So pa'aguenaxauapi maye chegaqa'ague da sheu'
1Qaq co'ollaq mashe ivi', cuatro vi'iye da nta'a so Joaquim, som llalec so Josías maye da ilotague' ye Judá, nache Ñim Nataxala', ỹamaxa so la'aqtac so Jeremías, maye talec 'enauac so nhuo' le'ecpi ye Judá. Qaq se'eso vi'i nacheso so la'auaxanec vi'i da lo'onataxanaxac so Nabucodonosor da nta'a ye Babilonia. 2Nache so na'aqtaxanaxanec Jeremías ỹa'axatem de'era na'aqtaxanaxac 'enauac so nhuo' le'ecpi ye Judá qataq som hueta'a ye Jerusalén nache, 'eeta': 3«Chegoqta'a co'ollaq ivi' soua trece vi'iye da nta'a so Josías, som llalec so Amón maye ilotague' ye Judá, qaq choche ivitta'a nagui, qaq damaye, 'eeta': mashe ivi' naua veintitrés vi'iye da Ñim Nataxala' aỹem detaxaỹot co'ollaxa, nache aỹem qami' she'eguelaqtaleguete co'ollaxa da qami' setaqtacoto, qalaxaye qami' saishet da aỹem qaualaqaiguet. 4Qaq na'aictaxa da Ñim Nataxala', ỹe'eguelaxattalec da qami' namaxalo so lamaxashecpi maye la'aqtaxanaxanecpi, qalaxaye qami' saishet co'ollaxa da qauqochiitega somayepi, qataq saishet da qana'axaỹaxañiỹa qataq saqaualaqaiguet. 5Somayepi qami' 'enapegalo co'ollaxa, 'eeta': ‹Qaỹa'axañiiuec da qauem qarataxaqui qataq nam qauem maye qauo'ocheetac, yaqto' nache 'eetai' da qoñiitalec ne'ena 'alhua maye Ñim Nataxala' qami' ỹanema co'ollaxa qataq som hua'au qarta'ailpi. 6Qaq saishet qome da qoquiigue nam laỹepi atamnaxala'pi, saishet da qavio'oxoreñiitac qataq da qanatamñiitacot. Saishet qome da qanogoqcheche Ñim Nataxala' souaxat da qavio'oxoreñiitac nam atamnaxala'pi maye maiche qaro'onataqui, nache Ñimaye saishet qome da qami' namaxalo ca qauem.› 7Qaq nagui Ñim Nataxala', 'eeta': ‹Qami' saishet da Aỹem qaualaqaiguet, Aỹem qanogoqcheche, souaxat da qanatamñiitacot na atamnaxala'pi maye maiche qaro'onataqui, qaq souaxat de'era nache maiche qami' taleguete qome ca qauem.›
8Qaq ỹoqo'oye Ñim Nataxala' maye Qaica ca Ỹaqalanapec, 'eeta': ‹Qaq cha'aye qami' saishet da qaualaqaigueta naua ỹa'aqtaqa, 9nache Aỹem seỹaxana qome 'enauac na nhuo' le'ecpi maye neta'ague da sheu', qataq ñim ỹamaxashec Nabucodonosor maye nta'a ye Babilonia, da yaqto' anac, nache iloquiaxa'n ne'ena 'alhua, qataq 'enauac nam netalec namaye, qataq 'enauac nam ỹotta'a't shiỹaxauapi maye lauoreuapi, nache ỹataqta imauec qome da selaxachigui, qataq chochaq tatec ñaqa'en da nlaguiñi, qataq ỹo'ot da ne'elaxa qataq da ncolanaxa. 10Qataq so'ot qome da namayepi saishet da qaỹa'aqtega ca no'onec da huo'o ca na'ashaxac qataq da namaicỹaxac huo'otaq da qaỹo'onaxaalec ca naronaxac, qataq da l-lamaxa ca coma' maye namaicnaxanaxat, qataq saishet da ỹe'eguelaxa da qaila'a na le'eraxa ana ncoỹaraxanaxaquipi. 11Qaq 'enauac qome ne'ena 'alhua da ỹataqta nlachiguiñi qataq logosheguem qome. Qaq ivittrec qome caua setenta vi'iye da ne'ena ỹotta'a't shiỹaxauapi do'onataxaatacot ñi nta'a ye Babilonia. 