Da na'aqtac maye talec na nta'alpi ye Judá
1Ñim Nataxala' aỹem 'enapega, 'eeta': «Jeremías, ña 'anqo'ona qome ñi lma' lta'araic ñi nta'a, nache huaña qome da 'aua'axat de'era ỹa'aqtac 2qom 'auatato'ot ñi nta'a ye Judá maye nso'ootangui añi nso'onaxaqui so David qataq nam 'amaqtaqaicpi ltauapi qataq shiỹaxauapi maye hueta'a ye huaqta'a't nỹecpi, nache qoneta': ‹Ña qana'axaỹaxañiỹa da la'aqtac Ñim Nataxala'. 3Qauo'oche qome da nalochiguiñi lataxac, qataq da no'on lataxac da qoñiitaña ne'ena nma', qausoiuec qome nam qaicoñettai', qataq saishet da qaica ca 'enec qanqa'eñi qataq da saqauyacñiỹapec nam chegaqauecpi, na saploqpi qataq ana pa'aipi. Qataq saishet da qaualauache cam chegaqauec shiỹaxaua da huaña ne'ena nma'. 4Qaq da qauo'oche de'era maye qami' samaxaleguete, nache queta qome da huo'o ca nta'alpi da nso'ongui añi nso'onaxaqui so David, nache camayepi ỹauota'a qome ana nnaigonapi qataq na caipi da tateua'a na lasompi ne'ena nma' lta'araic, nnaictague' na ltauapi qataq na nhuo' le'ecpi. 5Qalaxaye da saishet da qaualaqaigueta naua ỹa'aqtaqa, nache ne'ena nma' lta'araic, namaye nlachiguiñi qome. Qaq 'era da ỹa'aqtac, Aỹem Nataxala'.›»
6Cha'aye Ñim Nataxala' 'eeta' da la'aqtac maye talec ñi nma' lta'araic ñi nta'a ye Judá:
«'Am 'eeta'am ñaqa'en añi qasoxonaxa ye Galaad,
qataq añi lmilo añi qasoxonaxa ye Líbano,
qalaxaye san da ỹa'aqtac da 'am she'eguelaxata qome da 'am toolec,
nache qaica qome ca 'am netalec.
7Qataq ñamaq qome ca shiỹaxauapi maye na'atchiguiñi
na lo'ogoxonaxatpi da 'am dataỹa'aguet da yaqto' 'am ilaxachigui.
Qataq iquesoq ana 'arhuoqtepi maye cedropi,
qaq ime nache ỹasaxangui ca norec.
8Qaq qalota qome na ỹotta'a't shiỹaxauapi da nlectelec ne'ena huaqta'a't nỹecpi nache ñi 'oonolec nnattague' ñi lỹa, 'eeta': ‹¿Chaq ta'ainec Ñim Nataxala' da ỹo'otec de'era, ne'ena qalochiguiñi huaqta'a't nỹecpi?› 9nache qaỹasateguet qome qoỹeeta': Cha'aye namayepi ca'ai da aỹamaxataxac maye Ñim Nataxala' maye Natamnaxala', ỹo'ot co'ollaxa da naỹamaxate' namayepi, nache natameetacot qataq ỹanot da llo'oxonnataxanaxac nam ỹaqa'a atamnaxala'pi.»
Da la'aqtaxanaxac so Jeremías maye talec so Salún
10Saishet da qanỹeñiilec ye nta'a Josías;
qataq saishet da qanỹeñiilec da l-leuaxa,
maye nacherata da qanỹeñiilec som llalec Salún,
cha'aye jec qaq saishet qome da qaltaq da ñe'eguelaq,
nache saishet qome da nauane' yem 'alhua maye lañoqo'.
11Cha'aye da la'aqtac Ñim Nataxala' maye talec ñi Salún ñim llalec so Josías maye nta'a ye Judá, ñim talec co'ollaxa da lo'onataxanaxac so lta'a maye ca'ai co'ollaxa ne'ena nma', 'eeta': «Saishet qome da qaltaq ñe'eguelaq 12nacherata da ileuaña cam 'alhua maye qaỹauega da qaicoñe', nache saishet da qaltaq ñe'eguelaxa ne'ena na'alhua.
Da na'aqtaxanaxac maye talec so Joaquim
13¡Choxoraxaso' 'am maye 'auachegoxotchigui
na qauem qataq na sanalogoñi lataxac da 'ano'oxoosheguem
na 'arma' lta'araicpi qataq nam logoraic nỹecpi,
qataq 'auo'onataxanaxan na laỹepi shiỹaxauapi,
qaq saishet da 'ausheeten da lo'onataxanaxac!
14Qataq qonapec naxa: ‹Aỹem ño'oxoosheguem ca lta'araic ima',
nache sauo'o ca qalochiguiñi ndaqa' na pa'asheguem.›
Qataq 'auo'ot naua nalloxoqui'
qaq na pa'auo nache 'alapaxauo na no'on 'epaq cedro,
ime nache 'aua'amen, togaxaraic 'anqa'en da lo'oxoỹaxac.
15¿'Aupi'itaxaatega peta'a da ca nta'a,
nda'a't da na'attalec da netaigui ca coleesopa na cedro?
