So Aarón ỹacoolec da lo'onataxanaxac
1Qaq co'ollaq ivireuga so na'a'q ocho, nache so Moisés iỹaxana so Aarón qataq soua llalqa, qataq so nqueroxonecpi maye lataxala'pi so Israel le'ecpi. 2Nache 'enapego' so Aarón, 'eeta':
«'Auaconeua'a qome ca huaca, yaqto' nachetaqtaxanaxat maye sa imauaq da qaỹavigaxat, qataq ca qagueta lhuaraic maye qaica ca lque'emaxa, yaqto' nachetaqtaxanaxat qaỹavigaxatta, nache qoỹanot Ñim Nataxala'. 3Qaq na Israel le'ecpi, qalaq qonapega qome, qoneta':
‹Qandoiuo qome ca quetaq yaqto' nachetaqtaxanaxat maye sa imauaq da qaỹavigaxat, qataq ca huaca, qataq ca qagueta maye ñaq 'oonolec vi'i, qataq qaica ca lque'emaxa, yaqto' nachetaqtaxanaxat qaỹavigaxatta, 4qataq ca 'oonolec huaca qataq ca 'oonolec qagueta lhuaraic, nache qaỹalauat huaña ye lanataqa' Ñim Nataxala' yaqto' nachetaqtaxanaxat maye qanhuaachigui. Nataqa'en qandoiuo qome aca nachetaqtaxanaqte lsoche ana ala ca nañiguishec qairaqneguet ca aceite, cha'aye Ñim Nataxala' qami' nachaxanalo ne'ena na'a'q.›»
5Nache so Israel le'ecpi iroua'a co'ollaxa so npe'l 'enauac som damaxasoxoolecpi so Moisés, nache 'enauac so shiỹaxauapi nachattaua'a som lanataqa' Ñim Nataxala'. 6Nache so Moisés 'enapeco':
«'Era da qami' ỹamaxaleguete Ñim Nataxala', qaq damaye qauo'oche qome, nache Ñim Nataxala' qami' nachaxanalo, qataq ỹataqta qaica ca 'ena'am da llo'oxoyec.»
7Ime, nache so Moisés 'enapega so Aarón, 'eeta':
«Ña 'anquigueua'a añi nca'atoxonaxalate, nache 'aỹa'aneuo aca 'arachetaqtaxanaqte maye sa imauaq da qaỹavigaxat, qataq aca 'arachetaqtaxanaqte qaỹavigaxatta. Nataqa'en 'aỹa'aneuo qome aca lachetaqtaxanaqte na Israel le'ecpi, yaqto' qaỹapalaxat na 'arasouaxashetpi qataq na lasouaxashetpi namayepi. Nache ipacchigui da lamaxasoxonaxac Ñim Nataxala'».
8Nache so Aarón nquigueua'a aso nca'atoxonaxalate, nache ipelecot na lqosot so huaca maye lachetaqtaxanaxat sa imauaq da qaỹavigaxat, yaqto' qaỹapalaxat na maiche lasouaxashetpi. 9Nache soua llalqa somaye iroua'alo so laỹe' so ntago'q, nache so Aarón ỹa'ayingui aso llaxaata somaye, nache ỹa'ame'n soua lsheeneqa soua lcoue aso nca'atoxonaxalate. Qaq so no'onañi, nache icorot na pa'aguiñi asomaye. 10Ime, nache ỹachalec aso nca'atoxonaxalate da yaqto' ỹavigaxat so lcheta qataq soua lchiguishel ima'aguet naqa'en so lcheta, qataq so lsheenec so l-lamec se'eso shiguiỹac, qaq nache ipacchigui da lamaxasoxonaxac Ñim Nataxala' maye ỹamaxalec co'ollaxa so Moisés. 11Qalaxaye so lapat qataq so lo'oc, nache ỹavigaxat huauga naqa'en so pa'auec so nanataqa' maye qanayeuta'a.
