Levítico 25

₁Nache Ñim Nataxala' 'enapega so Moisés co'ollaq hualec añi qasoxonaxa Sinaí, 'eeta': ₂«Qonapega qome na Israel le'ecpi qoneta': Da ivita da qaunoxoñiiua'a ye 'alhua maye qami' sanema qome da yaqto' qaralamaxache, nache yemaye huo'o qome ca laloxoqui da qanmataxanaxañiiuec na 'alhua, souaxat da ỹataqta qavio'oxoyiñi Ñim Nataxala'. ₃Nache seis vi'iye da qaỹa'anaxañeeteguelec ca qana'alhuai, qataq da qauchiquiiuec aca lcouepi aca qa'añiguishe uva qataq da qanqachettac aca alapi, ₄qalaxaye da ivireuga ca vi'i siete, nache saishet qome da qaỹa'anaxañeelec que'eca qana'alhuai qataq saishet da qauchiquiiuec aca lcouepi aca qa'añiguishe uva cha'aye que'eca vi'i iuen da nmatec ca 'alhua, souaxat da qavio'oxoyiñi Ñim Nataxala'. ₅Qataq saishet da qanqache ca ala ca maiche ñaxat nañiguishec, qataq saishet da qanqache aca ala aca nañiguishe uva maye sa qaicheguec aca lcouepi, cha'aye que'eca 'alhua iuen da ỹataqta qanmataxanaxanec. ₆Qalaxaye 'enauac ca maiche ñaxaalec que'eca 'alhua da huetoigui que'eca vi'i maye nmataxaqui na 'alhua, camaye ishet da qollequiitac, qataq ca qarlataqui qataq aca qarlataipi, qataq ca no'onataxanaxanecpi qataq ca chegaqauecpi maye qami' netaiguilo. ₇Nache 'enauac ca maiche ñaxat que'eca qana'alhuai, ishet da qolliquiitac, nataqa'en ca maiche qareloipi qataq ca shiguiỹac maye huauec, ishet da chectac nataqa'en camaye.

₈Qaq da mashe ivi' ca siete da qaỹe'eguelaxalec da qaỹo'ot que'eca vi'i maye nmataxaqui na 'alhua, nache mashe ivi' caua cuarenta y nueve vi'iye. ₉Qaq ca na'a'q diez que'eca ca'agoxoic siete, nache huetoigui da qaỹapalaxat ca nasouaxashet, nache qami' qauashiiyigui aca nasheere peenaq lcoue, que'eca qoñiitaña qana'alhuai. ₁₀Qaq da ivita ca vi'i cincuenta, nache qaiỹotauga da yaqto' laloxoqui da huesouec qanqa'en ca shiỹaxauapi maye nsheenaxanaxat que'eca qana'alhuai, nache camaye ỹe'eguelaxa ca chegoxoguet lauo' le'ecpi, qataq ca lalamaxat na'alhua, nataqa'en da qaỹapalaxat aca navigaxaiste qataq da qaỹe'eguelaxat ca 'alhua maye qaimen. ₁₁Qaq que'eca vi'i cincuenta, nache laloxoqui da ỹe'eguelaxa da huesochiguiñi 'enauacna, nache qaica ca danaxan qataq da nqat aca ala ca nañiguishec maye maiche ñaxat, qataq saishet da qanqat aca ala aca nañiguishe uva, ₁₂cha'aye que'eca vi'i, camaye ỹataqta qaiỹotauga qataq nache qami' huesochiyiñi. Qataq nache qollequiitac qome aca ala na no'onaxa le'ec maye maiche ñaxat que'eca 'alhua. ₁₃Nache que'eca vi'i maye laloxoqui da ỹe'eguelaxa da huesochiguiñi 'enauacna, qami' qaltaq qavi'iguelaqailec da qoñiỹalec ca maiche qaralamaxache qana'alhuai. ₁₄Qaq da huo'o ca imen ca lalamaxat, huo'otaq da desheenaxana ca na'alhua ca lỹa, nache saishet qome da ỹe'enai' ca nmenaxaua. ₁₅Ỹoqo'oye iuen da qanaỹamaxatchigui aca lasheue ca qaisheenaxana, nache qanaloqnaguilo caua vi'iye maye huaiguilo da qanqat na ala ca nañiguishec, choche ivitta'a da ivireuga ca vi'i maye laloxoqui da ỹe'eguelaxa da huesochiguiñi 'enauacna. ₁₆Qaq da ñaq qaỹata'a que'eca laloxoqui da ỹoltaq huesochiguiñi 'enauacna, nache que'eca qaimen, ishet da nquiguisheguem aca lasheue, qaq da saq 'amaqtache que'ecaua vi'iye, nache nquiguiñi aca lasheue. Cha'aye ca qaimen saishet da nacheca ca 'alhua, nacherata da qanaloqnagui ca lashiichiỹaxac caua lcate' da qanqat ana ala ca nañiguishec. ₁₇Saisheto' da huo'o ca ỹatenachet ca lỹa da ỹe'enai'. Nacherata da huo'o naq 'enec naqa'en Ñim Natamnaxala', qaq 'era da ỹa'aqtac, Aỹem Nataxala' maye Qanatamnaxala'ai.

