So Jeremías deshenaxana so 'alhua
1Ñim Nataxala' detaxaỹot so Jeremías co'ollaq mashe ivi' soua diez vi'iye da lo'onataxanaxac so Sedequías da nta'a ye Judá, qaq so Nabucodonosor qalaq mashe ivi' dieciocho vi'iye da lo'onataxanaxac. 2Qaq se'eso na'a'q nache so nalleppi so nta'a ye Babilonia iloquiaxaatac ye Jerusalén, qaq so na'aqtaxanaxanec Jeremías qaỹapotaua'a hueta'a so nqasoxoc so nta'a. 3Cha'aye so nta'a Sedequías damaxasoxoolec co'ollaxa da qaicoñe', cha'aye so Jeremías 'enapec co'ollaxa: «Ñi Nataxala', 'eeta': ‹Aỹem so'ot qome da ne'ena huaqta'a't nỹecpi loxonec ñi nta'a ye Babilonia, 4qaq ñi nta'a Sedequías saishet qome da ỹañoxot da naneltaxaneguet na caldeopi, nacherata da loxonec qome ñi nta'a ye Babilonia, nache nachaateua'a qome ñimaye. 5Nache ñi Nabucodonosor ỹauec qome ñi Sedequías ỹauega ye Babilonia, nache hueta'a qome yemaye choche ivitta'a ca na'a'q qom qaltaq seqocha'a. Qaq na'aictaxa qome da qauloqui' na caldeopi, qalaxaye qaica qome ca qarviye. Qaq 'era da ỹa'aqtac, Aỹem Nataxala'.›»
6Nache so Jeremías, 'eeta': «Ñim Nataxala' aỹem 'enapega, 'eeta': 7‹Ña 'aumeten ñim 'arhuo' le'ec Janamel, ñim llalec so 'antesoqo' Salún, ñimaye 'am naỹa qome da 'am ỹachaxanapecot da 'aushenaxanaxa ye na'alhua maye naña ye Anatot, cha'aye 'am hueto'ot da 'enec da ishet da 'ausheenaxana, cha'aye maiche 'arhuo' le'ec ñimaye.› 8Qaq nache ipacchigui som la'aqtac Ñim Nataxala', da so ihuo' le'ec Jananel aỹem naỹa co'ollaq soota'a ye nqasoxoc ñi lma' lta'araic ñi nta'a, nache aỹem iỹaxanot da sesheenaxana ye lalamaxat no'onaxa, maye huaña ye Anatot maye huaigui ye na'alhua nam chegoxoguet so Benjamín, cha'aye aỹemta da aỹem hueto'ot da shenec da ishet da sesheenaxana yemaye da yaqto' ỹalamaxat, cha'aye somaye maiche ỹalamaxat ihuo' le'ec. Qaq souaxat da aỹem saỹaten damaye da lamaxasoxonaxac Ñim Nataxala', 9nache Aỹem sesheenaxana yem na'alhua som ihuo' le'ec Janamel. Nache sanem aso diecisiete anom maye chegaqaigui na plata. 10Nache so'ot aso lmalate da nmenaguec qataq setoqoolec aso ỹa'anaxanaqte qataq sauo'oi soua ỹauaacheguelo ñaqa'en, ime nache ñaloqten aso plata maye nachaso aso ñasataxagui da lasheue. 11Ime, nache saconalo soua dos maye lỹa't lmalatel de'era qanmenaxac, 'oonole aso qaitoqoolec aso na'anaxanaqte maye huetalec dam lataxac da nmeenaguec se'eso 'alhua, qaq aso lỹa qalaq nauattalec, 12nache sanem so Baruc, som llalec so Nerías maye laual so Maseías, ỹauaachigui ñaqa'en so ihuo' le'ec Janamel, qataq soua lỹa't ỹauaatrauo maye nataqa'en nanettralec aso nere, qataq 'enauac som Judiopi maye hueta'a so nqasoxoc aso ncoñetaxanaxaqui. 