Qaỹa'axata'a ca nhuaxanaguec na Judá le'ecpi
1Ñim Nataxala' aỹem 'enapega, 'eeta': «Qaq na'aictaxa da aỹem nachaateua'alo nagui ca Moisés qataq ca Samuel, qalaxaye Aỹem saishet da sechoxoreetac qome ne'ena nhuo' le'ecpi. Qonapega qome namayepi da Aỹem ca'ai, 'enauac qome da jec. 2Qaq da huo'otaq 'am inat cam hua'ague ca taigue, nache 'aua'aqtaxanem da ỹa'aqtac, qoneta':
‹Nam taỹa'a da ilem ca napiina, nache ilem qome ca napiina,
qaq cam taỹa'a da ileuaigui ca alaataxac qalaq ileuaigui qome ca alaataxac,
qaq cam taỹa'a da ilem na lqouaxa, qaq ilem qome na lqouaxa,
qaq cam taỹa'a da qaỹauega ca ỹaqa'a 'alhua qalaq qaỹauec qome.›
3Aỹem ñamaxa qome namayepi caua cuatro ỹotta'a't nhuaxanagueco: Qaỹalauat qome huaigui ca alaataxac qaq na pioxoppi ỹauogoleetac qome namayepi qataq na maỹopi maye chec na lapat qalaq chec qome namayepi qataq na huauec shiguiỹacpi chec qome namayepi. Qaq 'era da ỹa'aqtac Aỹem Nataxala' 4Qaq so'otec qome na ỹotta'a't shiỹaxauapi maye netalec ana 'alhua da huo'o da lqaigaxa dam so'otec namayepi, souaxat dam ỹo'ot so nta'a ye Judá, Manasés som llalec so Ezequías maye huaña ye Jerusalén.
5¿Negue't cam 'am ichoxoren qome 'am Jerusalén?
¿Negue't ca daquico qome souaxat da qoneta?
¿Negue't qome ca 'am huapegue' da 'am nataren?
6'Am mashe Aỹem qoca'ai qataq aỹem 'auro'oguet na 'al-laq.
Qaq 'era da ỹa'aqtac Aỹem Nataxala'.
Cha'aye Aỹem, mashe 'am ñasamiisop da 'am ñeualaxaueetague',
nache ñauaxaỹaxaasheguem na ihuaq da 'am seuaxan qataq 'am selaxachigui.
7Selagaxattac na 'arhuo' le'ecpi, 'eeta'am ñaqa'en ca 'auaqpi ltoxoic
ñeqateeguesop na huaqta'a't nỹecpi maye hueta'a ne'ena 'alhua,
nache qaica ñaqa'en ca llalaqpi na ỹalamaxat nhuo' le'ecpi,
namayepi selaxachigui, souaxat da saishet da ỹalat da qauem lataxac.
8Qataq so'ot qome da qalota ana pa'aipi
napacalec na delec maye hueto'ot na loigue aso auaxai.
Qataq huaigui ñaqa'en ca na'a'q laiñi da talec ca nleuaxa
ana nate'elpi qataq na llalaqpi nsoxoppi,
qataq nque'elaxatta qome da talec ca laquicoxo qataq ca lcolanaxa.
9Anam nate'elpi maye qalota na llalaqpi decopchetac qome,
nache qaica ca la'añaxac, qataq huo'o da la'aloxo
qataq qaica ca 'enec qanqa'en,
ye yo'oqchiguiñi qalaq ỹe'eguelaxa da napalñi.
Qaq da huo'otaq huo'o ca nca'altauec,
nache so'otec da ca mpa'aguenaxaua ỹalauat camaye.
Qaq 'era da ỹa'aqtac, Aỹem Nataxala'.»
Da la'alaxac so na'aqtaxanaxanec
10¡Choxoraicolec aỹem, 'am ỹate'e maye aỹem 'auco'oic co'ollaxa
da yaqto' ñecotatague' qataq seloctague' 'enauac na shiỹaxauapi ana 'alhua!
Qaica co'ollaxa ca sa'aalaxanaxanec aca aỹom
qataq qaica ca aỹem ỹa'aalaxanaxanec aca alom,
qalaxaye 'enauac na shiỹaxauapi aỹem ỹasaxalec da qauem.
