Levítico 26

₁Saishet qome da qauo'oche ca ỹotta'a't ne'enaqtac nqui'ipi, qataq ca no'onatac coma' atamnaxala', qataq saishet da qanatamñiitacot camaye, cha'aye Aỹem Nataxala' maye Qanatamnaxala'ai. ₂Qataq huo'o naq 'enec qanqa'eñi ca na'a'q mataxaqui, qataq ye ỹanataqa' maye huaña naxa da Aỹem qanauane'. Qaq 'era da ỹa'aqtac, Aỹem Nataxala'.

₃Qaq da qaualaqaigueta naua iqataxaco, qataq ỹataqta qauo'oche' naua ỹamaxasoxonaxaco, ₄nache Aỹem ipacchiguilo ñaqa'en naua na'axa'te maye laloxoqui' na auot da qami' ñamaxalo, nache ana 'alhua qataq ana qo'oipaqpi maye hualec na no'onaxa huo'o da alaỹaxac, ₅nache sa qoue qome na ala ca nañiguishec, choche ivitta'a da qanqat aca ala aca uva, qaq aca ala aca uva, acamaye choche ivitta'a qome ca laloxoqui da qaltaq qoỹaañi ca nañiguishec, nache que'eca qoñiitaña qana'alhuai, qaica ca leetapigui lauel, cha'aye sa qoue qome ca qanallec ivitta'a da ỹataqta qami' comaraxaiqa. ₆Qataq qami' sanema da qami' lacchiyiñi qome, qataq qaica ca ỹe'elaqtapigui' na lo'ochaxa, cha'aye Aỹem jec qome ñaqa'en ca shiguiỹacpi maye dequi'iỹapec, qataq que'eca qana'alhuai qaica ca alaataxac. ₇Qataq qami' dataueguesopa ca qami' ipa'agueeta'ape, qataq iqallem ca qaro'ogoxonaxache da qami' dataỹa'agueta. ₈Qaq caua cinco da qoñiita, nache datauec naqa'en ca cien, qaq ca cien da qoñiita, nache datauec naqa'en ca diez mil. Nache ca qami' ipa'agueetacpi iqallem qome ca qaro'ogoxonaxache da qami' dataỹa'agueta. ₉Qaq Aỹem nache ỹataqta qami' saỹamaxareete' da qami' selota'alo, qataq nquictauec qome ñaqa'en da qoñiita yaqto' qami' qalota, qataq nache 'eetai' ñaqa'en da ñaỹamaxataxac da qoñiita. ₁₀Qataq qollequiitac qome aca ala ca hua'auñi qa'añiguishe ca lỹa vi'i, nache ivitta'a da qanqacheeuec ca togoshec qaraỹamaqtaqui souaxat da qauaỹamaxache ca dalaxaic ala.

₁₁Qaq Aỹem nache qami' sootanguilo qome, qataq saishet da qami' sa seuoonegueta. ₁₂Qataq qami' ñenaictegueto, qaq nache Aỹem Qanatamnaxala'ai, qataq qami' nhuo' le'ecpi maiche qami' ỹalamaxatpi. ₁₃Qaq 'era da ỹa'aqtac, Aỹem Nataxala' maye Qanatamnaxala'ai maye qami' ñeqateeguesopa co'ollaxa ye Egipto da yaqto' saishet da nache 'eetai' da qami' l-lataqa yemayepi. Qataq qami' ñeqateeguesopa da qapa'atta qanlataguiiqui, nache huaỹoxootegue ñaqa'en da qarqauaxaqui.

₁₄Qalaxaye qami', da Aỹem sa qaualaqaiguet qataq da saishet da qauo'oche 'enauac ne'ena ỹamaxasoxonaxacpi, ₁₅qataq da saishet da qauacoñiiguet, qataq sa qaushetaxachiiguet na iqataxacpi, qataq na ỹamaxasoxonaxacpi, qataq da sa qaualaqaiguet namayepi, qataq qaica ca 'enec qanqa'eñi da ñaỹamaxataxac, ₁₆nache Aỹem qami' ñamaxalo qome ca ncolanaxa lta'araic, qataq ca nalolaxasat maye qanlem, qataq ca napaxa maye ỹo'ot na ne'eraxa, qataq na'aqche't naua na'ai'te, qataq qaica naqa'en ca la'añaxac da no'ocỹaxac, qataq choche qaỹa'añiiteguiñi qome ca qa'añiguishequi, qalaxaye ca qampa'aguenaxauaipi nacheca ca chec ca ala camaye. ₁₇Qaq Aỹem nache qami' sataỹa'agueta qome, qataq qami' naue'c ñaqa'en ca qampa'aguenaxauaipi. Qataq qami' ilatta'ape ca qami' lquiỹaqa'ate, nache huaña qaq maiche qauataiuec na'aictaxa da qaica ca qami' icaata'ape.