13Qaq hua'aqchigui ñaqa'en somayepi da shenapega so Baruc, sheeta': 14‹Ñim Nataxala' maye Qaica ca Ỹaqalanapec, qataq Natamnaxala' na Israel le'ecpi, 'eeta': 'Auaconalo qome ne'enaua dos maye lỹa't lmalatel de'era qanmenaxac, aram ntoqootalec aso na'anaxanaqte, qataq aram qaca aca la'anaqte, ime nache 'auaỹamaxa't 'auachangui aca naco'oña 'alhua yaqto' qaỹaloqta da qauema. 15Cha'aye Ñim Nataxala' maye Qaica ca Ỹaqalanapec Ñim Natamnaxala' na Israel le'ecpi, 'eeta': Ne'ena 'alhua qaỹe'eguelaxa qome da qaisheenaxana ca nỹecpi, no'onaxapi qataq nanaxanaqa'pi maye lma' ana uva.›»
Da natamnaxac so Jeremías
16Qaq co'ollaq ime da sanem so Baruc som llalec so Nerías, aso lmalate da qanmenaxac, nache aỹem ñatamnot Ñim Nataxala', sheeta': 17«'Am nataxala' 'auota'a co'ollaxa da lta'araic 'ara'añaxac, da 'auo'ot na piguem qataq ana 'alhua. 'Am qaica ca 'auqalanapec. 18'Am, 'auachaxana da 'arsoxoyec na ỹataqta qalota shiỹaxauapi, qalaxaye nataqa'en 'auauo'o da nhuaxanaguec na ỹalleppi souaxat na lasouaxashet so lta'alpi. ¡'Am Atamnaxala', maye 'Am 'amaqtaqaic qataq 'añaxaic, da 'are'enaxat 'eeta', Nataxala' maye Qaica ca Ỹaqalanapec! 19'Am ỹataqta huo'o da llo'oxoyec nam 'alapaxañipi, qataq 'Am 'añaxaic da huo'o na 'auo'ot. 'Am 'aumeteetac 'enauac nam ỹo'ottacpi na shiỹaxauapi, qataq 'aỹa'anem ñi 'oonolec namayepi cam naigui nam ỹo'otacpi. 20'Am 'auo'ot nam sa qaỹauanapega, qataq na na'anecpi co'ollaq huaña ye Egipto, qaq nache ivitta'a nagui da ñaq 'auo'ottac da huaña na Israel, qataq nam laỹepi shiỹaxauapi, qaq ỹoqo'oye da 'are'enaxat ỹataqta qaỹoqtegue da na'aqtaguec. 21'Am 'aurolec da lta'araic 'ara'añaxac co'ollaq 'anqateeguesot ye Egipto so 'aralamaxat nhuo' Israel le'ecpi, 'auo'ot co'ollaxa na saqaỹauanapegapi qataq na'anecpi, qataq 'anlaxatchigui da lcolanaxa 'enauac na shiỹaxauapi. 22Nache 'aỹa'anem na Israel le'ecpi ne'ena 'alhua, maye na huaca lche' qataq na dapic lli'i, ipa'axanec 'eeta'am ca 'etaxat, ipacchigui dam 'auachaxanapeguem co'ollaxa som hua'au lta'alpi namayepi. 23Qalaxaye namayepi co'ollaq nnoxoneua'a ne'ena 'alhua, qataq nalec namaye, nache saishet da 'am ỹalaxaguet, qataq saishet da quegue dam 'arapaxaguenataxanaxac maye 'aỹa'anem co'ollaxa, qataq saishet da ỹo'ot nam 'auamaxalecpi. Qaq ỹoqo'oye 'Am 'anamaxa namayepi 'enauac ne'ena qauempi. 24Qaq nagui na caldeopi nauaxaỹaxaasheguem na lliguisheguempi da yaqto' iloquiaxan na huaqta'a't nỹecpi, qaq dam alaataxac, qataq na nqouaxa qataq na napiina, nachena qome na ỹo'ot da noxonec na huaqta'a't nỹecpi. 'Am Nataxala' 'aumeteetac da mashe ipacchigui 'enauac nam 'aua'axattac co'ollaxa. 25Qaq 'Am Nataxala', ¿ta'ainco' da aỹem qonapega da sesheenaxana qataq da sisheeten yi'iye 'alhua, qataq sauo'oi soua ỹauaachiguilo ñaqa'en, ye ne'ena huaqta'a't nỹecpi taỹa'a da loxonec na caldeopi?»
