Jueces 20

₁Huaña nache 'enauac so Israel le'ecpi, chegoqchiguiña ye Dan nache ivitta'a ye Berseba qataq ye Galaad da 'eeta'am ca 'oonolec shiỹaxaua da anac da laỹona't huaña ye Mispá, ỹauaachigui Ñim Nataxala'. ₂Qaq 'enauac da ỹalectauo som lataxala'pi so maiche nhuo' Israel le'ecpi, nache se'eso lalamaxat nhuo' le'ecpi Ñim Lo'onatac 'Enauacna, ivi' cuatrocientos mil alleppi som petañi. ₃Qaq so maiche nhuo' le'ecpi maye chegoxoguetpi so Benjamín co'ollaq ỹaỹaten da so maiche laỹepi Israel le'ecpi mashe laỹona't co'ollaxa hueta'a ye Mispá.

Nache so Israel le'ecpi inat co'ollaxa so leviita, 'eeta':

¿Ca 'eetec co'ollaxa da l-leuaxa aya'aye 'alo?

₄Nache se'eso leviita, maye lhua aso 'alo maye qaỹalauat co'ollaxa, 'eeta':

Aỹem ñenaictague' ayemaye so sevireua'a ye huaqta'a't nỹecpi ye Gabaa maye lalamaxat so chegoxoguetpi so Benjamín, da yaqto' souaqa'a yemaye se'eso pe. ₅Qalaxaye nacheso se'eso pe, anac so 'etaxaloxoicpi maye netaña yi'iye huaqta'a't nỹecpi nache coleesop ñim sonaqtaigui nỹec cha'aye huotaique da aỹem ỹalauat, qaq aye ihua lỹa nache qaỹaconeua'a da qancat, qataq ỹataqta qaỹe'en, nache qaỹalauat ayemaye. ₆Huaña, nache aỹem sacoosop so lo'ocỹaxac, nache ñipilliguiñi, nache naua laỹelolqa asomaye samaxa 'enauac nam 'alhuapi maye netaña na Israel le'ecpi yaqto' 'enauac ne'ena Israel da qaỹaỹaten de'era nalaataxanaxac maye qaica ca 'ena'am da qataq ỹataqta qauem. ₇Qaq cha'aye 'enauac da qami' Israel le'ecpi, nache qami' pa'aỹaiguilo ca 'eetec ca qarhuennataxaqui qataq ca qarqataxaqui da sheeta.

₈Huaña, nache 'eeta'am ca 'oonolec shiỹaxaua, da 'enauac somayepi da nachaañi, nache 'enapec:

Da shenaqta qaica qome ca ỹe'eguelaxa ca lpe'l huo'otaq ca lma'. ₉Qomi' iuen da so'otaq ca alletaxac, yaqto' saỹatenaq negue't cam jecpi da iloquiaxan qome ye Gabaa. ₁₀Qaq ne'ena maiche nhuo' le'ecpi ỹaconeua'alo qome caua diez maye chegoqraigui nam cien, qaq nachecaua qome ca pa'aỹa'agueta da laỹona't ca nallec da yaqto' aloq na alleppi. Qaq na laỹepi qalaxaye 'enauac qome da nqo'ona ye Gabaa da ỹe'eguelaxateguet da nleuaxa maye qaica ca 'ena'am qataq ỹataqta qauem maye ỹo'otec na Israel le'ecpi.

₁₁Nache 'enauac so Israel le'ecpi huaxaỹa't, nache 'eeta'am ca 'oonolec shiỹaxaua, da yaqto' iloquiaxan se'eso huaqta'a't nỹecpi. ₁₂Nache ỹauo'o so lamaxashecpi da ỹamaxa 'enauac so netañalo so maiche nhuo' le'ecpi maye chegoxoguetpi so Benjamín, da yaqto' inat, 'eeta':

¿Ta'ainco' da ỹo'ot de'era nalaataxanaxac soua chegoxoiguilo da qoñiita? ₁₃Ña qomi' qaỹa'añima qome caua 'etaxaloxoiqa maye lma' ne'ena Gabaa, da yaqto' salauata'q nache sapalaxataq de'era qauem maye ỹo'otec na Israel le'ecpi.

