So Baruc itaxaỹaxan aso nere huaigui aso atamnaxaqui
1Qaq co'ollaq mashe ivi' soua cuatro vi'iye da lo'onataxanaxac so Joaquim som llalec so Josías da nta'a ye Judá, nache Ñim Nataxala' huo'o so la'aqtac ỹanem so Jeremías, 'eeta': 2«'Auacona qome aca nere, nache 'erelec 'enauac nam 'am sa'aqtaxaateguem co'ollaxa da talec qome na Israel qataq na Judá qataq na laỹepi ỹotta'at shiỹaxauapi, chegoqta'a co'ollaq 'am setaqtague' huetoigui som na'a'q co'ollaq nta'a so Josías, nache ivitta'a nagui. 3Saiuena'a na Judá le'ecpi da huo'otaq ỹaỹaten 'enauac nam qauempi maye huotaique da ñamaxa namayepi, nache ishet da ỹaxanec dam qauem lataxac, nache Aỹem sechoxoren qome namayepi qataq sapalaxat nam lasouaxashetpi.» 4Nache so Jeremías iỹaxana so Baruc, som llalec so Nerías, nache ỹa'axatem 'enauac nam la'aqtacpi Ñim Nataxala', nache so Baruc ỹerelec aso nere. 5Ime, nache so Jeremías 'enapega so Baruc, 'eeta': «Ña 'aumeten da souaigui, damaye ỹo'ot da saishet da saua'a añi atamnaxaqui maye lalamaqte Ñim Nataxala'. 6Qaq ỹoqo'oye 'am 'anqo'oneua'a qome añi atamnaxaqui qom nvireuo cam na'a'q maye huaigui ca qouaqchetaxac, nache 'autaxaỹaxan qome ana'ana nere maye huetalec nam 'ereguishecpi maye 'am saxatem, yaqto' na nhuo' le'ecpi qataq 'enauac nam hueta'a na huaqta'a't nỹecpi maye ỹotta'a't naua nañalo na Judá maye nvita ne'ena, na'axaỹaxana qome da la'aqtaxanaxac Ñim Nataxala'. 7Saiuena'a da ỹanem ca nachoxonnaxac Ñim Nataxala', qataq ỹaxaañi dam qauem lataxac, cha'aye da layeloxo qataq da nnogoxonaxac Ñim Nataxala' maye do'ogoxona da ỹareetalec ne'ena shiỹaxauapi, damaye ỹataqta chaqaic.» 8Nache so Baruc ỹo'ot 'enauac dam ỹamaxalec so na'aqtaxanaxanec Jeremías: nqo'oneua'a aso atamnaxaqui, nache itaxaỹaxan aso nere maye huetalec da la'aqtaxanaxac Ñim Nataxala'.
9Qaq so ca'agoxoic nueve so vi'i cinco da lo'onataxanaxac so Joaquím, som llalec so Josías, da nta'a ye Judá, nache 'enauac na lma' ye Jerusalén qataq 'enauac na laỹepi shiỹaxauapi maye chegaqa'a na laỹepi huaqta'a't nỹecpi maye ỹotta'a't naua nañalo ye Judá, qoỹenapega da nqouaqchet da dataỹot Ñim Nataxala'. 10Nache so Baruc nqo'oneua'a so nqasoxoc lta'araic aso atamnaxaqui, nache ñichiguiña so Dalaxaic Lasom, qataq naloteuga so lo'onataxanaxaqui so Gemarías som llalec so Safán, nache so Baruc itaxaỹaxan aso nere maye huetalec na la'aqtacpi so Jeremías, hua'aqchigui naqa'en 'enauac so shiỹaxauapi.
So Baruc itaxaỹaxan aso nere hua'aqchigui naqa'en so nataxala'pi
11Qaq so Micaía som llalec so Gemarías qataq laual so Safán, co'ollaq hua'aqchigui 'enauac da la'aqtaxanaxac Ñim Nataxala' maye huetalec aso nere maye itaxaỹaxaatac so Baruc, 12nache somaye nqo'oneua'a so lma' lta'araic so nta'a, tateua'a so lo'onataxanaqa' so neraxanaxanec, maye hueta'a 'enauac som 'amaqtaqaicpi nataxala'pi: So neraxanaxanec Elisama, qataq so Delaía som llalec so Semaías, so Elnatán som llalec so Acbor, so Gemarías som llalec so Safán, so Sedequías som llalec so Jananías, qataq som laỹepi nataxala'pi. 13Nache so Micaía ỹa'axat 'enauac, nam hua'aqchigui co'ollaq so Baruc itaxaỹaxaatac na huetalec aso nere, hua'aqchigui naqa'en so shiỹaxauapi. 14Nache so nataxala'pi ỹamaq so Yehudí som llalec so Netanías maye laual so Selemías, qataq so Cusí, da yaqto' 'enapega so Baruc da iroua'a somayepi asom nere maye itaxaỹaxaatac co'ollaxa, maye hua'aqchigui naqa'en so shiỹaxauapi. Qaq huaña nache so Baruc ỹacona aso nere nache nqo'oneua'a somayepi, 15nache somayepi 'enapega somaye, 'eeta':
'Anso'ooñi nache 'autaxaỹaxan ana nere.
Nache so Baruc nso'ooñi nache itaxaỹaxan aso nere, 16qaq co'ollaq choche hua'aqchigui somayepi, nache ỹataqta nlaxagui da lcolanaxa, nache namatapega't, ime, nache 'eeta':
iuen da sa'aqtaxanaxam 'enauac de'era ñi nta'a.
