Ca nasouaxashet maye hueto'ot ca nỹa
1Ñim Nataxala' 'enapega so Moisés, 'eeta':
2«Qaq da huo'otaq huo'o ca shiỹaxaua da npe'eeleguete naua lamaxasoxonaxaco Ñim Nataxala', souaxat da ỹatenachet ca lỹa, qataq ỹoxooñi ca nogoxoshet maye qaicotano'ot da ilo'ogue, huo'otaq da ỹoqta decachiỹa, huo'otaq da deuotaxanec ca lalamaxat ca lỹa, 3huo'otaq da ilalec ca nogoxoshet maye deqat nache saishet da ichoxot, qataq da ỹan ca la'aqtac da 'eetega saishet da ilalec ca deqat nogoxoshet, qataq da 'eetega saishet da ỹo'ot na nasouaxashetpi maye nache 'eetai' naxa da ỹo'ottac na shiỹaxauapi, 4nache que'eca shiỹaxaua huo'o da lasouaxashet, nache camaye iuen da ỹe'eguelaxat que'eca lcachaxat, huo'otaq lhuotaxanaxat, huo'otaq ca nogoxoshet maye ilalec, 5huo'otaq ca lỹa maye iqoleguettac da saishet da ỹo'ot. Nache camaye ỹe'eguelaxatem ca lalamaxat camaye, qataq huo'o aca huaqtalec naqa'en aca ỹataqta lasheue, nache ỹanem ca ntaxaỹaxanaxanec aca'aca lauaxaỹaxanata, da ivita da ỹaneuo aca lachetaqtaxanaqte maye sa imauaq da qaỹavigaxat. 6Qataq ỹanot Ñim Nataxala' ca qagueta qaica ca lque'emaxa da lachetaqtaxanaxat maye sa imauaq da qaỹavigaxat, huo'otaq aca lasheue que'eca shiguiỹac. Nache iroua'a ca ntaxaỹaxanaxanec. 7Nache camaye ỹanot Ñim Nataxala' ca lachetaqtaxanaxat yaqto' Ñimaye ỹapalaxat ca lasouaxashet que'eca shiỹaxaua, huo'otaq ca lỹa huasoilec camaye, nache qaỹapalaxat.»
So ntaxaỹaxanaxanec da ỹo'ot aca nachetaqtaxanaqte maye qaỹavigaxatta
8Nache Ñim Nataxala' 'enapega so Moisés, 'eeta':
9«Qonapega qome ñi Aarón qataq ñeua llalqa, qoneta':
'Era da llec aca nachetaqtaxanaqte maye qaỹavigaxatta, 'eeta':
Aca'aca nachetaqtaxanaqte qaỹavigaxatta, acamaye iuen da palom huetangui ca norec maye huetalec añi nca'atoxonaxalate, choche ivitta'a ca lỹa na'a'q. Qataq que'eca norec, nache 'eetai' da 'ettaigui qanqa'en. 10Qaq ca ntaxaỹaxanaxanec, nache ỹaañi qome ca lapo' hualoxolaỹi maye chegaqaigui na lino, qataq caua lpa'axanaqtel. Ime, nache lapona't ca alo aca nachetaqtaxanaqte qaỹavigaxatta maye huetalec añi nca'atoxonaxalate, nache ỹachaua'a na laỹe añimaye. 11Ime, qataq naralaxa't caua ỹaayiñi alogo, nache irouga ca no'onaxa qui'itta maye laponqa' na alo, maye pa'aueegue da laỹe ca qanayeetaña.
12Qaq que'eca norec maye 'ettaigui huetalec añi nca'atoxonaxalate, camaye saishet qome da 'om qanqa'en. Qaq ca ntaxaỹaxanaxanec, nache ỹasaqtauaq qome ca 'epaqpi maye lalonaxat que'eca norec ye nte'eta. Ime, nache ỹachalec que'eca norec aca nachetaqtaxanaqte qaỹavigaxatta. Ime, qataq npa'axatcheguem ca lcheta aca nachetaqtaxanaqte maye qanhuaachigui. 13Qaq que'eca norec maye huetalec añi nca'atoxonaxalate, camaye nache 'eetai' qome da 'ettaigui qanqa'en.
