Aso laỹepi nachetaqtaxanaqtepi souaxat na ỹotta'a't nasouaxashet
1Qaq da huo'o ca shiỹaxaua qaiỹaxana da yaqto' ỹa'axat cam nasouaxashet maye ỹauaachigui, huo'otaq hua'aqchigui co'ollaxa, qaq camaye da saishet da da'aqtaxan, nache camaye nque'etaxangui que'eca lasouaxashet.
2Qataq nache 'ena'am da huo'o ca shiỹaxaua da ilamaxata'a da ỹasheleua'a ca shiguiỹac leuaxaic maye saishet da qui'itta, huo'otaq ca 'atet leuaxaic, qataq ca huauec, nataqa'en ca hualectapigui' maye saishet da qui'itta, nache que'eca shiỹaxaua saishet da qui'itta, cha'aye huo'o ca lasouaxashet.
3Qaq da huo'o ca ilamaxata'a da ỹashelagui ca la'atec ca shiỹaxaua, nache camaye saishet da qui'itta. Qaq da ivita da nanoma, nache camaye huo'o ca lasouaxashet.
4Qaq da huo'otaq huo'o ca shiỹaxaua da nỹalaqtoc da ỹan ca la'aqtac da 'eetega ipacchigui da ỹo'ot ca ỹaỹamaqchiguiñi, huo'otaq ca sa ỹaỹamaxañi. Qalaxaye da ivita da nanoma de'era npe'enaxac, nache camaye huo'o ca lasouaxashet.
5Qaq da huo'otaq huo'o ca nache 'eeta'am de'era ca npe'enaxac, nache iuen da ỹa'axatta da ỹoqta 'eesa que'eca lasouaxashet. 6Nache camaye ỹanot Ñim Nataxala' aca qagueta, huo'otaq quetaq da lachetaqtaxanaqte maye sa imauaq da qaỹavigaxat. Qaq 'era da 'eetec da ỹo'ot ca ntaxaỹaxanaxanec da yaqto' qaỹapalaxat ca ilamaxata'a lasouaxashet que'eca shiỹaxaua.
Aso lachetaqtaxanaqte ca choxoraq maye sa imauaq da qaỹavigaxat
7Qaq da huo'otaq sa nalolec da desheenaxana aca qagueta huo'otaq aca quetaq, nache ỹanot Ñim Nataxala' caua dos qoto' lta'araiqa, huo'otaq caua dos qoto' llalqa da yaqto' lachetaqtaxanaqte. Qaq ca 'oonolec caamaye ỹaneuo da lachetaqtaxanaxat maye sa imauaq da qaỹavigaxat, qaq ca lỹa nache lachetaqtaxanaxat qaỹavigaxatta. 8Qataq iroua'alo ca ntaxaỹaxanaxanec, nache camaye hua'auñi da ỹaneuo ca nachetaqtaxanaxat maye sa imauaq da qaỹavigaxat, nache lpataxan na lqosot, qalaxaye saishet da nache nqat ca lqaic. 9Ime, nache nlom da ichegoxolec na 'oonolec laỹe añi nca'atoxonaxalate ca ltago'q que'eca nachetaqtaxanaxat. Qaq ca no'onañi, nache ichegoqot na pa'aguiñi añi nca'atoxonaxalate, cha'aye nachetaqtaxanaxat maye sa imauaq da qaỹavigaxat. 10Qaq ca lỹa qoto', nache nachetaqtaxanaxat qaỹavigaxatta, qataq ỹe'enaxatchigui da maiche lataxac da qaỹo'ot. Qaq da nache 'eetec de'era ca ntaxaỹaxanaxanec, nache qaỹapalaxat ca ilamaxata'a lasouaxashet que'eca shiỹaxaua.
11Qalaxaye que'eca shiỹaxaua da ỹataqta sa nalolec da desheenaxanalo caua dos qoto' lta'araiqa, huo'otaq caua qoto' llalqa, nache irouo ca dos kilos ca ỹataqta no'on lsoche na ala ca nañiguishec, da yaqto' lachetaqtaxanaxat. Qalaxaye saishet da icorelec ca aceite qataq da ỹachalec ca nchenaxanaxat qo'oipaq lcha'q ama na laita, cha'aye nachetaqtaxanaxat maye sa imauaq da qaỹavigaxat souaxat ca nasouaxashet. 12Ime, nache que'eca shiỹaxaua iroua'a ca ntaxaỹaxanaxanec. Qaq camaye ỹaconeguet, nache ỹauota'a 'oonole napocna da ỹacona ca lsoche ana nañiguishe ala da nachetaqtaxanaxat maye naigui da qaiuennate da Ñim Nataxala' lalamaxat 'enauacna, qataq nache ỹavigaxat ỹachalec añi nca'atoxonaxalate. Nache ỹachalec aca laỹepi nachetaqtaxanaqtepi maye qaỹavigaxat. Qaq 'era da 'eetec aca nachetaqtaxanaqte maye sa imauaq da qaỹavigaxat souaxat ca nasouaxashet, 13da yaqto' ca ntaxaỹaxanaxanec ỹo'ot da qaỹapalaxat camachaqca lasouaxashet maye ỹo'ot que'eca shiỹaxaua. Qaq nache 'ena'am da lataxac aca nachetaqtaxanaqte maye chegaqaigui ana ala ca nañiguishec. Qaq ca no'onañi, nache taỹot que'eca ntaxaỹaxanaxanec.›»
Aso lỹa nachetaqtaxanaqte maye sa imauaq da qaỹavigaxat
14Ñim Nataxala' 'enapega so Moisés, 'eeta':
15«Da huo'otaq huo'o ca shiỹaxaua da sa ipaguelec da ỹanot nam ishet da ỹanot Ñim Nataxala', nache camaye ỹaneuo ca qagueta qaica ca lque'emaxa da yaqto' lachetaqtaxanaxat maye sa imauaq da qaỹavigaxat. Huo'otaq naloqnagui aca lasheue que'eca shiguiỹac aca ỹaneuo, nache iroua'a Ñim Nataxala'. 16Qataq aca'aca lasheue que'eca shiguiỹac, nache ỹauo'o aca ỹauaxaỹaxaatalec da desheetenaxan, nache ỹanem ca ntaxaỹaxanaxanec. Qaq 'era da 'eetec ca ntaxaỹaxanaxanec da yaqto' qaỹapalaxat ca lasouaxashet que'eca shiỹaxaua chegoqchigui ca qagueta maye ỹaneuo da nachetaqtaxanaxat maye sa imauaq da qaỹavigaxat.
17Da huo'o ca shiỹaxaua da sa nanoma da npe'eelec na lamaxasoxonaxacpi Ñim Nataxala', nache ỹo'ot ca sa qaỹashen da qaỹo'ot, nache camaye nque'etaxangui qome que'eca lasouaxashet. 18Nache camaye iuen da iroua'a ca ntaxaỹaxanaxanec ca qagueta maye qaica ca lque'emaxa, huo'otaq aca lasheue que'eca shiguiỹac da yaqto' lachetaqtaxanaxat maye sa imauaq da qaỹavigaxat. Qaq 'era da 'eetec ca ntaxaỹaxanaxanec da yaqto' qaỹapalaxat ca lasouaxashet maye sa nanoma da ỹo'ot que'eca shiỹaxaua. 19Cha'aye acamaye nachetaqtaxanaqte maye sa imauaq da qaỹavigaxat, cha'aye que'eca shiỹaxaua huo'o ca lasouaxashet hueto'ot Ñim Nataxala'.»
