Nam ishet da chec ana nachetaqtaxanaqte
1Ñim Nataxala' 'enapega so Moisés, 'eeta':
2«Qonapega qome ñi Aarón qataq na llalaqpi, da huo'o naq 'enec naqa'en ana nachetaqtaxanaqtepi maye sa qaishetapec maye Aỹem ỹanot na Israel le'ecpi, yaqto' saishet da ỹe'enai' da qui'itta ỹe'enaxat. Qaq 'era da ỹa'aqtac, Aỹem Nataxala'.
3Nataqa'en qonapega qome namayepi, da huo'o ca saishet da qui'itta da lataxac na chegoxoguet namayepi, nache saishet da ỹaneuo ca nachetaqtaxanaxat, cha'aye da ỹaneuo ca nachetaqtaxanaxat maye ỹaneuo na Israel le'ecpi, da yaqto' qoỹanot Ñim Nataxala', nache camaye qaỹo'orauec, ca'ai qanqa'en ye ỹanataqa'. Qaq 'era da ỹa'aqtac, Aỹem Nataxala'.
4Qataq na chegoxoguetpi ñi Aarón, da huo'o ca huetalec na lo'oc ca qauem nhuetaxanaxa, huo'otaq da huo'o na lli'i ñi logoxoshet, nache saishet qome da chec ca nallec maye qoỹaneuo da nachetaqtaxanaxat, nato' qom qui'itta.
Qataq ca ipoteua'a ca ỹataqta qaiqaiga souaxat da nhuoiguet ca leuaxaic, huo'otaq ca maiche anactac ana lmale, 5huo'otaq ca ipoteua'a ca shiguiỹac maye saishet da qui'itta, huo'otaq da ipoteua'a ca shiỹaxaua maye saishet da qui'itta, nache camaye saishet da qui'itta, 6nache camaye saishet da qui'itta ivitta'a da pe. Ỹoqo'oye camaye saishet qome da chec ca nachetaqtaxanaxat maye qoỹaneuo, da ñaq saxanaxa da nachel da yaqto' nỹola't. 7Qaq da inoxooñi añi nala', nache camaye qui'itta. Ime, nache ishet da qaltaq chec ca nachetaqtaxanaxat maye qoỹaneuo, cha'aye maiche lalamaxat aloq. 8Qataq saishet qome da chec ca lapat ca shiguiỹac leuaxaic, huo'otaq ca lalaatac ca shiguiỹac maye dequi'iỹapec, ten qom saishet da qui'itta naqa'en da lataxac. Qaq 'era da ỹa'aqtac, Aỹem Nataxala'.
9Nache na ntaxaỹaxanaxanecpi ỹataqta ỹalaxalec qome na ỹamaxasoxonaxacpi, yaqto' qaica ca ileu, souaxat da ỹashaxanec da ỹa'aqtac. Cha'aye Aỹem Nataxala' maye sanem namayepi da Aỹem do'onataxanot.
10Qaica qome ca shiỹaxaua maye saq chegoxoguet na ntaxaỹaxanaxanecpi da chec ca laỹe aca nachetaqtaxanaqte maye qoỹaneuo. Qataq ca choche namaxasoxoic ca ntaxaỹaxanaxanec, qataq ca lo'onataxanaxanec camaye saishet da chec ca laỹolec acamaye. 11Qalaxaye ca ntaxaỹaxanaxanec da desheenaxana ca nlatac, ỹauota'a aca maiche alom, nache que'eca nlatac ishet da chec ca laỹe aca nachetaqtaxanaqte. Qataq ca lañoqo' ca lma' camaye, nataqa'en ishet da chec ca laỹe que'eca nallec.
12Qaq aca llale camaye, da huaroneguet ca saishet da ntaxaỹaxanaxanec, nache acamaye saishet da chec ca laỹe aca nachetaqtaxanaqte maye lalamaqte na ntaxaỹaxanaxanecpi. 13Qalaxaye da pa'ai, huo'otaq qaỹalat, qataq qaica ca llalaqpi acamaye, qataq da ỹe'eguelaxa ca lma' ca lta'a, nache 'eeta'am da ñaq lamaxai, nache acamaye ishet da chec ca aloq ca lta'a. Qalaxaye ca shiỹaxaua maye saq chegoxoguet na ntaxaỹaxanaxanecpi, nache saishet qome da chec que'eca nallec.
14Qaq ca shiỹaxaua da ilamaxata'a da chec ca nallec maye qoỹaneuo da nachetaqtaxanaxat, nache camaye iuen da isheeten ca nallec maye chec, qataq ỹauo'o aca ỹactec lsheetenaxanaqte, da ỹanem ca ntaxaỹaxanaxanec. 15Qalaxaye ca ntaxaỹaxanaxanecpi saishet qome da ỹa'ashaxan aca nachetaqtaxanaqtepi maye ỹaneuo na Israel le'ecpi da ỹanot Ñim Nataxala', 16cha'aye namayepi da ỹashaxanec da lataxac ca nallec maye sa qaishetapec, nache iuen da ỹaneuo ca lachetaqtaxanaxat maye sa imauaq da qaỹavigaxat. Cha'aye Aỹem Nataxala' maye sanem namayepi da Aỹem do'onataxanot.»
