Qaỹa'axata'a da noxonec Ye Babilonia
1Qaq 'era da la'aqtac Ñim Nataxala' maye ỹanem so Jeremías da ỹa'axata'a da talec qome ye Babilonia, yem lma' so caldeopi, 'eeta':
2«Qaua'axachem qome de'era nam ỹotta'a't shiỹaxauapi.
Qanauaxaỹaxañiisheguem qome aca la'anaqte,
qaua'axacheeuec saishet da qo'oxocheetañi,
nacherata da qoñeeta': ‹¡Ye Babilonia noxonec qome!
¡Ñi atamnaxala' Bel qalaq huo'o qome da la'aloxo,
qaq ñi atamnaxala' Marduc qalaq nlaqchigui da lcolanaxa!
¡Nam lqolacpi qataq na saq'en natamnaxala'pi
qalaq qane'eetapigui qataq nlaqchigui da lli'iỹaxa!›
3Cha'aye chegaqa'ague qome da sheu'
da anac ca ỹotta'a't shiỹaxauapi da iloquiaxan yemaye,
nache ỹe'eguelaxata qome da toolec ye na'alhua namayepi.
Nache qaica qome ca shiỹaxauapi, huo'otaq ca shiguiỹacpi
da ỹe'eguelaxa da nalec yemaye, cha'aye 'enauac qome da datauec.»
Da lle'eguelaxasoxoc na Israel le'ecpi
4Ñim Nataxala', 'eeta': «Que'eca na'a'q nache na shiỹaxauapi maye lma' ye Israel qataq ye Judá nỹeeta'aguet qome da anac da Aỹem nmitaique, Aỹem maye Aỹem Lataxala' qataq Natamnaxala'. 5Denataxaataique qome ca nqa'aic maye taỹa'ague da Sión, ime nache jec da taỹa yemaye nache, 'eeta': ‹Ñeqo'onaxa Ñim Nataxala', nache sauoqo'o ca chochaq tatec qanaỹamaxataxac maye saishet qome da icoua'ai Ñimaye.›
6Nam ỹalamaxat nhuo' le'ecpi, 'eeta'am co'ollaxa aca qaguetapi da deqat, cha'aye so qagueta lo'opi isomaxanaqchet co'ollaxa, nache ỹo'ot da chochaq quetapeguelec ana qasoxonaxapi, ca'ai añi 'oonole qasoxonaxa qataq nqo'ona añi lỹa qasoxonaxa, choche ivitta'a da icoua'ai aso laỹe'. 7Na mpa'aguenaxauapi naxa da ilalec, nache chec nache, 'eeta': ‹Saishet da qarasouaxashet damaye, cha'aye namayepi huo'o da lasouaxashet hueto'ot Ñim Nataxala', maye qaica ca iueetaique naqa'en namayepi, qataq hueto'ot da naquitaxac som hua'au lta'alpi.›
8¡Qoquiỹa'ai qome na Babilonia, maye lma' na caldeopi!
¡Qaunoxoñeeuec qome qalaq qoñeeta'am ca lca'ataxala' ana qaguetapi!
9Cha'aye so'ot qome da huo'o ca anac shiỹaxauapi
cam 'añaxaicpi nhuo' le'ecpi maye chegaqa'ague da sheu'
da iloquiaxan ye Babilonia.
Camayepi naloguiñi qome nache loxonec yemaye.
Cha'aye que'eca alleppi ỹataqta ỹaỹaten da nalaataxac,
da ỹaỹenec ana lchecnapi qalaq saishet da depe'enaxan.
10Nache ỹataqta nhuotta qome na caldeopi,
ivitta'a da ỹataqta ỹaguec na lhuotaxanaxat.
Qaq 'era da ỹa'aqtac Aỹem Nataxala'.»
Ye Babilonia noxonec
11Qami' caldeopi maye qanhuoyeeta co'ollaxa ye ỹalamaxat nhuo' le'ecpi
¡ñaq qauamaichiguiñi qome qataq qantoñiỹapigui'!
¡Qauparenaxañeetai' qome qoñeeta'am aca huaca llale
da quetaigui na 'auaqpisat!
¡Qataq qauachemnaxañeetai' qoñeeta'am ca caaỹo!