Aso nachetaqtaxanaqte maye chegaqaigui ana ala na nañiguishec
14Qaq 'era da llec aca nachetaqtaxanaqte maye chegaqaigui ana ala ca nañiguishec, 'eeta': Ne'enaua llalqa so Aarón, nache ỹaareuo qome acamaye huaña añi nca'atoxonaxalate ỹauaachigui naqa'en Ñim Nataxala'. 15Nache ca 'oonolec caamaye, ỹauota'a 'oonole napocna da ỹacona ca ỹataqta no'on lsoche ana ala ca nañiguishec, qataq lalegue ca aceite, qataq ca nchenaxanaxat qo'oipaq lcha'q ama na laita maye huetalec aca'aca nachetaqtaxanaqte. Qaq 'enauac acamaye, nache ỹavigaxat, ỹachalec añi nca'atoxonaxalate da nachetaqtaxanaqte, maye naigui da qaiuennate da Ñim Nataxala' lalamaxat 'enauacna, yaqto' da ama laitaỹaxac ỹamaateguet Ñimaye. 16Qaq ca no'onañi laỹepi aca'aca nachetaqtaxanaqte, nache qoỹanem da chec ñi Aarón qataq ñeua llalqa. Qalaxaye saishet da che'c aca huo'o aca lalegue maye ỹasheeraxachigui ca ndaqñiguishec, da huaña ca ỹaqauga ndaqa' ye nqasoxoc ñi npe'l. 17Qataq saishet da qaỹauot aca laỹepi aca'aca nachetaqtaxanaqte maye ỹaleeguet ana ỹasheeraxachigui ca ndaqñiguishec, cha'aye acamaye lalamaqte ñeua llalqa so Aarón. Qaq aca'aca laỹepi, acamaye ỹataqta sa qaishetapec, 'eeta'am aca nachetaqtaxanaqte maye sa imauaq da qaỹavigaxat. 18Qataq 'enauac na llalaqpi ỹalleppi ñi Aarón, ishet da chec acamaye. Qaq 'era qome da nache 'eetai' lataxac da qoyecỹaxaqui, na qaỹa'alquipi qataq ca qami' chegoxogueta, da qaỹo'ot aca nachetaqtaxanaqte maye qaỹavigaxat da qoỹanot Ñim Nataxala'. Qalaxaye 'enauac ca ỹaqauga, saishet da ipoteua'a, cha'aye acamaye sa qaishetapec.»
Aso lachetaqtaxanaqte na ntaxaỹaxanaxanecpi
19Nache Ñim Nataxala' 'enapega so Moisés, 'eeta':
20«Qaq da ivita ca na'a'q da qoỹanaguilo da lo'onataxanaxa'c ñi Aarón qataq ñeua llalqa, nache ñiimaye ỹaarot qome Ñim Nataxala' ca lachetaqtaxanaxa't, ỹauotra'a dos kilos ca lsoche ana ala ca nañiguishec, nache ỹaareuo ca 'oonolec laỹe ca nte'eta, qaq ca lỹa laỹe qalaq ỹaareuo ca avit. Qaq 'era da 'eetra'ac qome 'enauaque naua na'axa'te. 21Qataq da ỹo'ot acamaye, nache ỹachalec ca nauoxonaxala', qataq lalegue ca aceite, qaq da ỹaneuo acamaye, nache icolaxatchigui, cha'aye nachetaqtaxanaqte, yaqto' da ama laitaỹaxac ỹamaateguet Ñim Nataxala'. 22Qaq 'era da 'eetec da ỹo'ot aca lachetaqtaxanaqte ca 'oonolec llalec ñi Aarón da ivita da qoỹanagui da lo'onataxanaxac. Qaq aca lachetaqtaxanaqte ala na nañiguishec, acamaye imauec da qaỹavigaxat. Qaq 'era da llecỹaxac da chochaq tatec lqataxac Ñim Nataxala'. 23Qataq 'enauac aca'aca lachetaqtaxanaqtepi maye ỹaneuo ca ntaxaỹaxanaxanecpi, acamaye saishet da qanallec, cha'aye ỹataqta qaỹavigaxatta.»
Aso nachetaqtaxanaqte maye sa imauaq da qaỹavigaxat
24Ñim Nataxala' 'enapega so Moisés, 'eeta':
25«Qonapega ñi Aarón qataq ñeua llalqa, qoneta':
'Era da llec aca nachetaqtaxanaqte maye sa imauaq da qaỹavigaxat, ca shiguiỹac nachetaqtaxanaxat da qaỹalauat, nache huaña ye nalaataqa' na shiguiỹac ỹauaachigui qanqa'en Ñim Nataxala', cha'aye acamaye ỹataqta sa qaishetapec. 26Qaq que'eca ntaxaỹaxanaxanec maye ỹaneuo que'eca shiguiỹac maye sa imauaq da qaỹavigaxat, camaye nacheca ca ishet da chec ca laỹe camaye, qalaxaye nache hueta'a ye ỹaqauga nqasoxoc ñi npe'l. 27Qalaxaye 'enauac ca ỹaqauga, nache saishet da ipoteua'a que'eca lapat, cha'aye saishet da qaishetapec. Qaq da huo'otaq ichecnoto caua anogo que'eca ntago'q, nache caamaye da qaiỹoi', nache huaña qanqa'en ca qaiỹotauga nỹoqo' ca nogoxot. 28Qaq aca taxaqui 'alhua maye qaiuoshigui da qoỹaneuaq aca'aca nachetaqtaxanaqte, acamaye qailaxachigui. Qalaxaye da qaiuoshigui aca taxaqui lcat bronce, nache acamaye ỹataqta qaiqueuocta qataq qaiỹota, qaỹauota'a ca 'etaxat.
29Qaq 'enauac ca ỹalleppi maye ntaxaỹaxanaxanecpi ishet da chec aca'aca nachetaqtaxanaqte na'aictaxa da sa qaishetapec. 30Qalaxaye saishet da ỹe'egueeta'a da chec aca nachetaqtaxanaqte maye sa imauaq da qaỹavigaxat maye mashe qairoua'a ñi npe'l ca ltago'q acamaye, cha'aye nachetaqtaxanaqte da yaqto' qaỹapalaxat ca nasouaxashet. Ỹoqo'oye acamaye iuen da ỹataqta imauec da qaỹavigaxat.