26Qaq huaña nache Ñim Nataxala', ỹasateguet so Jeremías, 'eeta': 27«Nachaỹem maye Aỹem Nataxala', maye Natamnaxala' 'enauac nam huo'o da lca'alaxa, Aỹem qaica ca seqalanapec. 28Qaq ỹoqo'oye Aỹem, 'am shenapega, sheeta': Aỹem so'ot qome da ne'ena huaqta'a't nỹecpi, loxonec ñi Nabucodonosor maye nta'a ye Babilonia, qataq nam caldeopi. 29Na caldeopi maye iloquiaxan ne'ena huaqta'a't nỹecpi, taigui qome namaye nache ỹe'egueua'a, l-llañe' qome na nỹecpi maye hualec naxa na pa'asheguem da qaỹavigaxat na nchenaxanaxat da qoỹanot so Baal, qataq huaña naxa da qoỹanot na lataxa nam ỹaqa'a atamnaxala'pi da Aỹem qainogoqchet. 30Qaq nache 'eetai' naxa da chegoqta'ague nam nhuo' Israel, qataq na Judá, da ỹo'ottac naxa nam saishet da saỹamaxarenpi. Na Israel le'ecpi, saishet da ỹaxaañi da aỹem inogoqchettac, souaxat na atamnaxala'pi maye maiche lo'onatac namayepi. Qaq 'era da ỹa'aqtac Aỹem Nataxala'. 31Qaq ne'ena huaqta'a't nỹecpi, chegoqchiguiña co'ollaq cheta'ague da qano'oxoosheguem nache ivitta'a nagui, da nacherata da ỹo'ottac da ỹayeloxo qataq inogoxonaxac. Qaq ỹoqo'oye Aỹem sapalaxat qome namayepi, 32souaxat 'enauac nam qauem ỹo'otpi na nhuo' Israel qataq na Judá maye Aỹem inogoqchet, nataqa'en nam lta'alpi, qataq na lataxala'pi qataq na ltaxaỹaxanaxanecpi qataq na la'aqtaxanaxanecpi qataq 'enauac nam netaña na Judá qataq na Jerusalén. 33Aỹem iro'oguet na l-laq, nache saishet da Aỹem datateguet. Qaq na'aictaxa da saishet da saxanec da sapaxagueetac, namayepi saishet da Aỹem ỹalaxaguet qataq saishet da ỹaconeguet da ihuogoqtaxanaxac. 34Qataq ivitta'a da nshepaxanaqchet añi atamnaxaqui maye Aỹem qoỹanot co'ollaxa, souaxat da ỹanaigui añimaye na atamnaxala'pi maye seqaiga. 35Nataqa'en no'oxoosheguem ana nca'atoxonaxalatepi da natamnot so Baal ỹanaña ye ca'amegue Ben Jinón, da yaqto' ỹavigaxat na llalaqpi qataq ana llalepi 'alpi da yaqto' ỹanot so Moloc, qaq 'eetec de'era da yaqto' ỹauo'o da lasouaxashet na Judá le'ecpi, da ỹo'ot nam ỹataqta seqaiga qataq saishet da samaxalec co'ollaxa qataq saishet da seuennatega.»
Dam qaỹachaxanapec cam ñaq natauo
36Qaq Aỹem Nataxala', maye Natamnaxala' na Israel le'ecpi, sa'axat da 'eetec qome ne'ena huaqta'a't nỹecpi maye 'am qonetega loxonec ñi nta'a ye Babilonia huaigui ca alaataxac qataq nqouaxa qataq napiina: 37«Aỹem llaỹona't qome na nhuo' le'ecpi maye hueta'a na 'alhuapi maye selagaxaalec co'ollaxa, co'ollaq Aỹem nlaxagui da ỹalemataic, inogoxonaxac qataq da chaqaic ỹayeloxo, nache ñe'eguelaxata qome ne'ena 'alhua da yaqto' ỹe'emaqtac qom netalec namaye. 38Nache ne'ena nhuo' le'ecpi ỹalamaxat qome, qataq Aỹem Natamnaxala' qome. 39Qataq sanem da 'oonolec da lhuennataxac qataq 'oonolec da llecỹaxac da yaqto' tatec da huo'o naq 'enec naqa'en Aỹem, qaq damaye maiche laỹamaxa namayepi qataq cam chegoxoguetpi. 40Qataq so'ot ca chochaq tatec ñaỹamaxataxac da ñaỹamaxate' namayepi, qataq sanem da ỹa'aqtac da saishet qome da sha'axaneguet da so'otec ca ỹaỹamaqchiguiñi namayepi, qataq ñelaxatchigui da lhuennataxac da yaqto' Aỹem ỹo'oxoreetac, qataq saishet da Aỹem ca'ai. 41Qaq Aỹem samachiguiñi qome da so'otec da no'on namayepi, qataq ỹataqta imauec da iquiyaqteỹaxac qataq da huesota iuennataxac da so'ot da nache netalec ne'ena 'alhua.»
42Ñim Nataxala' nataqa'en, 'eeta': «Qaq dam 'eetec co'ollaq ñamaxa som lta'araic qauem ne'ena nhuo' le'ecpi, qaq nache 'eetec nataqa'en da ñamaxa qome ca 'onaxaic maye sachaxanapeguem co'ollaxa namayepi. 43Qaq ne'ena 'alhua maye qoñeetega taỹa'a da toolec, qaica ca hueta'a shiỹaxauapi qataq shiguiỹacpi, qataq loxonec na caldeopi, qalaq ỹe'eguelaxa qome da qaisheenaxana na 'alhua. 44Qaisheenaxana qome qataq qaỹo'ot aca lmalate qataq qaỹauo'o aca la'anaqte qataq nanereleguete qanqa'en caua ỹauaatraua'a da qaimen. Qaq 'era dam hualec qome na na'alhua so Benjamín, qataq naua laỹel ye Jerusalén qataq na huaqta'a't nỹecpi maye ỹotta'a't naua nañalo na Judá, ivira'a yem 'alhua maye huo'o ana qasoxonaxapi qataq ye ca'ameguepi, qataq ye huaqta'a't nỹecpi maye ỹotta'a't naua nañalo ye Néguev, cha'aye Aỹem dalaxaic qome ñaqa'en da na'achecỹaxac namayepi. Qaq 'era da ỹa'aqtac, Aỹem Nataxala'.»
