So lta'araic lqaxaỹaxa
1Qaq souaxat so lta'araic lqaxaỹaxa, nache Ñim Nataxala' detaxaỹot so Jeremías nache 'enapega, 'eeta':
2«Ye Judá nỹeetac souaxat da laquicoxo,
na huaqta'a't nỹecpi maye ỹotta'a't naua nañalo qalaq qaica ca la'añaxac,
na shiỹaxauapi qalaq huetaiya' hueta'aguet na 'alhua.
Ye Jerusalén qalaq qaỹa'atega da la'alaxac souaxat da nqui'ic.
3Na sallaxanecpi qalaq ỹamaq naxa na lamaxashecpi da ilaique 'etaxat,
nache namayepi taỹa ana laỹe'pi na 'etaxat, qalaxaye saỹanata,
nache qui'itchiguilo naxa naua laco'oña da ỹe'eguelaq,
nache saỹaỹaten ca 'eetec qataq nlaqchigui da la'aloxo,
qataq ỹapoleguete naua lqaigo.
4Na shiỹaxauapi maye huetauga na no'onaxa qalaq huo'o da lhuogoxo,
nache ỹapotaleguete naua lqaigo, cha'aye qaica ca auot
qataq deqaqta na 'alhua.
5Qaq vira'a ana chegaxangopi maye huetauga na no'onaxa,
no'onaxatchigui na llalaqpi maye cheta'ague da ñiguiñi,
cha'aye qaica ca aloq 'auaqpi.
6Na huauecpi 'ashenapi qalaq nachaara't
huetalec ana toolec lcomaraxalatepi, nashettac,
'eeta'am na qa'alaqpi, qaq da lmeenaxanaxac
qalaq mashe 'omalec, cha'aye qaica ca aloq 'auaqpi.»
So na'aqtaxanaxanec nachoxonnot Ñim Nataxala'
7¡'Am Nataxala', na'aictaxa na qarasouaxashetpi da qomi' ỹa'aloqche't,
qaq no'on da huo'o ca 'auo'ot souaxat da llo'oxoyec da 'are'enaxat!
Qalota naxa da saishet da 'am salaxasoxoguet,
qaq huo'o da qarasouaxashet 'am hueto'ot.
8'Am maye 'am ỹacheto'ot naxa da naquitaxac,
qataq 'am lca'alaxaqui na israel le'ecpi da huaigui da lqalaic,
¿ta'ainco' da 'avi'inaxat da lataxac cam ỹaqa'a ca chegaqa'ague
da qoueta'a ne'ena 'alhua, qoneta'am ca queuoxoic
da 'oonolec pe da hueta'a ca lanataqa'?
9¿Ta'ainco' da 'aue'enaxat ca ỹale da maye saishet da ỹaỹaten ca 'eetec,
qataq qoneta'am ca alaataxaic maye saishet da detaunaxan?
Qalaxaye, 'Am Nataxala', qouetangui na laiñi da shenaqta,
'enauac da qaỹaỹaten da qomi' 'aralamqa'ate,
¡Qaq saishet qome da qomi' 'auala't!
10Ñim Nataxala', 'eeta' da la'aqtac da detaxaỹa na nhuo' Israel le'ecpi: «Ne'ena nhuo' le'ecpi, ỹataqta lauela da chochaq queta. Qaq ỹoqo'oye sa saỹamaxaren da lataxac namayepi. Qaq nagui, nache seuennate na lasouaxashetpi namayepi, qataq sauo'o ca nhuaxanaguec souaxat namayepi.» 11Qaq huaña nache Ñim Nataxala' aỹem 'enapega, 'eeta': «Saishet qome da Aỹem 'auỹaxanot da 'auỹaxanaique ca laỹamaxa ne'ena nhuo' le'ecpi. 12Cha'aye na'aictaxa da ỹaguec ca nqouaqchetaxac, qalaxaye Aỹem saishet da sa'axaỹa qome ca nachoxonnaxac, qataq na'aictaxa da qalota ana ndouopi lachetaqtaxanaqtepi maye qaỹavigaxatta qataq ana ala ana lañiguishepi, qalaxaye saishet qome da saỹamaxaren da selogui. Aỹem selaxachigui qome namayepi serolec ca alaataxac, nqouaxa, qataq ca napiina.» 13Qaq aỹem sasateguet, sheeta': «'Am Nataxala', nam na'aqtaxanaxanecpi da'aqtaxaateguem na nhuo' le'ecpi da qaica qome ca alaataxac qataq ca nqouaxa, qataq da 'am 'aỹa'anem qome namayepi ca chochaq tatec nlagaxayec da hueta'a ne'ena 'alhua.»
