Qaỹa'axata'a da 'eetec qome ye Moab
1Da la'aqtac Ñim Nataxala' maye Qaica ca Ỹaqalanapec, Ñim Natamnaxala' na Israel le'ecpi da ỹa'axata'a da 'eetec qome ye Moab, 'eeta':
«¡Qaq choxoraxaso' yem huaqta'a't
nỹecpi ye Nebo, ỹataqta nlachiguiñi qome!
¡Qaq ye Quiriatayin qalaq qanhuo' qome
nache qaica ca la'amaqchec qanqa'en
Qataq nam lpaqtaxatpi qalaq
qailaxachigui qome!
2Da llo'oxoyec ye Moab qalaq mashe imeuo.
Ye Esbón maye mpa'aguenaxauapi yemaye,
qalaq mashe lapaxañi nam
lhuennataxacpi da yaqto' ye Moab
imeuo na hueta'a shiỹaxauapi.
Qaq 'am Madmena nataqa'en
'am dolachigui qome,
cha'aye ca alaataxac saishet da 'am ỹaxaatac qome.
3Qaq ye Joronayin qalaq
chegoqchiguiña qome ca na'alaxac, 'eeta':
‹¡Ỹataqta imauec da qanlaxatchiguiñi!›
4Ye Moab ỹataqta nlachiguiñi,
da na'alaxac qalaq ivira'a ye Sóar souaxat da qui'ic.
5Qaq na quetasheguemgue na loigue ye Luhit
qalaq saq vi'iiguet da nnoinaxac,
qataq na'alaqtapiguiñi da nqui'ic nam naỹaña
ye Joronayin souaxat da nlachiguiñi ye Moab.
6¡Ñaq qauataiuec qome!
¡Maicheye cam ishet da nca'alec!
¡Qaue'enaxache aca qo'oipaqole huo'o
ana le netalec ca toolec 'alhua!
7'Am Moab, 'aupe'etega
co'ollaxa da 'ara'añaxac,
qataq da 'arsallaxa,
qalaxaye nataqa'en 'am noxonec qome.
Ñi 'anatamnaxala' Quemós
qaỹauega qome ca lỹa 'alhua,
caueegue' qanqa'en na ltaxaỹaxanaxanecpi
qataq nam shiỹaxauapi maye 'amaqtaqaicpi.
8Qaq 'enauac qome na huaqta'a't
nỹecpi maye ỹotta'a't naua nañalo qanlaxaañi,
nache saishet da no'onañi
ca 'oonolec namayepi.
Ye ca'amegue qataq ye pa'asheguem nalochiguiñi 'alhua
qalaq nlachiguiñi qome.
Qaq 'era da ỹa'aqtac Aỹem Nataxala'.
9Qauqataxañiỹai' qome aca
nhuachiqui ye Moab cha'aye yemaye
taỹa'a da qailaxachigui,
nam huaqta'a't nỹecpi maye ỹotta'a't
naua nañalo maye hueta'a yemaye,
qalaq nlachiguiñi qome,
nache qaica qome ca netaña yemaye.»
10¡Ỹataqta qauem qome ca talec cam saishet da nasapattelec da ỹo'ot dam no'onataxanaxac maye damaxasoxoolec Ñim Nataxala'! ¡Ỹataqta qauem qome ca talec cam sa nashen da ỹalegueua'a da nalaataxanaxac!
11Ye Moab nache 'eetai' naxa dam chegoqta'ague da huetaigui da l-lagaxayec, saỹauano' da qaỹauega ca ỹaqa'a 'alhua. 'Eeta'am ca lataxa maye saishet da qairaxanapigui' da qaicottangui ana ỹomaxaquipi, qaq ỹoqo'oye saishet da deqat da lamaicỹaxac qataq da no'on laitaỹaxac.
12Qalaxaye Ñim Nataxala' da la'aqtac, 'eeta': «Anacta ca na'a'q, da Aỹem ñamaq qome ca shiỹaxauapi da yaqto' icoyingui aca lỹa laỹe' ne'ena lataxa, qaq acam qui'itchigui laỹe'pi qalaq ilaxachigui qome. 13Qaq huaña qome nache ye Moab, nomteguet da la'agaxa souaxat ñi Quemós, 'eeta'am na Israel le'ecpi co'ollaq nomteguet da la'agaxa souaxat so Betel maye ỹacheto'ot co'ollaxa da naquitaxac.
14Qaq qami' Moab le'ecpi, saishet qome da qoñeeta':
‹Qomi' qaramchiguilo, qomi' alaataxaicpi 'añaxaicpi.›
15Cha'aye mashe nayeetai' nam ilaxachigui qome ye Moab,
qataq nam huaqta'a't nỹecpi maye ỹotta'a't na nañalo,
qataq na no'on nsoxoppiolec qalaq ileu qome.