12Qalaxaye na qana'alhuai qataq na huaqta'a't nỹecpi
maye qarañoqo'oi, namaye nlaqaalec qome da na'agaxa.
Qaq nachena qome nam pa'atec nam ỹotta'a't shiỹaxauapi
da toolec maye deqaqta qataq qaica ca ñaxaalec.
13Cha'aye salemata qome, nache so'ot da qaica ca hueta'a namaye,
nache ỹataqta imauec qome da toolec ñaqa'en.
Nache 'enauac nam nateuga yemaye, ỹataqta huo'o qome da lcolanaxa,
qom ila'a da nhuaxanaguec maye talec yemaye.
14¡Ña qanaỹamaxache qami' checnec lo'opi,
nache qauconñiisop da qauloquiaxañi ye Babilonia!
¡Qauaỹiñi yemaye qauroilec 'enauac ana qarchecnaipi,
cha'aye huo'o da lasouaxashet hueto'ot Aỹem!
15¡Qauconñiisop yemaye nache qaua'alqaitalec da alaataxac, qoñeeta'!
¡Ye Babilonia mashe nañan!
¡Mashe hua'axañi ana lalloxolatepi
qataq qalagoxouec na lpaqtaxanaxatpi!
¡Qaq 'era da so'otec da she'eguelaxateguet yemayepi!
¡Ñaq qavi'eguelaxacheeguet qome,
nache qaue'enaxachiichigui dam ỹo'ot co'ollaxa namayepi!
16Ye Babilonia saishet qome da qano'onaxachiỹalec
cam danaxan huo'otaq ca nqat na ala na lañiguishec.
Qaq nam chegaqauecpi qom ila'a que'eca alaataxac,
nache ỹe'eguelaxa ca maiche na'alhua,
qaq ñi 'oonolec ỹe'eguelaxa ca maiche lma'.
So Israel le'ecpi ỹe'eguelaq
17Na Israel le'ecpi, 'eeta'am aca qagueta da isomtac souaxat da icaatac na llonpi. Qaq hua'auñi co'ollaxa da chec namayepi ñi nta'a ye Asiria, ime qaltaq nabucodonosor maye nta'a ye Babilonia nache ilaxachigui na lpi'inecpi. 18Qaq ỹoqo'oye Aỹem Nataxala', maye Qaica ca Seqalanapec maye Natamnaxala' na Israel le'ecpi da ỹa'aqtac, 'eeta': «Sauo'o qome ca nhuaxanaguec ñi nta'a ye Babilonia qataq yem na'alhua, 'eeta'am da sheetec co'ollaxa so nta'a ye Asiria. 19Nache na Israel le'ecpi so'ot qome da ỹe'eguelaxa ye maiche na'alhua, qaq huaña nache 'eeta'am ana qaguetapi da huetangui na aloq 'auaqpi da hueta'a ye Carmelo qataq ye Basán, qataq aye qasoxonaxapi maye huaña ye Efraín qataq ye Galad. 20Qaq 'era da ỹa'aqtac Aỹem Nataxala', 'eeta': Que'eca na'a'q nache na Israel le'ecpi qataq na Judá le'ecpi huesoueeguesop qome na lasouaxashetpi, cha'aye Aỹem sechoxoren qome cam ñaq nca'altauec.»
Da nanoxonaguec ye Babilonia
21¡Qauloquiaxañi na hueta'a ye 'alhua Meratayin qataq nam lma' ye Pecod!
¡Qaucañiỹapec qome nache ỹataqta imauec da qanlaxachiiñi!
¡Qaualaqaiguet qome 'enauac da ỹamaxasoxonaxac.
Qaq 'era da ỹa'aqtac Aỹem Nataxala'.
22Yi'iye 'alhua mashe qaỹa'aqtega da l-lamaxa da 'alaataxac,
qataq da l-lamaxa na qalota qailaxachiguipi.
23¡Ye Babilonia maye 'eeta'am
aca ntoqnaxanaqte 'enauac ana 'alhua,
yemaye mashe dolagui, nache ndotrec naua laỹelolqa!
¡Na ỹotta'a't shiỹaxauapi qalaq nomteguet
da lli'iỹaxa da ila'a dam qauem maye talec ye Babilonia!
