Co'ollaq qoỹanagui da lo'onataxanaxac so Aarón qataq soua llalqa
1Nache Ñim Nataxala' 'enapega so Moisés, 'eeta':
2«'Auaconeua'a qome ñi Aarón qataq ñeua llalqa, qataq 'auaconalo caua alogo ca ntaxaỹaxanaxanec, qataq aca laỹe' ca aceite maye ncoraxanaxat da huo'o ca qaicorelec, qataq ca huaca maye qoỹaneuo da nachetaqtaxanaxat maye sa imauaq da qaỹavigaxat, qataq caua dos qagueta qataq aca npaqtole maye huetangui aca nauole qaica ca lalegue maye ỹasheeraxachigui, 3nache 'alaỹona't 'enauac na Israel le'ecpi huaña ye ñegueuo ñi npe'l».
4Nache so Moisés ỹo'ot da lamaxasoxonaxac Ñim Nataxala', nache laỹona't so Israel le'ecpi, huaña so ñegueuo so npe'l, 5huaña nache somaye 'enapego' co'ollaxa somayepi, 'eeta': «'Era da lamaxasoxonaxac Ñim Nataxala' da so'otaq». 6Nache so Moisés, ỹamaxalec da nquigueuo so Aarón qataq soua llalqa, nache nỹoi' naqa'en ỹauota'a so 'etaxat. 7Ime, nache ỹaañigui so lpa'axanaxat so Aarón, qataq nsaachigui naqa'en so lasot alaxa, qataq napogoña naqa'en so lapo', qataq npa'axanasheguem so ntogue lapoxot, qataq ỹaxatchiyiñi soua maiche lque'ete. 8Ime, qataq nqolaaña naqa'en so laỹe' soua coma'yolqa maye chegoqchiguilo da qaỹaỹaten ca 'eetapeguec Ñim Nataxala'. 9Qataq nataqa'en ỹanaxanaxangui so lqaic alaxa, qataq npa'aỹasheguem so latapshec lcat oro, maye na'anaxat da qoỹanagui da ntaxaỹaxanaxanec, nache so Moisés ipacchigui da lamaxasoxonaxac Ñim Nataxala'.
10Ime, nache so Moisés ỹacona aso laỹe' so aceite maye ncoraxanaxat da huo'o na qaicorelec, nache icorelec so npe'l maye huaña naxa da qanauane' Ñim Nataxala', qataq 'enauac so huetaiguipi da yaqto' ỹaneuo da ỹataqta qui'itta. 11Qataq siete da ichegoxolec so aceite aso nca'atoxonaxalate, nataqa'en ichegoxolec 'enauac so nhuenecpi maye chegaqaigui so lcat bronce, qataq so nỹoxonaxaqui qataq so lmala', nache ỹaneuo da ỹataqta qui'itta. 12Ime, nache somaye icorelec na lqaic so Aarón so aceite, nache ỹanagui da lo'onataxanaxac da ntaxaỹaxanaxanec da qaitaxaỹapegue' Ñim Nataxala'. 13Ime, nache 'enapegalo soua llalqa so Aarón da nquiguereuo, nache ỹaañiguilo ñi 'oonolec soomaye soua alogo, qataq nsaachiguilo naqa'en soua lasot alaxa, qataq ỹanaxanaxaanguilo soua lqaic alaxa, nache ỹataqta ipacchigui da lamaxasoxonaxac Ñim Nataxala'.
Aso nachetaqtaxanaqte da huo'o ca qoỹaneuo
14Ime, nache so Moisés damaxasoxoolec da qandouo so huaca maye qoỹaneuo da nachetaqtaxanaxat maye sa imauaq da qaỹavigaxat, nache so Aarón qataq soua llalqa ỹashel-leguete na lqaic se'eso huaca. 15Qaq so Moisés, nache ipelecot na lqosot se'eso huaca. Ime, nache ỹacona so laỹe' so ltago'q, nache ỹa'ayingui ana llaxaata, da yaqto' ỹa'ame'n naua lsheeneqa soua lcoue aso nca'atoxonaxalate, qaq so no'onañi ntago'q, nache icorot na pa'aguiñi asomaye. Qaq 'era da 'eetec da qui'itta naqa'en aso nca'atoxonaxalate, qataq nache huaña da qaỹapalaxat ca nasouaxashet.
16Ime, nache so Moisés ỹacona 'enauac so lcheta na lauel le'ec se'eso huaca, qataq so lsheenec so l-lamec, qataq soua lchiguishel ima'aguet naqa'en so lcheta, nache ỹavigaxat, ỹachalec aso nca'atoxonaxalate. 17Qalaxaye so lo'oc se'eso huaca, qataq so no'onañi lapat, qataq so aloq, nache ỹavigaxat, ỹachauga so no'onaxa qui'ittelec maye pa'aueegue da laỹe so qanayeetaña, nache ipacchigui da lamaxasoxonaxac Ñim Nataxala'.
18Nache so Moisés damaxasoxoolec da qandouo so qagueta maye nachetaqtaxanaxat qaỹavigaxatta. Qaq so Aarón qataq soua llalqa, nache ỹashel-leguete na lqaic somaye. 19Ime, nache so Moisés ipelecot na lqosot se'eso qagueta, qaq so ltago'q somaye, nache icoroto naua laỹel aso nca'atoxonaxalate, 20qataq npilliguiñi so qagueta, nache imauaq da ỹavigaxat, ivira'a so lqaic qataq so lcheta. 21Qaq co'ollaq ime da iỹo so lauel le'ecpi so qagueta, qataq soua lapia'ate se'eso qagueta ỹauota'a so 'etaxat, nache ỹavigaxat 'enauac somaye ỹachalec aso nca'atoxonaxalate. Qaq somaye, nache nachetaqtaxanaxat qaỹavigaxatta, yaqto' da ama laitaỹaxac ỹamaateguet Ñim Nataxala'. Qaq 'era da 'eetec so Moisés da ipacchigui da lamaxasoxonaxac Ñim Nataxala'.
