Lucas 24

₁Qaq co'ollaq ña nte'etom so la'auaxanec na'a'q soua na'axa'te, nache soua 'alo nqo'oneugalo aso huachiqui, ỹachetrac som coraxat maye iqataxaatrapigui'. Qataq huo'o so laỹepi 'alpi nnaictague'. ₂Qaq co'ollaq ivireugalo asomaye, nache ila'alo so lta'araic coma' maye lapoxot aso huachiqui da saishet da ỹapotagui som ñegueuo. ₃Nache inoxooroigui aso huachiqui, qalaxaye saishet da ỹanata so lo'ocỹaxac So Qarataxala' Jesús. ₄Qataq sa ỹaỹate'n ca 'eeteque co'ollaq ila'alo soua dos ỹale't, nachattrañi huaqta'ato soomaye. Soua alogo somaye ỹataqta qashelectrapiguiñi. ₅Qaq soua 'alol ỹataqta nlaqchiguilo da lcolanaqa', nache ỹa'alyiñi naua l-llectel, nache ỹataqta iviraxata'agueta naqa'en na 'alhua naua lata'api. Nache se'esoua ỹale't 'ena'apo':

–¿Ta'ainco' ye qanmichiitapigui na leuaxaicpi da qanmichiitaique som nca'altauec? ₆Saishet da hueta'a ne'ena Somaye, cha'aye mashe qaltaq nca'alec qanqa'en. Qauennache dam la'aqtac co'ollaq hueta'a ye 'alhua Galilea, 'eeta': ₇«Aỹem Shiỹaxaua Llalec Aỹem qoỹanoigui qome na 'etaxaloxoicpi, da yaqto' Aỹem qaiuaxaneuo, qalaxaye qom mashe ivi' caua tres na'axa'te, nache qaltaq ñeca'alec.»

₈Nache asomayepi tachigui lauel da la'aqtac co'ollaxa So Jesús. ₉Qaq co'ollaq quera'ai aso huachiqui da ỹe'eguelaxareuo, nache co'ollaq ivildeuo, nache da'aqtaxanem 'enauac de'era, soua once lamaxa'she So Jesús, nataqa'en 'enauac so laỹepi. ₁₀Qaq so 'alpi maye irouo da la'axaỹaxa'c soua once namaxa'she, nache ỹalectaigui aso María maye Magdala lashe, qataq aso Juana, qataq aso María maye late'e so Santiago, qataq so laỹepi 'alpi. ₁₁Qalaxaye soua namaxa'she 'eeta'am naqa'en da choche naỹaquiaxac da ỹa'axattac asomayepi, nache saishet da ỹa'amaqte'n.

₁₂Qalaxaye so Pedro, nache nqalgoq da demeenaxaneuga aso huachiqui. Qaq co'ollaq ivireuga nache ỹalloigui na pa'auo asomaye, nache ndotec so hualoxolaỹi lapagaxaic maye qalpataxangui co'ollaxa so lo'ocỹaxac So Jesús da huetaua'a na laỹe asomaye. Ime, nache ỹe'eguelaxaua'a ca lma' ỹataqta huo'o da la'aalaxa dam qanayeuaigui.

₁₃Qaq nacheso se'eso na'a'q da huo'oi soua dos som lapaxaguenatacpi So Jesús taira'a ye nỹecpi le'enaxat Emaús, maye huo'o ca once kilómetros ye lshecta da qaỹachegoqchiguiña ye Jerusalén. ₁₄Qaq co'ollaq quete' soomaye, nache na'aqtaxaatrapigui 'enauac de'era qanayeuaigui. ₁₅Qaq co'ollaq ñaq na'aqtaxaatega't, nache So Jesús ca'atalo soomaye, nache nnaictagueto. ₁₆Qaq na'aictaxa da ilotro'ot Somaye, qalaxaye huo'o som 'eeta'am da npaxatta'agueta, da huo'omshe saishet da ỹauatto'n Somaye. ₁₇Nache So Jesús inatta'ape soomaye, 'eeta':

–¿Negue't cam qana'aqtaxañeetapigui nam nqa'aic? Qataq ¿ta'ainco' ye qauaquicoita?

₁₈Nache so 'oonolec soomaye, le'enaxat Cleofas, ỹasat, 'eeta':

–'Enauac nam shiỹaxauapi maye hueta'a na Jerusalén qaica ca sa ỹaỹaten da qanayeuaigui se'esoua na'axa'te. Qaq ¿chaq 'amto' da qonetaña yemaye da sa 'auaỹaten de'era?

₁₉Nache Somaye 'enapeco':

–¿Negue'to' camaxa?