₁₈Ỹataqta qaualaqailec qome na iqataxacpi, qataq ỹataqta qauo'oche na ỹamaxasoxonaxacpi, yaqto' qaica ca machaqca da qanachaalataxaqui ca 'alhua maye qoñiitaña. ₁₉Qaq ca qana'alhuai ỹataqta qalota qome da alaỹaxac, nache chochaq huañi da qarquia'axaqui, ivitta'a da qami' comaraxaiqa, nache qaica camachaqca da qanachaalataxaqui. ₂₀Saiuena'a da maiche qannacheeteguela't, qoñiita': ‹¿Chaq negue'to' cam sacheguenaq da ivireuga que'eca vi'i siete, ye saishet da sanaxanaq qataq da saishet da ñeqataq ana ala na qa'añiguishecpi?› ₂₁Qalaxaye Aỹem qome qami' sanema da ichoxonnataxanaxa da ivireuga que'eca vi'i seis, qataq nache ỹo'ot da ivi' caua tres vi'iye da sa qoue da alaỹaxac ca nañiguishec. ₂₂Nache qollequiitac qome aca qaraỹamaqtai qa'añiguishe ala, qataq ivitta'a ca vi'i ocho da qaltaq qaỹa'añiiñi ca dalaxaic qa'añiguishequi, qalaxaye ñaqaiyeta ivirauga ca vi'i nueve aca'aca qaraỹamaqtai nañiguishe ala.

₂₃Qaq ca 'alhua saishet da ỹoqta qaimen, cha'aye 'enauac camaye ỹalamaxat, qataq ye qami' saishet da nache 'eetai' da qoñiitalec camaye, cha'aye qami' qoñiita'am ca chegaqauec maye choche ñamaxasoxoic. ₂₄Qaq ỹoqo'oye, da huo'o ca qausheenaxañiỹa 'alhua, nache qami' qauaỹaañita da ca hua'auñi lalamaxat, camaye ishet da ñe'eguelaxaala't. ₂₅Qaq da huo'o ca 'oonolec na qarhuo'oi le'ecpi da ivita da choxoraq, nache imen ca lalamaxat na'alhua, nache ishet da anac ca lalamaxat lauo' le'ec da nachaalec camaye da yaqto' desheenaxana que'eca imen camaye co'ollaxa. ₂₆Qaq da huo'otaq qaica ca lalamaxat lauo' le'ec da anac da yaqto' desheenaxana que'eca 'alhua, qalaxaye camaye da ishet da nalotalec aca lasheue, nache ñe'eguelaxaala't que'eca na'alhua, ₂₇nache naloqte'n caua vi'iye chegoqchiguiña co'ollaq imen, qataq naloqnagui ca lashiichiỹaxac caua lcate' da qanqat ca ala ca nañiguishec, da yaqto' isheeten que'eca shiỹaxaua maye desheenaxana ca na'alhua. Huaña, nache ishet da qaltaq ỹe'eguelaxalec da nalec ca maiche lalamaxat na'alhua. ₂₈Qalaxaye da saishet da ivi' aca lasheue da yaqto' ñe'eguelaxaala't ca na'alhua, nache camaye nache 'eetai' da hueto'ot ca shiỹaxaua maye desheenaxana co'ollaxa, choche ivitta'a ca vi'i maye laloxoqui da ỹe'eguelaxa da huesochiguiñi 'enauacna. Huaña, nache ca imen ca na'alhua ishet da ỹe'eguelaxa da qaltaq nalec ca lalamaxat na'alhua.

