguetpi so Benjamín. 17Qomi' seuenaq da ñimitaqaique ca lataxac da yaqto' sa deraỹai' namayepi da ỹalectaigui nam maiche qaralamaxat qarhuo' le'ecpi, da chegoqchigui ñaqa'enaq nam no'onañipi da yaqto' qaica ca imeuo nam nhuo' le'ecpi maye chegoxoguetpi so Israel. 18Qalaxaye qomi' saishet da sanaxauec ana qoyalepi da huaroneguet namayepi, cha'aye 'enauac nam Israel le'ecpi mashe sanaq co'ollaxa so qara'aqtac da qaỹo'ot da nhuaxanaguec cam ỹan aca llale da huaroneguet naqa'en nam chegoxoguetpi so Benjamín.
19Qalaxaye somayepi tachigui lauel co'ollaxa da ye 'oonolec vi'i, nache qaỹo'ot naxa so naponaxac lta'araic da qaỹo'oxoren Ñim Nataxala' huaña ye Silo, maye naña ye pa'aỹa'ague da sheu' ye Betel, qataq ye pa'aỹa'ague da nala' lliguisheguem so nqa'aic maye chegaqaua'a ye Betel, nache taỹa'a ye Siquén qataq pa'aỹa'ague da sheu' ye Lebona. 20Ime, nache so nqueroxonecpi lataxala'pi so Israel le'ecpi, ỹamaxa da la'aqtac so chegoxoguetpi so Benjamín, 'eeta': Qanqo'oñiỹa qome ye nanqa' ana uva maye saqaỹapeque ye Silo nache qanqañoxochiiñi, 21nache qanaỹamaxacheetai' qome. Nache qom qauloỹa'a nam 'alpi ye Silo da lapootec da dasora't, nache qoquiỹa'ai nataqa'en cam qanqañoxotaqa'ai, nache ñi 'oonolec ỹale da qoñiita ỹaconeua'a aca 'alo da decachiỹa, nache qoqui qome da yaqto' qanqo'oñiỹa ye maiche qana'alhuai. 22Qaq da huo'otaq anac ca lta'alpi qataq ca lqaỹañecpi da qomi' icogaxana'ape souaxat que'eca qa'ampi, nache qomi' shenaqapega qome da qami' ichoxore'n, cha'aye qomi' saishet da sanataxa acam laỹepi 'alpi da yaqto' qaica ca ichiỹauga namayepi. Namayepi ỹo'ot de'era cha'aye co'ollaq seloquiaqtague' so lma' ye Jabés, nache saishet da sachoxoñi so 'alpi da yaqto' imauec da huaroneguet ñaqa'enaq namayepi. Nache saishet da huo'o ca qarasouaxashichi, cha'aye saishet da nache qami' da qa'añiiuec anamayepi.
23Qaq 'era da 'eetec so chegoxoguetpi so Benjamín da ỹo'ot de'era qoỹanem na'aqtac, nache ñi 'oonolec so nsoxoppi ỹaconeua'a añi 'oonole so qa'ampi maye coleeta'a't da dasottega't. Ime, nache ỹauec, nache ỹe'eguelaxa ye maiche lalamaxat na'alhua, nache ỹoltaq no'oxoosheguem som huaqta'a't nỹecpi, qataq nache netaigui somayepi. 24Nache so laỹepi Israel le'ecpi nataqa'en jec da ỹe'eguelaxalo naua lalamaqa'ate 'aleu' maye netañalo so maiche lauo' le'ecpi, qataq so lalamaxat llalaqpi.
25Qaq se'esoua na'axa'te maye huetoiguilo de'era, nache so Israel le'ecpi saxanaxa co'ollaxa da huo'o ca nta'a da ilo'ogue somayepi, nache ñi 'oonolec maiche ỹoiqueetac cam ỹataqta ỹaỹamaxareeta da ỹo'ot.