24'Am Babilonia, maiche 'auo'ot co'ollaxa aso 'arqoina,
nache sa 'ananoma da maiche 'angui asomaye.
Nache qouangui da 'am loxonec,
souaxat da 'auataỹa'aguet Ñim Nataxala'.
25Ñim Nataxala', ỹauatoigui ñi laỹe' na lo'ogoxonaxatpi,
nache nqatec nam lo'ogoxonaxatpi da cha'aye dalemata,
cha'aye Ñim Nataxala' maye Qaica ca Ỹaqalanapec
huo'o dam ỹo'ot da talec naqa'en na caldeopi.
26¡Ñaq qauloquiaxañi qome yemaye qaunoxochiỹaua'a!
¡Nache qauauachiỹoiguilo qome naua laỹamaqtaxanaxaqui'!
¡Qataq qalapoñiisheguem na shiỹaxauapi nache qaulaxachiigui!
¡Nache saishet qome da huo'o ca nca'altauec qanqa'eñi!
27¡Qaualauache 'enauac na nalleppi,
nache qauaviqueuga ca nalaataxanqa'!
¡Choxoraxaso' namayepi!
¡Mashe nvita nam na'a'q qataq ye laloqo' da nhuaxanaguec!
28Na shiỹaxauapi 'eltaxaicpi maye chegaqa'a ye Babilonia ivita ye Sión, nache ỹa'axattac da 'eetec Ñim Nataxala' Ñim Qanatamnaxala' dam Ñimaye ỹanem dam naigui da ỹo'ot na lma' ye Babilonia, souaxat dam ỹo'ot co'ollaxa da ilaxachigui aso atamnaxaqui.
29¡Ñaq qauỹaxañiỹa 'enauac na checna lo'opi,
da yaqto' iloquiaxan ye Babilonia!
¡Qanauañi' naua loiguiye ye huaqta'a't nỹecpi,
yaqto' qaica ca ishet da datauec!
¡Qausheechiñiiguet dam ỹo'ot co'ollaxa yemaye!
¡Qauo'ochec yemaye da ipacchigui qanqa'eñi dam ỹo'ot co'ollaxa!
Cha'aye yemaye ỹataqta Aỹem sairen co'ollaxa,
Aỹem Nataxala' maye Qui'itta Natamnaxala' na Israel le'ecpi.
30Qaq ỹoqo'oye nam lalamaxatpi nsoxoppiolec
huetangui qome na nqa'aicpi da ileu,
qataq 'enauac na nalleppi alaataxaicpi ileu qome que'eca na'a'q.
Qaq 'era da ỹa'aqtac Aỹem Nataxala'.
31Ñim Nataxala' maye Qaica ca Ỹaqalanapec, 'eeta':
Qami' ỹotta'a't shiỹaxauapi maye qaica ca qanỹeñi,
Aỹem qami' sataỹa'agueta, mashe ivita na na'a'q
qataq na laloqo' da sauo'o ca qanhuaxanaguiqui.
32Qami' ỹotta'a't shiỹaxauapi maye qaica ca qanỹeñi,
qaupogolaxañiiñi qome nache qoviỹañi,
nache qaica ca qami' naviguiyeshegue'm.
Aỹem savigaxat qome 'enauac na 'aralamaxat huaqta'a't nỹecpi
maye ỹotta'a't naua nañalo,
qaq que'eca norec nlaxatchiguiñi
qome 'enauac nam 'am coleesoppi.
33Ñim Nataxala' maye Qaica ca Ỹaqalanapec, 'eeta': «Na nhuo' Israel le'ecpi qataq na Judá le'ecpi, nque'etaxaatapigui da qaipataqta'a't. Na mpa'aguenaxauapi namayepi icoñettai' nache saishet da ỹaxanec. 34Qalaxaye na lca'alaxaqui namayepi, namaye ỹataqta 'añaxaic, nam le'enaxat Nataxala' maye Qaica ca Ỹaqalanapec. Namaye pa'aiguet qome da ỹo'otec namayepi ca nalochiguiñi lataxac, qataq nda'a qome ca nlagaxayec ne'ena 'alhua, qaq cam lchec qalaq talec naqa'en na lma' ye Babilonia.»