Nache soomaye 'ena'apo':

–Qomye dam huaigui So Jesús maye Nazaret le'ec, som la'aqtaxanaxanec Ñim Lo'onatac 'Enauacna. Se'eso ỹale qaica ca ỹaqalanapec da huo'o ye la'aqtac, qataq da huo'o ye ỹo'ot, qaq ỹataqta ỹaỹamaxareeta Somaye Ñim Lo'onatac 'Enauacna qataq 'enauac na shiỹaxauapi. ₂₀Qalaxaye nam lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq nam maiche qarataxala'pi, ỹaneguet Somaye da nalaataguec qataq iuaxaneguet so npe'enaxaqui. ₂₁Qaq qomi' huo'o da qanaquitaxac da nacheso Somaye, som nca'alaxatec taxa na Israel le'ecpi. Qaq nagui mashe ivi' naua tres na'axa'te da qanayeuaigui de'era. ₂₂Qaq 'eesa da huo'oi soua 'alo maye qomi' ỹalectaiguilo da qomi' icolanaqche't, cha'aye so ña qaỹata'aguet so na'a'q, nache nqo'ooreuga aso huachiqui. ₂₃Qaq co'ollaq saishet da ỹanata ca lo'ocỹaxac Somaye, nache ñe'eguelaxareuo da ỹa'axattrac da lauanaqche'c co'ollaq ilora'a soua namaxa'she piguem lashe' ỹa'axatta'ape da ca Jesús mashe nca'alec. ₂₄Ime, nache je'c soua maiche qarỹa't da demeenaxareuga aso huachiqui. Qaq co'ollaq ivildeuga, nache ilaleguete da qui'itchigui. Qaq ipacchigui dam 'enapec soua 'alo, qalaxaye soua qarqaỹa't saishet da ila'alo ca Jesús.

₂₅Nache So Jesús 'enapeco':

–¡Ỹataqta qaico' ca qauaỹaañiỹapec qami', qataq qaỹaloqta da qaua'amaqchiñi 'enauac nam la'aqtaxanaxacpi co'ollaxa som la'aqtaxanaxanecpi Ñim Lo'onatac 'Enauacna! ₂₆¿Sa qauaỹaañiỹo' peta'a, da que'eca Lca'aguishec Ñim Lo'onatac 'Enauacna hua'auñi qome da nque'etaxan da saxanaxa da inoxoneua'a ca lo'onataxanaxac da ilo'ogue 'enauacna?

₂₇Ime, nache So Jesús da'aqtaxanema soomaye 'enauac nam na'aqtaguec Somaye, nam nanettalec ana nere maye huetalec na la'aqtacpi Ñim Lo'onatac 'Enauacna, ỹachegoxottot aso hua'auchiguiñi lereguishe so Moisés, iviraxatta'a asom pa'atec lereguishe som la'aqtaxanaxanecpi Ñim Lo'onatac 'Enauacna.

₂₈Qaq co'ollaq mashe yaqta'a da ivilda ye nỹecpiolec le'enaxat Emaús, nache So Jesús ỹe'enaxat da ỹapactauec. ₂₉Qalaxaye ỹataqta ipactrega soomaye da no'onañi naqa'e'n. Nache 'eetrega, 'eeta':

–Ña qomi' 'ano'onaisopactaxa. Ten, ye mashe avit, qataq yaqta'a da pe.

Nache So Jesús ca'ateuo'oguelo soomaye da no'onaisopa. ₃₀Nache co'ollaq mashe nso'ootrañi soomaye da datatralec so nquia'axala', nache So Jesús ỹacona aso nauole 'ayiiña da nqouagaxaueelec. Ime, nache ỹanoiguilo soomaye. ₃₁Huaña, nache soomaye 'eco' da qaỹauatoiguilo naua la'ai'te, nache ỹauatto'n Somaye, qalaxaye So Jesús nache pal. ₃₂Nache soomaye detaqtega'to', 'eeta':

–¡Qache ỹoqta 'eesa de'era ntonaxa'c naua qarquiyaqtel, quiye so ñanaguenaqtague' na nqa'aic, can qomi' da'aqtaxaatapeguema naua naiguilo naua ñiyigui'she maye nanettaleguete ana nere!

₃₃Huaña, nache saishet da huo'o ca iuattra'a soomaye, nache je'c da ỹe'eguelaxaregue da Jerusalén. Huaña, nache nauaneto soua once lamaxa'she So Jesús qataq 'enauac so laỹepi. ₃₄Nache som hueta'a yi'iye da'aqtaxanema soomaye, 'eeta':

–Ỹoqta 'eesa da qaltaq nca'alec So Qarataxala', cha'aye so Simón mashe nauane'.

₃₅Nache soua dos ỹale't nataqa'en da'aqtaxaata'ape, ỹa'axattrac da 'eetec da hueraigui co'ollaq quetrague' so nqa'aic maye taỹa'a ye nỹecpi le'enaxat Emaús, qataq co'ollaq ỹauatto'n So Jesús chegoqchigui co'ollaq ncolaxattapiguiñi aso nauole 'ayiiña.

