So Jeremías qaỹasaxangui aso nshere maye deqaqta
1Qaq so Sefatías som llalec so Matán qataq so Gedalías som llalec so Pasjur qataq so Jucal som llalec so Selamías qataq so Pasjur som llalec so Malquías, hua'aqchiyigui co'ollaxa so Jeremías da detaqtapoigui so shiỹaxauapi de'era la'aqtac maye, 'eeta': 2«Ñim Nataxala', 'enapec: Cam no'onaña na huaqta'a't nỹecpi nache camaye ileuaigui qome ca alaataxac, huo'otaq ca nqouaxa, huo'otaq ca napiina. Qalaxaye cam ca'ai namaye, qataq nañaneguet na caldeopi, nache camaye nca'alec. 3Ñim Nataxala', 'eeta': Ne'ena huaqta'a't nỹecpi loxonec qome na nalleppi ñi nta'a ye Babilonia. Ñimaye ỹacona qome namaye, nache qaica ca ishet da naneltaxan.»
4Qaq huaña, nache so 'amaqtaqaicpi nataxala'pi detaxaỹot so nta'a, 'eeta':
De'era ỹale iuen da qaỹalauat, cha'aye naua la'aqtaqa ỹo'ot da qaica ca la'añaxac nam alleppi qataq nam laỹepi shiỹaxauapi maye ñaq hueta'a ne'ena huaqta'a't nỹecpi. De'era ỹale saishet da nmittaique ca laỹamaxa ne'ena nhuo' le'ecpi, nacherata da ỹasaxalec da qauem.
5Nache so nta'a Sedequías ỹasateguet somayepi, 'eeta':
Aja', ỹaỹamaqchiguiñi, qauo'ochec damaye cam qoñeetapeguec. Cha'aye aỹem saishet da qami' sataỹa'agueta.
6Qaq huaña nache somayepi ỹaconeua'a so Jeremías, nache ỹasaxangui aso nshere 'etaxat laỹe' maye lalamaqte so Malquías maye naña so qasoxoc maye nauanaxanaqa'. Qaq somaye qaỹauota'a so lquet da qaỹasaxañi, qaq cha'aye aso nshere ye qaica ca 'etaxat, nda'a't na nshaxa, nache so Jeremías lhuotañi da tangui so nshaxa.
7Qaq huo'o so Etiopía le'ec le'enaxat Ébed Melec, som lpe'et so nta'a, somaye la'axaỹaxac co'ollaxa da so Jeremías qaỹasaxangui aso nshere. Qaq se'eso na'a'q so nta'a huo'o so ltaxaỹaxac huaña so Nasom so Benjamím. 8Nache so Ébed Melec, ca'ai so lma' lta'araic so nta'a, nache nqo'ona so nta'a da 'enapega, 'eeta':
9'Am nta'a, de'era ỹo'otec se'eso ỹalleppi ñi Jeremías, damaye ỹataqta lta'araic nalaataxanaxac. Somayepi ỹasaxangui añi nshere ñi Jeremías, qaq ñimaye mashe ileetapigui' souaxat na lqouaxa, cha'aye mashe qaca aca nauole 'ayiiña ne'ena huaqta'a't nỹecpi. 10Nache so nta'a saỹaỹaloxon da ỹamaq so Ébed Melec da nnaicapegue' naqa'en so treinta ỹalleppi, da yaqto' nqatsheguem so Jeremías maye huetangui aso nshere yaqto' saishet da ileu. 11Nache so Ébed Melec ỹauec se'eso ỹelleppi da taỹa so laỹe' na nogoxot maye naña so lma' lta'araic so nta'a, nache ỹacona so hualoq laỹepi maye ltoxoicpi, nache icoñeraua'a so lañec, ime nache ỹasaxaña so Jeremías, 12nache 'enapega, 'eeta': Ne'ena hualoq laỹepi 'aỹa'anaguilo naua 'arsaqtaqui' yaqto' saishet da 'am ique'emaqchet na nañec.
Nache so Jeremías ỹo'ot damaye. 13Qaq huaña nache so ỹalleppi naviguisheguem se'eso nañec, nache nqatsheguem so Jeremías. Qaq co'ollaq, ime de'era, nache so Jeremías hua'a so qasoxoc maye nauanaxanaqa'.
So Sedequías damaxasoxoneuga so Jeremías
14Qaq so nta'a Sedequías damaxasoxoneuga co'ollaxa so na'aqtaxanaxanec Jeremías, da qaỹauegueua'a ye hueta'a somaye, qoỹanaña so lỹa ñegueuo aso atamnaxaqui. Qaq huaña yemaye nache so nta'a inat, 'eeta':
Aỹem sauo'o da inataxanaxac, qaq 'am no'on da saishet da huo'o ca 'oxottañi da aỹem 'auasateguet.
