Lucas 12

₁Qaq ñaq queta da qalota so shiỹaxauapi lapootapegueua'a So Jesús qataq mashe ivira da huo'o na qaỹe'eguingui. Nache Somaye 'enapegalo soua lapaxaguenataqa, 'eeta':

«Maxatchoxo' qome, qarvichiỹa'aguet da latenataxanaxac na fariseopi. Namayepi ỹataqta ỹatenachettac na shiỹaxauapi da 'eetega 'eesa nam la'aqtaxanaxacpi. ₂Cha'aye 'enauac nam qoỹoxottapiguiñi ya'aqalec qataq 'enauac nam saq cha'api ivira'a da qaỹaỹaten. ₃Qaq cam qanasaqaiuec da huo'otaq huaigui ca napalaxa, nache 'enauac da qaỹaỹaten da huaigui ca yo'oqchiguiñi, qataq cam qara'aqtaqui maye qo'oxocheetañi qalaq ivira'a da ỹaỹaten 'enauac na shiỹaxauapi.

₄Qami' ñauochaxau' ỹaqaỹa't, saishet da qayi'iitega na shiỹaxauapi maye ishet da nqat da qanachaalataxaqui, qalaxaye saishet da huo'o ca lỹa ỹo'ot. ₅Nachaqrata da qayi'iỹai Ñim Lo'onatac 'Enauacna Ñim saishet da nachaqrata da nqat da achaalataxac, maye nataqa'en Ñimaye huo'o naq 'enec da ỹamaxaña ca nhuaxanaqa' na 'etaxaloxoicpi ca shiỹaxaua, qom imat da nqat da nachaalataxac. Qaq 'iñi maye ishet da qayi'iỹai.

₆Caua cinco qoỹolqa da qaime'n qalaq qaica ca la'amaqchec aca lasheue. Qalaxaye Ñim Lo'onatac 'Enauacna ỹataqta huetegueto caamaye. ₇Qaq nache 'eetec nataqa'en da qoñiita: Ñim Lo'onatac 'Enauacna ỹaỹaten ye lcata na laue ñi 'oonolec. Qaq ỹoqo'oye saishet da qayi'iitac, cha'aye qami' qanapacỹalec da lashiichiỹaxac ca qalota qoỹopiolec.

₈Da qami' qaua'aqtaxañim na laỹepi shiỹaxauapi da Aỹem qoquiitague', nache Aỹem Shiỹaxaua Llalec, sa'aqtaxanem na lamaxashecpi Ñim Lo'onatac 'Enauacna da 'eesa da Aỹem qoquiitague'. ₉Qalaxaye da qaua'aqtaxañim nam shiỹaxauapi da saishet da Aỹem qoquiitague', nache Aỹem sa'aqtaxanem na lamaxashecpi piguem le'ecpi Ñim Lo'onatac 'Enauacna da 'eesa da saishet da Aỹem qoquiitague'.

₁₀Qami' da huo'o ca qara'aqtaqui qauem da qauasaqailec Aỹem Shiỹaxaua Llalec, nache Ñim Lo'onatac 'Enauacna qami' ichoxore'n. Qalaxaye da huo'o ca qauem qara'aqtaqui da qauasaqailec So Saqcha'a Na'añaxac Qui'itta, nache Ñim Lo'onatac 'Enauacna saishet da qami' ichoxore'n.

₁₁Qaq qom ivita da qami' qaỹauegueua'alo ana napaxaguenaxaquipi na judiopi huo'otaq nam nmit na nasouaxashetpi qataq nam nataxala'pi da qami' qanmi't, nache saishet qome da tatapigui qarvilli cam qarasataxaqui qataq cam qoñiitec da qauataiỹa'aguet namayepi. ₁₂Cha'aye qom ivita ca laloqo' da qautaqai, nache som Saqcha'a Na'añaxac Qui'itta qami' ỹapaxagueneque cam iuen da qanasaqaiuec.»

₁₃Nache huo'o so shiỹaxaua maye hueta'a yi'iye 'enapega So Jesús, 'eeta':

–'Am Napaxaguenataxanaq, qonapega ctaxa ñi ỹaqaỹa da icolaxachigui da nsallaxa maye qomi' no'onaxata'agueta co'ollaxa so qarta'a.

₁₄Qalaxaye So Jesús 'enapega, 'eeta':

–'Am shenapega, ¿negue't ca Aỹem ỹanagui da saỹamaxaañi cam qancotaitapigui, huo'otaq da secolaxachigui da nsallaxa?

