Levítico 17

₁Ñim Nataxala' 'enapega so Moisés, 'eeta':

₂«Qonapega qome ñi Aarón qataq ñeua llalqa, qataq 'enauac na Israel le'ecpi, da lamaxasoxonaxac Ñim Nataxala', 'eeta':

₃Da huo'o ca 'oonolec na Israel le'ecpi da ỹalauat ca huaca, qagueta huo'otaq quetaq, da huaña ca qanayeetaña, huo'otaq ca pa'aỹauec ca nanataqa', ₄qataq souaxat da saishet da iroua'a ye ñegueuo ñi npe'l da yaqto' lachetaqtaxanaqte maye ỹanot Ñim Nataxala', nache que'eca shiỹaxaua huo'o da lasouaxashet souaxat da icoraxatec ca ltago'q ca shiguiỹac. Nache camaye qaỹo'orauec, ca'ai qanqa'en ca lauo' le'ecpi. ₅Ỹoqo'oye na Israel le'ecpi da huo'o ca ỹalauat ca shiguiỹac da huauga ca no'onaxa, nache iroua'a ca ntaxaỹaxanaxanec da huaña ye ñegueuo ñi npe'l, nache ỹaneuo da ỹanot Ñim Nataxala' da nachetaqtaxanaqte maye qanhuaachigui. ₆Nache ca ntaxaỹaxanaxanec ỹacona ca ltago'q que'eca shiguiỹac, nache icoroto naua laỹel añi nca'atoxonaxalate maye lalamaqte Ñim Nataxala' maye netaña ye ñegueuo ñi npe'l. Ime, nache ỹavigaxat ca lcheta yaqto' da ama laitaỹaxac ỹamaateguet Ñim Nataxala'. ₇Huaña, nache saishet da ỹe'eguelaxalec na Israel le'ecpi da ỹanot ca lachetaqtaxanaxat ca ỹaqa'a atamnaxala' maye ne'enaqtac, 'eeta'am na quetaq da lataxac, souaxat da ỹo'ottac da nquisheshaxac. Qaq 'era qome da nache 'eetai' lataxac da qoyecỹaxaqui, qataq ca qami' chegoxogueta.

₈Nataqa'en qonapega, na Israel le'ecpi qataq na chegaqauecpi maye qami' netaiguilo, da huo'o ca ỹaneuo ca lachetaqtaxanaxat maye qaỹavigaxatta, huo'otaq ca lỹa lachetaqtaxanaxat, ₉qalaxaye da saishet da iroua'a ye ñegueuo ñi npe'l da yaqto' ỹanot Ñim Nataxala', nache camaye qaỹo'orauec, ca'ai qanqa'en ca lauo' le'ecpi.

₁₀Qaq Aỹem, saishet da seshetaxateguet ca Israel le'ec, huo'otaq ca chegaqauec maye qami' netaiguilo, da chec ca lapat da ñaq huo'oi naua ltago'q, nache camaye so'orauec, ca'ai ñaqa'en ca lauo' le'ecpi. ₁₁Cha'aye 'enauac na huo'o da lca'alaxa, namaye chegoqchigui na ltago'q da nca'altauec. Ỹoqo'oye qami' sanema da huaña añi nca'atoxonaxalate da Aỹem qaỹa'añiỹot ca ltago'q na shiguiỹacpi, qataq nache chegoqchigui camaye da sapalaxat ca qarasouaxashichi.

₁₂Ỹoqo'oye qami' shenapegalo qataq na chegaqauecpi maye qami' netaiguilo, da qaica qome ca chec na lapat da ñaq huo'oi naua ltago'q.

₁₃Nache da huo'o ca Israel le'ec huo'otaq ca chegaqauec maye qami' netaiguilo da ne'epe, nache da loxonec ca shiguiỹac, huo'otaq ca qoỹo maye ishet da qanallec, nache ỹa'auaxaañi da nqat na ltago'q ca loxonec. Ime, nache imeelec na 'alhua que'eca ntago'q, ₁₄cha'aye na ntago'q, namaye chegaqaigui da lca'alaxa 'enauac na nca'altauec. Qaq ỹoqo'oye qami' shenapegalo da saishet da qollequi na ntago'q, cha'aye namaye chegaqaigui da nca'alaxa. Nache ca shiỹaxaua da chec, nache qaỹo'orauec, ca'ai qanqa'en ca lauo' le'ecpi.

₁₅Nache ca Israel le'ec huo'otaq ca chegaqauec, da chec ca lapat ca shiguiỹac leuaxaic, huo'otaq ca lalaatac ca shiguiỹac maye dequi'iỹapec, camaye iuen da iỹoi' caua alogo qataq nachel, qalaxaye camaye saishet da qui'itta ivitta'a da pe. Qaq da ime, nache qui'itta. ₁₆Qalaxaye da saishet da iỹoi' caua alogo, qataq da saishet da nachel, nache camaye maiche nque'etaxangui ca lasouaxashet.»