Da nachoxoc so Jeremías
1'Am Nataxala', dam 'Am ñecotaỹapegue',
qalaq 'Am saqỹet naxa da 'eesa cam qonapec,
qalaxaye aỹem sauotaique da 'am senat da ta'ainco' da huo'o nam laỹe lataxacpi.
¿Ta'ainco' da qaica ca iuena'a nam qauemaicpi?
Qataq ¿ta'ainco' da ỹe'emaqtac nam sa ỹalaq?
2'Am 'aỹa'aañi, nache namayepi ỹa'ayiñi na lpa'a'pi
qataq nquittasheguem da lañaxataxac qataq huo'o ana ala.
Da 'Am detaqtega qalaq 'eeta'am da 'Am saqaỹapeque,
qalaxaye da lquiyaqteỹaxac ỹataqta qaỹoqtaique naqa'en 'am.
3¿Qalaxaye 'am Nataxala', aỹem 'auauatton,
qataq aỹem 'aulotagui qataq 'auaỹaten dam iuennataxac da qoneta.
¡Ñaq 'auauec yi'iye shiỹaxauapi, 'eeta'am 'anqa'en aca qaguetapi
da qaỹauega ca nalaataqa',
'aua'an qome yaqto' taỹa'a cam na'a'q maye huaigui da qaỹalauat!
4¿Chaq laguio' qaq vi'iiguet da lqaxaỹaxa ana 'alhua,
qataq ana huoue maye huetalec na no'onaxa?
Na shiguiỹacpi qataq ana maỹopi mashe ileetac,
souaxat nam qauem maye ỹo'ottac nam netalec ne'ena 'alhua,
maye 'eetega da saishet da 'auauangui nam ỹo'ottac namayepi.
Da lasataxac Ñim Lo'onatac 'Enauacna
5«Da ỹaguec da 'anasamñi
da 'anqomittague' nam petañepi,
¿qaq cam 'eeteco' da 'aushet da 'anqomite'
na ỹalleppi maye netalec na caipi?
qataq da qonetalec ca 'alhua nalochiguiñi nache 'avi'imaqtac,
¿qaq cam qoneteco' da qoquetangui na nloche ye Jordán?
6Ye ivira'a nam 'aralamaxat 'arqaỹañecpi
qataq nam 'arhuo' le'ecpi, 'am dataỹa'aguet,
nache 'am ỹataxaatec da 'am isheueetac.
Qaq saishet qome da 'aua'amaqten namayepi
na'aictaxa da no'onaxa't naua la'aqtaqa da 'am detaqtacot.»
Da laquicoxo Ñim Nataxala' souaxat na lalamaxat nhuo' le'ecpi
7«Aỹem sheca'ai co'ollaxa na ỹalamaxat nhuo' le'ecpi,
qataq so'otan nam ỹalamaxat co'ollaxa.
Nache saneguet da lhuaqỹaxac nam mpa'aguenaxauapi,
nam nhuo' le'ecpi maye ỹauotaxat co'ollaxa.
8Ne'ena nhuo' le'ecpi maye ỹalamaxat co'ollaxa,
nagui qalaq 'eeta'am ca llon aviaq le'ec, ỹataqta aỹem desoqto'ot,
qaq ỹoqo'oye saỹemec namayepi.
9Na ỹalamaxat nhuo' le'ecpi, 'eeta'am ca maỹo
maye ỹataqta 'onaxaic da lo'oxoỹaxac na laue,
cam saiuoten naxa na laỹepi maỹopi.
¡Ñaq qauanaqui qami' shiguiỹacpi maye qami' qauemaicpi
qalaỹoñiỹa't qome da qauo'oche ca qarquia'axaqui!
10Qalota na nataxala'pi na ilaxachigui na ỹanaxanaqa' uva lma'pi
qataq nlaxaañi na ỹalamaxat no'onaxapi.
Nache ỹo'ot da toolec naqa'en nam 'alhua maye ỹataqta ỹauotaxat.
11Ỹataqta nlachiguiñi qataq toolec naqa'en,
qaq aỹem selota'a da daquicota.
'Enauac ne'ena 'alhua ỹataqta toolec qalaxaye qaica ca qochetega namaye.
12Qaq 'enauac ana lcomaraxalatepi yem toolec 'alhua,
da naỹa da nalec na qauemaicpi shiỹaxauapi,
qalaxaye Aỹem Nataxala', huo'o na ỹainec maye ivira'alo
qome naua loga'te ana 'alhua da ilaxachigui,
qaq huaña nache qaica qome ca hueto'ot ca nlagaxayec.
13Namayepi ỹaañi na trigo, qalaxaye da deqataxan nache nqat ana ỹaxat;
'enauac da lo'onatacpi da qaica ca naigui.
Da lqataxanaxac qalaq qaica ca naigui, souaxat dam 'ettaigui ỹayeloxo.»
Da 'eetec qome na lauoreuapi na Israel le'ecpi
14Ñim Nataxala' 'eeta' da la'aqtac: «'Enauac na qauemaicpi lauoreuapi na Israel le'ecpi maye ilaxachigui nam 'alhua maye Ñim Nataxala' ỹanem da lalamaxat na nhuo' Israel le'ecpi, Aỹem ñeqateeguesop qome namayepi na netalec 'alhuapi, qataq ñeqateeguesop namayepi nam chegoxoguet so Judá. 15Qalaxaye qom mashe ime da ñeqateua'a namayepi, nache qaltaq she'eguelaxa da sechoxoren, nache she'eguelaxata qome nam lalamaxatpi lma'pi qataq na na'alhua. 16Cha'aye 'eesa da namayepi ỹapaxaguenec co'ollaxa na ỹalamaxat nhuo' le'ecpi da ỹanot da la'aqtac so Baal, qalaxaye nagui ishet da ỹalegoigui na ỹalamaxat nhuo' le'ecpi, da ỹoqta 'eesa da ỹaconeguet da la'amqaanataxanaxac na ỹalamaxat nhuo' le'ecpi, qataq da ỹan ca la'aqtac da ỹachegoxotchigui da ỹe'enaxat da, 'eeta': ‹Nca'altauec Ñim Nataxala'.› 17Qalaxaye cam shiỹaxauapi maye Aỹem saỹalaxaguet qalaq ñapogosheguem qome nache selaxachigui. Qaq 'era da ỹa'aqtac Aỹem Nataxala'.»
