Lucas 23

₁Nache 'enauac ñesheguem somayepi, nache qaỹauegueua'a So Jesús so Pilato. ₂Huaña, nache somayepi ỹauo'o na ỹasaqteguelec da 'eetega lasouaxashet Somaye, 'eeta':

–Qomi' selaqalec de'era ỹale da ỹataqta taỹa't naqa'en na qarhuo' le'ecpi. Qataq 'eetega da saishet da sesheetenaq ñi lta'a na nta'alpi maye netaña ye Roma, qataq 'eetega da nachera dam Lca'aguishec Ñim Lo'onatac 'Enauacna.

₃Nache so Pilato inat Somaye, 'eeta':

–¿Ỹoqta 'eesa peta'a da 'am lta'a na judiopi?

Nache So Jesús 'enapeco':

–Aja', nachera dam qonapec.

₄Nache so Pilato 'enapega som lataxala'pi nam ntaxaỹaxanaxanecpi qataq som shiỹaxauapi, 'eeta':

–Aỹem saishet da huo'o ca sanata lasouaxashet de'era shiỹaxaua.

₅Qalaxaye somayepi ỹe'eguelaxalec da la'aqtac ỹataqta na'axannec, 'eeta':

–Namaye ỹasouaxattega't na shiỹaxauapi maye netaña na Judea, souaxat da lapaxaguenataxanaxac. Chegoqchiguiña ye 'alhua Galilea, qaq nagui qataq nvitta'a ne'ena souaqta'a.

₆Qaq so Pilato co'ollaq hua'axaỹa de'era, nache denataxanec da se'eso ỹale chegaqa'a ye 'alhua Galilea. ₇Qaq co'ollaq mashe qaỹa'aqtaxanem da Somaye chegaqa'a ye 'alhua Galilea, nache so Pilato ỹamaxa so nta'a Herodes maye ilotague' ye 'alhua Galilea, cha'aye somaye nataqa'en hueta'a ye Jerusalén se'eso na'a'q. ₈Nache so nta'a Herodes co'ollaq ila'a So Jesús, nache ỹataqta machiguiñi, cha'aye mashe qaỹoqteguelo naua na'axa'te da huotaique da ỹauatton Somaye. Cha'aye hua'aqtapeguelec naxa da qaỹa'axattac, qataq nshetaique da ỹauaachigui da huo'o ca ỹo'ot na'anec maye sa qaỹauanapega. ₉Nache ỹataqta qalota na nnataxanaxacpi da inattac Somaye, qalaxaye So Jesús saishet da ỹasateguet. ₁₀Qaq nataqa'en nachattauo nam lataxala'pi na ntaxaỹaxanaxanecpi qataq nam dapaxaguenataxaatapeguec na namaxasoxonaxacpi, namayepi ỹataqta qalota na ỹasaqteguelec da 'eetega lasouaxashet Somaye. ₁₁Nache so nta'a Herodes qataq so nalleppi ỹataqta ỹe'enai' So Jesús, nache lapaxalec so npo' ỹataqta qaica ca 'ena'am da lyac, 'eeta'am naqa'en ca nta'a. Qaq co'ollaq ime, nache qaltaq ỹe'eguelaxata so Pilato. ₁₂Nache se'eso na'a'q so Pilato qataq so Herodes qaltaq nmana't, cha'aye soomaye co'ollaxa ỹataqta pa'aguenaxau'.