12Qaq qom inoxoore'c caua setenta vi'iye, nache Aỹem sauo'o ca nhuaxanaguec ñi nta'a ye Babilonia, souaxat na lasouaxashetpi qataq nataqa'en nam shiỹaxauapi maye hueta'a nam na'alhua nam caldeopi, nache she'eguelaxata qome da chochaq tatec da toolec. Qaq 'era da ỹa'aqtac Aỹem Nataxala'. 13Aỹem so'ot qome da talec yi'iye na'alhua 'enauac nam sa'axatta'a co'ollaxa, qataq nanettalec ana'ana nere: 'Enauac nam ỹa'axattac co'ollaxa so Jeremías maye ỹachegoxotchigui da ỹe'enaxat da dataỹa'aguet 'enauac na ỹotta'a't shiỹaxauapi. 14Qataq nam 'amaqtaqaicpi shiỹaxauapi qataq nta'alpi maye 'añaxaicpi qalaq ỹamaqtac qome namayepi. Qaq 'era da sheetec da sanem qome da nsheetenaguec maye lasheue nam ỹo'otpi.›»
Da nhuaxanaguec na ỹotta'a't shiỹaxauapi
15Ñim Nataxala' maye Natamnaxala' na Israel le'ecpi aỹem 'enapega, 'eeta': «Ña 'aumeten ana'ana ỹomaxaqui maye nlaqchigui na lataxa, maye naigui da inogoxonaxac. 'Auacona, nache 'aỹa'anem da yaqto' nỹomgui 'anqa'en 'enauac na ỹotta'a't shiỹaxauapi maye 'am samaxa qome. 16Qaq qom mashe nỹomgui namayepi ana'ana ỹomaxaqui, nache anol qataq 'eeta'am qome ca huo'o da aloic, souaxat ca alaataxac maye ñamaxa qome namayepi.»
17Qaq aỹem sacona aso ỹomaxaqui maye nasoqta'a Ñim Nataxala', nache sanem da nỹomgui 'enauac na ỹotta'a't shiỹaxauapi maye Ñim Nataxala' aỹem ỹamaxa. 18Nataqa'en sanem da nỹomgui nam hueta'a ye Jerusalén qataq nam huaqta'a't nỹecpi maye ỹotta'a't naua nañalo ye Judá, nataqa'en na lta'alpi qataq na lataxala'pi, da yaqto' selaxachigui qataq da lapoosheguem ñaqa'en, nache ỹo'ot da ne'elaxa qataq da ñi'iỹaxa, qataq naloqnaxanaxat da huo'o na qaỹasaxalec ca qauem choche ivitta'a nagui. 19Qaq nataqa'en sanem da nỹomgui, ñi Faraón maye nta'a ye Egipto, qataq na ltauapi, qataq na nataxala'pi, qataq 'enauac na lauo' le'ecpi ñimaye, 20qataq nam chegaqauec shiỹaxauapi maye hueta'a yemaye, qataq 'enauac na nta'alpi ye 'alhua Us, qataq hueta'a ye na'alhua na Filisteopi: yem Ascalón, Gaza, Ecrón qataq nam no'onañi ye Asdod, 21ye Edóm, Moab qataq ye Amón, 22qataq 'enauac na nta'alpi ye Tiro qataq ye Sidón, qataq 'enauac na nta'alpi maye netaña nam ỹotta'at 'alhuapi ye 'alhua Mediterráneo, 23nam chegoxoguetpi so Dedán, Tema qataq so Buz qataq na nhuo' le'ecpi maye namare'c naua lqaic laỹel, 24qataq 'enauac na nta'alpi ye 'alhua Arabia, qataq 'enauac nam lta'alpi nam ỹotta'a't shiỹaxauapi maye netaña ye toolec 'alhua, 25qataq 'enauac na nta'alpi ye 'alhua Zimri, Elam qataq ye Media, 26qataq 'enauac na nta'alpi maye pa'aigue da sheu', nam saqaỹara'che huo'otaq na qaỹoqtache. Qaq damaye, 'eeta': 'enauac na nta'alpi ana 'alhua. Qaq nache pa'atec qome da nỹomgui ñi nta'a ye Babilonia.