₂₉Qaq da huo'otaq huo'o ca imen ca lma' maye naigui ca qalota nỹecpi maye qanpaxattaua'a, camaye ishet da qaltaq ñe'eguelaxaala't da desheenaxana da ñaq saxanaxa ivirec ca 'oonolec vi'i, chegoqchiguiña naqa'en ca na'a'q co'ollaxa imen camaye. ₃₀Qaq da huo'otaq sa ỹañoxot que'eca nỹec da ñe'eguelaxaala't da ivirec ca 'oonolec vi'i, nache que'eca nỹec taỹot cam desheenaxana qataq ca llalaqpi. Nache saishet da qaltaq qaỹe'eguelaxatot da ivita ca vi'i maye laloxoqui da ỹe'eguelaxa da huesochiguiñi 'enauacna. ₃₁Qalaxaye ca nỹecpi maye netaigui na qaica ca lpaqtaxat, camayepi 'eeta'am qanqa'en da lataxac ca 'alhua, da ishet da qaltaq qañe'eguelaxaala't da qaisheenaxana, huo'otaq qaỹe'eguelaxat da ivireuga ca vi'i maye laloxoqui da ỹe'eguelaxa da huesochiguiñi 'enauacna.

₃₂Qaq na chegoxoguet so Leví, namayepi nache 'eetai' qome da ishet da ñe'eguelaxaala't da desheenaxana ca lalamaxat nỹec maye netaigui na qalota nỹecpi maye maiche lalamaxat namayepi. ₃₃Qaq namayepi da huo'o ca saishet da nalolec da ñe'eguelaxaala't da desheenaxana, nache qaỹe'eguelaxatem da ivireuga ca vi'i maye laloxoqui da ỹe'eguelaxa da huesochiguiñi 'enauacna. Cha'aye nachenata namayepi da lalamaxat ca nỹecpi maye naigui nam huaqta'a't nỹecpi maye qanpaxattaua'a, maye maiche lalamaxat na leviitapi. ₃₄Qaq ca 'alhuapi maye nquia'axanataxanaqa' maye hueto'oto naua loiguiye nam huaqta'a't nỹecpi maye lalamaxat na leviitapi, namayepi saishet da qaimen, cha'aye nache 'eetai' da lalamaxat namayepi.

₃₅Qaq da huo'o ca 'arhuo' le'ec da ivita da ỹataqta choxoraq, nache da 'am ỹe'eguenot, nache ishet da 'autauan qome camaye, 'eeta'am 'anqa'en ca chegaqauec da 'anamaxasoxoic, nache 'auauo'o ca ldaqa' que'eca 'arma'. ₃₆Saishet qome da 'anhuo' qataq saishet da 'anquigaxatapeguec ca lavigaxashet maye 'anem co'ollaxa, souaxat da huo'o naq 'enec 'anqa'en Ñim 'Anatamnaxala', yaqto' camaye nache 'eetai' da netaigui ca 'arhuo' le'ecpi. ₃₇Saishet qome da 'anquigaxatapeguec aca 'om maye 'anem co'ollaxa da la'aale, qataq saishet da 'anquigaxatapeguec aca lasheue ca nallec maye 'anem da lavigaxashet. ₃₈Qaq 'era da ỹa'aqtac, Aỹem Nataxala' maye Qanatamnaxala'ai, maye qami' ñeqateeguesopa co'ollaxa ye Egipto da yaqto' qami' sanema ye 'alhua Canaán da yaqto' Aỹem Qanatamnaxala'ai.

₃₉Qaq da huo'o ca maiche 'arhuo' le'ec da ivita da ỹataqta choxoraq, nache 'am imenot da nachaalataxac. Nache da 'auo'onataxanaxan camaye, qalaq saishet da 'eeta'am 'anqa'en ca lỹa nlatac. ₄₀Nacherata da 'aue'enaxattem ca yo'oqchigui 'onataxanaxaic, huo'otaq ca 'anamaxasoxoic. Nache camaye 'am do'onataxaatacot, ivitta'a ca vi'i maye laloxoqui da ỹe'eguelaxa da huesochiguiñi 'enauacna. ₄₁Huaña, nache camaye ca'ai qome ca 'arma', lỹatec ca llalaqpi da yaqto' ỹe'eguelaxa ca lalamaxat lauo' le'ecpi, qataq ca na'alhua, ₄₂cha'aye 'enauac na Israel le'ecpi maiche ỹalamaxat ỹamaxashecpi, cha'aye Aỹem ñeqateeguesop co'ollaxa ye Egipto, ỹoqo'oye namayepi saishet qome da huo'o ca qaimen, da yaqto' nlatacpi. ₄₃Qataq saishet qome da sa 'auayacnapec, nacherata da 'auachaxan da huo'o naq 'enec 'anqa'en Ñim Atamnaxala'.

