Na'a'q maye laloxoqui da qaỹapalaxat ca nasouaxashet
1Ñim Nataxala' 'enapega so Moisés co'ollaq ime da ileu' soua dos llalqa so Aarón, souaxat da sa ipaguerelec da lataxac da qanqo'oneua'a aso nca'atoxonaxalate maye lalamaqte Ñim Nataxala'.
2Nache Ñim Nataxala' 'enapega so Moisés, 'eeta':
«Qonapega qome ñi 'arqaỹa Aarón da saishet da saq ỹataq ca ñichiguiña añi nala' da huenoxoneua'a ye pa'auo ñi lapoxonaxat ñi npe'l maye netaña añi laỹe' naua ñaỹamaxataxaco, yaqto' da ñachaxan nache saishet da ileu, da sootaigui ca lo'oc maye nalotcheguema ñi lapoxot añi laỹe' naua ñaỹamaxataxaco.
3Qaq ñimaye da huenoxoneua'a ye pa'auo ñi npe'l, nache irouo ca 'oonolec huaca da lachetaqtaxanaxat maye sa imauaq da qaỹavigaxat, qataq ca 'oonolec qagueta da lachetaqtaxanaxat qaỹavigaxatta. 4Qataq da huenoxoneuo, nache ỹa'auaxaañi nachel. Ime, nache ỹaayiñi soua lpa'axanaqa'ate, qataq napogoña so lapo' ca ntaxaỹaxanaxanec, qataq nsaachigui so lasot alaxa, qataq so lqaic alaxa soua alogo maye chegaqaiguilo na lino maye lalamaqa'ate da ntaxaỹaxanaxanec.
5Qataq ñi Aarón, nache ỹachegoxotaigui na Israel le'ecpi caua dos quetaq da yaqto' namayepi lachetaqtaxanaxa't maye sa imauaq da qaỹavigaxat, qataq ca qagueta lhuaraic da lachetaqtaxanaxat qaỹavigaxatta. 6Qalaxaye ỹa'auaxaañi da ỹaneuo ca huaca maye maiche lachetaqtaxanaxat sa imauaq da qaỹavigaxat, yaqto' qaỹapalaxat na lasouaxashet qataq na lasouaxashetpi na llalaqpi ñimaye. 7Ime, nache ỹaconalo caua dos quetaq, nache ỹanoto Ñim Nataxala', huaña ye ñegueuo ñi npe'l. 8Ime, nache ỹo'ot ca alletaxac ỹauota'a soua coma'yolqa da yaqto' ỹaỹaten ca taỹot Ñim Nataxala', qataq ca taỹot so Azazel, som le'ec ye toolec 'alhua maye 'eeta'am na quetaq. 9Nache ca quetaq maye taalec da taỹot Ñim Nataxala', nacheca ca ỹaneuo ñi Aarón da nachetaqtaxanaxat maye sa imauaq da qaỹavigaxat. 10Qaq ca lỹa quetaq maye taalec da taỹot so Azazel, som le'ec ye toolec 'alhua maye 'eeta'am na quetaq, nache nca'altauec naqa'en da ỹanot Ñim Nataxala', da yaqto' camaye ỹache na lasouaxashetpi na Israel le'ecpi da irouga se'eso Azazel.