₁₃Nache so Pilato lapona't so lataxala'pi na ntaxaỹaxanaxanecpi qataq nam lataxala'pi na shiỹaxauapi. ₁₄Nache 'enapega, 'eeta':

–Qami' aỹem qanaviquiiua'a de'era ỹale, qoñiitega da nachera da ỹasouaxattega't na shiỹaxauapi. Qaq aỹem sogote da sechemaxattega damaye, qalaxaye saishet da huo'o ca sanata da 'eesa nam qauasaqaitapeguelec lasouaxashet damaye. ₁₅Nataqa'en ñi Herodes saishet da ỹa'amaqten da huo'o ca lasouaxashet, qaq ỹoqo'oye ñe'eguelaxat damaye. Qaq qauloichigui damaye da qaica ca lasouaxashet da huo'otaq ishet da qaỹachegoxotchigui ca nalaataguec. ₁₆Ỹoqo'oye aỹem choche samaxasoxoolec qome da qaiuaxan damaye, qaq qom ime, nache saxanec. ₁₇[Qaq so Pilato nache lataxac naxa da ivireuga ye naponaxac nache huo'o isouec ncoñeteguishec.]

₁₈Qalaxaye 'enauac so shiỹaxauapi maye hueta'a yi'iye nmasheguem da ỹa'alaq, 'eeta':

–¡'Auamaxasoxoolec da qaỹalauat da Jesús! ¡Qaq ca Barrabás, qalaxaye 'ausouec!

₁₉Qaq se'eso Barrabás, somaye qaicoñe' co'olloxocheye, nache qoỹanaigui aso ncoñetaxanaxaqui, souaxat npa'aguene' so lta'a na nta'alpi maye netaña ye Roma co'ollaq huaña ye Jerusalén, qataq souaxat da ỹalauat so 'oonolec shiỹaxaua. ₂₀Qalaxaye so Pilato huotaique da isouec So Jesús, ỹoqo'oye qaltaq ỹe'eguelaxalec da detaqtogoigui so shiỹaxauapi. ₂₁Qalaxaye somayepi ỹataqta na'axannec da ỹe'eguelaxattalec da la'alaxac, 'eeta':

–¡'Auaxaneuo qome damaye! ¡'Auaxaneuo qome damaye!

₂₂Qaltaq ỹe'eguelaxalec so Pilato da 'enapega somayepi, 'eeta':

–Qaq ¿negue'to' ca ỹo'ot sa ỹaỹamaxañi damaye? Ye aỹem qaica ca sanata lasouaxashet da huo'otaq naigui da qaỹauo'o ca nalaataguec. Aỹem choche samaxasoxoolec qome damaye da qaiuaxan, qaq qom ime, nache saxanec.

₂₃Qalaxaye so shiỹaxauapi ỹataqta ỹe'eguelaqtalec da iỹaxaatapegueua'a So Jesús da ña qaiuaxaneuo. Qaq co'ollaq ỹaguec da la'alaxac somayepi, nache ivitta'a da ỹañoxot dam 'eetapeguec. ₂₄Huaña, nache so Pilato nañoxot da ỹasateguet da 'eetapeguec somayepi. ₂₅Nache isouec som ỹale maye lca'ateua'a somayepi, som qoỹaataigui aso ncoñetaxanaxaqui souaxat co'ollaq npa'aguene' so lta'a na nta'alpi qataq souaxat da laataxanaxaic. Nache ỹanoigui somayepi So Jesús da maiche ỹoiqueetac.

₂₆So huataxanaqpi co'ollaq ỹauegueueegue da laỹe ye nỹecpi So Jesús da ỹauotaique da iuaxaneuo, nache qanatena'aguet so ỹale, le'enaxat Simón, maye lma' ye nỹecpi le'enaxat Cirene. Somaye chegaqauga na no'onaxa. Nache qaỹachelec somaye so npe'enaxaqui So Jesús, nache ca'attaueegue qanqa'en Somaye.