35Ñim Nataxala', 'eeta':
«Qanalaate' qome ye Babilonia qataq nam lma' yemaye!
¡Nam lataxala'pi qataq nam ỹaanaxanaxaicpi maye hueta'a yemaye!
36¡Qanalaate' qome na ilaviigui ca lỹa,
yaqto' ỹe'eguelaxa da huo'o aloic!
37¡Qanalaate' qome na nalleppi namayepi
qaq iviloxol qome souaxat da lcolanaxa!
¡Qanalaate' qome na netalec na caipi
qataq na netangui ana naigonapi!
¡Qanalaate' qome na nalleppi maye qaisheeten:
yaqto' ỹe'eguelaxa da 'eeta'am aca 'alo da ñi'i!
¡Qailogui' qome nache qaiuotaxanec nam no'on logoxoshetpi!
38Qaq 'enauac ana npaxaatasheguem na le'ec 'etaxat
maye hueta'a yemaye qalaq deqaqa qome.
Cha'aye yi'iye 'alhua Babilonia yemaye hueta'a
na nqolacpi maye ỹataqta qaiqaiga,
qaq nachena nam ỹasouaxat da deqat da ntoonaxac yemayepi.
39Qaq ỹoqo'oye ye Babilonia, nache lanataqa' qome na copaicpi qataq ana huaxaỹaxapi, qataq nache hueta'a qome yemaye na mañecpi. Nache saishet qome da qaltaq ỹe'eguelaxa da qanayenalec yemaye. 40Qaq 'eeta'am qome so Sodoma qataq so Gomorra, qataq so lauoreuapi huaqta'a't nỹecpi maye ỹotta'a't naua nañalo co'ollaq qailaxachigui. Nache qaica qome ca ỹe'eguelaxa da nalec yemaye, huo'otaq da choche lanataqa'. Qaq 'era da ỹa'aqtac Aỹem Nataxala'.
41Anac qome ca ỹotta'at shiỹaxauapi maye 'añaxaicpi,
qataq ca qalota nta'alpi chegaqa'a cam ỹataqta
qaỹoqta 'alhua maye pa'aigue da sheu'.
42Nachetac na lo'ogoxonaxat lchecnecpi qataq ana lataquiaxaipi,
namayepi ỹataqta qauemaicpi qaica ca ichoxoreetac,
da la'alaxac qalaq 'eeta'am da lauaxanaxa aso auaxai,
namayepi anacta netalec na lalopi caipi.
Ỹataqta lhuotta da iloquiaxan ye Babilonia.
43Qaq ñi nta'a ye Babilonia co'ollaq ỹaỹaten de'era,
nache ỹataqta qaica ca la'añaxac souaxat da lcolanaxa,
qataq huo'o da laquicoxo qataq da nqui'ic,
'eeta'am aca 'alo maye deco'otac.
44Qom ñanac qalaq ñeque'elaxatta sheeta'am ca llon, da chegoqtoigui ye aviaq ye Jordán, nache tauga nam no'onaxa maye daralata na 'auaqpi, qaq huaña yemaye nache datauec ñaqa'en na lma' ye Babilonia, nache so'otec qome da ilo'ogue ca shiỹaxaua maye maiche lleca'aguishec. Qaq ỹoqo'oye, ¿negue't ca ishet da sheeta'am? ¿Qataq negue't ca ishet da Aỹem ñe'eguene'? ¿Qataq negue't ca qagueta lo'o ca ishet da Aỹem dataỹa'aguet? 45Ña qana'axaỹaxañiỹa dam llapaxañi Aỹem, Nataxala', dam seqataxanai' da yaqto' talec ñaqa'en ye Babilonia, qataq dam so'ottac lataxac da sataỹa'aguet na lma' ye Caldea. Qaq ivira'a qome nam ỹataqta qapio'olecpi nam qagueta llalaqpi da qaỹache qome, nataqa'en na lquiaqa'pi ỹataqta qanlaxatchiguiñi qome 46Qaq qom nlaguiñi ye Babilonia, nache ỹataqta lta'araic ca l-lamaxa, nache ỹacholaxan qome ana 'alhua, qaq da la'alaxac qalaq ivira'a qome na laỹepi ỹotta'a't shiỹaxauapi.»