Na shiguiỹacpi maye ishet da qoỹaneuo
17Ñim Nataxala' 'enapega so Moisés, 'eeta':
18«Qonapega qome ñi Aarón qataq na llalaqpi, qataq 'enauac na Israel le'ecpi, da huo'o ca Israel le'ec, huo'otaq ca chegaqauecpi maye netaigui namayepi, da ỹanot Ñim Nataxala' ca shiguiỹac da yaqto' lachetaqtaxanaxat qaỹavigaxatta, huo'otaq souaxat da huo'o ca qoỹan na'aqtac, huo'otaq aca nachetaqtaxanaqte maiche chegoqchigui da qoỹan, 19nache iuen da qoỹaneuo ca shiguiỹac lhuaraic, qataq qaica ca lque'emaxa yaqto' qaỹaỹamaxareeta. Qataq ishet da huaca, huo'otaq qagueta huo'otaq quetaq, 20qalaxaye saishet da que'emaxaic, cha'aye camaye saishet qome da qaỹaconeguet.
21Qaq da huo'o ca shiỹaxaua da ỹanot Ñim Nataxala' ca lachetaqtaxanaxat qanhuaachigui, huo'otaq souaxat da huo'o ca ỹan la'aqtac, huo'otaq ca lachetaqtaxanaxat maiche chegoqchigui da ỹan, nache camaye iuen da ỹaneuo ca huaca, huo'otaq qagueta qaica ca lque'emaxa da yaqto' qaỹaỹamaxareeta. 22Saishet qome da ỹanot Ñim Nataxala' ca shiguiỹac sa nauaañi, huaỹoraxaic, qaica ca lỹa lapia', huo'otaq ca huo'o aca lquerela, huo'otaq quesaxaic, huo'otaq da nasheguem na lo'oc ana lhueta, nache saishet da ỹaneuo da yaqto' qaỹavigaxat da qaỹachalec añi nca'atoxonaxalate maye lalamaqte Ñim Nataxala'. 23Nachaqcata ca nachetaqtaxanaxat maye maiche qoỹan, nache ishet da qoỹaneuo ca huaca, huo'otaq qagueta na'aictaxa da ichiỹañi na lỹa lapia', qalaxaye da nachetaqtaxanaxat souaxat da huo'o ca qoỹan na'aqtac, nache saishet da qaỹaconeguet.
24Qataq saishet da qoỹanot Ñim Nataxala' ca shiguiỹac maye que'emaxai naua l-la, huo'otaq qaiuaxanguilo, huo'otaq da qanqa't, qaicheguere'c. Qaq nache saishet qome da qauo'oche de'era ca qoñiitalec qana'alhuai. 25Qataq saishet da qauacoñiiguet que'eca shiguiỹac que'emaxaic da qami' iroua'alo ca chegaqauec, da yaqto' nallec maye qoỹanot Ñim Qanatamnaxala'ai, cha'aye que'eca shiguiỹac que'emaxaic, saishet da qaỹaỹamaxaren.»
Ca shiguiỹac maye qoỹaneuo da qaỹalauat
26Ñim Nataxala' 'enapega so Moisés, 'eeta':
27«Da ivita da ñiguiñi ca huaca llalec, qagueta llalec, quetaq llalec, nache camaye qaỹa'aqta'a da nache nnaictague' aca late'e caua siete na'axa'te, qalaxaye da ivi' ca na'a'q ocho, nache ishet da qaỹaconeguet da qaỹavigaxat da qoỹanot Ñim Nataxala'.
28Saishet qome da nache huaigui ca 'oonolec na'a'q da qaualauache aca huaca, qataq ca llalec, huo'otaq aca qagueta, qataq ca llalec.
29Qaq da huo'o ca ỹaneuo aca lachetaqtaxanaqte da ỹanot da na'achecỹaxac Ñim Nataxala', nache ỹaỹamaxatchiguiñi qome yaqto' ỹataqta qaỹaỹamaxareeta. 30Qataq acamaye, nache qanallec que'eca na'a'q qataq saishet da huo'o ca no'onañi qanqa'en da yaqto' ivira'a ca lỹa na'a'q. Qaq 'era da ỹa'aqtac, Ayem Nataxala'.
31Qaq qauo'oche qome na ỹamaxasoxonaxacpi, qataq qaualaqaiguet. Qaq 'era da ỹa'aqtac, Aỹem Nataxala'.
32Saishet qome da qaica ca 'enec qanqa'eñi da qui'itta ỹe'enaxat, qataq da qui'itta ỹataxac, da sootangui na Israel le'ecpi. Cha'aye Aỹem Nataxala' maye qami' sanema da Aỹem qauo'onataxañiỹot, 33qataq qami' ñeqateeguesopa co'ollaxa ye Egipto da yaqto' nache Aỹem Qanatamnaxala'ai. Qaq 'era da ỹa'aqtac, Aỹem Nataxala'.»
