So Jeremías huotaique da qaỹalauat
1Qaq co'ollaq cheta'ague da do'onataxan so Joaquim, som llalec so Josías, da nta'a ye Judá, nache Ñim Nataxala' 'enapega so Jeremías 2nache 'eeta': «'Anachaañi qome, qoua'a ye nqasoxoc añi atamnaxaqui nache 'aua'axat 'enauac nam 'am samaxalecpi da 'aua'aqtaxanem na shiỹaxauapi maye chegaqa'a nam huaqta'a't nỹecpi maye ỹotta'a't naua nañalo ye Judá, da naỹa añi atamnaxaqui da yo'oxonnataxan, nache qaica qome ca sa 'aua'axat. 3Shapegueto' da ishet da 'am ỹalaxaguet da ỹaxaañi da qauem lataxac, yaqto' Aỹem saishet da sepaguelec dam seuennatega co'ollaxa da sauo'o ca nhuaxanaguec, souaxat nam qauem maye ỹo'otpi. 4Qataq 'aua'aqtaxanem da Aỹem Nataxala' shenapec: ‹Da saishet da Aỹem qaualaqaiguet qataq sa qaupaquiileguete naua ỹapaxaguenataxanaxaco maye qami' sanema, 5qataq da saishet da qauqocheetega da lvitaqtaxanaxac so ỹamaxashecpi maye ỹa'aqtaxanaxanecpi, maye ỹe'eguelaqtalec da qami' ñamaxalo, som sa qaualaqaiguetpi, 6huaña qome nache ana'ana atamnaxaqui so'otec dam 'eeta'am co'ollaxa aso naña ye Siló. Qataq so'otec qome ne'ena huaqta'a't nỹecpi da naloqnaxanaxat da huo'o ca qauem ca qaỹasaxalec, 'enauac na ỹotta'a't shiỹaxauapi ana 'alhua.›»
7Qaq so ntaxaỹaxanaxanecpi qataq so na'aqtaxanaxanecpi qataq 'enauac so nhuo' le'ecpi, hua'aqchiguilo co'ollaxa ne'enaua na'aqtaqa maye nasaxare'c so Jeremías, huaña aso atamnaxaqui. 8Qaq somaye co'ollaq ime da ỹa'axat dam ỹamaxalec Ñim Nataxala', nache so ntaxaỹaxanaxanecpi qataq so na'aqtaxanaxanecpi qataq 'enauac so nhuo' le'ecpi, ỹaconeua'a somaye nache 'enapega, 'eeta': «¡'Am 'aleu qome! 9¿Ta'ainco' da 'aua'axattac da qonetega chegoqchigui da le'enaxat Ñim Nataxala' da ana atamnaxaqui 'eeta'am qome asom naña ye Siló, qataq ne'ena huaqta'a't nỹecpi dolagui qome nache qaica ca hueta'a shiỹaxauapi?» Nache 'enauac so nhuo' le'ecpi maye hueta'a aso atamnaxaqui coleesop so Jeremías. 10Qaq som nataxala'pi ye Judá co'ollaq ỹaỹaten de'era, nache chegoqchiguiña so lma' lta'araic so nta'a da taita aso atamnaxaqui, qaq co'ollaq ivitta som le'enaxat Dalaxaic Lasom nache nso'ooñi. 11Huaña nache so ntaxaỹaxanaxanecpi qataq so na'aqtaxanaxanecpi, da'aqtaxanem so nataxala'pi qataq so nhuo' le'ecpi, 'eeta': «De'era ỹale iuen da qaỹalauat, cha'aye ỹa'axatta'a da qailaxachigui qome ne'ena huaqta'a't nỹecpi. Qaq qami' qaua'aqaichigui damaye.» 12Nache so Jeremías da'aqtaxanem so nataxala'pi qataq so nhuo' le'ecpi, 'eeta': «'Enauac nam mashe qaua'aqaichigui, nacheñi Ñim Nataxala' Ñim aỹem ỹamaxalec da sa'axata'a, cam talec qome ana'ana atamnaxaqui qataq ne'ena huaqta'a't nỹecpi. 