Qalaxaye so chegoxoguetpi so Benjamín saishet co'ollaxa da ỹalaxaguet so lqaỹañecpi Israel le'ecpi. ₁₄Nachaqrata da 'enauac som netañalo som chegoxoguetpi so Benjamín jec da laỹona't huaña ye Gabaa, da yaqto' delogui' so laỹepi Israel le'ecpi. ₁₅Nache so alleppi maye chegaqa'a so huaqta'a't nỹecpi maye huaigui ye na'alhua so chegoxoguetpi so Benjamín ivi' veintiséis mil som ỹalleppi maye ỹataqta na'atchiguiñi na lo'ogoxonaxat, qalaxaye sa qanaloqneuo so setecientos alleppi nca'aguishecpi maye chegaqa'a ye Gabaa. ₁₆Qaq 'enauac se'eso ỹalleppi, ỹalectaigui so setecientos 'emaqpi maye ỹaỹaten da do'ogoxona na npocnaxanaxat. Qaq somayepi da ira'a na coma' da ipoquen ca 'oonolec qoue, qalaq ỹataqta saishet da npe'en. ₁₇Qaq so laỹepi Israel le'ecpi nataqa'en laỹona't co'ollaxa so cuatrocientos mil alleppi maye na'atchiguiñi na lo'ogoxonaxat som nache 'eetai' da alaataxaicpi.

₁₈Qaq so Israel le'ecpi nqo'ona co'ollaxa ye Betel, yem huaña da inat Ñim Lo'onatac 'Enauacna, 'eeta':

¿Chaq negue't ca hua'auñi da iloquiaxan na maiche nhuo' le'ecpi maye chegoxoguet so Benjamín?

Nache Ñim Nataxala' 'enapeco':

Qomye hua'auñi nam Judá le'ecpi.

₁₉Qaq so nte'etom nache so Israel le'ecpi nqo'ona ye saqaỹapeque ye Gabaa, nache ỹa'ayiñi so lpe'lpi. ₂₀Nache huaña yemaye da naloguiñi da yaqto' delogui' so chegoxoguetpi so Benjamín maye naña ye Gabaa. ₂₁Qalaxaye so maiche nhuo' le'ecpi maye chegoxoguetpi so Benjamín inoxoneuga so pa'auec se'eso huaqta'a't nỹecpi ye Gabaa, nache se'eso na'a'q ỹalauat so veintidós mil so Israel le'ecpi. ₂₂Qalaxaye so Israel le'ecpi saishet co'ollaxa da leuapigui ye lauel, nacherata da naloguiñi da yaqto' nalat qataq ipacchiguiña som hua'auchiguiñi co'ollaxa da huetaña da nalattac. ₂₃Cha'aye so Israel le'ecpi hua'auñi co'ollaxa nỹeeto'ot Ñim Nataxala', qataq inat da qaltaq delogui' peta'a so maiche lqaỹañecpi maye chegoxoguetpi so Benjamín. Nache Ñim Nataxala' 'enapega somayepi da naỹamaxat da qaltaq delogui' somayepi. ₂₄Qaq ỹoqo'oye so lỹa na'a'q nache so Israel le'ecpi qaltaq delogui' so lqaỹañecpi maye chegoxoguetpi so Benjamín. ₂₅Qalaxaye somayepi ỹoltaq inoxoneuga so pa'auec ye Gabaa da delogui' somayepi, nache qaltaq ỹalauat so dieciocho mil nalleppi so Israel le'ecpi. ₂₆Nache 'enauac so Israel le'ecpi qataq so nalleppi ỹoltaq ỹe'eguelaxa ye Betel, da qaltaq nỹeeto'ot Ñim Nataxala', nache imauec se'eso na'a'q da nqouaqchet somayepi, qataq ỹanot Ñim Nataxala' aso lachetaqtaxanaqte qaỹavigaxatta, qataq aso lachetaqtaxanaqte maye qanhuaachigui. ₂₇Huaña, nache inat Ñim Nataxala'. Qaq se'eso na'a'q, aso arca maye laỹe' so naỹamaxataxac Ñim Lo'onatac 'Enauacna netaña ye Betel. ₂₈Qaq so Finés, som llalec so Eleazar qataq laual so Aarón, nacheso som ilotague' asomaye. Nache qainat, qoỹeeta':