11Qaq ñaq ipacchigui qome nam qauem la'aqtacpi namayepi,
da 'Am Nataxala' saishet da ỹaỹamaqchiguiñi
da ỹo'onataxanaxac da 'am so'onataxaatacot,
qataq da saishet da 'am seỹaxaatacot co'ollaxa da 'anqouaguec
nam ñepa'aguenaxauapi, co'ollaq huaigui da qauem qataq laquicoxo.
Ñim Nataxala' ỹa'axata'a da nhuaxanaguec na Israel le'ecpi
12«¿Negue't ca ishet da ỹacagaxat so lcat
maye chegaqa'ague da sheu' qataq som lcat bronce?
13Qaq souaxat nam 'arasouaxashetpi, 'am Israel,
nache 'am saneguet qome na 'ampa'aguenaxauapi,
qataq da 'arsallaxa qataq nam 'ogoxoshetpi
qataq 'enauac na hueta'a na 'ana'alhua,
da yaqto' choche qaỹacoolec da qaỹache.
14Aỹem so'ot qome da 'am l-latac na 'ampa'aguenaxauapi
da huaña cam 'alhua maye saishet da 'auauana co'ollaxa,
cha'aye da ỹayeloxo mashe 'eroigui 'eeta'am ca norec da 'am ỹavigaxatta qome.»
So na'aqtaxanaxanec nachoxonnot Ñim Nataxala'
15'Am Nataxala', 'Am maye 'auaỹaten 'enauac de'era,
¡ñaq aỹem 'auennata'a qome nache 'auanac da aỹem 'autauan!
¡Ñaq 'auauo'o qome ca nhuaxanaguec nam aỹem icaatacpi!
saishet qome da 'auchoxoreetac namayepi, yaqto' saishet da seleu,
ña 'aulogui da souaxat 'am, nache ña'añaxatta'aguet na ñesheunaguecpi.
16Co'ollaq aỹem 'autaqtacot, nache aỹem seuoxoorañi naua 'ara'aqtaqa,
naamaye nachenaua naua ỹo'o't da ntonaxac qataq da lamaicỹaxac añi iquiyaqte,
cha'aye aỹem 'am ña'attaua'a, 'Am Nataxala' qataq Ñatamnaxala' maye Qaica ca 'Auqalanapec.
17Aỹem sevitta'aguet co'ollaxa da salecta'aguet
nam nda'a't da iuennatega da la'ashaxac,
nache chegoqchiguiña co'ollaq aỹem 'auacona da aỹem 'aralamaxat,
nache aỹem 'oonolec da huo'o ye soota'a,
cha'aye aỹem 'anlaxatchigui da 'arayeloxo.
18¿Ta'ainco' da saishet da vi'iiguet da ñequi'ic?
¿Ta'ainco' da ique'emaxa da qaica ca lata', qataq saisheteguet ca lata'?
Nache 'Am 'avi'eguelaxa da qoneta'am ca lqashelgaxa
na 'alhua maye 'eeta'am ca lqashelgaxa ca 'etaxat.
Dam lasataxac Ñim Nataxala'
19Qaq huaña nache Ñim Nataxala' aỹem ỹasateguet, 'eeta':
«Da Aỹem 'añe'eguelaxa, nache qaltaq 'am saconeguet,
nache ishet da Aỹem 'auo'onataxanot.
Da 'avita'aguet nam saq 'en ntaxaỹaxacpi,
nache ndotec da 'aua'axat nam ntaxaỹaxacpi maye no'on na naigui,
qaq nache 'am qome da 'aua'axattac Aỹem.
Qaq namayepi nachena nam iuen da 'am ỹe'eguelaxaguet qome,
qaq saishet da nache 'am da 'avi'eguelaxaguet namayepi
20Aỹem so'ot qome da qoneta'am ca mpaqtaxanaxat bronce
maye huo'o da lqalaic da qanlaxaañi da 'aualectaigui ne'ena nhuo' le'ecpi.
'Am qailoquiaxan qome qalaq saishet da 'am noxonec,
cha'aye Aỹem 'am soota'aguet qome da 'am ñepaxattalec
qataq 'am ñeca'alaxatec. Qaq 'era da ỹa'aqtac, Aỹem Nataxala'.
21Aỹem 'am sesoueeguesop qome da la'añaxac na qauemaicpi,
¡qataq 'am ñeca'alaxateeguesop da la'añaxac nam qaica ca ireetac!»
