Job 28

₁«Cha'aye huo'o na huaña da qanqatsheguem na lcat plata,

qataq huo'o na huaña da qanqatel na oro.

₂Na lcat qaỹachegoxotaigui na 'alhua,

qataq da qanqatel na coma' lsoche,

nache chegaqaigui na lcat cobre.

₃Na shiỹaxauapi qalaq imeuo naqa'en na napalaxa,

cha'aye namayepi taña na ỹataqta qaỹoqchiguiña,

na pa'aguiñi 'alhua, huaña nache huetaigui na napalaxa

da nmittaique na no'on coma'.

₄Huaña nache huetauga ca 'alhua

qaỹoqtaique na shiỹaxauapi da nshettaique na lcat,

decheenaxaatapeguelec na nañec, hueta'a ca qaica ca ishet da tateuga.

₅Qaq na 'alhua nache chegoqtapoigui na qanallec,

qaq na pa'aguiñi namaye qalaq 'eroigui 'eeta'am na norec.

₆Qaq ana'ana coma' nache chegoqtapoigui na zafiro,

qataq na lcat oro maye ỹaleeguet na 'alhua.

₇Nataqa'en qaica da huo'o ca qoỹo lo'o' da ỹauana yi'iye 'alhua.

Nataqa'en na laỹepi maỹopi maye dequi'iỹapec

saishet da ỹauana se'eso nqa'aic.

₈Nataqa'en na shiguiỹac dequi'iỹapec saishet da petalec yemaye,

qataq saỹauanapega da hueta'a yemaye na sauaxaicpi.

₉Na shiỹaxauapi ỹauota'a lhuaq da nhuaxaatauec na ỹotta'a't coma'pi,

nache 'eeta'am da nqat na lpa'a'pi ana qasoxonaxa.

₁₀Ỹo'ot na llecpi na 'etaxat na pa'aguiñi ana coma'pi,

huaña, nache ilotalec na ỹotta'a't chegaqaigui da nsallaxa.

₁₁Nataqa'en nmittaique na chegoqchiguiña na talapi da ỹapo'oguet na 'etaxat,

huaña nache nqatsheguem na saqcha'api saqaỹauanapega.

₁₂Qalaxaye ¿hua'ago' ca hueta'ague de'era naỹaanec?

Qataq ¿hua'ago' ca huetaña de'era ỹo'ot da qaica ca qanqalaate'?

₁₃Na shiỹaxauapi sa ỹaỹaten da lashiichiỹaxac damaye,

qataq damaye saishet da qaỹanata ana 'alhua.

₁₄Cha'aye na qaỹoqchiguiña na pa'aguiñi ana 'alhua qalaq, 'eeta':

‹Saishet da hueta'a ne'ena camaye›

qaq ana auaxai qalaq, 'eeta': ‹'A'i, saishet da aỹem hueto'ot camaye.›

₁₅Damaye saishet da nmeneguet qanqa'en na oro,

qataq saishet da qaỹauota'a na plata da qaisheenaxana.

₁₆Qataq saishet da qaisheetenaxana

na ỹataqta no'on oro da qaisheenaxana,

huo'otaq na ỹataqta no'on coma' le'enaxat ónice huo'otaq na zafiro.

₁₇Saishet da qanaloqnaxaneguet da lashiichiỹaxac

na oro huo'otaq ca chauec coma',

qataq saishet da nmeneguet qanqa'en na 'otaxat ndotec oro.

₁₈De'era naỹaanec napacalec da lashiichiỹaxac na no'on coma',

qataq ana nqola chegaqaigui na conec.

₁₉Na coma' crisólito maye huaña ye Etiopía

saishet da qanaloqnaxaneguet da lashiichiỹaxac damaye,

qataq saishet da qaisheetenaxana na no'on oro da qaisheenaxana.

₂₀Qaq ¿Hua'ago' qone' ca chegaqa'ague de'era naỹaanec?

¿Qataq chaq hua'ague ca huetaña de'era ỹo'ot da qaica ca qanqalaate'?

₂₁Damaye ỹataqta nqañoxocheesop

da lmeenaxanaxac na huo'o da lca'alaxa,

qataq ivira'a da nqañoxocheesop na maỹopi maye hueto'ot na piguem.

₂₂Qataq ivira'a so ilaxattapigui 'enauacna qataq so nleuaxa, 'eeta':

‹Qomi', choche sa'axasoqtapeguelec naxa damaye.›

₂₃Qalaxaye nacheñita Ñim Lo'onatac 'Enauacna

maye ỹauana so llec de'era naỹaanec,

nacheñita Ñimaye maye ỹaỹaten ca huetaña damaye,

₂₄cha'aye Ñimaye da lmeenaxanaxac ivira'alo naua loga'te ana 'alhua,

qataq 'enauac na hueto'ot na piguem.

₂₅Qataq ỹo'ot co'ollaxa da la'añaxac na la'at,

qataq ỹauo'o so loga't na 'etaxat,

₂₆qataq co'ollaq lapaxañi da lataxac naua auo'oche

qataq co'ollaq ỹo'ot so llec na la'at lta'araic,

₂₇Ñimaye ỹauaachigui nataqa'en de'era naỹaanec,

qataq da lta'araic la'amaqchec nache ỹe'eguen damaye

ime, nache ỹami' da ỹaỹamaxareeta.

₂₈Nache Ñimaye 'enapego' na shiỹaxauapi, 'eeta':

‹Da huo'o naq 'enec qanqa'en Ñim Nataxala',

nachera da ỹoqta 'eesa naỹaanec›,

qataq da qanayeca'ai na qauemsat,

‹nachera da ỹo'ot da qaica ca qanqalaate'.›»