Aso Débora qataq so Barac loxonec ye Sísara
1Qaq co'ollaq mashe ileu so Aod, nache so Israel le'ecpi qaltaq ỹe'eguelaxalec da ỹo'ot nam ỹataqta sa ỹaỹamaxaren Ñim Nataxala'. 2Qaq ỹoqo'oye Ñim Nataxala' ỹaneguet somayepi da la'añaxac so Jabín, som nta'a Canaán le'ec maye ilotague' co'ollaxa so huaqta'a't nỹecpi ye Jazor. Qaq so lataxala' so nalleppi, somaye le'enaxat Sísara, somaye naña ye Jaroset Goyín. 3Huaña nache so Israel le'ecpi ỹataqta nachoxoreetacot co'ollaxa Ñim Nataxala' da yaqto' itauan, cha'aye so Jabín ivi' novecientos aso laigonapi lcat nalaataxaquipi, qaq mashe ivi' soua veinte vi'iye da ỹataqta sa iyacnapec so Israel le'ecpi.
4Qaq se'eso na'a'q so Israel le'ecpi huetoigui co'ollaxa da lataxalate aso na'aqtaxanaxana le'enaxat Débora, asom lhua so Lapidot. 5Qaq asomaye hueto'ot naxa aso chaic da nso'ootañi, maye ñichiguinguilo na laiñi yeua Ramá qataq ye Betel maye huetraigui ye 'alhuapi maye huaña ana qasoxonaxapi ye Efraín. Qaq so Israel le'ecpi nache nqo'ona naxa som nauattonatac da le'enaxat «Nchaic aso Débora», da yaqto' ỹaỹamaxaañi ca camachaqca nam ncotaxacpi somayepi.
6Qaq huo'o so na'a'q, nache aso Débora damaxasoxona so ỹale le'enaxat Barac, so llalec so Abinoán maye netaña co'ollaxa ye Cedes, ye lma' so maiche nhuo' le'ecpi maye chegoxoguetpi so Neftalí, nache 'enapega, 'eeta':
«Ñim Nataxala', maye Natamnaxala' na Israel le'ecpi, 'am 'enapega, 'eeta': 'Anqo'ona qome añi qasoxonaxa Tabor, nache 'alaỹona't ca diez mil ỹalleppi ye maiche nhuo' le'ecpi maye chegoxoguetpi so Neftalí qataq so Zabulón. 7Qaq Aỹem so'ot qome da ñi Sísara, maye lataxala' ye nalleppi ñi Jabín, nqo'ona so la'auaxac Cisón, nache nnaictague' ca nalleppi qataq aca laigonapi maye nalaataxaqui da yaqto' 'am iloquiaxan. Qalaxaye Ñimaye 'am ỹanem qome da 'oxonec.»
8Qalaxaye so Barac 'enapeco': «Aỹem ashec qom aỹem 'auca'ategue, qalaxaye da saishet da aỹem 'auca'ategue, nache saishet da ashec.»
9Nache aso Débora, 'enapeco': «Aja', 'am seca'ategue. Qalaxaye da ño'oxonnataguec de'era alaataxac, saishet qome da 'am talec, cha'aye Ñim Nataxala' ỹanem aca 'alo da loxonec ñi Sísara.»
Huaña nache aso Débora nnaicapegue' so Barac da nqo'oora ye Cedes. 10Huaña yemaye da so Barac laỹona't na maiche nhuo' le'ecpi maye chegoxoguetpi so Zabulón qataq so Neftalí, nache ivi' diez mil so ỹalleppi som ca'ategue somaye. Qaq aso Débora, nache nnaictague' somaye.