Qaq 'era da la'aqtac Ñim Nta'a, maye le'enaxat Nataxala' maye Qaica ca Ỹaqalanapec.
16Ye Moab mashe nayeeta'a da qanlaxaañi,
dam qauem maye talec qome, mashe huotaique da nvi'.
17Qaq qami' maye qarhuoreuai ye Moab qataq 'enauac qami'
maye qauaỹachiñi da na'aqtaguec yemaye, qanỹeñiilec qome yemaye qataq, qoñiita':
‹¡Ña qauloỹa yemaye ỹataqta qailaxachigui da la'añaxac,
yem ỹataqta 'añaxaic co'ollaxa qataq ỹo'oxoraic!›
18'Am huaqta'a't nỹecpi Dibón, ñaq 'aunoteeguesop nam qoueta'a maye huo'o da llo'oxoyec,
nache 'anso'onangui na 'alhua maye ỹataqta deqaqta,
cha'aye nam ilaxachigui na Moab mashe 'am nayeeta'a
da yaqto' ilaxachigui na 'arpaqtaxanaxatpi.
19Qaq 'am huaqta'a't nỹecpi Aroer, ñaq qoua'a qome na loigue na nqa'aic, nache 'aumeenaxan,
qataq 'aunat nam lca'alaxaicpi da negue'to' dam qanayeuaigui.
20Ye Moab huo'o da la'agaxa, qataq nlaxagui da lcolanaxa.
¡Ñaq qaualaqai, qataq qanỹeñiilec yemaye!
¡Qaua'aqtaxañim ye Arnón da ye Moab ỹataqta dolachigui!»
21Mashe nvi' da nhuaxanaguec maye qaitaxaỹa co'ollaxa da talec nam huaqta'a't nỹecpi maye hueta'a ye nalochiguiñi 'alhua: Ye Holón, Jahas, Mefagat, 22Dibón, Nebo, Bet Diblatayin, 23Quiriatayin, Bet Gamul, Bet Megón 24Queriot, Bosra qataq 'enauac nam huaqta'a't nỹecpi maye ỹotta'a't na nañalo ye Moab, nam saqaỹapeque qataq na qaỹoqtapi.
25Ñim Nataxala' da la'aqtac, 'eeta':
«Da na'añaxataxac ye Moab mashe qaica, qataq da la'añaxac mashe imeuo.»
26Qautaqcheche qome ye Moab, cha'aye yemaye dataỹa'aguet Ñim Nataxala'.
Qaq huaña nache ye Moab ncocatapiguingui na lolaxat, nache 'enauac qome da qaỹe'eetac.
27'Am Moab, ¿peta'a saq 'avi'iitac naxa na le'ecpi Israel,
qataq da 'autaqtega qalaq ỹataqta sa 'auaỹamaxatapec, 'eeta'am 'anqa'en ca cachaxaic?
28Qami' maye qoñiitaña na Moab, qoquiỹa'ai qome na huaqta'a't nỹecpi,
nache qonqo'oñiỹa ana coma'pi da qoñiỹaña, qoñeeta'am
na qoto'pi maye ỹanalec na lpata'cpi naua nashecchiyiñi laỹel ana coma'pi.
29Qomi' sauattonaqta da lta'araic ño'oxonnaxac ye Moab,
da napagaqaanaxac, nachaqaanaxac,
qataq da na'amqaanaxac.
30Nataqa'en Ñim Nataxala', ỹauatton da qaica ca 'auren,
qataq da 'año'oxonnaxac, qalaxaye damaye qaica ca 'auachegoxotaigui.
31Qaq ỹoqo'oye aỹem ñeỹen, qataq saquicota qome,
souaxat 'enauac na nhuo' le'ecpi ye Moab, qataq nam ỹalleppi ye Quir Jeres.
32Aỹem 'am ñeỹeelec qome, 'am uva lma' maye qoueta'a na Sibemá,
napactelec da ñenoinaxac co'ollaq ñeỹeeteguelec ye Jazer.
Ana 'arcouepi qalaq napacalec co'ollaxa aso auaxai, nache ivira'a ye Jazer.
Qalaxaye nagui ana ala na uva maye mashe huotaique da qanqat qalaq dolachigui qome.
33Mashe saishet da qaỹa'aqtega ca na'alaxac souaxat da namaicỹaxac,
yem nanaxanaqa'pi ye Moab.
Nam naỹamaqtaxaquipi na lataxa qalaq mashe qui'itchigui.
Qataq mashe qaica ca pigui ana uvapi da yaqto' ỹo'ot na lataxa,
qataq qaica ca do'onaxaatac souaxat da machiguiñi.
