Jueces 5

₂«Qavio'oxoyiñi Ñim Nataxala', cha'aye na Israel

ñaq huo'o nam ỹalleppi maye lhuotta da deloqui,

cha'aye ne'ena nhuo' le'ecpi ñaq huo'o nam ỹalleppi

maye lhuotta da ỹasat da qaiỹaxaasop da alaataxac.

₃¡Ñaq aỹem qana'axaỹaxañiỹa, qami' nta'alpi!

¡Ñaq aỹem qaua'aqaiỹa qami' nataxala'pi!

¡Aỹem so'onaxan, so'on da le'enaxat Ñim Nataxala'!

¡Aỹem sevicnaxaalec Ñim Nataxala' maye Natamnaxala' na Israel le'ecpi!

₄'Am Nataxala', co'ollaq qoca'ai añi qasoxonaxa ye Seír,

qataq co'ollaq qojec, 'auachegoqchiguiña ye na'alhuapi ye edomiitapi,

nache cholaxan ana 'alhua, qataq nỹen na piguem,

na lo'ocpi qalaq naañi naqa'en na auot.

₅Cholaxan añi qasoxonaxa co'ollaq nayeeta'a Ñim Nataxala',

ỹataqta cholaxan añi Sinaí co'ollaq nachaxana Ñim Natamnaxala' na Israel le'ecpi.

₆Soua na'axa'te maye huetaiguilo so Samgar, maye llalec so Anat,

qataq soua na'axa'te maye huetaiguilo aso Yael,

nache na queuoxoicpi ca'aisalo naua nqa'aico,

nache quegue na na'axasoxonatacpi maye namaqtapigui.

₇Qaq nam lauoreuapi nma'piolec na Israel,

qalaq mashe ỹataqta qaỹalata'a'tpi.

Qaq ỹoqo'oye huaña nache aỹem ñachaañi,

¡aỹem Débora, maye aỹem late'e na Israel le'ecpi!

₈Qaq na Israel le'ecpi lca'aua'a co'ollaxa so dalaxaicpi natamnaxala'pi,

nache so loquiaxac nviraua'a nam lasompi na huaqta'a't nỹecpi,

qalaxaye qaica ca 'oonolec so cuarenta mil nalleppi

da hueto'ot acam lpaqtaxanaqte qataq lataquiaxai.

₉Qaq da iquiyaqteỹaxac

hueta'aguet na lataxala'pi na Israel le'ecpi,

qataq nam shiỹaxauapi maye maiche ihuo' le'ecpi,

maye lhuotta co'ollaq qaiỹaxana da nalat.

¡Sho'oxorenaq Ñim Nataxala'!

₁₀¡Qaua'aqtaxañi qami',

maye qoñiitalec naxa ana 'ashena lapagaxaipi,

qataq qarauala'ai naxa na no'on no'oxonecpi,

nataqa'en qami', maye qauapiitañi naxa da qoquiitegue na nqa'aicpi!

₁₁¡Qana'axanñic da qarvilỹaxaqui,

yaqto' hua'aqa nam pa'aỹauec maye hueta'a

ana llimiaxañipi da nỹomaxaatac na na'atetpi,

qaua'aqtaxañim da 'eetec da loxonaxanaxac Ñim Nataxala',

qataq da loxonaxanaxac na alaataxaicpi Israel le'ecpi!

Qaq na alleppi maye lalamaxat Ñim Nataxala'

namayepi taỹaua'a ñi lasom na huaqta'a't nỹecpi.

₁₂¡Ña 'anachaañi Débora, ña 'anachaañi,

'anachaañi, nache 'auo'on ca 'aro'onec!

¡Qaq 'am Barac, maye 'am llalec so Abinoán,

'anachaañi, nache 'auauec na 'oxonecpi!

₁₃Huaña nache huenotec so Israel le'ecpi,

da yaqto' delogui' so 'amaqtaqaicpi,

qataq huenotec na nalleppi Ñim Nataxala' souaxat aỹem,

da yaqto' delogui' so alaataxaicpi shiỹaxauapi.

₁₄Qaq so chegoxoguetpi so Efraín, anaỹa co'ollaxa ye lma' na amaleciitapi,

qataq nca'atalec somayepi som nalleppi so Benjamín.

Qaq som chegoxoguetpi so Maquir qalaq huenotec som lataxala'pi,

qataq som chegoxoguetpi so Zabulón nataqa'en anac so lataxala'pi.

₁₅Nataqa'en nnaicapegue' aso Débora

so lataxala'pi na chegoxoguetpi so Isacar;

qataq somayepi huenotec co'ollaxa da yaqto' itauan so Barac huaña ye ca'amegue.

Qalaxaye so chegoxoguetpi so Rubén huo'o som 'amaqtaqaicpi ỹalleppi

maye nasatta da lquiyaqteỹaxac.