17Ime, nache somayepi inat so Baruc, 'eeta':
Ña qomi' 'aua'aqtaxanema cam 'eetec co'ollaq 'erelec ana'ana nere 'enauac de'era.
18Nache so Baruc ỹasat, 'eeta':
so Jeremías nasaqtauec 'enauac ne'ena na'aqtacpi, qaq aỹem nache settañi sauota'a so ỹeraxanaxat da serelec ana'ana nere.
19Nache somayepi 'enapega so Baruc, 'eeta': ¡Hua', 'am qataq ca Jeremías qanqañoxochiiñi qome, qaq no'on qome da qaica ca ỹaỹaten ca qoñeeta'a!
So nta'a Joaquím ỹavigaxat aso nere
20Som 'amaqtaqaic nataxala'pi ỹachaña co'ollaxa aso lo'onataxanaxaqui so neraxanaxanec Elisama aso nere, ime nache nqo'oneua'a so lma' lta'araic so nta'a, da yaqto' da'aqtaxanem 'enauac de'era so nta'a. 21Nache so nta'a ỹamaq so Yehudí da ỹe'eguena'a aso nere maye huetaigui aso lo'onataxanaxaqui so neraxanaxanec Elisama, qaq so Yehudí co'ollaq nviraxateuo aso nere, nache itaxaỹaxan hua'aqchigui naqa'en so nta'a, qataq 'enauac som 'amaqtaqaicpi ltauapi maye coleesop somaye. 22Qaq souaxat da mashe qanayeetaigui so ca'agoxoic nueve, nache so nta'a netaigui so lma' da huo'o na latomaxa, datatangui so laỹe' ana poqo maye 'ettangui. 23Qaq naxa da so Yehudí ima't da itaxaỹaxa'n naua tres, huo'otaq cuatro lpa'axaco na nerec, nache so nta'a ichiigui naxa irota'a so lainec, ime nache ỹasaxangui so norec maye huetangui aso poqo laỹe', qaq 'era da 'eeta'ac somaye, nache choche ivitta'a da imauec da ỹavigaxat aso nere. 24Qaq so nta'a, qataq so 'amaqtaqaicpi ltauapi somaye maye na'axaỹaxaatega co'ollaq qaitaxaỹaxaatac aso nere, somayepi saishettaxa da choche nomteguet ca lcolanaxa, qataq da ỹo'ot ca la'anaxat da nqui'ic. 25Qaq so Elnatán, so Delaía qataq so Gemarías, nachoxoreetacoto co'ollaxa so nta'a da saishet da ỹavigaxat aso nere, qalaxaye so nta'a saishet da ỹalaq, 26nacherata da ỹamaq so Jerahmeel, maye maiche llalec, qataq so Seraías som llalec so Azriel, qataq so Selemías som llalec so Abdel, da yaqto' ỹacooreua'a so Jeremías, qataq so leraxanaxanec Baruc. Qalaxaye Ñim Nataxala' ỹoxooyiñi soomaye.
So Jeremías ỹo'ot aso lỹa nere
27Qaq co'ollaq qaỹata'ague da so nta'a ỹavigaxat aso nere maye huetalec na la'aqtacpi so Jeremías, maye ỹettañi co'ollaxa so Baruc, nache Ñim Nataxala' detaxaỹot so Jeremías, 'eeta': 28«'Auauo'o qome aca lỹa nere, nache qaltaq 'avi'eguelaxalec qome da 'erelec acamaye 'enauac nam huetalec aso hua'auchiguiñi nere maye ỹavigaxat ñi Joaquim maye nta'a na Judá. 29Ime, nache qoneta': 'Era da la'aqtac Ñim Nataxala': 'Am 'auavigaxat co'ollaxa aso nere, qataq 'auauotaique da 'auaconeua'a co'ollaxa so Jeremías, souaxat da ỹerelec asa'aso nere, da ñi nta'a ye Babilonia anac qome qaica ca iuatta'a, da yaqto' ilaxachigui ne'ena 'alhua, nache qaica naqa'en ca no'onañi na shiỹaxauapi, qataq nam shiguiỹacpi. 30Qaq ỹoqo'oye aỹem Nataxala', 'am shenapega 'am Joaquím maye 'am nta'a na Judá, na 'am chegoxoguetpi qaica qome ca nso'ongui añi nso'onaxaqui so David. Da 'aro'ocỹaxac qalaq hueta'aguet qome na ntap ye na'a'q, qataq ana aloñi ye pe, 31'am qataq na 'auachegoxoguetpi, qataq nache 'ena'am nam 'amaqtaqaicpi maye 'artauapi, sauo'o qome ca nhuaxanaguec souaxat na lasouaxashetpi. So'ot qome da qami' taleguete, qataq 'enauac na shiỹaxauapi maye hueta'a na Jerusalén qataq na Judá, 'enauac nam qauem maye sa'axatta'a co'ollaxa, cha'aye Aỹem saqaualaqaiguet co'ollaxa.»
32Qaq huaña nache so Jeremías, ỹacona aso lỹa nere, nache ỹanem so Baruc maye leraxanaxanec, nache somaye ỹiyiñi co'ollaxa 'enauac nam la'aqtaxanaxacpi so Jeremías, qaq damaye, 'eeta': 'Enauac nam huetalec aso nere maye ỹavigaxat co'ollaxa so nta'a Joaquim, qaq so Jeremías qaltaq nquigaxattec na qalota laỹepi maye 'eeta'am na huetalec aso hua'auchiguiñi nere.