22Ime, nache so Moisés damaxasoxoneuga so lỹa qagueta maye nachetaqtaxanaxat, da huo'o ca qoỹanagui da lo'onataxanaxac. Nache so Aarón qataq soua llalqa ỹashel-leguete na lqaic somaye. 23Nache so Moisés ipelecot na lqosot so qagueta. Ime, qaq ỹacona so laỹe' so ntago'q, nache ỹa'ayingui aso llaxaata da yaqto' ỹa'amen aso aloiguishe ltela da'am so Aarón, qataq aso aloiguishe llaxaata late'erai qataq aso aloiguishe lqona late'erai. 24Ime, nache 'enapegalo da nquiguereuo soua llalqa so Aarón, nache nataqa'en ỹa'ame'n soua aloiguishe ltela da'ami, qataq soua aloiguishe llaxaata late'erail qataq soua aloiguishe lqona late'erail. Ime, nache icoroto naua laỹel aso nca'atoxonaxalate so ntago'q.
25Ime, nache somaye ỹacona 'enauac so lcheta so la'araxashet, qataq so lcheta so lauel le'ecpi, qataq soua lchiguishel ima'aguet naqa'en so lcheta, qataq so lsheenec so l-lamec, qataq so ltele'eta aloiguishec. 26Qataq ỹachegoxotangui aso npaqtole maye laỹe' aso nauole maye netaña so lanataqa' Ñim Nataxala' aso 'oonole nauole qaca aca lalecte, qataq aso nauole lalegue na aceite, qataq aso lỹa nauole sa nquesaxan maye qaỹa'ameelec na aceite, nache npa'axatcheguem, ỹachalec so lcheta qataq so ltele'eta aloiguishec. 27Nache ỹanem 'enauac somaye so Aarón qataq soua llalqa, nache ỹaayishegue'm da yaqto' lachetaqtaxanaqte'. 28Ime, nache so Moisés ỹacona 'enauac aso nasoqta'api soomaye, nache npa'axatcheguem da ỹachalec aso nca'atoxonaxalate maye huetalec so lỹa shiguiỹac maye nachetaqtaxanaxat qaỹavigaxatta. Cha'aye nachetaqtaxanaxat da huo'o ca qoỹanagui da lo'onataxanaxac, yaqto' da ama laitaỹaxac ỹamaateguet Ñim Nataxala'.
29Ime, nache so Moisés ỹacona so ltogue lapat da yaqto' ỹaasheguem da ỹanot Ñim Nataxala'. Nache se'eso laỹe so nachetaqtaxanaxat taỹot so Moisés, qaq nache ipacchigui da lamaxasoxonaxac Ñim Nataxala'.
30Ime, nache so Moisés ỹacona aso laỹe' so aceite maye ncoraxanaxat da huo'o na qaicorelec, qataq aso laỹe' so ntago'q maye netaleguete aso nca'atoxonaxalate, nache ichegoxoleguete soua Aarón qataq soua llalqa, nataqa'en soua alogo so ntaxaỹaxanaxanec da qaitaxaỹapegue' Ñim Nataxala'. Qaq 'era da 'eetec co'ollaxa da qoỹaneuo da ntaxaỹaxanaxanec so Aarón, qataq soua llalqa da yaqto' qui'itta da lataxa'c qataq soua alogo.
31Qaq co'ollaq ime, nache so Moisés 'enapego' so Aarón qataq soua llalqa, 'eeta':
«Da ivita da qaỹa'añiiuaq ca lapat maye qaralamaxache, nache huaña ye ñegueuo ñi npe'l, qataq nache huaña yemaye da qollequi camaye, qataq aca nauole maye huetangui aca npaqtole da ivita da huo'o ca qoỹanagui da lo'onataxanaxac, qataq nache ipacchigui da la'aqtac Ñim Nataxala' co'ollaq 'eeta': ‹So Aarón qataq soua llalqa, nache aloq qome ne'ena lapat qataq ana nauole.› 32Qaq ca no'onañi que'eca lapat qataq aca nauole, nache qaualache, qalaxaye qauavigaxache qome. 33Qataq saishet qome da qoquiỹa'ai ye ñegueuo ñi npe'l caua siete na'axa'te, cha'aye nache laloxoqui' da ỹataqta qami' qaiỹotaugalo da qami' qoỹanaguilo de'era qaro'onataxanaxaqui. 34Qaq Ñim Nataxala', nache damaxasoxoolec de'era qaỹo'ot nagui, da yaqto' qaỹapalaxat na qarasouaxashichi. 35Qaq qami', nache qoviita'a qome ye na'a'q qataq ye pe, ye ñegueuo ñi npe'l, caua siete na'axa'te. Qataq qaualaqaiguet qome da lamaxasoxonaxac Ñim Nataxala' yaqto' saishet da qaullivi, cha'aye 'era da lamaxasoxonaxac maye aỹem ỹamaxalec.»
36Nache so Aarón qataq soua llalqa ỹo'o't 'enauac de'era lamaxasoxonaxac Ñim Nataxala' maye ỹamaxalec co'ollaxa so Moisés.