₁₅Ime, nache ỹamataigui som hueta'a yi'iye, nache 'enapeco': «Maxatchaxa, qarvichiỹa'aguet da nqopitaxanaqtaic da nsallaxa, cha'aye da nachaalataxac ca shiỹaxaua saishet da ỹachegoxotaigui nam saqalota lsallaxa maye hueto'ot.»

₁₆Huaña, nache So Jesús huo'o da daloqnaxana, 'eeta':

«Huo'o so ỹale ỹataqta sallaxanec, so do'onataxaatapeguelec 'alhua ỹataqta qalota naqa'en ana ala so lañiguishec co'ollaq nqat. ₁₇Nache so sallaxanec deuennataxaatac, 'eeta': ‹¿Chaq hua'ago' nagui ca sheetec? Ye aỹem qaica cam sacha'ague da saỹamaxat nam ñeqat ala na ỹañiguishec.› ₁₈Qaq co'ollaq nmate' da lhuennataxac, nache 'eeta': ‹Aja', saỹaten nagui dam iuen da so'ot. Nagui aỹem ñelaxaañi ñim laponaxaqui na ala na ỹañiguishec, da yaqto' so'ot ca lỹa ỹactec da lta'araic ñaqa'en. Qaq qom ime, qaq soxotoigui 'enauac nam ala na ỹañiguishec maye ñeqat, nataqa'en 'enauac nam aỹem hueto'ot. ₁₉Ime, nache maiche ntaqteguela't, 'eeta': Nagui mashe ỹataqta qalota nam ỹalamaxatpi maye saỹamaxat, namaye nalaiguilo caua saqaỹoqteguelo vi'iye. Nagui ñematec, seque'etac, ñeỹomtac, qataq samachiguiñi.›

₂₀Qalaxaye Ñim Lo'onatac 'Enauacna 'enapega, 'eeta': ‹'Am ỹale ỹataqta qaica ca 'auaỹaanapec, nachena ne'ena pe 'am 'aleu, qaq 'enauac nam 'auaỹamaxattac, ¿negue't qome cam talec?›

₂₁Qaq 'era qome da 'eetec cam shiỹaxaua da maiche logosheguem naqa'en da lsallaxa, qalaxaye Ñim Lo'onatac 'Enauacna ỹaỹaten camaye da ỹataqta choxoraq.»

₂₂Qaq co'ollaq ime, nache So Jesús 'enapegalo soua lapaxaguenataqa, 'eeta':

«Nagui qami' shenapegalo: Saishet qome da ỹataqta ỹapac da qarhuogoqoi cam qolliqui qataq cam qanapoiña. ₂₃Cha'aye da achaalataxac saq 'ena'am cam choche qanallec, qataq dam no'ocỹaxac, damaye saq 'ena'am cam choche qanapogoña.

₂₄Ñaq qauloỹa nam teguesanpi, namayepi saishet da danaxan, qataq saishet da deqataxan, qataq saishet da huo'o ca laponaxanaxaqui, qataq qaica ca laretac laỹe'. Qalaxaye Ñim Lo'onatac 'Enauacna iquia'axaatac namayepi. ¡Qami', qalaxaye ỹactec da qarashiichiỹaxaqui, saishet da qoñiỹa'am nam maỹopi!

₂₅Qaq, ¿negue't ca 'oonolec da qoñiita da ỹapactec da lachetataic, nache ishet da ỹañoxot da nquigaxat da nachaalataxac? ₂₆Cha'aye da huo'otaq saishet da qauañoxoche de'era, qaq ¿taloxocheyectoxo' da qami' ỹaquicoqchetta'ape 'enauac nam laỹepi?

₂₇Qami' ña qaumichiñi da 'eetec da lañaxataxac ana huoue maye huo'o ana lauoxo. Anamaye saishet da do'onataxan, qataq saishet da deqaleenaxan. Qalaxaye ỹataqta 'eesa de'era qami' sa'aqtaxanema da so Salomón, na'aictaxa da ỹataqta qaica ca 'ena'am da no'otaxac, qalaq somaye saishet da 'eeta'am aca 'oonole anamayepi.

₂₈Qaq da nache 'eetec de'era Ñim Lo'onatac 'Enauacna da no'otaxanaxan ana choche huoue maye huetauga nagui na no'onaxa, qaq qonte', nache qaỹavigaxat, qaq ¡hua'aguectoxo' da saq 'eetec da qoñiita maye saq 'amaqtaq da qarpi'iỹaxaqui!

