Qaltaq detaqa so Job
1Qaltaq ỹe'eguelaxalec da detaqa so Job, 'eeta':
2«¡Ỹataqta huo'o da iyaxa da she'eguelaxa se'eso na'a'q,
co'ollaq Ñim Lo'onatac 'Enauacna ñaq aỹem nteltega!
3Co'ollaq ñaq aỹem icoỹattalec naqa'en na yo'oqchiguiñi
nache na le'eraxa ishet da shectaigui naqa'en na napalaxa,
4co'ollaq ñaq aỹem nsoqolec,
nache Ñimaye ỹataqta ntela'a ye ima',
5qataq co'ollaq ñaq aỹem hueta'aguet Ñim Qaica ca Ỹaqalanapec,
nache na ỹalaqpi aỹem coleesop naxa,
6qataq co'ollaq sa qoue na huaca lche' ye soota'a,
qataq na aceite maye chegoqtapoigui ana coma',
7qataq co'ollaq ñeso'ootaña naxa
ye huaña da qoỹan da nqataxac, qataq da ñeso'ootaña
ye naponqa' maye huaigui na huaqta'a't nỹecpi.
8Nache na nsoxoppi naxa da aỹem ila'a nache aỹem ca'ai,
qaq na ỹa'axaiquipi qalaq nachaañi naxa.
9Qataq ivira'a na 'amaqtaqaicpi ỹa'axaneguet da ltaxaỹaxac,
qataq ỹauota'a na lhua'q da ỹapoguilo naua ala'api.
10Na nta'alpi qalaq nquigaxaayiñi naua la'aqtaqa,
qataq choche ñe'emaxat.
11Na shiỹaxauapi da aỹem ila'a qalaq aỹem ỹo'oxoreetac,
qataq da aỹem hua'aqtega qalaq no'onaxa't
naua la'aqtaqa da aỹem detaxaỹa,
12souaxat da setauaatac na qaicaua caua lta'al maye qaica ca itauan,
qataq na shiỹaxauapi choxoraqpi maye iỹaxaataique ca ntaunaguec.
13Qaq na huetapoigui da mashe qaica ca ye,
aỹem ỹaatacot naxa da na'achec, qataq da itaunaxanaxac
ỹataqta machiguiñi naqa'en da lquiyaqteỹaxac ana pa'aipi.
14Da ỹaỹamaqchiguiñi lataxac qataq da no'on nataxac,
damaye nachera da ñachattaigui,
'eeta'am da nachenaua naua aỹogo ye na'a'q.
15¡Qataq aỹem la'ai'te na sanauaañi,
qataq aỹem lchel na sara'añeeguelo naua lchel,
16qataq aỹem lta'a na huo'o da lhuenaxanaxa,
qataq seuettapeguelec naxa na ỹaqa'a ca chegaqa'ague!
17Qataq senoxo'n naxa naua lanoqo na qauemaicpi,
qataq ñeqateeguesopa naua lhue na loxonecpi namayepi.
18Nache naxa da seuennataxaatac, sheeta':
‹Naua ña'axa'te ỹataqta qaỹoqtrec qome,
'eeta'am ye lcata na lsoche na 'alhua,
qataq ỹataqta aỹem ỹa'axaiqui qom seleu,
qataq souaña ca maiche ima'.›
19Aỹem sheeta'am ana qo'oipaq da neto'ot na loigue na 'etaxat,
qataq ana lcouepi anamaye tatapeguelec na sheue ye pe.
20Da ỹa'amaqchec qalaq nache 'eetai' da dalaxaicta'aguet,
qataq naua ihuaxaye, nache 'eetai' da ỹa'añaxattaleguete so ichecnec.
21Qataq 'enauac na aỹem na'axaỹaxaatega,
ỹataqta ñe'emaxatta da iuatta'alo naua iqataxaco.
22Qaq da setaqtac qalaq qaica ca aỹem ỹasata'aguet.
Naua ỹa'aqtaqa qalaq ỹataqta qaỹamaategueta,
23qaq namayepi iuatta'agueta naua ỹa'aqtaqa,
'eeta'am da 'eetec da iuattaique na nca'ataxanauo auot.
24Qaq da saỹalleguettaigui namayepi,
qalaq saishet da ỹoqta aỹem ỹa'amaqten,
qalaxaye saq ỹaxaañi da ilotagui da ỹashiguiỹaxac.
25Nache aỹem sachaxana da llecỹaxac namayepi,
qataq ñeso'oota'ai', sheeta'am ca nataxala',
qataq salectaigui, sheeta'am ca nta'a da huetangui na nalleppi,
qataq sheeta'am ca ỹa'añaqchettac na daquicotac.»