¿Peta'a qolaqto'ot da seloquiaxanaq ye qarqaỹañicpi maye chegoxoguetpi so Benjamín, qalqo' ñañaxanaxañi?

Nache Ñim Nataxala', 'enapeco':

Ỹoltaq qavi'iguelaqailec da qauloquiaxañi, cha'aye qonte' nache qami' sanema qome da qoroxoñiqui yemayepi.

₂₉Huaña nache so Israel le'ecpi huo'o co'ollaxa so nqañoxotoiguilo naua loiguiye ye Gabaa. ₃₀Qaq so laỹepi, nache jec se'eso lỹa na'a'q, nqo'ona da delogui' so chegoxoguetpi so Benjamín, nache naỹamaxaañi da yaqto' nalat co'ollaq ivita ye nalotta ye Gabaa, 'ena'am naqa'en soua hua'auchiyiñi na'axa'te lỹa't. ₃₁Qaq nataqa'en se'eso na'a'q, so chegoxoguetpi so Benjamín ỹoltaq tauga so pa'auec, so huaqta'a't nỹecpi nache ca'ateguet so Israel le'ecpi da yaqto' iloquiaxan. Nache somayepi ỹalauat so treinta Israel le'ecpi, huaña ye no'onaxa qataq soua nqa'aico maye taira'a ye Betel qataq Gabaa. ₃₂Nache som chegoxoguetpi so Benjamín ipi'itaxaatega da qaltaq loxonec somayepi da 'eeta'ama soua hua'auyiñi lỹa't na'axa'te, qalaxaye so Israel le'ecpi, ỹauectauga co'ollaxa som qoỹoqteua'a so huaqta'a't nỹecpi som mpa'aguenaxauapi da yaqto' ivittauga soua nqa'aico. ₃₃Huaña, nache 'enauac so Israel le'ecpi da nque'elaxatta da ca'ai so netañapi nache naloguiñi da deloqui huaña ye Baal Tamar, qataq so laỹepi maye nqañoxottañipi huetaugalo naua loiguiye ye Gabaa, ₃₄nache nqo'oneua'a da iloquiaxan se'eso huaqta'a't nỹecpi. Qaq ivi' diez mil so ỹataqta alaataxaicpi Israel le'ecpi maye iloquiaxan co'ollaxa ye Gabaa. Qaq se'eso loquiaxac ỹataqta lta'araic, qaq so chegoxoguetpi so Benjamín sa ỹaỹaten co'ollaxa da mashe yaqta'a da qanauec. ₃₅Qaq se'eso na'a'q Ñim Nataxala' ỹanem so Israel le'ecpi da nauec so chegoxoguetpi so Benjamín, nache somayepi ỹalauat so veinticinco mil cien som nalleppi som chegoxoguetpi so Benjamín. ₃₆Huaña co'ollaxa nache so maiche nalamaxat nhuo' le'ecpi maye chegoxoguetpi so Benjamín, nanoma da so Israel le'ecpi mashe loxonec somayepi.