11Nache ñi Aarón ỹa'auaxaañi da ỹaneuo ca huaca maye maiche lachetaqtaxanaxat sa imauaq da qaỹavigaxat yaqto' qaỹapalaxat na lasouaxashetpi, qataq na lasouaxashetpi na llalaqpi. 12Ime, nache ỹacona aca nchenaxanaxat laỹe' maye nlaqchigui aca poqo maye ỹachegoxotalec añi nca'atoxonaxalate, qataq ca lsoche ca nchenaxanaxat maye ama na laita ỹauota'a dos napocna da ỹacona, nache iroua'a ye pa'auo ñi lapoxonaxat ñi npe'l, 13nache ỹachangui aca laỹe na nchenaxanaxat huaña ye pa'auo, nache ca lmala'q camaye sa yo'oq naqa'en ñi lapoxot añi laỹe' naua aỹamaxataxaco. Qaq da 'eetec de'era ñi Aarón, nache saishet da ileu qome. 14Ime, nache ỹacona aca laỹe' ca ltago'q ca huaca, nache ỹa'ayingui ana llaxaata, nache ichegoqot na laỹe maye pa'aigue da yo'oxoñi ñi lapoxot añi laỹe' naua aỹamaxataxaco. Qataq siete da ichegoxogue ca ntago'q da pa'aỹa'ague ñi'iñi lapoxot. 15Qaq da ime, nache ipelecot na lqosot ca quetaq da yaqto' nachetaqtaxanaxat maye sa imauaq da qaỹavigaxat, yaqto' qaỹapalaxat na lasouaxashetpi na ỹalecta'a't nhuo' le'ecpi. Qaq ca ltago'q, nache iroua'a ye pa'auo ñi lapoxonaxat ñi npe'l maye netaña añi laỹe' naua aỹamaxataxaco, qataq nache ichegoqot ñi lapoxot añimaye, nache ỹe'enaxatchigui da 'eetec ca ltago'q ca huaca. 16Qaq 'era da 'eetec da ỹo'ot da qui'itta naqa'en ye pa'auo ñi lapoxonaxat ñi npe'l maye netaña añi laỹe' naua aỹamaxataxaco, souaxat na lle'etaxaloxosat na Israel le'ecpi, qataq da sa ỹalaxaguet Ñim Nataxala', qataq sa iren da qui'itta lataxac. Qaq 'enauac de'era da nache 'eetec naqa'en ñi npe'l.
17Qataq saishet qome da sa qaỹapeque ca shiỹaxaua ñi npe'l da ñaq pa'ataigui ñi npe'l ñi Aarón da yaqto' qaỹapalaxat na lasouaxashetpi ñimaye, qataq na llalaqpi qataq 'enauac na Israel le'ecpi. 18Ime, nache ñi Aarón pa'auec, tauga da ỹo'ot da qui'itta naqa'en añi nca'atoxonaxalate maye ỹalamaqte. Nache ỹacona aca laỹe' ca ltago'q ca huaca qataq ca quetaq, nache ỹauota'alo naua llaxaata da ỹa'ame'n naua lsheeneqa naua lcouel qataq icoroto naua laỹel añi nca'atoxonaxalate. 19Ime, nache ỹa'ayingui ana llaxaata ca ntago'q, nache siete da ichegoxolec añimaye. Qaq 'era da 'eetec da qui'itta qanqa'en añi nca'atoxonaxalate, da yaqto' qaiỹouec na qauemsat maye ỹo'ot na Israel le'ecpi, yaqto' ishet da qui'itta.
So quetaq maye qaỹo'orauga ye toolec 'alhua
20Nache da ime ñi Aarón da iqui'itaxat ye pa'auo ñi lapoxonaxat ñi npe'l maye huaña naxa da qanauane' Ñim Nataxala', qataq añi nca'atoxonaxalate, nache damaxasoxoolec qome da qanauegueuo ca quetaq maye ña nca'altauec, 21nache ỹashel-lec na lqaic qataq nache ỹa'axat 'enauac na lle'etaxaloxosat na Israel le'ecpi, souaxat da npe'eeleguete naua lataxaco, qataq sa ỹalaxaguet Ñim Nataxala'. Qaq 'era da 'eetec da ỹachelec qome ca quetaq que'eca nasouaxashetpi, nache ca lỹa shiỹaxaua huapegue' da ỹo'orauga ca toolec 'alhua da yaqto' talec naqa'en camaye, 22yaqto' que'eca quetaq da tauga ca toolec 'alhua, nache ỹachetac 'enauac nam qauemsat maye ỹo'ot na Israel le'ecpi.