₂₇Qaq ỹataqta qalota so ỹalleppi maye ca'attaueegue So Jesús qataq qalota aso ỹalectauopi na 'alpi. 'Enauac asomayepi nỹeetagui, na'alaqtapiguiñi, souaxat da laquicoxo. ₂₈Nache So Jesús ỹamata'aguet asomayepi, nache 'enapega, 'eeta':

–Qami' 'alpi maye qarmaye na Jerusalén, saishet qome da Aỹem qanỹeñiilec. Chaqrata qome da maiche qanỹeñiila't, qataq qanỹeñiilec na qaỹa'alquipi. ₂₉Cha'aye anate' caua na'axa'te qome da qoỹeeta': «Ỹataqta machiguiñi acam sa deco'o qataq acam sa nauane' da hualaxai qataq acam saishet da illepaxaatauo ca llalec.» ₃₀Huaña qome, nache na shiỹaxauapi 'enapega ana qaỹoqotcheguemec 'alhuapi, 'eeta': «Ña qomi' qaupataqaiyiñi.» Qataq 'enapega ana comarelecpi, 'eeta': «Ña qomi' qo'oxochiiyiñi.» ₃₁Cha'aye da Aỹem qaica ca so'ot sa ỹaỹamaxañi, nache Aỹem qaỹalauat, qaq ¿chaq qoỹeetec cam ỹo'ottac ca sa ỹaỹamaxañi?

₃₂Qaq nataqa'en so huataxanaqpi ỹauecta'agueta soua dos ỹale't maye ỹo'otta'ape naua qauema, da ỹauotaique da nalaataxau' naqa'en So Jesús. ₃₃Qaq co'ollaq mashe ivireuga som 'alhua maye le'enaxat «Nqaic Lpi'inec», nache iuaxaneuo So Jesús, qataq nataqa'en soua dos maye ỹo'otta'ape naua qauema. So 'oonolec ỹana'ague da aloic So Jesús, qaq so lỹa qalaq ỹana'ague da ne'emaq. ₃₄[Nache So Jesús 'eeta':

–'Am Ita'a, 'auchoxoren namayepi, cha'aye sa ỹaỹaten dam ỹo'ottac.]

Ime, nache som huataxanaqpi nallettapiguilo soua alogo So Jesús da chaq negue't ca taleguete soomaye. ₃₅Qaq 'enauac na shiỹaxauapi imeteetac Somaye qataq nam lataxala'pi namayepi ỹe'eetac, 'eeta':

–Nca'alaxatec naxa ca lỹa. Qaq nagui, qaq no'on da maiche nca'alaxaala't, qom ỹoqta 'eesa da nacheñi ñi Nta'a Nca'alaxaqui maye lca'aguishec Ñim Lo'onatac 'Enauacna.

₃₆Qaq nataqa'en som huataxanaqpi ỹataqta ỹe'eetac Somaye, nache nquigueua'a da ỹauotaique da nỹomaxangui som lataxa maye ỹataqta chem. ₃₇Qataq 'eetega, 'eeta':

–Qom nache 'am maye 'am lta'a na judiopi, qaq no'on qome da maiche 'anca'alaxaala't.

₃₈Qaq huo'o som nerec maye neta'aguet na lsheenec pa'asheguem so npe'enaxaqui maye 'eeta': «'Ena na Lta'a na judiopi.»

₃₉Qaq som 'oonolec soua qauema naua ỹo'otta'ape maye nataqa'en qaiuaxaatauo nataqa'en isheueetac Somaye, 'eeta':

–Qom 'eesa da nache 'am Nta'a Nca'alaxaqui maye 'am Lca'aguishec Ñim Lo'onatac 'Enauacna, qaq no'on da maiche 'anca'alaxaala't qataq nataqa'en qomi' 'anca'alaxatre'c.

₄₀Qalaxaye so maiche lỹa nlaxa somaye, 'eeta':

–Qalaq ¿saisheto' da 'añi'iỹa Ñim Lo'onatac 'Enauacna? Ye qomi' nache shenaqta'am nataqa'en da nhuaxanaguec namaye. ₄₁Qomi' ỹoqta 'itchiguiñi dam qanque'eenaxac, cha'aye maiche sesheetenaqtac dam naigui nam so'otaqtacpi maye qauem. Qaq nam na' ỹale, qalaxaye saishet da huo'o ca ỹo'ot qauem.

