Da nhuaxanaguec so Nadab qataq so Abiú
1So Nadab qataq so Abiú, maye llalqa so Aarón, soomaye ỹacoora soua laỹe't so nchenaxanaxat, nache ỹacherangui so norec qataq ỹavigaxat so nchenaxanaxat maye ama na laita, nache ỹaarot Ñim Nataxala', qaq de'era 'eeteque soomaye saishet da lataxac da namaxasoxonaxac. 2Huaña, nache Ñim Nataxala' anacot so norec, nache ỹavigaxa't. Qaq 'era da 'eetec co'ollaq ileu' soomaye. 3Qaq co'ollaq mashe lcopa'ague de'era, nache so Moisés 'enapega so Aarón, 'eeta':
«'Era, da 'eetega Ñim Nataxala' co'ollaq 'eeta':
‹Da huo'o ca Aỹem naua'a na ntaxaỹaxanaxanecpi,
nache ñachaxana da ỹataqta Aỹem sa qaishetapec,
qataq 'enauac na Israel le'ecpi
sachaxana da qaica ca 'ena'am ỹo'oxoyec.›»
Nache so Aarón choche ñe'emaxat.
4Ime, nache so Moisés iỹaxana so Misael qataq so Elzafán som llalqa so Uziel, qataq ntesoqo' so Aarón, nache 'enapegalo, 'eeta':
«Ña qauanaqui da qanqacheeguesopa yeua qarhuo'oi lashe' na npe'l maye lalamaxat Ñim Nataxala', nache qauroỹeuga na pa'auec na nanataqa' maye qanayeutaña.»
5Nache soomaye taua'alo so npe'l, nache nqatrec soua lauo' lashe' maye leuaxaiqa, nache lpataxanguilo soua maiche alogo, nache ipacchigui da lamaxasoxonaxac so Moisés.
Da llec da lasouaxac ca ntaxaỹaxanaxanec
6Ime, nache so Moisés 'enapega so Aarón qataq soua no'oirañi llalqa, Eleazar qataq so Itamar, 'eeta':
«Qami' saishet da huesotagui qanqa'eñi na qaravi, qataq da qaucolaxachiỹa'aguelo naua qorogolli' da la'anaxat da qarasouaxaqui, yaqto' saishet da qaullivi, cha'aye saishet da ivirauga na laỹe Israel le'ecpi da layeloxo Ñim Nataxala'. Nacherata da huo'o da 'eeta namayepi souaxat yeua lauo' lashe', cha'aye Ñim Nataxala' Nacheñi Ñim anacot so norec. 7Qalaxaye nagui saishet da qoquiỹa'ai ne'ena ñegueuo na npe'l, yaqto' saishet da qaullivi, cha'aye mashe ime da qami' qaicoreleguete so aceite da qami' qaiỹotaugalo da qami' lalamaqa'ate Ñim Nataxala'.»
Nache soomaye ipacchiguilo da ỹo'o't da lamaxasoxonaxac so Moisés.
Da llec da qainoxoneua'a so npe'l
8Nache Ñim Nataxala' 'enapega so Aarón, 'eeta':
9«'Am qataq naua 'aỹa'alqa, da ivita da qaunoxoñiiua'a ñi npe'l, nache saishet da hua'auñi da qanỹomiigui na lataxa huo'otaq ca lỹa maye ishet da qantaxac, ten qom qaullivi. Qaq 'era qome da nache 'eetai' lataxac da qoyecỹaxaqui qataq cam qami' chegoxogueta, 10yaqto' ishet da qauaỹaañita da lataxac na npe'l maye sa qaishetapec, qataq naua ỹaqaugalo nanataqa'ate, qataq qauaỹaañita da qui'itta lataxac, qataq da nshepaxan lataxac, 11qataq qauapaxaguiñic na Israel le'ecpi 'enauac da lataxac na nqataxacpi maye Ñim Nataxala' ỹan co'ollaxa ỹachegoxotchigui so Moisés.»