27Qaq ime, nache aỹem 'enapega Ñim Nataxala', 'eeta': «Qonapega namayepi da, Aỹem Nataxala' maye Qaica ca Seqalanapec, maye Natamnaxala' na Israel le'ecpi, samaxalec namayepi da nỹomgui qome, nache ivitta'a da taxaicpi qataq noltañi, qataq hueta'aguet na 'alhua, nache saishet da ñisheguem, souaxat ca alaataxac maye ñamaxa qome namayepi. 28Qaq namayepi da huo'otaq saỹaconeguet aca ỹomaxaqui maye 'aỹa'anem qome da nỹomgui, nache qonapega, qoneta': Ñim Nataxala' maye Qaica ca Ỹaqalanapec, 'eeta': Iuen da qanỹomiigui anamaye, qaica ca lỹa lataxac. 29Cha'aye mashe sacoolec da ñamaxa da iuaxanaxanaxac na huaqta'a't nỹecpi, maye huaña da qaỹo'oxoreetac da ỹe'enaxat. Qaq qami', ¿qaupi'itaxañiitega peta'a da qaica qome ca qanhuaxanaguiiqui? Qalaxaye saishet qome da qaica qanhuaxanaguiiqui, cha'aye aỹem ñamaxa qome ca alaataxac 'enauac na netalec ana 'alhua. Qaq 'era da ỹa'aqtac Aỹem Nataxala', maye Qaica ca Saqalanapec.
30'Am Jeremías, 'auachegoxotchigui qome da ỹe'enaxat da 'aua'axatem namayepi 'enauac de'era, qoneta':
‹Ñim Nataxala', qaỹa'axaỹa qome da lavillỹaxac
dellimigui chemqot na pa'asheguem,
chemaxaña yem ỹataqta qui'itta maye netaña Ñimaye.
Cha'aye dataỹa'aguet ana lalopi qaguetapi
qaq da la'alaxac Ñimaye qalaq 'eeta'am ca petapigui ana uva,
qataq dataỹa'aguet 'enauac na netalec ana 'alhua.
31Da l-llimiaxa da lavilỹaxac, qalaq ivira'alo naua loga'te ana 'alhua,
cha'aye Ñim Nataxala' lapaxañi qome ca ltaxaỹaxac
da dataỹa'aguet na ỹotta'a't shiỹaxauapi,
nache iỹaxaneuga qome da nmit 'enauac na shiỹaxauapi,
da yaqto' ỹaneguet da l-leuaxa nam qauemaicpi.
Qaq 'era da la'aqtac Ñim Nataxala'.›»
32Ñim Nataxala' maye Qaica ca Ỹaqalanapec, 'eeta':
«Ca qauem maye nvira qome nam ỹotta'a't shiỹaxauapi,
camaye queta qome nache ivira'a ca laỹepi shiỹaxauapi,
qataq anac qome ca la'at lta'araic,
chegoqchiguiña cam loga't ana 'alhua.»
33Qaq da lo'ocỹaxac qome cam ileupi naqa'en Ñim Nataxala' qaue'eca na'a'q,
camayepi laguelec qome 'enauac ana 'alhua.
Nache qaica qome ca nỹeelec camayepi, qataq qaica ca laỹona't
qome da lo'ocỹaxac camayepi da yaqto' ilayiñi,
qataq laguelec qome ana 'alhua 'eeta'am ca shiguiỹac la'atec.
34¡Qami' qagueta lo'opi, ña qaua'alqai qome souaxat da qanqui'iqui!
¡Qami' maye qami' lataxala'ate ana qaguetapi
ña qanviñiingui qome na 'alhua!
Cha'aye mashe nvi' nam na'a'q maye huetoigui da nalaataxanaxac,
qaq qami' nache qami' qaỹalaua't qome qoñeeta'am
ca qagueta lhuaraicpi maye chaxaraicpi.
35Na qagueta lo'opi qalaq saishet qome da datauec,
nam lataxala'pi ana qaguetapi saishet qome da ỹañoxot da naneltaxan.
36Na qagueta lo'opi qalaq ỹa'alaqtagui,
ỹa'alaqtagui nam lataxala' ana qaguetapi souaxat da nqui'ic,
cha'aye Ñim Nataxala' deqaqa naqa'en nam 'auaqpi.
37Ñim Nataxala' dalemata, nache deqaqa naqa'en
som ỹataqta 'onaxaic no'onaxapi namayepi.
38Ñimaye nnoxonec 'eeta'am ca llon da chegoqoolec ca lauanaxanaqa',
qaq na na'alhua namayepi ỹe'eguelaxa da toolec,
cha'aye 'eroigui da layeloxo Ñim Nataxala',
nache namaxa namayepi da alaataxac maye ỹataqta chaqaic.