14Qaq huaña nache Ñim Nataxala' aỹem ỹasateguet, 'eeta': «De'era ỹa'axattac na nam na'aqtaxanaxanecpi da 'eetega ỹachegoxotchigui da ỹe'enaxat, damaye choche latenataxanaxac. Aỹem saishet da samaq namayepi, qataq saishet co'ollaxa da sanem ca ỹamaxasoxonaxac qataq saishet da setaqtague'. De'era lauanaqchec saq 'en, nloxoc maye natenataxanaxac, maiche ỹo'ot dam ipettega da 'eetec. Qaq 'era dam ỹa'axatteguec nam na'aqtaxanaxanecpi.» 15Qaq ỹoqo'oye Aỹem Nataxala', 'eeta' da ỹa'aqtac: «Ne'ena na'aqtaxanaxanecpi maye 'eetega ỹa'axattac da ỹe'enaxat, qalaxaye saishet da samaq namayepi, qataq 'eetega da saishet da huo'o ca alaataxac qataq ca nqouaxa ne'ena 'alhua: ne'ena na'aqtaxanaxanecpi ileuaigui qome ca alaataxac qataq ca nqouaxa. 16Qaq na shiỹaxauapi maye ỹa'axattapeguem de'era, nataqa'en ileuaigui qome ca alaataxac qataq ca nqouaxa, l-llañe' ana lhuapi, qataq na llalaqpi ỹalleppi qataq ana llalepi. Nache da lo'ocỹaxac qaỹasaxauga qome na nqa'aicpi ye Jerusalén, nache qaica qome ca ilayiñi. Qaq 'era da 'eetec da isheeten ñaqa'en nam qauem maye ỹo'otpi. 17'Aua'aqtaxanem qome na nhuo' le'ecpi de'era, 'eeta':
‹Naayiñi qome naua ỹache' chegaqaiguilo naua ỹa'ai'te,
nache saishet da vi'iigueta ye na'a'q qataq ye pe,
souaxat dam chaqaic qataq qauem maye huaigui na ihuo' le'ecpi,
qataq dam lta'araic lque'emaxa.
18Da sauga na no'onaxa, nache sela'a na leuaxaicpi,
nam leuaxaicpi maye huaigui so alaataxac,
qaq da saigui na huaqta'a't nỹecpi, nache sela'a
na shiỹaxauapi maye huotaique da ilem na lqouaxa,
qaq na na'aqtaxanaxanecpi qataq na ntaxaỹaxanaxanecpi
qalaq taỹa ca ỹaqa'a 'alhua maye saishet da qaỹauana.›»
So na'aqtaxanaxanec iỹaxanot Ñim Nataxala'
19'Am Nataxala', ¿ỹoqta imauec peta'a da sa 'auaconeguet nam hueta'a Judá?
¿Peta'a mashe 'anasamiisop na huaqta'a't nỹecpi na Sión?
¿Ta'ainco' ye qomi' 'auque'emaqchet, nache qaica ca qarata' 'anqa'en?
Qomi' seuataqtaique ca qarlagaxayec,
qalaxaye saishet da saconaxaguet ca no'on.
Qataq seuataqtaique da qomi' no'oite',
qalaxaye nacherata da qomi' hueto'oto da qarcolanaxa.
20'Am nataxala', qomi' saỹaanaqta dam qauem maye so'otaq
qataq nam lasouaxashetpi som hua'au qarta'alpi,
qaq huo'o da qarasouaxashet 'am hueto'ot.
21¡Qaq souaxat da la'amaqchec da 'are'enaxat,
nache saishet qome da qomi' sa 'auaconegueta,
saishet qome da 'auo'otan nam huaqta'a't nỹecpi
maye netaña añim huo'o da llo'oxoyec 'anso'onaxaqui!
¡Ñaq 'auennata'a qome so 'anaỹamaxataxac
co'ollaq qomi' 'anaỹamaxateto, qaq no'on da 'aupaqueelec qome somaye!
22¿Qaq peta'a huo'o ne'ena saq 'en atamnaxala'pi
ca ishet da ỹo'ot da huo'o na auot?
Qataq ¿peta'a ishet na piguem da maichena da namaq aca auot?
¡'A'i saishet, 'Am Nataxala' qataq Qanatamnaxala'!
'Am maye ishet da 'anamaq namaye, 'Am maye 'auo'ot 'enauac nam huo'opi,
¡Qaq ỹoqo'oye qomi', 'Am seuataqta'aguet!