15Nache so Jeremías ỹasat, 'eeta': Aja', da aỹem 'eesa ca 'am sa'axatem, nache 'am aỹem 'auamaxasoxoolec da aỹem qaỹalauat, qaq da sauo'o ca iqataxac nache 'am saishet da aỹem 'aualaxaguet.
16Qalaxaye so nta'a Sedequías, ỹoxotchiguiñi so ỹan la'aqtac maye ỹanem so Jeremías, 'eeta':
'Am sanem da ỹa'aqtac qataq Ñim Nataxala', maye qomi' ỹanema da qanachaalataxac, da aỹem saishet qome da 'am samaxasoxoolec da 'am qaỹalauat, qataq saishet da 'am saneguet da lhuaqỹaxac nam huotaique da 'am ỹalauat.
17Nache so Jeremías, 'enapega so nta'a Sedequías, 'eeta':
Ñim Nataxala' maye Qaica ca Ỹaqalanapec, qataq Natamnaxala' na Israel le'ecpi, 'eeta': Da 'anañanot nam ltauapi ñi nta'a ye Babilonia, nache 'am qataq na 'aỹa'alaqpi nca'alec qome, qataq ne'ena huaqta'a't nỹecpi saishet qome da qoỹegueua'a. 18Qalaxaye da saishet da 'anañanot namayepi, nache na caldeopi loxonec qome ne'ena huaqta'a't nỹecpi, nache ỹavigaxat qome, qaq 'am qalaq sa 'aushet qome da 'ananeltaxan.
19Nache so Sedequías ỹasateguet somaye, 'eeta': Aỹem huo'o da icolanaxa na maiche judiopi maye huaxaiguet na caldeopi, cha'aye da aỹem loxonec namayepi, nache aỹem ỹachoxoren da aỹem ỹalauat. 20Nache so Jeremías ỹasateguet somaye, 'eeta': 'Am nta'a, ñaq 'aualaxaguet taxa da la'aqtac Ñim Nataxala' maye 'am sa'aqtaxaateguem, yaqto' saishet da 'am loxonec namayepi qataq qaica ca machaqca, nache 'anca'alec. 21Qaq da sa 'anañan, nache 'era da aỹem ỹachaxana Ñim Nataxala' maye yo'oq qome: 22'Enauac na 'alpi maye no'onaigui ñi lma' lta'araic ñi nta'a, qanqatec qome nache qoỹanem na ltauapi ñim nta'a ye Babilonia, qaq anamayepi qome maiche, 'eeta':
Nam ỹataqta nauochaxauapi ñi nta'a qalaq ỹatenachet nache loxonec,
qataq hua'aqta'a ñimaye da petangui na nshaxa,
qataq saishet da qochetega.
23Qaq so Jeremías, nache queto'ot da 'eetega so nta'a, 'eeta':
'Enauac na 'alpi, qataq na 'aỹa'alaqpi 'am nta'a, namayepi loxonec qome na caldeopi, qaq 'am nta'a saishet qome da 'auañoxot da 'ananeltaxaneguet namayepi, nacherata da 'am qoỹaneua'a ñi nta'a ye Babilonia, qaq ne'ena huaqta'a't nỹecpi qalaq qoỹegueua'a qome. 24Qaq huaña nache so Sedequías ỹasateguet so Jeremías, 'eeta': Da 'auauotec da 'anachaalataxac, nache saishet da huo'o ca 'aua'aqtaxanem de'era ten qom 'am qaỹalauat. 25Cha'aye na itauapi nataxala'pi qom ỹaỹaten da 'am ña'aqtaxaatague', nache 'am naỹa qome da 'am inat ca 'eetec cam aỹem 'aỹa'anem 'ara'aqtac, qataq cam 'am sanem ỹa'aqtac, qataq 'am ỹachaxanapeguem da 'am nca'alaxatec, nache 'am iỹaxanot qome da 'aua'axat 'enauac damaye. 26Qalaxaye 'am qome nacherata da 'aua'axatem namayepi da aỹem 'auanaua'a da aỹem 'anachoxonnot da saishet da qaltaq 'am samaxa ye lma' so Jonatán, da yaqto' saishet da 'aleuaña yemaye. 27Qaq ipacchigui co'ollaxa da so ltauapi so nta'a nqo'ona so Jeremías, nache inattac, qalaxaye somaye ipagaqchiichigui da la'aqtac maye ỹamaxalec so nta'a. Qaq huaña nache qoỹaxaañi da qainattac, cha'aye qaica co'ollaxa ca hua'aqchiguilo co'ollaq detaqtega't. 28Qaq so Jeremías nache hueta'a co'ollaxa so qasoxoc maye nauanaxanaqa', nache ivitta'a so na'a'q co'ollaq noxonec ye Jerusalén.
