Job 3

₃«¡'Onaxaictoxo' da qaica co'ollaxa se'eso na'a'q maye sañiguiñi!

Qataq so pe, maye huetoigui da qoỹeeta':

‹¡Mashe ñiguiñi na nogotolec!›

₄¡'Onaxaictoxo' co'ollaxa da se'eso na'a'q

da ỹataqta napalñi qanqa'en,

qataq Ñim Lo'onatac 'Enauacna saishet taxa da ỹoqocha'a,

qataq saishet da yo'oqchiguiñi naqa'en!

₅¡'Onaxaictoxo' da anac co'ollaxa ca napalaxa

qataq ca sansatchiguiñi lpaqal maye dalaataxanapec,

nache ỹapolec na lpaqal na lo'oc na piguem,

huo'otaq ca lta'araic napalaxa maye ỹo'ot da lta'araic ncolanaxa!

₆¡'Onaxaictoxo' co'ollaxa da daqat se'eso pe, da huaigui ca napalaxa

qataq se'eso na'a'q, saishettaxa da qanaloqneuo

da qaỹalecnoiguilo naua na'axa'te maye huaiguilo ye vi'i!

₇¡'Onaxaictoxo' co'ollaxa se'eso pe da ỹataqta qaica ca huaigui,

qataq saishet da huo'o ca do'onaxaatai' souaxat da ntonaxac!

₈¡'Onaxaictoxo' da na qauemaicpi ỹasaxalec ca qauem la'aqtac se'eso na'a'q,

nam huo'o da la'añaxac da ỹamaq so da'ailo'oc lta'a le'enaxat Leviatán!

₉¡'Onaxaictoxo' co'ollaxa da se'eso nte'eta

da saishet da 'eroigui ana yo'oxoñi lashe huaqaañipi,

qataq saishettaxa da nviyi' na yo'oxoñi maye qaỹa'axatta'aguet,

qataq saishet da qailogui na la'auaxanec le'eraxa aso nala' da mashe yo'oxoñi!

₁₀¡Ta'ainco' da saqaỹapogui co'ollaxa aso lco'oxoqui aso ỹate'e

da yaqto' saishet da selogui da qalota nachoxoyec!

₁₁¿Ta'ainco' ye sa seleuaiguio' co'ollaxa na lauel aso ỹate'e,

ta'ainco' da sa seleu co'ollaq choche sañiguiñi?

₁₂¿Ta'ainco' ye huo'oỹo' co'ollaxa soua nhuaxaye da aỹem ỹaconegueta,

qataq soua ntete maye aỹem illepaxa'n?

₁₃Cha'aye da seleu taxa nache naguictaxa,

qaq so'ocheta, qaica cara da ñemattapeguec.

₁₄Nache salectaigui taxa so nta'alpi qataq so ltauapi

maye qano'oxooyeshegue'm soua late'el laỹe't somayepi,

₁₅huo'otaq so nta'alpi maye nlaxatchiguilo

soua lma'ate lta'al na oro qataq na plata.

₁₆¿Ta'ainco' co'ollaxa da saq aỹem qoỹoxooñi,

da sheeta'am ca nogotolec nsollañi,

huo'otaq da sheeta'am ca nogotolec maye ileu da ñiguiñi?

₁₇Cha'aye añim huachiqui, nache huaña da vi'iiguet

da ldaxanataxanaxac ca qauemaicpi,

qaq ca nasamtañi, qalaq huaña nache nmatec,

₁₈huaña, nache ishet da lactapiguiñi ca ncoñeteguishecpi,

qataq huaña da saq hua'axaỹa da la'alaxac ca ilotague' ca 'onataxanaxaic,

₁₉qataq yemaye nache hueta'a ca 'amaqtaqaic qataq ca saq 'amaqtaq,

qataq nache huaña ca nlatac da huesoueeguesop ca na'aco'.

₂₀¿Ta'ainco' Ñim Lo'onatac 'Enauacna,

da nauane' naqa'en ye na'a'q ca huo'o da nque'eenaxac?

¿Ta'ainco' ye ỹami' da lca'alaxa ca ỹataqta qalota da laquicoxo,

₂₁huo'otaq ca iyaqta'a da l-leuaxa,

qalaxaye saishet da nvita camaye,

na'aictaxa da nmittaique, 'eeta'am aca anom maye qoỹoxooñi?

₂₂Qaq de'era lamaicỹaxac que'eca shiỹaxaua,

qalaq ivireguet qom mashe tangui aca nhuachiqui.

₂₃¿Ta'ainco' da qoỹanemo' da lca'alaxa ca shiỹaxaua maye sa ỹaỹaten ca taỹa'ague,

cam shiỹaxaua maye Ñim Lo'onatac 'Enauacna ỹataqta npaxat 'enauac na llecpi?

₂₄Da ñenoinaxac nachera da 'eco' anoq,

ca ỹaquip, qalaq nachera da ỹachotaxac souaxat da ñiqui'ic.

₂₅Qaq 'enauac na she'etaiquepi,

nam ỹataqta ỹo'ottac da icolanaxa co'ollaxa,

nachena na aỹem talec nagui.

₂₆Qaq qaica ca ilagaxayec, ñemataxac qataq ca ỹe'emqa',

nacherata da qaica ca ỹamaicỹaxac.»