So aceite maye lcoraxat aso ncoỹaraxanaxaquipi
1Ñim Nataxala' 'enapega so Moisés, 'eeta':
2«'Auamaxalec qome na Israel le'ecpi da 'am ndoua'a ca ỹoqta no'on aceite, yaqto' nache 'eetai' da 'ettaigui añi ncoỹaraxanaxaquipi ye ỹanataqa'. 3Qaq ñi Aarón nacheñi ñi huapegue' qome da ỹaỹamaxaañi ayemayepi, da yaqto' palom 'ettaigui da netaigui ñi npe'l, ye npa'auec ñi napoxonaxat maye netaña añi arca maye laỹe' naua ñaỹamaxataxaco. Qaq 'era qome da nache 'eetai' lataxac da qoyecỹaxaqui qataq cam qami' chegoxogueta. 4Nache aya'aye ncoỹaraxanaxaqui maye siete naua lcoue maye chegaqaigui na ndotec oro, nache 'eetai' da icoỹattalec qome ye lanataqa' Ñim Nataxala'.
Aso nauole maye huetaigui so pa'auo so lanataqa' Ñim Nataxala'
5'Auacona qome ca ỹataqta no'on 'ayiiña, nache 'auo'o't caua doce nauole qaq cuatro kilos 'anqa'en añi 'oonole, 6qataq 'auachalec ye nquia'axala' maye chegaqaigui na ndotec oro maye netaña ye pa'auo ye lanataqa' Ñim Nataxala', nache 'alapotchiyigue'm caua seis, da 'auachaleguete naua dos laỹel. 7Nache 'auachaua'alo naua laỹel ca ndochiguiñi nchenaxanaxat ama na laita, nache 'auavigaxat camaye da yaqto' nmeneguet aca nachetaqtaxanaqte nauolepi, cha'aye naigui da qaiuennate da Ñimaye lalamaxat 'enauacna. 8Qaq acamayepi, nache 'enauaque qome naua na'axa'te maye mataxaqui' da ca ntaxaỹaxanaxanec iroua'a ye pa'auo ye lanataqa' Ñim Nataxala'. Qaq aca'aca nauolepi, nache naigui naua doce llalqa so Israel, qaq 'era da nache 'eetai' qome da lataxac acamayepi.
9Qaq acamayepi, nache taỹot qome ñi Aarón qataq na chegoxoguetpi ñimaye. Qaq namayepi da chec aca'aca nauole, nache huaña naqa'en ca ỹaqauga ye pa'auo ye nqasoxoc ñi npe'l, cha'aye qaiỹotauga nachetaqtaxanaqte maye qoỹanot Ñim Nataxala'. Qaq acamayepi ỹataqta sa qaishetapec.»
Da nhuaxanaguec ca inogoqchet Ñim Lo'onatac 'Enauacna
10Qaq huo'o so shiỹaxaua ỹalectaigui so Israel le'ecpi maye llalec aso 'alo Israel lashe, qalaxaye so lta'a Egipto le'ec, nache se'eso shiỹaxaua ncotaỹapegue' so Israel le'ec huaña ye nanataqa' maye qanayeuta'a. 11Nache so llalec asa'aso Israel lashe, ỹo'ot da l-laraxanaxac, qataq isheuen da le'enaxat Ñim Nataxala', huaña nache qaỹauegueua'a co'ollaxa so Moisés. Qaq aso late'e somaye le'enaxat Selomit, asom llale so Dibri, maye chegoxoguet na lauo' le'ecpi so Dan. 12Nache somaye qaỹapoua'a qataq nache qanauaatalec. Ime, nache qaiuata'a ca la'aqtac Ñim Nataxala'. 13Nache Ñim Nataxala' 'enapega so Moisés, 'eeta':
14«'Auauegueuga qome na pa'auec ye nanataqa' maye qanayeuta'a que'eca shiỹaxaua maye isheuen da ỹe'enaxat. Nache 'enauac na shiỹaxauapi maye hua'aqchigui co'ollaxa, nache ỹashel-lec na lqaic camaye. Ime, nache ỹalauat ỹauota'a na coma' laỹe da ỹasaq.
15Nache qonapega qome na Israel le'ecpi, qoneta': ‹Camachaqca shiỹaxaua da ilarapiguiñi Ñim Natamnaxala', nache camaye maiche nque'etaxangui ca nhuaxanaguec.› 16Qaq 'enauac cam ỹo'ot da l-laraxanaxac qataq da isheuen da le'enaxat Ñim Nataxala', nache qaỹalauat. Nache 'enauac ca lapoota'a't Israel le'ecpi ỹalauat, ỹauota'a na coma' laỹe da ỹasaq. Qaq nache 'ena'am ca chegaqauec huo'otaq Israel le'ec, cha'aye ỹo'ot da l-laraxanaxac, qataq isheuen da le'enaxat Ñim Nataxala', nache camaye qaỹalauat.»
Da nhuaxanaguec ca huo'o ca ỹo'otec ca lỹa
17«Qaq ca shiỹaxaua da ỹalauat ca lỹa, nache camaye nataqa'en qaỹalauat.
18Qaq ca shiỹaxaua da ỹalauat ca shiguiỹac maye saishet da lalo, nache camaye ỹauo'o ca nmenaxanaxaneguet lỹa shiguiỹac.
19Qaq da huo'o ca ique'emaqchet ca lỹa shiỹaxaua, nache camaye qaỹe'enaxatteguet ca lque'emaqtaxanaxac. 20Da huo'otaq dacagaqtaxan, nache nataqa'en qaỹacagaxat, da huo'otaq ique'emaqchet aca na'aite, nache nataqa'en qaique'emaqchet aca la'aite. Qaq da huo'otaq ỹacagaxat aca nhue, nache nataqa'en qaỹacagaxat aca lhue, nache qaipagaqchiichigui da nque'eenaxac ca qaỹacagaxat acamaye.
21Qataq ca ỹalauat ca shiguiỹac maye saishet da lalo, camaye naiguet naqa'en ca lỹa shiguiỹac. Qalaxaye ca ỹalauat ca lỹa shiỹaxaua, nache camaye nataqa'en qaỹalauat.
22Qaq 'era da 'oonolec lataxac da namaxasoxonaxac, damaye saishet qome da ndotec da talec nam chegoxoguetpi so Israel, damaye ivirauga nataqa'en na chegaqauecpi. Qaq 'era da ỹa'aqtac, Aỹem Nataxala' maye Qanatamnaxala'ai.»
23Nache so Moisés 'enapega so Israel le'ecpi, da ỹauegueuga ye pa'auec ye nanataqa' maye qanayeuta'a so shiỹaxaua maye isheuen da le'enaxat Ñim Lo'onatac 'Enauacna. Nache huaña, qaq qaỹalauat qaỹasaqtalec na coma' laỹepi. Nache so Israel le'ecpi ipactelec da lamaxasoxonaxac Ñim Nataxala' maye ỹamaxalec co'ollaxa so Moisés.
