Da nỹaxanaguec so Jeremías
1Dam la'aqtaxanaxac qataq nam ỹo'otpi co'ollaxa so Jeremías maye llalec so Hilcías. So Jeremías chegoxoguet so nhuo' le'ecpi, som ntaxaỹaxanaxanecpi maye netaña co'ollaxa ye huaqta'a't nỹecpi ye Anatot, yem 'alhua maye lalamaxat so Benjamín. 2Ñim Nataxala' detaxaỹot co'ollaxa so Jeremías, co'ollaq so Josías maye llalec so Amón, mashe ivi' trece vi'iye da lo'onataxanaxac da nta'a ye Judá. 3Qaq Ñim Nataxala', nataqa'en detaxaỹot somaye, co'ollaq so Joaquím maye llalec so Josías, do'onataxaatac da nta'a ye Judá, qataq ivitta'a da lo'onataxanaxac so Sedequías maye nataqa'en llalec so Josías, maye ivi' soua once vi'iye da nta'a ye Judá, damaye naigui da ivitta'a so ca'agoxoic cinco se'eso vi'i, co'ollaq so lma' ye Jerusalén noxonecpi nache qaỹauec.
Ñim Nataxala' iỹaxana so Jeremías
4Ñim Nataxala' aỹem da'aqtaxanem, 'eeta':
5«Co'ollaq saxanaxa da 'am sanem da 'arca'alaxa,
nache Aỹem mashe 'am lleca'aguishec,
qataq co'ollaq saxanaxa da 'auañiguiñi
nache mashe 'am seỹotauga da yaqto' 'am ỹa'aqtaxanaxanec,
da 'aua'aqtaxanem 'enauac nam ỹotta'a't shiỹaxauapi.»
6Nache aỹem sasat, sheeta':
«¡'Am Nataxala'! ¡Choxoraicolec aỹem ye ñaq aỹem nsoqolec,
qataq sasaỹaten da itaxaỹaxac!»
7Qalaxaye Ñim Nataxala' aỹem 'enapega, 'eeta':
«Saishet qome da qonapec da ñaq 'am nsoqolec.
Cha'aye 'am 'aigue qome cam 'am samaxague,
qataq 'aua'axat qome cam 'am samaxalec.
8Qaq saishet qome da huo'o ca 'aye'etega,
cha'aye Aỹem 'am soota'aguet qome da yaqto' 'am ñepaxattalec.
Qaq 'era da ỹa'aqtac Aỹem Nataxala'.»
9Qaq huaña nache Ñim Nataxala' ỹauota'a na lhuaq da ipoteua'a na aỹap, nache aỹem 'enapega, 'eeta':
10«Aỹem sanaigui na 'ap naua ỹa'aqtaqa.
Nagui 'am sanem da huo'o da qonec, da 'aulo'ogue
na nta'alpi qataq na ỹotta'a't shiỹaxauapi,
da yaqto' ishet da 'anqat qataq 'auamaxañi,
qataq da 'anlaxaañi qataq 'aulaxachigui,
qataq nataqa'en ishet da 'ano'oxoosheguem qataq 'aỹa'aañi.»
11Ñim Nataxala' aỹem inat, 'eeta':
«'Am Jeremías, ¿negue't dam 'aulota'a?»
«Nache aỹem sheeta', selota'a ara lcoue ana almendro.»
12«Nache Ñim Nataxala', 'enapec:
Aja', 'eesa da 'anasaxauec.
Cha'aye mashe Aỹem lhuotta da yaqto'
ipacchiguilo ñaqa'e'n naua ỹa'aqtaqa.»
13Nache Ñim Nataxala' qaltaq ỹe'eguelaxalec da aỹem inat, 'eeta':
«¿Negue't dam 'aulota'a? Nache aỹem sheeta':
Selota'a añi taxaqui nachamtac neta'ague sheu'
nache mashe yaqta'a da huecoregue da taguiñi.»
14Qaq huaña nache Ñim Nataxala' aỹem 'enapega, 'eeta':
«Chegoqtegue qome da sheu' da huecorec dam qauem
da talec 'enauac nam netalec ne'ena 'alhua.
15Aỹem Nataxala', ỹoqta 'eesa qome da seỹaxana
'enauac nam nta'alpi maye neta'ague da sheu'.
Qaq anac qome namayepi, nache ỹo'ot na lanataqa'pi
ỹanaña yem naloteuga ye ñegueuo na Jerusalén
qataq ye naloteuga na npaqtaxanaxatpi maye coleesop namaye
qataq yem naloteuga na huaqta'a't nỹecpi maye
ỹotta'a't naua nañalo na 'alhua Judá.
16Qaq 'era da nhuaxanaguec maye saneguet qome
nam 'etaxaloxoicpi maye aỹem ca'ai co'ollaxa,
maye ỹavigaxat naxa na lchenaxanaxat da ỹo'oxoreetac na chegaqauec
atamnaxala'pi maye namayepi maiche lo'onatacpi.
17Qaq 'am, 'anaỹamaxat qome.
Nache qojec da 'aua'aqtaxanem namayepi 'enauac nam 'am samaxalec.
Qaq saishet da 'aye'etega qome namayepi,
cha'aye da 'añi'i,
nache so'ot da 'aviloxol qom 'auataỹa'aguet namayepi.
18Aỹem, 'am sanem nagui da qoneta'am ca huaqta'a't nỹecpi,
maye qaỹapotaua'a qoneta'am aca nhuoqte maye lcat,
qataq qoneta'am ca mpaqtaxanaxat maye lo'oxonaxat na bronce,
da yaqto' 'auataỹa'aguet 'enauac na hueta'a ye 'alhua Judá.
Nam nta'alpi, nataxala'pi, ntaxaỹaxanaxanecpi
qataq 'enauac nam nhuo' le'ecpi maye hueta'a yemaye.
19Namayepi 'am delogui' qome, qalaxaye saishet qome da 'am loxonec,
cha'aye aỹem 'am soota'aguet qome da yaqto' 'am ñepaxattalec.
Qaq 'era da ỹa'aqtac Aỹem Nataxala'.»