₁₈Qaq da ñaq 'eetalec da saishet da Aỹem qaualaqaiguet, nache siete da she'eguelaxalec da qami' seuaxa'n souaxat da qaye'etaxalqoi. ₁₉Qataq selaxachigui da qana'amqaanaxaqui, qataq so'ot da qaica ca auot ana 'alhua, qataq qaica ca alaỹaxac. ₂₀Qataq shaco' da qana'añaxachiitac da qauo'ocheetac ca qana'alhuai, ye camaye qaica ca lañaxataxac, qataq aca qo'oipaqpi ca no'onaxa qaca aca ala.

₂₁Nache da ñaq 'eetalec da Aỹem qandaqaitapeeguet, qataq saishet da Aỹem qaualaqaiguet. Qaq huaña, nache qaltaq siete da she'eguelaxalec qome da qami' seuaxa'n souaxat da qaye'etaxalqoi. ₂₂Nache qami' samaxaleguete ca shiguiỹacpi maye dequi'iỹapec, da yaqto' chec ca qaỹa'alquipi, qataq ito ca qareloipi, nache nquigaxattañi, qataq ivitta'a da toteguelo caua qanqa'aicolli'.

₂₃Qaq da ñaq 'eetalec da sa qaualaqai, qataq Aỹem qauataita'aguet, ₂₄nache Aỹem qome nataqa'en, qaltaq siete da she'eguelaxalec da qami' seuaxa'n souaxat da qaye'etaxalqoi. ₂₅Qataq qami' nagueleguete ñaqa'en ca no'ogoxonaxat, da yaqto' huo'o da lvi' ñaqa'en da ñaỹamaxataxac, nache na'aictaxa da qavi'igueñiiua'a ca maiche qaralamaxache huaqta'a't nỹecpi maye qanpaxattaua'a, qalaxaye Aỹem qami' hueque ñaqa'en ca nalolaxasat maye qanlem, huaña nache ỹataqta qami' loxonqa ca qampa'aguenaxauaipi.

₂₆Qaq da ivita da selaxachigui ca qaraỹamaqtaqui nallec, huaña nache caua diez 'alo, da ỹauot aca qanqoi nauolepi, nache dauoxonoigui aca 'oonole qatelaxanaxaqui, souaxat da saq 'amaqtaq ca nallec. Qataq da qanallec, nache ỹataqta qalcoreeta, huaña nache saishet da ỹataqta qami' comaraxaiqa.

₂₇Qaq da ñaq 'eetalec da sa qaualaqai qataq Aỹem qauataita'aguet, ₂₈nache Aỹem nataqa'en qami' sataỹa'agueta qome, qataq qami' seroleguete da ỹayeloxo da ỹoltaq siete da qami' seuaxa'n souaxat da qaye'etaxalqoi, ₂₉huaña qome nache qollequi ca maiche qaỹa'alquipi, qataq aca qaỹa'allipi. ₃₀Qataq Aỹem selaxachigui ca qanatamnaqa'aipi maye netaña ca ne'enaqtacpi, qataq dolagui ñaqa'en aca lca'atoxolate ca nchenaxanaxat ama na laita, qaq da qaro'ocỹaxaqui maye mashe leuaxaic, nache llapoolec qome ca ne'enaqtacpi maye qanatamnaxala'aipi, cha'aye ỹataqta qami' saỹemeque. ₃₁Qataq nlachiguiñi ñaqa'en ca qaralamaxache huaqta'a't nỹecpi, qataq dolachigui ñaqa'en ca qanatamnaqa'aipi, qataq sevira'a da saishet da sesheteguet da laitaỹaxac aca qarachetaqtaxanaqche maye samaateguet co'ollaxa.

