Qaỹa'axata'a da nhuaxanaguec ye Jerusalén
1So nta'a Sedequías ỹamaq so Pasjur maye llalec so Malquías, qataq so ntaxaỹaxanaxanec Sofonías maye llalec so Maseías da nqo'onalo so Jeremías da 'enapega, 'eeta': 2«Ña qomi' 'anqouagueque da 'aunat Ñim Nataxala' da qomi' 'aunataxaaleguete, cha'aye ñi Nabucodonosor maye nta'a ye Babilonia, mashe huotaique da qomi' iloquiaxa'n. Shapegueto' da Ñim Nataxala' ỹo'ot ca saqaỹauanapega da yaqto' ỹo'ot da ñi Nabucodonosor qomi' ca'aisalo.» Qaq huaña nache Ñim Nataxala' 'enapega so Jeremías, 3qaq somaye nache da'aqtaxanema soua lamaxa'she so Sedequías, 'eeta': «Qaua'aqtaxañim qome ca Sedequías 4da Ñim Nataxala' maye Natamnaxala' na israel le'ecpi, 'enapec: ‹Aỹem so'ot qome da qoshe na 'analleppi maye deloctague' ñi nta'a ye Babilonia qataq nam caldeopi maye pa'ataueegue da laỹe na mpaqtaxanaxat da qami' coleesopa. Qataq so'ot na 'analleppi da ỹe'eguenoigui qome na huaqta'a't nỹecpi. 5Qaq Nachaỹem da qami' seloguito qome, qami' seroleguete da lta'araic ỹa'añaxac, qataq dam 'eroigui ỹalemataic qataq da lta'araic ỹayeloxo. 6Nache salauat qome 'enauac na shiỹaxauapi maye hueta'a ne'ena huaqta'a't nỹecpi, na ỹalleppi qataq na shiguiỹacpi ilem qome ca lta'araic napiina. 7Ime, nache ñi Sedequías maye nta'a ye Judá saneguet qome da lhuaqỹaxac ñi Nabucodonosor, qataq saneguet na laỹepi mpa'aguenaxauapi maye qauemaicpi, nache l-llañe' na lataxala'pi qataq na nalleppi, qataq na shiỹaxauapi maye lca'alaxaicpi ne'ena huaqta'a't nỹecpi qom ime que'eca napiina qataq ca alaataxac qataq ca nqouaxa. Aỹem so'otec qome da saishet da qaichoxonnai' da qaỹalauat qairolec ca ỹeelonec. Qaq 'era da ỹa'aqtac Aỹem Nataxala'. 8Qaq nataqa'en 'aua'aqtaxanem qome ne'ena nhuo' le'ecpi da Aỹem Nataxala', 'eeta' da ỹa'aqtac: Sanem namayepi da lca'aguilo naua dos nqa'aico, da nca'alaxa huo'otaq da nleuaxa. 9Qaq cam no'onaña ne'ena huaqta'a't nỹecpi, qalaq ileuaigui qome ca alaataxac huo'otaq ca nqouaxa huo'otaq ca napiina. Qaq cam nañaneguet na caldeopi maye coleesop nagui na huaqta'a't nỹecpi, camaye saishet qome da ileu, nacherata da nca'alec qome. 10Cha'aye Aỹem maiche iuennataxa da talec ñaqa'en ca qauem ne'ena huaqta'a't nỹecpi qaq saishet da talec ca 'onaxaic. Aỹem saneguet qome da lhuaqỹaxac ñi nta'a ye Babilonia, qaq ñimaye ỹavigaxat qome. Qaq 'era da ỹa'aqtac, Aỹem Nataxala'.
Qaỹa'axata'a da nhuaxanaguec so nta'a ye Judá
11Qonapega nataqa'en nam chegoxoguet so nta'alpi na Judá da na'axaỹaxana da la'aqtac Ñim Nataxala'. 12Qataq 'auqata nam chegoxoguet so David da Ñim Nataxala' 'eeta' da la'aqtac:
Qauo'oche qome 'enauaque naua na'axa'te ca nalochiguiñi lataxac,
qataq qausoiuec nam qarcoñeteguishequi,
cha'aye da saiuena'a da souaxat da qauem qaro'onataxanaxaqui,
nache 'eroigui da ỹalemataic 'eeta'am ca norec,
qataq nalaqaasheguem, nache qaica ca ishet da ỹalamat.
Qaỹa'axata'a ca nhuaxanaguec ye Jerusalén
13Aỹem 'am sataỹa'aguet 'am Jerusalén,
'am maye 'amattalec na ca'amegue qataq qoneta'am ca coma'
maye netalec na nalochiguiñi 'alhua.
Qaq 'era da ỹa'aqtac, Aỹem Nataxala'.
Qami' maye qoñeeta' naxa:
¿Negue't ca ishet da qomi' iloquiaxa'n?
¿Negue't cam ishet da nvira'a nam qanqañoxotaqa'?
14Aỹem sauo'o qome ca qanhuaxanaguiqui
maye taiguet nam qauo'oche, qataq savigaxat na qaralamaxache aviaq,
qaq que'eca norec ỹavigaxat qome 'enauaque naua loiguiye.
Qaq 'era da ỹa'aqtac, Aỹem Nataxala'.›»