₄₄Qaq da 'auauotaique da 'ausheenaxana ca 'arlatac, huo'otaq aca 'arlata, nache 'auachegoxota'a ca lỹa 'alhua maye saqaỹapeque ca qonetaña 'alhua. ₄₅Nataqa'en ishet da 'auachegoxotaigui nam shiỹaxauapi chegaqauecpi maye qami' netaiguilo cam 'ausheenaxana, qataq ca llalaqpi namayepi maye lañoqo' que'eca 'alhua maye qaralamaxache, nachecata maye ishet da huo'o ca 'ausheenaxana da yaqto' 'aralamaxat. ₄₆Qaq camayepi nache no'ona'aguet qome ca qaỹa'alquipi da yaqto' lalamaxat da ivita da qaullivi, da nache 'eetai' da l-latacpi. Qalaxaye qami' Israel le'ecpi, qaica qome ca sa iyacnapec ca lamaxashec da maiche lauo' le'ec.

₄₇Qaq da huo'o ca chegaqauec, huo'otaq queuoxoic, da netaña ca qana'alhuai, nache da ivita da ỹataqta sallaxanec, qaq da ivita da huo'o ca choxoraq da qoñiita, nache imenot da nachaalataxac que'eca chegaqauec, huo'otaq ca lalamaxat lauo' le'ec camaye, ₄₈nache que'eca Israel le'ec, ishet da qaltaq qaisheenaxana da yaqto' qañe'eguelaxaala't, na'aictaxa da camaye mashe nmeela't co'ollaxa. Qalaxaye ishet da anac ca lalamaxat lauo' le'ec da yaqto' nachaalec camaye da nqateeguesop da nlataguec. ₄₉Qaq da anac ca ntesoqo', huo'otaq ca llalec ca ntesoqo', huo'otaq ca lỹa lalamaxat lauo' le'ec, nache ishet da nachaalec da isheeten aca lasheue, da yaqto' isoueeguesop da nlataguec. Qaq da huo'otaq ỹaỹamaxañi camaye, nache ishet da maiche nsheetela't. ₅₀Qaq camaye, qataq cam desheenaxana camaye, naloqte'n caua vi'iye chegoqchiguiña ca vi'i co'ollaq nmeela't, nache ivitta'a ca vi'i maye laloxoqui da ỹe'eguelaxa da huesochiguiñi 'enauacna. Qaq aca'aca lasheue, nache qanaloqna'agueta caua vi'iye da do'onataxaatac, naloteguet qanqa'en aca lasheue ca 'onataxanaxaic. ₅₁Qaq da ñaq qalote' caua vi'iye da ñaq saxanaxa da ivita ca laloxoqui da ỹe'eguelaxa da huesochiguiñi 'enauacna, nache ishet da huo'o ca isheeten aca lasheue maye nalotegueta ca lasheue da lo'onataxanaxac que'ecaua vi'iye maye saxanaxalo da ivildec. ₅₂Qaq da mashe sa qaỹapeque ca vi'i maye laloxoqui da ỹe'eguelaxa da huesochiguiñi 'enauacna, nache camaye isheeten aca lasheue, naloqchiichiguilo caua vi'iye maye no'oirañi. ₅₃Qataq saishet da qauashiñiita da sa qaiyacnapec camaye, nacherata da qaue'enaxacheeteguet ca 'onataxanaxaic maye 'oonolec vi'i qanqa'en da do'onataxan.

₅₄Qalaxaye da huo'otaq qaica ca anac da nachaalec que'eca Israel le'ec da ñe'eguelaxaala't, camaye qataq ca llalaqpi, nache camayepi huesochiguiñi da ivita ca vi'i da ỹe'eguelaxalec da huesochiguiñi 'enauacna. ₅₅Cha'aye qami', Israel le'ecpi maiche qami' ỹalamaxatpi, da yaqto' Aỹem qauo'onataxañiỹot, cha'aye Aỹem qami' ñeqateeguesopa co'ollaxa ye Egipto. Qaq 'era da ỹa'aqtac, Aỹem Nataxala' maye Qanatamnaxala'ai.