So 'arta'a co'ollaxa saishet da choche deque'etac qataq nỹomtac,
maye nataqa'en ỹo'ottac da nalochiguiñi lataxac
qataq da no'on lataxac, qaq ỹoqo'oye somaye no'on da llecỹaxac.
16Somaye iueelec co'ollaxa na choxoraqpi
qataq na huo'o da lhuenaxanaxa, qaq ỹoqo'oye no'on da llecỹaxac.
Qaq 'era da lataxac maye ỹachaxan da Aỹem qaỹauatton.
Qaq 'era da ỹa'aqtac Aỹem Nataxala'.
17Qalaxaye 'am nacherata da 'anmitta'a
da nauegaxanaxac maye chegaqaigui da ncachaxac,
qataq 'aualauat nam qaica ca ỹasouaxat, qataq qaica ca ldaqa' 'anqa'en,
qataq 'anhuo' na 'aralamaxat 'arhuo' le'ecpi.»
18Qaq ỹoqo'oye da la'aqtac Ñim Nataxala', maye taalec so Joaquim, som llalec so Josías maye nta'a ye Judá, 'eeta':
«Qaica qome ca nỹeelec ñimaye qom ileu.
Qaica qome ca nỹeetac da 'eeta':
‹¡Aicoue 'am ỹaqaỹa! ¡Aicoue 'am ỹaqaỹole!
¡Aicoue 'am Nataxala'! ¡Aicoue 'am 'Amaqtaqaic!›
19'Am qaỹauogonnauga qome na pa'auec ye Jerusalén,
nache 'am qailareñi qome qoneta'am ca 'ashena.»
Da na'aqtaxanaxac maye talec ye Jerusalén
20«¡'Am Judá, 'asheguema qome añi qasoxonaxa Líbano nache 'aua'alaq!
¡Qataq 'ana'axannec da 'ara'alaxac qom huaña aye qasoxonaxapi ye Basán!
¡'Aua'alaq qom qonetalec añi lcomaraxalate ye Abarín,
cha'aye 'enauac na 'ancachaxauapi mashe noxonecpi!
21Aỹem 'am setaqtecot co'ollaq qouetaigui da qaica ca 'auena'a,
qalaxaye 'am saishet da Aỹem 'ana'axaỹaxana.
Qaq nache qoneta'ac de'era chegoqta'a co'ollaq saxanaxa da 'am ỹe,
da saishet da Aỹem 'aualaxaguet!
22Qaq 'enauac qome na 'arataxala'pi da ỹaỹoxonaqchet ca la'at,
nam 'ancachaxauapi qalaq qaỹauega qome ca ỹaqa'a 'alhua.
Nache 'am huo'o qome da 'ara'agaxa qataq sa 'auaỹaten ca qonetec,
souaxat na qauempi maye 'auo'ot.
23Qaq 'am nagui 'avi'imaqtac qonetangui na 'arpata'c,
qonetangui na cedropi maye chegaqauga ye Líbano,
¡qalaxaye yaqta'a da huo'o ca 'anque'eenaxac
qom 'am nvita ca 'anqui'ic, maye 'eeta'am da nqui'ic da nco'oxoc!»
Da la'aqtac Ñim Nataxala' maye talec so nta'a Jeconías
24Ñim Nataxala' 'enapega so Jeconías, som llalec so Joaquim, maye nta'a ye Judá 'eeta': «Aỹem san da ỹa'aqtac, da na'aictaxa da 'am qoneta'am aca chiguishaqte na'anaxanaqte, da netagui na aỹoic ihuaq, qalaxaye nache 'ena'am 'am ñeqat, 25da yaqto' 'am saneguet na 'ampa'aguenaxauapi maye huotaique 'am ỹalauat, nam ỹataqta 'arcolanaxatpi. Qataq 'am saneguet qome ñi Nabucodonosor maye nta'a ye Babilonia, qataq ye caldeopi. 26Nache 'am, qataq añi 'arate'e qami' so'ora'alo qome cam 'alhua maye saishet da qarañoqo'oi, qaq nache huaña camaye da qaullivi qome.» 27Qaq huo'o qome da qaryaqai da qañe'eguelaqỹa na maiche qana'alhuai, qalaxaye saishet qome da qauañoxoche da qaltaq qañe'eguelaqai.
Da la'alaxac so na'aqtaxanaxanec
28Ñim Jeconías, ¿peta'a 'eeta'am aca naco'oña
poxoỹaxai maye qaica ca naigui,
huo'otaq cam nogoxoshet maye qaica ca nqopittega?
¿Ta'ainco' da ñimaye qataq nam llalaqpi da qaỹo'ora'a ca 'alhua maye saqaỹauana?
29¡'Alhua, 'alhua, 'am 'alhua,
ñaq 'ana'axaỹaxana da la'aqtac Ñim Nataxala'!
30Ñim Nataxala', 'enapec:
«Qa'eyeeua'a qome da le'enaxat ne'ena ỹale
aca naneraxalate na shiỹaxauapi,
da 'eeta'am ca ỹale maye qaica ca llalaqpi,
'eeta'am ca ỹale maye huo'o da lletaxanaxac da nachaalataxac.
Cha'aye cam chegoxoguetpi qome namaye,
saishet da huo'o ca nso'ongui añi nso'onaxaqui so David
da yaqto' qaltaq ilo'ogue na Judá.»