₄₂Nache somaye 'enapego' So Jesús, 'eeta':

–Aỹem 'auennata'a qome, qom 'am qoỹami' da 'aulo'ogue 'enauacna.

₄₃Nache So Jesús 'enapeco':

–Ỹoqta 'eesa da shenapec, da nagui sogote Aỹem qoueta'aguet da souaqta'a ye lma' na qanca'alaxatecpi da piguem maye qaica ca 'eeta'am da llo'oxoyec.

₄₄Co'ollaq mashe na'a'q laiñi choche ivitta'a da dasheta añi nala', nache 'enauac ye 'alhua ỹataqta napalñi, ₄₅cha'aye añi nala' qalaq ỹataqta qaica ca le'eraxa, qaq som lapoxonaxat hualoxolaỹi maye pa'auo aso no'onaxanaxaqui late'erai qalaq colaqchiguingui na laiñi. ₄₆Nache So Jesús ỹa'alaq, 'eeta':

–'Am Ita'a, 'am sepagaqteetot da saqcha'a ica'alaxa da maiche 'aulo'ogue.

Qaq co'ollaq mashe nasaxauec de'era la'aqtac, nache ileu.

₄₇Nache so huataxanaq lta'a co'ollaq ỹauaachigui de'era, nache ỹo'oxoreetac Ñim Lo'onatac 'Enauacna, 'eeta':

–Ỹoqta 'eesa da ñi'iñi ỹale qaica ca ỹasouaxat.

₄₈Qaq 'enauac so shiỹaxauapi maye ỹauaachigui de'era huaigui Somaye, nache nlagaxatapec, qalaxaye ỹataqta iuaxaataleguete naua ltogue souaxat da nqui'ic. Cha'aye nomta da lasouaxashet. ₄₉Qaq 'enauac nam nauochaxauapi So Jesús qataq som 'alpi maye ca'attague' Somaye co'ollaq chegoqchiguiña ye 'alhua Galilea, nache qaỹatauga ca hueta'a co'ollaq imeteetac da huaigui Somaye.

₅₀Qaq huo'o so ỹale ỹataqta no'on da lataxac, qataq soxoraic, le'enaxat da José, lma' ye nỹecpiolec le'enaxat Arimatea maye huaigui ye 'alhua Judea. Somaye nache ỹalectaigui na 'amaqtaqaicpi maye loicnatac na lataxaguesat. ₅₁Se'eso José, somaye iuattaique da saqaỹaloq da yo'oq da lo'onataxanaxac Ñim Lo'onatac 'Enauacna. Qaq somaye saishet co'olloxocheye da ỹaỹamaxaren dam ỹo'ot som maiche laỹepi nta'alpi. ₅₂Nache somaye nqo'oneua'a co'ollaxa so Pilato da iỹaxaneua'a da lo'ocỹaxac So Jesús. ₅₃Qaq co'ollaq ime da nqaañi So Jesús, nache lpataxangui so nacanec maye no'on qataq late'erai añi lasheue, nache irouga asom huachiqui maye no'onata, naigui so coma' lta'araic. Asomaye saxanaxa da huo'o ca qaỹachangui. ₅₄Qaq se'eso na'a'q, nacheso so aỹamaxataxaqui da qanaỹamaxatta'aguet so lỹa na'a'q maye mataxaqui som yaqta'a da nnoxoneuo.

₅₅Nache som 'alpi maye ca'attague' So Jesús co'ollaq chegoqchiguiña ye 'alhua Galilea, nataqa'en jec da ca'attaueegue so José da demeenaxaneuga aso huachiqui. Nache ỹauaachigui ye qoỹaachiguiña so lo'ocỹaxac So Jesús. ₅₆Nache co'ollaq ỹe'eguelaxareua'a ca lma't, nache iqataxaarai' som coraxat da ỹauotaique da lcoraxat so lo'ocỹaxac So Jesús. Ime, nache nmatre'c se'eso na'a'q mataxaqui, qaipactelec da lamaxasoxonaxac so Moisés.