₂₉Qaq ỹoqo'oye saishet qome da leetapigui ye qarvilli souaxat cam qolliqui qataq cam qanỹomiigui. ₃₀Cha'aye nachaqnata nam saishet da ỹauatton Ñim Lo'onatac 'Enauacna maye huo'o da lachetataic souaxat de'era. Qalaxaye Ñim Lo'onatac 'Enauacna maye Qarta'ai, ỹaỹaten 'enauac namayepi da qaviñiitac.

₃₁Qalaxaye dam ỹataqta ỹaỹamaqchiguiñi 'eeta': qauauattoñiita da Ñim Lo'onatac 'Enauacna nacheñita 'oonolec Nta'a. Qaq 'enauac na laỹepi maye qaviñiitac Ñimaye qami' ỹanema da ivita ca laloqo' naqa'en.

₃₂Saishet qome da qayi'i, qami' maye qoñiita'am acam ỹalamaqte qagueta maye selotague'. Ỹataqta qami' saq 'amaqtache, qalaxaye Ñi Qarta'ai ỹataqta maiche lhuennataxac da qanhuañiỹaua'a naqa'en da lo'onataxanaxac da ilo'ogue 'enauacna. ₃₃Qaq qaumiñi qome na qami' hueto'oto. Ime, qaq qaỹa'añim nam deuenaxaatapigui'. Ime, qaq qauo'oche cam qarachoxonaxaquii maye saishet da lto qataq ca nsallaxa hueta'ague da piguem maye saishet da imeuo, qataq saishet da inoxoneua'a cam cachaxaic, qataq saishet da chec ca lalaxat. ₃₄Qauennachiỹa'a qome de'era. Da qami' nache 'eetai' da tatapigui ye qarvilli cam hueta'ague da qarsallaqai.

_35-36Qami' iuen da nache 'eetai' da qami' lhuotte'. Iuen da qoñiita'am ca namaxashecpi maye ca na'aco' nqo'ona ca naronaxac. Camayepi nache 'eetai' da nlotauec qataq 'ettaigui aca lcoỹaraxanaxaqui, iuattaique cam na'aco' da deỹaxan da netaigui ca lasom, nache sa naỹaloxon da ỹauateguet. _37-38¡Ỹataqta huo'o qome da lta'araic lamaxayec ca camayepi qom huo'otaq ca na'aco' nvi' ca laiñi ca pe huo'otaq da mashe yo'oxoñitai', qalaxaye nache 'ena'am nlotauec camayepi! Qaq ỹataqta 'eesa qami' sa'axatema, da que'eca na'aco' 'enapega camayepi da nso'ooñi da datalec ca nquia'axala', qaq camaye qalaq huapegue' da ỹo'ot ca aloq.

₃₉Ca lalamaxat ca nỹec da huo'otaq ỹaỹaten ca laloxoqui da nvi' ca cachaxaic, nache camaye iuataique da yaqto' saishet da ỹashenem da taigui ca lma'. ₄₀Qaq qami' nataqa'en ỹataqta qanaỹamaxacheetai' qome, cha'aye Aỹem Shiỹaxaua Llalec, ñevi' qom qami' saishet da taỹapigui qarvilli Aỹem.»

₄₁Ime, nache so Pedro denataxan, 'eeta':

–'Am Qarataxala', de'era 'aualoqnaxana ¿peta'a ndotre'c qomi' da qomi' tachiguilo, huo'otaq nataqa'en 'enauac nam hueta'a ne'ena?

₄₂Nache So Qarataxala' ỹasateguet somaye 'eeta':

–¿Chaq negue't cam namaxashec maye ỹataqta ỹalaq qataq nlotec? Qomye, nacheca cam namaxashec maye ca na'aco' ipataxalec da ilo'ogue ca lma' qataq caua llalqa, qataq iqataxanai' ca nallec. ₄₃Qaq ỹataqta machiguiñi que'eca namaxashec, qom huo'otaq nvi' ca na'aco', qaq ilalec camaye da ỹo'ottac dam qaỹamaxalec. ₄₄Qaq Aỹem shenapec da ỹoqta 'eesa da que'eca 'aco', ishet da ỹanagui camaye da ilo'ogue naqa'en 'enauac nam hueto'otpi. ₄₅Qalaxaye que'eca namaxashec da huo'otaq 'enapec: «Ca ña'aco' ỹataqta qaỹaloqteguet», nache jec da iuaxaatac ca laỹepi namaxashecpi qataq aca namaxashepi, ime, qaq cot da lquia'axac qataq da nỹomaxac qataq da ltaxa. ₄₆Qaq so na'aco' da ñe'eguelaq da huetoigui ca na'a'q qataq cam laloqo' da huo'otaq se'eso namaxashec saishet da huotaique, ime, qaq qaỹauo'o ca nhuaxanaguec, 'eeta'am qanqa'en da nhuaxanaguec nam namaxashecpi maye sa ỹalaq.