Cha'aye so Israel le'ecpi 'eeta'am co'ollaxa da dataueeguesop somayepi, qalaxaye nache queto'ot da nalattac, cha'aye ỹaỹaten da so ltauapi maye nqañoxottañi taua'a da iloquiaxan som hueta'a ye Gabaa. ₃₇Nache somayepi ique'elaxatta da iloquiaxan so hueta'a ye Gabaa, irolec na ỹeelonec da ỹalauat 'enauac som netaña yemaye. ₃₈Qaq se'eso nqañoxottañipi co'ollaxa, mashe naỹamaxate' so laỹepi, nache da mashe loxonec so netaña ye Gabaa, nache huaỹoxoosheguem naqa'en ca lta'araic lmala'q ca norec da icoyeguen somayepi, ₃₉qaq so Israel le'ecpi maye 'eco' datauec, ila'a co'ollaxa so lmala'q nache ñe'eguelaxaguet da dataỹa'aguet da delogui' so chegoxoguetpi so Benjamín.

Qaq som chegoxoguetpi so Benjamín, ỹalauat so treinta Israel le'ecpi, nache ipi'itaxaatega da doxonaxan, 'eeta'am so hua'auñi loquiaxac. ₄₀Qalaxaye huaña co'ollaxa nache naỹoxoosheguem so lmala'q chegoqchiguiña se'eso huaqta'a't nỹecpi, nache so chegoxoguetpi so Benjamín co'ollaq nqoilec, nache so le'eraxa qataq so lmala'q se'eso huaqta'a't nỹecpi ỹataqta iviro'ot na piguem. ₄₁Huaña, nache so Israel le'ecpi dataỹa'aguet da iloquiaxan somayepi, nache so chegoxoguetpi so Benjamín co'ollaq ila'a da mashe ỹataqta qaica ca laỹamaqa' nache daqalvi. ₄₂Nache dataueeguesop so Israel le'ecpi, quetegue so nqa'aic maye taỹa'a ye toolec 'alhua, qalaxaye qaica ca llec da datauec, cha'aye som chegaqaua'a so huaqta'a't nỹecpi ỹa'axasoxooteguet somayepi, nache ỹalauat. ₄₃Nache so Israel le'ecpi ỹataqta qaica ca ldaqa' naqa'en so chegoxoguetpi so Benjamín, nache icaatac qataq ỹataqta nquigaxatta'a't, ỹachegoxotchiguiña ye Menuhá, nache iviraxatta'a ye pa'aỹa'ague da nala' lliguisheguem ye Gabaa. ₄₄Qaq 'era da 'eetec co'ollaq ileu so dieciocho mil alaataxaicpi maye nalleppi so chegoxoguet so Benjamín. ₄₅Qaq so laỹepi qalaq datauec, nache taigue da pa'aỹa'ague ye toolec 'alhua, dam pa'aỹa'ague añi coma' maye naña ye Rimón, qalaxaye so laỹepi cinco mil somayepi ileu, huangui so nqa'aicpi. Qaq so Israel le'ecpi nache quetot da icaatac somayepi, nache qaltaq ỹalauat so dos mil.

₄₆Qaq da ỹalega't so ileupi se'eso na'a'q, nache ivi' veinticinco mil som ỹataqta no'on nalleppi so chegoxoguetpi so Benjamín. ₄₇Qalaxaye seiscientos so datauec, taỹa ye toolec 'alhua, nache ivi' cuatro soua ca'agoxoiqa da hueta'a añi coma' maye naña ye Rimón. ₄₈Ime, nache so Israel le'ecpi qaltaq deloqui, nache irolec so ỹeelonec da ỹalauat 'enauac so no'onaiguipi so huaqta'a't nỹecpi maye lma'pi so chegoxoguetpi so Benjamín, nataqa'en ỹalauat 'enauac som na'atetpi qataq som natena'aguetpi, qataq ỹavigaxat 'enauac som huaqta'a't nỹecpi maye ỹotta'a't naua nañalo maye natenalecpi.