11Qaq ye saqaỹapeque ye Cedes, maye naña aso encina ye Saanaim, nache netaña so lpe'l so Jéber, som queniita maye ca'ai so laỹepi queniitapi maye chegoxoguetpi so Hobab, som lacho' so Moisés. 12Nache so Sísara co'ollaq ỹaỹaten da so Barac mashe ivita ye pa'asheguem añi qasoxonaxa Tabor, 13nache somaye laỹona't aso novecientos laigonapi lcat alaataxaqui, qataq so nalleppi, nache nnaicapegue' so nalleppi da chegoqchiguiña ye Jaroset Goyín da nqo'ona so la'auaxac Cisón. 14Huaña nache aso Débora 'enapego' so Barac, 'eeta':
«¡Ñaq qoñisheguem, cha'aye nagui Ñim Nataxala', 'am ỹanem da 'oxonec ñi Sísara! Cha'aye Ñim Nataxala' mashe hua'auta'ague da taỹa'ague na 'analleppi.»
Nache so Barac huenoteeguesop añi qasoxonaxa Tabor, lỹatac so diez mil nalleppi, 15nache Ñim Nataxala' ỹo'ot da sa ntouen so nalleppi so Sísara, qataq som netanguipi aso nalaataxaqui laigonapi lcat, co'ollaq mashe nayeeta'a da delogui' so Barac, nache so Sísara huenoteeguesop aso laigona, nache piỹañi da datauec. 16Qalaxaye so Barac icaatac so alleppi qataq aso nalaataxaqui laigonapi so Sísara, nache iviraxatta'a ye Jaroset Goyín. Nache se'eso na'a'q ỹataqta qaica da huo'otaq 'oonolec ca no'onañi da nca'altauec som nalleppi so Sísara. Nache 'enauac ileu.
Aso 'alo maye ỹalauat so Sísara
17Nache so Sísara co'ollaq petañi da datauec, nache ivitta'a so lpe'l aso Yael, asom lhua so Jéber, som queniita, qaq cha'aye so Jabín, som nta'a ye Jazor, somaye nhuoteete' so lalamaxat lauo' le'ecpi so Jéber. 18Nache aso Yael ca'atta'aguet co'ollaxa so Sísara, nache 'enapego', 'eeta':
«'Aỹala 'am ỹataxala', 'aỹala, saishet da 'añe'etac.»
Nache so Sísara pa'aigui co'ollaxa so npe'l, nache asomaye ỹoxooñi, ỹapolec so npo', 19nache so Sísara dequiguiỹaique 'etaxat, cha'aye ỹataqta ỹaguec na laquip. Nache aso Yael ỹauangui aso lo'oc maye laỹe' na quetaq lche', nache nỹomaxangui, ime nache qaltaq ỹapolec somaye. 20Nache so Sísara, 'enapeco':
Qouetaviigui qome ñi ñegueuo ne'ena npe'l, qaq da huo'o ca nvireuo da 'am inat, da huo'o ca hueta'a ne'ena, nache qonapega da qaica ca hueta'a ne'ena.
21Qalaxaye so Sísara ye ỹataqta ỹaguec na lasamaxa, nache qaica ca nanomaxa co'ollaq do'oche. Huaña nache aso Yael ỹacona aso ntoqnaxanaqte qataq aso lashe naxa na npe'l, nache nchettaua'a so huetaña so Sísara, nache ira'a asomaye da ỹa'ayigui na lqaic laỹe, nache ỹataqta ivira'aguet naqa'en na 'alhua. Qaq 'era da 'eetec co'ollaq ileu so Sísara.
22Qaq so Barac co'ollaq ivireuo da nmittaique so Sísara, nache aso Yael ca'atta'aguet somaye, nache 'enapega, 'eeta':
'Aỹala, ñaq 'am sachaxana yem 'anmittaique.
Nache so Barac co'ollaq inoxonoigui so npe'l, nache ilalec so Sísara da huetaiya', mashe ileu, qataq aso npe'l lashe, nache ỹa'attagui na lqaic somaye.
23Qaq 'era da 'eetec se'eso na'a'q da Ñim Lo'onatac 'Enauacna ỹauaachigui naqa'en so Israel le'ecpi da qaica ca la'añaxac naqa'en so Jabín, maye lta'a so Canaán le'ecpi. 24Ỹoqo'oye da la'añaxac so Israel le'ecpi da dataỹa'aguet so Jabín ỹataqta nquictauec, nache ivitta'a da ilaxachigui somaye.