₄₇Qaq cam namaxashec maye ỹaỹateeta cam 'eetapeguec cam na'aco', qalaxaye saishet da naỹamaxattai', qataq sa ỹalaq, qaq camaye ỹataqta lta'araic da nhuaxanaguec. ₄₈Qalaxaye cam namaxashec maye ỹoqta 'itchiguiñi da sa ỹaỹaten cam ỹo'ottac maye ishet da chegaqaigui da huo'o qanqa'en ca nhuaxanaguec, qaq camaye saq 'amaqtaq qome ca nhuaxanaguec. Ñim Lo'onatac 'Enauacna ỹataqta qami' ỹauoteque, ỹoqo'oye nataqa'en iuen da qauauochec Ñimaye. Qaq de'era 'eetec da Ñimaye qami' ỹachaxanalo da lqouagaxanaqtaic, qaq nataqa'en Ñimaye qami' iuatta'alo da qauachaxañi nataqa'en da qarqouagaxanaqtaiqui da qauo'onataxañiỹot Ñimaye.

₄₉Aỹem ñanac da se'eraxatoigui ca norec ana 'alhua, qaq ¡Aỹem ỹataqta huo'o da iyaxa da nale'en, nache 'eroigui camaye nagui! ₅₀Qalaxaye hua'auñi qome da Aỹem saigui ca lta'araic lqalaic qataq lta'araic ca ñeque'eenaxac, choche ivitta'a da nvi' que'eca na'a'q. ₅₁Qaq qami' ¿qaupi'itaxañiitega peta'a da Aỹem ñera'a ca l-lagaxayec na shiỹaxauapi? 'A'i, saishet. Chaqrata da huesogui ñaqa'en namayepi. ₅₂Qaq ca 'oonolec nỹec da hueta'a caua cinco, nache caua tres dataỹa'agueta caua dos. ₅₃Ca nta'a qalaq maiche npa'aguene' ca llalec, qaq cam ñalec maiche npa'aguene' ca lta'a, qaq aca nate'e npa'aguene' aca maiche llale, qaq aca ñale qalaq maiche npa'aguene' aca late'e, qataq aca nachoro maiche npa'aguene' aca late, qataq aca nate maiche npa'aguene' aca lachoro.

₅₄So Jesús nataqa'en 'enapego' so shiỹaxauapi, 'eeta':

«Qami' naxa da qauloỹa'a na lo'oc na piguem da chegaqa'ague da avit da naỹoxoosheguem, nache qoñiỹapec da huo'o ca auot. Qaq damaye 'eesa. ₅₅Qataq na la'at da nashiiyisheguem da chegaqa'ague da taguiñi, nache qoñiỹapecnaxa da qara'aqtaqui: ‹¡Yo'oqta da huotaique da napaxaỹañi!› Qaq damaye ipacchigui. ₅₆Qaq ¡qami' maye qoñiỹapec da qami' 'eesora! Qami' qauaỹaañi da qaua'axache na la'anaxatpi na piguem qataq ana 'alhua, qalaq ¿ta'ainco' ye saishet da qaua'axache da lataxac naua souaqtaiguilo na'axa'te nagui?

₅₇'Alca'aua'a da 'auo'ot ca ỹaỹamaqchiguiñi. ₅₈Da huo'otaq huo'o ca 'am nmaxalec da 'eetega huo'o ca 'auo'otec sa ỹaỹamaxañi, nache no'on da 'anaỹamaxate' camaye qom huo'otaq saxanaxa da 'am ỹaneua'a ca nmit na nasouaxashet. Cha'aye da saishet da qonetec de'era, nache que'eca nmit na nasouaxashet ishet da ỹamaxalec ca huataxanaq le'ec da 'am ỹauegueua'a aca ncoñetaxanaxaqui. ₅₉Qaq Aỹem shenapec da 'am saishet da qoca'ai aca ncoñetaxanaxaqui, qom huo'otaq saxanaxa da 'ausheeten aca pa'atec maye qaiỹaxaneua'a da 'ausheeten añi 'aravigaxaiste.»