Aso nachetaqtaxanaqte maye chegaqaigui ana ala na nañiguishec
1Qaq da huo'o ca 'oonolec da qoñiita da ỹanot Ñim Nataxala' aca lachetaqtaxanaqte, da chegaqaigui ana ala na nañiguishec maye ishet da qaỹo'ot na lsoche, nache icorelec ca aceite qataq ỹachalec ca qo'oipaq lcha'q nchenaxanaxat ama na laita. 2Ime, nache iroua'alo ñeua llalqa so Aarón maye ntaxaỹaxanaxanaqa. Huaña, nache ca 'oonolec ñiimaye ỹauota'a 'oonole napocna da ỹacona que'eca lsoche maye lalegue ca aceite, qataq 'enauac ca qo'oipaq lcha'q maye nchenaxanaxat, nache ỹavigaxat, ỹachalec añi nca'atoxonaxalate da yaqto' nachetaqtaxanaqte maye naigui da qaiuennate da Ñim Nataxala' lalamaxat 'enauacna. Cha'aye nachetaqtaxanaqte maye qaỹavigaxat, yaqto' da ama laitaỹaxac ỹamaateguet Ñim Nataxala'. 3Qaq ca no'onañi laỹepi aca'aca nachetaqtaxanaqte maye chegaqaigui ana ala na nañiguishec, nache taỹot ñi Aarón qataq na llalaqpi. Cha'aye qaiỹotauga nachetaqtaxanaqte maye qaỹavigaxat da qoỹanot Ñim Nataxala', qaq anamaye ỹataqta sa qaishetapec.
4Qaq da huo'o ca ỹaneuo aca lachetaqtaxanaqte chegaqaigui na lsoche ana ala ca nañiguishec, nache ỹauota'a aca nauole maye nqachilliguishe maye qairaqneguet ca aceite, qalaxaye saishet da qaỹalecneguet aca ỹasheeraxachigui ca ndaqñiguishec, huo'otaq aca lỹa nauole sa nquesaxan maye choche qaỹa'ameelec ca aceite.
5Qalaxaye da ỹaneuo da lachetaqtaxanaqte aca nauole maye nauotaxala' ca nauoxonaxala', nache ỹauota'a ca ỹataqta no'on lsoche, qataq qairaqneguet ca aceite, qalaxaye saishet da qaỹalecneguet ca ỹasheeraxachigui ca ndaqñiguishec. 6Ime, nache icolaxachigui qataq icorelec ca aceite, cha'aye nachetaqtaxanaqte chegaqaigui ana ala ca nañiguishec.
7Qaq da ỹaneuo da lachetaqtaxanaqte aca nauole maye nauotaxaqui aca taxaqui, nache ỹauota'a ca ỹataqta no'on lsoche qataq lalegue ca aceite.
8Qaq da ime da ỹo'ot aca'aca lachetaqtaxanaqte maye nache 'eetec de'era da no'onataguec, nache iroua'a Ñim Nataxala', ỹanem ca ntaxaỹaxanaxanec, yaqto' camaye iroua'a añi nca'atoxonaxalate. 9Qaq huaña qome, nache ca ntaxaỹaxanaxanec ỹacona ca laỹe aca'aca nachetaqtaxanaqte da ỹavigaxat, ỹachalec añi nca'atoxonaxalate, cha'aye nachetaqtaxanaqte maye naigui da qaiuennate da Ñim Nataxala' da lalamaxat 'enauacna, yaqto' da ama laitaỹaxac ỹamaateguet Ñimaye. 10Qaq ca no'onañi laỹepi aca'aca nachetaqtaxanaqte maye chegaqaigui ana ala ca nañiguishec, nache taỹot ñi Aarón qataq na llalaqpi. Cha'aye aca'aca qaiỹotauga nachetaqtaxanaqte maye qaỹavigaxat da qoỹanot Ñim Nataxala', acamaye ỹataqta sa qaishetapec.
11Qaq 'enauac aca'aca nachetaqtaxanaqtepi, saishet da qaỹalecneguet ca dapic lli'i qataq ca ỹasheeraxachigui ca ndaqñiguishec, cha'aye acamaye ishet da na'axat aca nachetaqtaxanaqtepi maye qaỹavigaxat da qoỹanot Ñim Nataxala'. 12Qalaxaye ca ỹasheeraxachigui ca ndaqñiguishec, qataq ca dapic lli'i, ishet da qoỹanot Ñim Nataxala' huaxaiguet aca nachetaqtaxanaqte maye la'auaqteguishe ala ca nañiguishec. Qalaxaye saishet da qaỹauota'a nachetaqtaxanaqte qaỹavigaxat da yaqto' ỹamaateguet da laitaỹaxac Ñim Nataxala'.
13Qaq 'enauac aca'aca nachetaqtaxanaqtepi maye chegaqaigui ana ala ca nañiguishec, iuen da qaỹalecneguet ca toue, cha'aye ca toue naigui da nache 'eetai' de'era aỹamaxataxac Ñim Qanatamnaxala'ai. Qaq ỹoqo'oye 'enauac aca laỹepi nachetaqtaxanaqtepi iuen da qaỹalecneguet ca toue.
14Qaq da huo'o ca ỹaneuo aca nachetaqtaxanaqte aca la'auaqteguishe ala ca nañiguishec, nache ỹauota'a aca nqatelliguishec ala ca nañiguishec, huo'otaq aca nsoiguishe. 15Qataq nache icorelec ca aceite qataq ỹachalec ca qo'oipaq lcha'q nchenaxanaxat ama na laita, cha'aye acamaye qaỹauo'o nachetaqtaxanaqte chegaqaigui ana ala ca nañiguishec. 16Ime, nache ca ntaxaỹaxanaxanec ỹavigaxat ca laỹe que'eca nsoiguishec, qataq aca nqatelliguishec ala ca nañiguishec, nache lỹateuo ca aceite qataq 'enauac ca qo'oipaq lcha'q nchenaxanaxat ama na laita, da yaqto' nachetaqtaxanaqte maye naigui da qaiuennate qataq huo'o naq 'enec qanqa'en da Ñim Nataxala' maye lalamaxat 'enauacna.
