Qataq detaqa so Job
1Qataq detaqa so Job, 'eeta':
2«Qache ¿nache 'amo' maye 'autauaatac na huo'o da lqalviaxa,
qataq 'anca'alaxattapeguec na qaica ca la'añaxac?
3¿Negue'to' ca 'arqataxac maye 'aỹa'anem ca qaica ca ỹaỹaten,
qataq ca 'eetec da 'auapaxaguen na qaica ca ỹaỹaanapec?
4¿Chaq negue't ca 'am itaunec da ishet da 'anasaxauec de'era 'ara'aqtac?
¿Negue't ca 'am ỹanem de'era 'al-loxoc da yaqto'
qonetec de'era da 'ara'aqtac?»
Qaltaq detaqa so Bildad
5«Na leuaxaicpi maye huetangui ana auaxai maye qaỹoqchiguingui,
namayepi ỹataqta iviloxolaqchet da lcolanaxa na pa'aguiñi na 'etaxat.
6Ana huachiqui qalaq yo'oqta naqa'en Ñimaye,
qataq da nleuaxa qaica da huo'o ca ỹoxochiisop Ñim Lo'onatac 'Enauacna.
7Ñim Lo'onatac 'Enauacna ỹanalec na piguem na pa'asheguem maye qui'ittelec,
qataq ana 'alhua qaica da huo'o ca na'attalec naqa'en.
8Ñimaye ỹapoua'a na 'etaxat huetaigui naqa'en na lo'oc na piguem
qalaxaye namaye da lsallaxa saishet da icolaxata'ague na lo'oc da yaqto' naañi,
9Ñimaye napalalec naqa'en ñi ca'agoxoic
souaxat da ỹapotalec na lo'oc na piguem,
10Ñimaye ỹo'o't naua loga'te aso auaxai,
qataq iỹotauga da lpa'axac na yo'oqchiguiñi qataq na napalaxa.
11Ñim Lo'onatac 'Enauacna da huo'o da larenaxanaxac,
nache iviloxol naqa'en ana qasoxonaxapi maye nlletañi na piguem.
12Ñimaye irolec da la'añaxac da ỹacholaxan ana auaxai,
qataq da laỹaanataxanaxac nachera da huo'omshe loxonec
so lta'araic shiguiỹac le'enaxat Rajab.
13Qaq da iquetetec na la'at nache qui'itta naqa'en na piguem,
qataq ỹauota'a na lhuaq da ỹalauat so na'araxanaq
maye sa qalhuota'a da qaỹachiguiñi.
14Qaq de'era, 'eeta'am da laỹolec 'enauac na lo'onatacpi,
qaq de'era sa'axasoqchigui nagui,
damaye 'eeta'am da l-lamaxa ana qo'oipaq lauepi.
¿Qalaxaye negue'tom ca ishet da ỹaỹateeteguet
da ivita da dellimigui naqa'en da la'añaxac Ñimaye?»