34Na shiỹaxauapi ye Hesbón qalaq ỹa'alaqtac souaxat da nqui'ic,
qaq da la'alaxac qalaq ivira'a ye Eleale qataq ye Jahas.
Qataq chegoqchiguiña ye Sóar, nache ivira'a ye Joronayin qataq ye Eglat Selisiyá,
cha'aye ivira'a ana 'etaxat laỹe'pi ye Nimrín da deqaqta.
35Ñim Nataxala' da la'aqtac, 'eeta':
«Aỹem selaxachigui qome na shiỹaxauapi ye Moab,
nam tasheguema naxa ana lcomaraxalatepi maye huaña na natamnaqa'pi
da natamnot na ỹaqa'a atamnaxala'pi,
qataq da ỹanot na lachetaqtaxanaxatpi qataq nam lchenaxanaxatpi
maye ama na laita nam natamnaxala'pi.»
36Qaq ỹoqo'oye añi iquiyaqte dachottai' souaxat ye Moab qataq na ỹalleppi ye Quir Jeres,
sauota'a ana ỹasheere maye lataxaua da qaỹatategueua'a ca leuaxaic,
cha'aye dam lsallaxa maye lapootasheguem co'ollaxa nagui deqat.
37'Enauac namarec na lqaicpi, qataq npetec ana lqa' lauepi,
qataq 'enauac ỹauo'o na lque'emaxapi naua lhuaxaye,
qataq ỹaayiñi naua alogo maye lasouaxaqui'.
38«'Enauac na pa'asheguem na nỹecpi, qataq 'enauac na nqa'aicpi ye Moab,
da nacherata da noinaxac qaỹa'aqtega, cha'aye Aỹem selaxachigui ye Moab,
'eeta'am ñaqa'en aca naco'oña da mashe qauem.
Qaq 'era da ỹa'aqtac Aỹem Nataxala'.»
39Qanỹeñiilec qome ye Moab, cha'aye yemaye nlaqaalec da lchec,
ye Moab ỹe'eguelaxague da chegaqa'ague ỹachetec da la'agaxa,
nache na lauoreuapi ỹe'eguelaxa da deqaiga qataq saisheteguet yemaye.
40Ñim Nataxala', 'eeta':
Na mpa'aguenaxauapi ye Moab anac da iloquiaxan yemaye,
'eeta'am ca vi'ic da ipegueere'c naua laua't.
41Na huaqta'a't nỹecpi
qataq na lpaqtaxatpi loxonec
qome nam mpa'aguenaxauapi.
Qaq que'eca na'a'q na alaataxaicpi ye Moab
qalaq iviloxol qome 'eeta'am aca 'alo da deco'otac.
42Qaq ye Moab qailaxachigui qome,
nache qaica qome na shiỹaxauapi,
cha'aye yemaye dataỹa'aguet
co'ollaxa Ñim Nataxala'.
43Qaq ỹoqo'oye Aỹem Nataxala',
da ỹa'aqtac, 'eeta':
Na lma' ye Moab 'eeta'am qome
na shiguiỹacpi da icaatac na 'ipiaxaicpi,
huo'otaq da iteetapeeguet
da lchec da tangui aca nshere
huo'otaq aca nqoina.
44Qaq cam ỹet ca 'ipiỹaxaicpi
qalaq tangui qome aca nshere,
qaq ca ishet da nnoxoosheguem
da chegaqangui aca nshere,
qalaq tangui qome aca nqoina,
cha'aye Aỹem talec qome ñaqa'en ye Moab
ca nhuaxanaguec qom ivita ca laloqo'.
Qaq 'era da ỹa'aqtac Aỹem Nataxala'.
45«Qaq huo'o qome na datauec qalaq qaica ca la'añaxac,
nache jec da ỹe'eguena da deuaxaỹot ye Hesbón,
qalaxaye ye Hesbón yem lalamaxat
so nta'a Sijón yemaye ỹavictac
qaq na norec nache nquictauec
nache ivira'a da ỹavigaxat
añi qasoxonaxa ye Moab,
yem nhuo' le'ecpi maye 'oopaicpi.
46¡'Agai, 'am Moab!
¡Qami' nhuo' le'ecpi ye Quemós mashe qami' deqa't!
¡Na 'aỹa'alaqpi ỹallippi qataq na 'alpi
qaỹauega qome ca ỹaqa'a 'alhua
da ncoñeteguishecpi!
47Qalaxaye qom ime de'era
nache Aỹem ñaralaxat qome da
na'achecỹaxac ye Moab.
Qaq 'era da ỹa'aqtac Aỹem Nataxala'.»
Qaq 'ena nam tachiguiña da lhuaxanaxanaxac Ñim nataxala' maye talec ye Moab.