13Qaq ỹoqo'oye qano'onaxache da qarataxaqui qataq da qaro'onataxanaxaqui, nache qaualaqaiguet Ñim Nataxala' maye Qanatamnaxala'ai, yaqto' Ñimaye saishet qome da qami' namaxalo cam qauem maye ỹa'axatta'a. 14Qaq aỹem ye mashe aỹem qoroxoñiqui, nache maicheye cam aỹem qoñeeta'ac. 15Qalaxaye qauaỹaañita da aỹem qaualauache, nache qami' qataq 'enauac nam netaigui ne'ena huaqta'a't nỹecpi, maiche qarasouaxashechi da qaualauache cam qaica ca lasouaxashet, cha'aye 'eesa da nacheñi Ñim Nataxala' Ñim aỹem ỹamaxalec da ỹataqta sa'axatta 'enauac ne'enapi.» 16Nache so nataxala'pi qataq so nhuo' le'ecpi 'enapega so ntaxaỹaxanaxanecpi qataq so na'aqtaxanaxanecpi, 'eeta': «De'era ỹale qaica ca lasouaxashet, cam ỹo'ot da ishet da qaỹalauat, cha'aye dam qomi' da'aqtaxaateguema damaye chegoqo'ot Ñim Nataxala' maye Qanatamnaxala'.» 17Qaq huo'o so nqueroxonecpi maye nataxala'pi nachaañi, nache 'enapega som lapoota'a't nhuo' le'ecpi, 'eeta': 18«So na'a'q maye huetoigui da lo'onataxanaxac so Ezequías, maye nta'a na Judá, nache so Miqueas maye lma' ye Moreset ỹachegoxotchigui da le'enaxat Ñim Nataxala' da da'aqtaxanem 'enauac na nhuo' le'ecpi na Judá, 'eeta':
‹Ñim Nataxala' maye Qaica ca Ỹaqalanapec, 'eeta':
Na Sión ỹe'eguelaxa qome da 'eeta'am ca 'alhua maye qana'ayesheguem,
na Jerusalén qalaq qailaxachigui qome nache lapoosheguem
qaq yem qaỹoqotcheguec 'alhua maye netaña añi atamnaxaqui
qalaq ndotec qome na nloche ñaxaalec.›
19¿Qaq peta'a so nta'a Ezequías qataq 'enauac so nhuo' le'ecpi ye Judá, ỹalauat co'ollaxa so Miqueas? 'A'i, maye nacherata da so nta'a huo'o co'ollaxa da lcolanaxa Ñim Nataxala', nache iỹaxanot da yaqto' ichoxoren somayepi. Huaña nache Ñim Nataxala' saishet co'ollaxa da namaxa somayepi cam qauem maye ỹa'axatta'a co'ollaxa. Qalaxaye qomi' sauoqtaique da maiche qomi' taleguete ca qauem.»
20Qataq nataqa'en so na'aqtaxanaxanec Urías, som llalec so Semaías, maye lma' ye Quiriat Yearín, ỹachegoxotchigui co'ollaxa da le'enaxat Ñim Nataxala' da ỹa'axata'a dam 'eetec qome ne'ena huaqta'a't nỹecpi qataq ne'ena 'alhua, 'eeta'am nagui da 'eetec da Jeremías. 21Qaq so nta'a Joaquim, qataq so ltauapi somaye qataq so nataxala'pi co'ollaq hua'aqchigui dam la'aqtac somaye, nache so nta'a huotaique da damaxasoxoolec da qaỹalauat. Qalaxaye so Urías co'ollaq ỹaỹaten de'era nache somaye huo'o da lcolanaxa, nache datauec taỹa ye Egipto. 22Qaq so nta'a Joaquim ỹamaxa co'ollaxa ye Egipto so Elnatán, som llalec so Acbor, qataq soua lỹa't ỹale't, 23nache soomaye ỹachegoxotchiyiña co'ollaxa ye Egipto da naue'c so Urías, ime nache ỹaareua'a so nta'a Joaquim, nache se'eso nta'a damaxasoxoolec somaye da qaỹalauat, qataq da lo'ocỹaxac somaye qaỹasaxangui aso nshere maye qauem.
24Qaq so Ahicam, som llalec so Safán, detaqa co'ollaxa da npaxaalec so Jeremías, nache somaye ỹo'ot da saishet da qoỹaneguet somaye so nhuo' le'ecpi da ỹalauat.
