Josué 23

₁Qaq co'ollaq mashe qaỹoqtegue da Ñim Nataxala', ỹanem da lactapiguiñi so Israel le'ecpi, qataq so Josúe mashe ỹa'axaiquiolec co'ollaxa, ₂nache so Josué iỹaxaneuga 'enauac so Israel le'ecpi, nqueroxonecpi, qataq so lataxala'pi som nalamaxat nhuo' le'ecpi, qataq so nmit na nasouaxashetpi, qataq so lataxala'pi so alleppi, nache 'enapega somayepi, 'eeta':

«Aỹem, mashe aỹem ỹa'axaiquiolec, qataq naua vi'iye mashe sa ñalo'ogueta. ₃Qaq qami' qauauañiichigui 'enauac nam qami' ỹo'oteque Ñim Nataxala' maye Qanatamnaxala'ai, qataq da 'eetec naqa'en na ỹotta'a't shiỹaxauapi, cha'aye Ñimaye nacheñi Ñim qami' deloctapegueleguete. ₄Qaq aỹem sauota'a da alletaxac co'ollaxa da sanoigui na na'alhuapi ne'ena maiche nalamaxat nhuo' le'ecpi. Qataq saishet da nda'a't na 'alhuapi maye mashe qaiuotaxanec co'ollaxa da sanem namayepi, cha'aye nataqa'en sanem nam ñaq saxanaxa da qaiuotaxanec, maye chegoqchiguiña ye pa'aỹa'ague da yo'oxoñi so Jordán, nache ivitta'a da pa'aỹa'ague da avit aso Auaxai Mediterráneo. ₅Maye Ñim Nataxala' maye Qanatamnaxala' taỹa'a da ỹo'orauec 'enauac na netalec yi'iye 'alhuapi. Nache qami' qauacoñiỹa qome yi'iye 'alhuapi, nache ipacchigui da la'aqtac Ñim Nataxala' maye qami' ỹachaxanapeguema co'ollaxa.

₆Qaq ỹoqo'oye, ỹataqta qana'añaxache qome da qaualaqaiguet qataq qauo'oche 'enauac nam nanettañi lqataxacpi so Moisés, nache ỹataqta qaupaquiitelec da qauo'oche. ₇Nache saishet qome da qauallequiiguet na shiỹaxauapi maye ñaq hueta'a ne'ena, maye ñaq qami' netanguilo. Qataq saishet da qavio'oxoreñiitac nam natamnaxala'pi namayepi, qataq saishet da qaualaqaiguet huo'otaq da qanasaqaiteguec cam le'enaxatpi que'eca atamnaxala'pi, huo'otaq da qaỹa'añim ca qara'aqtaqui. ₈Nacherata da ỹataqta qoquiitegue qome Ñim Nataxala' maye Qanatamnaxala', 'eeta'am qanqa'eñi da qoñeeta'ac co'ollaxa choche ivitta'a nagui. ₉Ñim Nataxala' ỹataqta qauauañiichigui co'ollaxa naqa'en da ỹo'orauec 'enauac so ỹotta'a't shiỹaxauapi maye 'amaqtaqaicpi qataq 'añaxaicpi, qaq nache ivitta'a nagui da qaica ca ishet da qami' dataỹa'agueta. ₁₀Qaq ca 'oonolec da qoñiita qalaq ishet da datauec naqa'en ca mil alleppi, cha'aye Ñim Nataxala' maye Qanatamnaxala'ai qami' deloctegueleguete, cha'aye maiche la'aqtac co'ollaxa Ñimaye. ₁₁Qalaxaye ñi 'oonolec da qoñiita ntela'a qome da maiche nachaalataxac, qataq ỹataqta imauec da qarquiyaqteỹaxaqui da qauauochec Ñim Nataxala' maye Qanatamnaxala'. ₁₂Cha'aye da qoquiỹa'ai Ñim Lo'onatac 'Enauacna, da qaualliquiiguet na ỹaqa'a shiỹaxauapi maye ñaq qami' netanguilo, qataq qauaroñiiguet namayepi, nache qaualliquiiguet, qataq namayepi qami' ỹaleegueta, ₁₃nache Ñim Nataxala' maye Qanatamnaxala'ai saishet da qauauañiichigui naqa'en qome da ỹo'orauec ne'ena shiỹaxauapi, nacherata da do'onataxana qome namayepi da 'eeta'am ca naleguec, qataq aca nqoina da yaqto' qami' noxonqa, qataq 'eeta'am ca nhuaxanaxanaxat da qaỹalasheelec na qarlaqai, qataq 'eeta'am aca ỹaxat da taiguilo naua qara'ai'chilli', nache ivitta'a da ỹataqta qaica ca no'onañi da qoñiita da hueta'a ne'ena no'on 'alhua maye qami' ỹanema Ñim Nataxala' maye Qanatamnaxala'.

₁₄Qaq aỹem mashe yaqta'a da seleu, qalaxaye aỹem sauotaique da ỹataqta 'enauac da qarquiyaqteỹaxaqui, qataq da qanachaalataxaqui da qauaỹachiñiita da Ñim Nataxala' maye Qanatamnaxala', ỹataqta ipacchigui qome da ỹo'ot 'enauac ne'ena no'on ỹachaxanapecpi co'ollaxa. Nache ỹataqta saishet da huo'otaq 'oonolec ca sa ipaguelec da ỹo'ot ne'ena ỹachaxanapecpi. ₁₅Qaq dam 'eetec da ỹataqta imauec da ipacchigui na 'onaxaicpi maye ỹachaxanapecpi co'ollaxa Ñim Nataxala' maye Qanatamnaxala', qaq nache 'eetec nataqa'en Ñimaye da anacot qome ca qauemsat, nache ivitta'a da ỹataqta qaica 'oonolec da qoñiita da no'onañi da no'onalec ne'ena no'on 'alhua maye qami' ỹanema Ñimaye, ₁₆qom saishet da qaualaqailec da aỹamaxataxac maye qami' ỹo'oteque Ñim Nataxala' maye Qanatamnaxala'. Qataq da qavio'oxoyiñi ca ỹaqa'a atamnaxala', qataq da qaua'ayiỹoto naua qarllicchilli' camaye, nache Ñim Nataxala' qami' dalemataỹalo qome, nache qami' nqateeguesopa ne'ena no'on 'alhua maye qami' ỹanema Ñimaye.»