₃₂Nache ỹataqta 'enauac ñelaxatchiguiñi qome ca qana'alhuai, nache ca qampa'aguenaxauaipi maye anac da nalec camaye, ỹataqta huo'o qome da la'aalaxa. ₃₃Nache qami' selagaxaaleguete ca ỹaqa'a 'alhuapi, souaxat da ñeqatsheguem ca ỹainec da yaqto' qami' secaata'ape, ivitta'a da ỹataqta toolec ñaqa'en ca qana'alhuai, qataq ñelaxaañi ca qaralamaxache huaqta'a't nỹecpi. ₃₄Nache ca 'alhua ỹataqta lacchiguiñi qome, cha'aye huo'o da nmataxac 'enauaque que'ecaua vi'iye da toolec, qataq da qoñiitaña ca na'alhua ca qanpa'aguenaxauaipi, nache ca qana'alhuai ỹataqta nmatec qome, souaxat da qaica ca nmataxac co'ollaxa. ₃₅Qaq nache 'enauaque que'ecaua vi'iye da toolec, ca 'alhua ỹataqta nmatec qome, saq 'ena'am co'ollaq qoñiitalec nache qaica ca nmataxac.

₃₆Nache 'enauac ca lca'alaxaicpi da qoñiita maye hueta'a ca na'alhua ca qanpa'aguenaxauaipi, ỹataqta sa la'axaic ñaqa'en qome da lli'iỹaxa, nache da choche hua'axaỹa da dauaclec aca qo'oipaq laue nache datauec, 'eeta'am ca dataueeguesop ca no'ogoxonaxat, qataq maiche huañi, na'aictaxa da qaica ca ncaatague'. ₃₇Qataq ỹe'egueetega'tpi, 'eeta'am ca dataueeguesop ca alaataxac, na'aictaxa da qaica ca ncaatague', nache qaica ca 'oonolec da qoñiita ca ishet da dataỹa'aguet ca npa'aguenaxauapi. ₃₈Huaña, nache qaulliviỹalec ca ỹaqa'a 'alhua, qataq qami' nmatchiyiñi ca qanpa'aguenaxauaipi. ₃₉Qataq ca lca'alaxaic maye hueta'a ca na'alhua ca npa'aguenaxauapi, camayepi ivitta'a qome da maiche imeuo, souaxat na maiche lle'etaxaloxosat qataq na lle'etaxaloxosat ca lta'alpi.

₄₀Qalaxaye da qaua'axacheeta ca qarasouaxashichi, qataq ca lasouaxashetpi so qarta'ailpi, qataq da 'eetec da ỹe'eguelaqtalec da Aỹem qauataiỹa'aguet, qataq Aỹem qauatenachichi naxa, ₄₁qaq nachera da ỹo'ot qome da qami' sataỹa'agueta, qataq qanqo'oñiỹa ñaqa'en ca na'alhua ca qampa'aguenaxauaipi, yaqto' sa na'amaqten da qarquiyaqteỹaxaqui. Huaña, nache saishet da qauqolliguichi da qanhuaxanaguiiqui. ₄₂Huaña, nache tachigui iuel qome da ñaỹamaxate' co'ollaxa so Jacob, Isaac qataq so Abraham, qataq seuennate yi'iye 'alhua maye sachaxanapeguema co'ollaxa soomaye, ₄₃yem 'alhua maye taỹa'a da qoquiỹa'ai qome, da yaqto' ỹataqta nmatec, nachichiigui da qami' saishet da qoñiỹalec. Qalaxaye qauaỹachiñiita qome da qami' huo'o da qanpe'enaxaqui, souaxat da sa qaualaqailec na ỹamaxasoxonaxacpi qataq na iqataxacpi.

₄₄Qaq na'aictaxa da ñaq qoñiitaña ca na'alhua ca qampa'aguenaxauaipi, qalaxaye saishet qome da qami' so'ota'n, qataq saishet da qami' imereuo ñaqa'en, cha'aye saishet da ñelaxaañi so ñaỹamataxac co'ollaq ñaỹamaxate' so qarta'ailpi. Qaq 'era da ỹa'aqtac, Aỹem Nataxala' maye Qanatamnaxala'ai. ₄₅Nacherata da sepagaqchigui qome da ñaỹamaxataxac co'ollaq ñaỹamaxate' so qarta'ailpi, maye ñeqateeguesop co'ollaxa ye Egipto, ỹauaachigui ñaqa'en na lma' naua lỹa't 'aleu' da yaqto' Aỹem Qanatamnaxala'ai. Qaq 'era da ỹa'aqtac, Aỹem Nataxala'.»

₄₆Qaq 'ena na nqataxacpi, qataq na namaxasoxonaxacpi qataq na napaxaguenataxanaxacpi, maye lapaxañi co'ollaxa so Moisés, chegoqchigui Ñim Nataxala', da ỹanem so Israel le'ecpi, huaña añi qasoxonaxa Sinaí.