₃₆Qaq ña qana'aqtaxaatapigui de'era, co'ollaq So Jesús nachaxan nachatchiguingui na laiñi se'esoua lapaxaguenataqa. Nache iqui'n soomaye, 'eeta':

–La', qauacoñiiguet da l-lagaxayec Ñim Lo'onatac 'Enauacna.

₃₇Nache soomaye ỹataqta ỹe'elaqche't de'era, qataq qalota da lcolanaxa, ipi'itaxaatrega da choche nqui'i so ilotro'ot. ₃₈Qalaxaye So Jesús 'enapeco':

–¿Ta'ainco' ye qami' ỹe'elaqche't de'era? Qataq ¿ta'ainco' ye huo'o da lqolectaxanaxa'c naua qarquiyaqchilli'? ₃₉Ña qaumichiñi' naua ihua'q qataq naua ichel. Qataq ñaq Aỹem qaupocheeua'a qataq Aỹem qauloitot, nache qauauattoñi da Nachaỹem ¡'Eesa da Aỹem! ¡Nachaỹem! Cam nqui'i qaica cam lapat qataq ca lpi'inec, qaq saishet da 'eetec nagui da Aỹem qauloito'ot.

₄₀Qaq co'ollaq 'enapec de'era, nache ỹachaxa'n naua lhua'q qataq naua lapia'ate. ₄₁Qalaxaye soomaye saxanaxa da ỹa'amaqte'n de'era, souaxat da ntonaxa'c qataq dam la'aalaqa'. Nache So Jesús 'enapeco':

–¿Huo'o peta'a ca qo'oqoi ne'ena?

₄₂Nache soua lapaxaguenataqa ỹanem so laỹe so lauoc nỹaq. ₄₃Nache So Jesús ỹaconeguet. Ime, nache chec, ỹauaachigui naqa'en soomaye. ₄₄Qaq co'ollaq ime, nache 'enapegalo soomaye, 'eeta':

–De'era souaigui, nachera dam sa'axattac co'ollaq ña qami' soota'agueta: da iuen da ipacchigui qome 'enauac na ña'aqtaguec maye ỹa'axat nam namaxasoxonaxacpi maye ỹiyiñi co'olloxocheye so Moisés qataq naua leregui'she som la'aqtaxanaxanecpi Ñim Lo'onatac 'Enauacna qataq nam no'onecpi le'enaxat Salmos.

₄₅Huaña, nache itaua'n soomaye da ỹaỹate'n naua naiguilo naua ñiyigui'she maye nanettralec ana nere maye huetalec na la'aqtacpi Ñim Lo'onatac 'Enauacna. ₄₆Nache 'enapeco':

–Dam nanettañi ỹa'axat da ca Lca'aguishec Ñim Lo'onatac 'Enauacna, iuen da hua'auñi da qaỹalauat. Qaq qom mashe inoxoore'c caua tres na'axa'te, nache qaltaq nca'alec. ₄₇Nataqa'en iuen da qaỹa'aqtaxanem na ỹotta'a't shiỹaxauapi Aỹem, yaqto' 'enauac namayepi ỹe'egueloqot Ñim Lo'onatac 'Enauacna, qaq Ñimaye ỹapalaxat na lasouaxashetpi. Qaq chegoqchiguiña na Jerusalén, ₄₈da qami' qaua'axacheeuec 'enauac de'era qarauanaqchiqui. ₄₉Qaq Aỹem qome qami' ñamaxalo cam ỹachaxanapec co'olloxocheye Ñim Ita'a. Qalaxaye qami', nache qoviita'a qome na Jerusalén, nato' qom mashe qauacoñiiguet cam na'añaxac maye chegaqasheguem.

₅₀Nache So Jesús nqateeguesop soomaye ye Jerusalén da ỹauega ye Betania. Huaña yemaye, nache ỹachaxaayishegue'm naua lhua'q da ỹaalec da no'on la'aqtac soomaye. ₅₁Qaq nache saqaỹaloq da So Jesús qaỹaueegue da piguem ₅₂co'ollaq soua lapaxaguenataqa ñaq ỹo'oxoreetrac Somaye.

Qaq co'ollaq ime de'era, nache soua lapaxaguenataqa ỹe'eguelaxaregue da Jerusalén, ỹataqta machiyiñi. ₅₃Nache ima'ape naua na'axa'te da ỹe'eguelaqtraua'a aso no'onaxanaxaqui late'erai da do'onaxaata'ape qataq ỹo'oxoreetrac Ñim Lo'onatac 'Enauacna. Aja', nache 'eetec de'era.