₁₆¿Qalaq ta'ainco' da huetaigui aso lalo qaguetapi

nache choche na'axaỹaxaatega da lỹaxanaxac som qagueta lo'opi?

¡Qataq som nalleppi so Rubén

huo'o so 'amaqtaqaicpi shiỹaxauapi maye 'iỹaqaic da lquiyaqteỹaxac!

₁₇Qaq so Galaad le'ecpi qalaq nache netaña ye le'ego so tala Jordán,

Qaq so Dan le'ecpi qalaq nache huaqta'ai' aso notaxaquipi

da qanayiguingui na 'etaxat,

qaq so Aser le'ecpi qalaq nache hueto'ot na loigue aso auaxai,

nache saishet da ca'ai so llegaxasompi aso nnotaxaquipi.

₁₈Qalaxaye so chegoxoguetpi so Zabulón qataq so Neftalí,

ỹataqta sa iren da nachaalataxac huaña ye qaỹoqotcheguemec alaataqa'.

₁₉Huaña nache so nta'alpi anac da naỹa ye Tanac,

naỹa ye huaqta'ai' ye 'etaxat ye Meguido,

qaq so nta'alpi cananeopi qalaq anac da deloqui,

qalaxaye sa ỹañoxot da ỹache ana anom plata huo'otaq da nsallaxa.

₂₀Cha'aye anac aso huaqaañipi,

chegoqtot na piguem da delogui' so Sísara,

₂₁nache so ỹataqta chaxaguet la'auaxac

som togoshaapec la'auaxac Cisón,

ỹa'auatec naqa'en somaye qataq so nalleppi.

¡'Am, qalaq 'aupataxa't ana lqoichiqui so 'añaxaicpi!

₂₂¡Ỹataqta ala'm naua nna'ache so caipi!

¡Ỹataqta nỹateetagui so qayaqaicpi caipi!

₂₃Qaq so nale piguem le'ec Ñim Nataxala' da'aqtaxan, 'eeta':

‹¡Talec qome ca nhuaxanaguec ye Meroz

qataq yem shiỹaxauapi maye lma' yemaye!›

Cha'aye saishet da ỹalaxaguet da lỹaxanaxac Ñim Nataxala',

qataq da itauan na 'añaxaicpi nalleppi Ñimaye.

₂₄¡Ỹataqta ỹo'oxoraq aso Yael

da ỹalectaigui so laỹepi 'alpi,

asom lhua so Jéber maye queniita!

¡Ỹataqta ỹo'oxoraq da ỹalectaigui so 'alpi

maye netaña se'eso npe'lpi!

₂₅Co'ollaq iỹaxanaique 'etaxat so Sísara,

nache aso Yael ỹanem co'ollaxa so quetaq lche'.

¡Qataq ỹanem so isaxa't quetaq lche',

ỹachangui aso nỹomaxaqui na 'amaqtaqaic!

₂₆Ime, nache ỹacona aso lashe so npe'l,

ỹauota'a na ne'emaq lhuaq

qaq na aloiguishec lhuaq nache nasoqta'a aso ntoqnaxanaqte,

nache ira'a so Sísara da iuaxangui na lqaic,

ỹapacaviiguilo naqa'en naua laỹel na lqaic.

₂₇Qaq huetañoto naua lchel aso Yael da ncocatapiguiñi so Sísara,

hueta'aguet na 'alhua co'ollaq ncocatapiguiñi da nqui'ic,

qaq nache huaña yemaye da ileu.

₂₈Qaq aso late'e so Sísara qalaq huo'o da lachetataic

nache ỹalletapoigui so lalloxoqui, nache 'enapec:

‹¿Chaq ta'ainco' da qaỹaloqteguet aca laigona ca ỹalec?

¿Chaq ta'ainco' da saishet da sa'axaỹa da l-lamaxa naua lasaxanna aca nalaataxaqui?›

₂₉Nache so sa nqalat 'alpi ỹasateguet asomaye,

qaq nataqa'en asomaye ñe'eguelaxattasheguem da na'aqtac, 'eeta':

₃₀‹Souaxai' ncolaxattapigui ca lhuotaxanaxatpi

maye laueguec huaigui se'eso alaataxac.

Nache ñi 'oonolec cam alaataxaicpi ỹacona

aca 'oonole huo'otaq dos ca qa'ampi maye nlatapi,

qaq ca Sísara qalaq souaxai' taỹot cam no'on da lo'oxoỹaxa'c npotoyec:

qataq 'oonolec huo'otaq dos caua no'oxonqa maye ỹotta'a't da lo'oxoỹaxac,

da yaqto' llo'oxoraxat na lqosot ca huegaxanaxaic.›

₃₁¡Qaq 'era da 'eetec qom 'aulaxachigui 'am Nataxala',

'enauac na 'ampa'aguenaxauapi.

Qalaxaye da la'añaxac nam 'am ỹauotec, qalaq 'ena'am na le'eraxa añi nala' da nnoxonec!»