12Nache so Aarón ỹalauat nataqa'en so shiguiỹac maye nachetaqtaxanaxat qaỹavigaxatta. Qaq soua llalqa somaye, nache ndoua'alo somaye so ntago'q, nache so Aarón icoroto soua laỹel aso nca'atoxonaxalate. 13Ime, nache qandoua'a somaye so lqaic qataq so laỹe logoxoshetpi se'eso shiguiỹac, nache so Aarón ỹavigaxat somaye ỹachalec aso nca'atoxonaxalate. 14Qaq co'ollaq ime da iỹo so lauel le'ecpi qataq soua lapia'ate, nache nataqa'en npa'axatcheguem da ỹavigaxat.
15Ime, nache so Aarón ỹaneuo nataqa'en so lachetaqtaxanaxat so Israel le'ecpi. Nache ỹacona so quetaq maye nachetaqtaxanaxat sa imauaq da qaỹavigaxat, nache ipelecot na lqosot, yaqto' qaỹapalaxat na nasouaxashetpi, 'eeta'am so hua'auñi lachetaqtaxanaxat. 16Nache ỹaneuo aso nachetaqtaxanaqte qaỹavigaxatta, da yaqto' ipacchigui da llec da qoỹaneuo asomaye. 17Ime, qataq ỹaneuo aso nachetaqtaxanaqte lsoche ana ala na nañiguishec, ỹauota'a 'oonole napocna da ỹacona, nache ỹavigaxat, ỹachalec aso nca'atoxonaxalate maye huetalec so lỹa shiguiỹac maye mashe qaỹavigaxat so nte'eta.
18Nache so Aarón ipelecot na lqosot so huaca, qataq so qagueta maye ỹaneuo so Israel le'ecpi, da lachetaqtaxanaxat maye qanhuaachigui. Nache soua llalqa so Aarón ndoua'alo somaye so ntago'q, nache icoroto soua laỹel aso nca'atoxonaxalate. 19Nataqa'en ỹaneuo so lcheta so huaca qataq so qagueta, qataq 'enauac so la'araxashet qataq so lcheta na lauel le'ecpi, qataq soua lchiguishel ima'agueta so lcheta nataqa'en na lsheenec so l-lamec, 20nache 'enauac so lcheta npa'axatcheguem da ỹachalec so ltogue lapat. Nache so Aarón ỹachalec aso nca'atoxonaxalate da yaqto' ỹavigaxat. 21Qalaxaye so ltogue lapat qataq aso lleegue aloiguishe, ỹa'auaxaañi da ỹaasheguem da ỹanot Ñim Nataxala', nache ipacchigui da lamaxasoxonaxac Ñim Nataxala' maye ỹamaxalec co'ollaxa so Moisés.
22Nache so Aarón ỹachaxaayishegue'm naua lhua'q nalotelec naqa'en so Israel le'ecpi, nache ỹan so no'on la'aqtac yaqto' 'onaxaic da llecỹaxac somayepi. Qaq co'ollaq mashe ime da ỹaneuo 'enauac aso nachetaqtaxanaqtepi, nache ca'ai aso nca'atoxonaxalate. 23Ime, nache so Moisés qataq so Aarón inoxooroigui so npe'l. Qaq co'ollaq nnoxoorec, nache soomaye qaltaq ỹaarelec da no'on la'aqtac so Israel le'ecpi. Huaña, nache Ñim Nataxala' ỹachaxana 'enauac so shiỹaxauapi da ỹataqta qaica ca 'ena'am llo'oxoyec, 24nache Ñim Nataxala', anacot so norec, nache ỹavigaxat 'enauac so lapat so shiguiỹac, qataq so lcheta maye mashe qaiqataxaatai' huetalec aso nca'atoxonaxalate.
Qaq co'ollaq ỹauaachigui de'era so Israel le'ecpi, nache ỹataqta ỹa'alaqtagui souaxat da ntonaxac, nache ỹa'alyiñi naua l-llecte, iviraxata'aguet naqa'en na latap na 'alhua.