23Ime, nache ñi Aarón qaltaq inoxoneua'a ñi npe'l, nache nqa't caua alogo chegaqaigui na lino maye ỹaatrañi co'ollaq inoxoneua'a ye pa'auo ñi lapoxonaxat ñi npe'l maye netaña aso laỹe' naua aỹamaxataxaco, qataq nache ỹacheraña yemaye. 24Qataq huaña yemaye da nachel, qataq ỹaayiñi caua lỹa't alogo, ime qaq huenoxonec da ỹaneuo aca maiche lachetaqtaxanaqte maye qaỹavigaxatta, qataq aca lachetaqtaxanaqte na Israel le'ecpi, yaqto' qaỹapalaxat na lasouaxashetpi somaye qataq na ỹalecta'a't nhuo' le'ecpi. 25Qataq na lcheta ca nachetaqtaxanaxat maye sa imauaq da qaỹavigaxat, nataqa'en ỹavigaxat ỹachalec añi nca'atoxonaxalate.
26Qaq ca shiỹaxaua maye ỹo'orauga ye toolec 'alhua ca quetaq, camaye iuen da iỹoi' caua alogo qataq nachel. Ime, nache ishet da inoxoneua'a ca nanataqa' maye qanayeuta'a.
27Qaq ca no'onañi lapat, qataq ca lo'oc, qataq na aloq ca huaca qataq ca quetaq, nache qaỹavigaxat qairouga ye no'onaxa qui'ittelec maye pa'aueege da laỹe ye qanayeuta'a. 28Nache ca shiỹaxaua maye ỹavigaxat camaye, iuen da iỹoi' caua alogo qataq nachel. Ime, nache ishet da ỹe'eguelaxaua'a ca nanataqa' maye qanayeuta'a.
29Qaq 'era da nache 'eetai' qome lataxac da qoyecỹaxaqui: Da ivita ca na'a'q diez caua siete ca'agoxoiqa, nache qanqouaqchichi qataq qaica ca do'onataxan 'enauac na Israel le'ecpi qataq na chegaqauecpi maye qami' netaiguilo. 30Cha'aye que'eca na'a'q, nache huetoigui da qaỹapalaxat ca qarasouaxashichi, qataq huaña ye lanataqa' Ñim Nataxala', da yaqto' qui'itta da qarataxaqui. 31Qaq 'era da qoñiitec da ivireuga yi'iye na'a'q, nache imauec da qanmachiiuec qataq saishet da huo'o ca qollequi. Qaq 'era qome da nache 'eetai' da qoyecỹaxaqui.
32Nache ca ntaxaỹaxanaxanec maye talec da lo'onataxanaxac ñi Aarón da yaqto' lataxala' ca ntaxaỹaxanaxanecpi, camaye ỹo'ot ca nachetaqtaxanaxat maye sa imauaq da qaỹavigaxat, da yaqto' qaỹapalaxat na nasouaxashetpi. Qaq camaye, nache ỹaayiñi caua alogo na ntaxaỹaxanaxanec maye chegaqaiguilo na lino, 33nache ỹo'ot da lataxac da qui'itta naqa'en ñi npe'l qataq ye pa'auo maye netaña añi laỹe' naua aỹamaxataxaco, qataq añi nca'atoxonaxalate, qataq qaỹapalaxat nataqa'en na lasouaxashetpi ca ntaxaỹaxanaxanecpi, qataq 'enauac na Israel le'ecpi.
34Qaq 'era da nache 'eetai' lataxac da qoyecỹaxaqui: Da nache 'oonolec da qauo'oche ye vi'i da yaqto' qaỹapalaxat nam ỹo'ot lle'etaxaloxosat na Israel le'ecpi.»
Nache qaipacchigui da lamaxasoxonaxac Ñim Nataxala' maye ỹamaxalec co'ollaxa so Moisés.