Na taỹot na ntaxaỹaxanaxanecpi
12Ime, nache so Moisés 'enapega so Aarón qataq soua llalqa maye no'oirañi, Eleazar qataq so Itamar, 'eeta':
«Ca no'onañi lsoche aca ala ca nañiguishec maye nachetaqtaxanaqte acamaye qami' taỹoto, nache qauo'oche aca nauole qaca aca lalecte maye ỹasheeraxachigui, nache qollequi da qoviita'a ye sa qaỹapeque añi nca'atoxonaxalate, cha'aye acamaye ỹataqta sa qaishetapec. 13Nache huaña yemaye da qollequi, cha'aye nacheye ye qaiỹotauga da qarquia'aqa'ai da qollequi aca nachetaqtaxanaqte maye mashe qaiỹotauga da qami' taỹoto, qaq 'era da lataxac maye 'am sanem, qataq daua 'aỹa'alqa, cha'aye nachera da aỹem qaỹamaxalec. 14Qaq aca'aca lachetaqtaxanaqte na Israel le'ecpi maye qanhuaachigui, ca ltogue lapat maye qoỹaasheguem da qoỹanot Ñim Nataxala', qataq ca ltele'eta maye qaralamaxache da qollequi, camaye nache huaña ye qaiỹotauga da qarquia'aqa'ai, 'am qataq ca 'aỹa'alaqpi ỹalleppi, qataq ca 'alpi. 15Nache ca ltele'eta qataq na ltogue lapat lỹateuo ca lcheta da qaỹa'añeeuo, nache 'enauac camaye qaỹa'añisheguem da qaỹa'añiỹot Ñim Nataxala', da nachetaqtaxanaxat ỹaqauga maye qaỹavigaxat. Qaq 'era qome da nache 'eetai' lataxac da 'icỹaxac qataq ca 'aỹa'alaqpi, cha'aye 'era da lamaxasoxonaxac Ñim Nataxala'.»
So Aarón ỹe'elaxam da nnataxanaxac so Moisés
16Qaq co'ollaq ime, nache so Moisés denataxanaique so quetaq maye qoỹaneuo da nachetaqtaxanaxat maye sa imauaq da qaỹavigaxat, nache choche ỹe'elaqtem da mashe qaỹavixaxat. Nache ỹataqta dalemataỹa so Eleazar qataq so Itamar, soua no'oirañi llalqa so Aarón, nache inatta'apo', 'eeta':
17«¿Ta'ainco' ye saishet da huaigui ñi npe'l da qollequi aso nachetaqtaxanaqte maye sa imauaq da qaỹavigaxat? Ye asomaye ỹataqta sa qaishetapec, qataq Ñim Nataxala' qami' ỹanema da yaqto' qaỹapalaxat na lasouaxashetpi na Israel le'ecpi. 18Cha'aye so ltago'q so shiguiỹac saishet co'ollaxa da qauroiua'a ye pa'auo ñi npe'l, yem huaña ctaxa da qollequi aso nachetaqtaxanaqte da yaqto' qaupaquiichigui da qami' samaxaleguete.»
19Nache so Aarón ỹasategueto' so Moisés, 'eeta':
«Ña 'aumeten nagui, yeua ỹalqa Nadab qataq ye Abiú, yeemaye ỹanoto Ñim Nataxala' aso lachetaqtaxanaqte' maye sa imauaq da qaỹavigaxat, qataq aso lachetaqtaxanaqte' maye qaỹavigaxatta, qaq nagui aỹem sevireguet de'era qauem. Nasho' taxa da sachec aso lỹa nachetaqtaxanaqte maye sa imauaq da qaỹavigaxat, ¿peta'a ỹaỹamaxareeta taxa Ñim Nataxala'?»
20Qaq co'ollaq hua'axaỹa de'era so Moisés, nache maguiñi.
