Da la'aqtaxanaxac so Juan maye nachelaxanataxanaq
1-2So Juan maye nachelaxanataxanaq som llalec so Zacarías, hueta'a ye toolec 'alhua. Nache Ñim Lo'onatac 'Enauacna detaxaỹapegue' co'ollaq huauga yemaye, huetoigui so na'a'q co'ollaq so Tiberio maye netaña ye Roma mashe ivi' naua quince vi'iye da lo'onataxanaxac da ilotague' na qalota shiỹaxauapi maye hueta'alo naua lỹa't 'aleu', qaq so Poncio Pilato ilotague' ye 'alhua ye Judea. Qaq se'eso na'a'q so Herodes Antipas ilotague' ye 'alhua Galilea, qaq so Filipo maye lqaỹa so Herodes ilotague' ye 'alhua Iturea qataq Traconítide, qaq so Lisanias ilotague' ye 'alhua Abilene. Qaq so Anás qataq so Caifás, soomaye lataxala'ate na ltaxaỹaxanaxanecpi na judiopi da qaitaxaỹapegue' Ñim Lo'onatac 'Enauacna.
3Nache so Juan jec da coleelec 'enauac yem saqaỹapeque so tala Jordán. Huaña yemaye, nache 'eetego' na shiỹaxauapi, 'eeta': «¡Qavi'eguelaqaỹot nagui Ñim Lo'onatac 'Enauacna! Qataq iuen da qami' qanachelaxa'n, yaqto' Ñim Lo'onatac 'Enauacna ỹapalaxa't naua qarasouaxashe'echilli'.»
4Qaq soua qaỹoqteguelo vi'iye so la'aqtaxanaxanec Ñim Lo'onatac 'Enauacna le'enaxat Isaías ỹiyiñi co'ollaxa da ỹa'axatta'aguet so Juan, 'eeta':
«Huo'o qome ca shiỹaxaua chemaqtapeguelec
ca toolec 'alhua, 'eeta' da lỹaxanaxac:
Ña qauqataxañiỹai' ca nqa'aic Ñim Nataxala'.
¡Ỹataqta qauauacheetegue ca llec!
¡Qataq saishet da huo'o ca npaxateguet!
5'Enauac na ca'ameguepi qaimingui,
qataq qavi'eguelaxachiỹa da nalochiguiñi 'enauac ana
qaỹoqotcheguemec 'alhuapi.
Qataq qanlaxañeeuec na nqa'aicpi maye namaqtapigui.
6¡Yaqto' 'enauac na shiỹaxauapi ila'a
ca Nca'alaxaqui maye qami' namaxalo
Ñim Lo'onatac 'Enauacna!»
7Qalota so shiỹaxauapi naỹa so Juan da yaqto' qanachelaxan, qaq somaye 'enapeco' da la'aqtac:
–¡Qami' qoñiita'am na na'araxanaq! ¿Qaupicheetega peta'a da qami' ỹe't ca lhuaxanaxanaxac Ñim Lo'onatac 'Enauacna maye qami' namaxalo? 8Qauachaxañi ca qarataxaqui maye ỹachaxan da qaỹa'axañiiuec da qauo'ocheetac naua qarasouaxashe'echilli'. Saishet da qaupicheetega da qami' llalqa so Abraham nache qanca'alliiuec. Cha'aye ỹataqta 'eesa de'era qami' sa'axatema da ivira'a ne'ena coma' Ñim Lo'onatac 'Enauacna ishet da nqochenaxata da ỹauo'o llalaqpi so Abraham. 9Aca nañiguishe da qauem da alaỹaxac, nache ca lalamaqte acamaye ichecot nmachitcheguem na lpa'a'pi, ime, nache ỹavigaxat. Qaq Ñim Lo'onatac 'Enauacna mashe lhuotta da yaqto' ilaxachigui nam saishet da ỹo'ot cam ỹaỹamaqchiguiñi.
10Nache so shiỹaxauapi denataxan, 'eeta':
–Qaq, ¿hua'ago' ca shenaqtec da yaqto' ñeca'alaxauec?
11Nache so Juan 'enapeco':
–Qomye ca dos caua l-lomaxaqui', qalaq ỹanem ca 'oonolec cam qaica ca l-lomaxaqui, qataq cam huo'o ca aloq, qalaq ỹachet cam qaica ca aloq.
12Nataqa'en anac som ỹacootapeeguet ana nsheetenaqte ca nta'a maye netaña ye Roma da huotaique da qanachelaxan, nache inattaco' so Juan, 'eeta':
–'Am Napaxaguenataxanaq, qaq qomi', ¿hua'ague ca shenaqtec da yaqto' ñeca'alaxauec?
13Nache so Juan 'enapeco':
–Da ivita da qalapoñiỹa't ana lsheetenaxanaqte na shiỹaxauapi, qalaq saishet da napacalec qanqa'eñi añi iỹaxanaique ca nta'a.
14Nataqa'en anac so huataxanaqpi, da inattaco' so Juan, 'eeta':
–Qaq qomi', ¿hua'ague ca shenaqtec?
Nache so Juan 'enapeco':
–Qami' maye qauayiñiitalec na shiỹaxauapi qataq qoñiỹapega da qami' ỹanema aca alom da yaqto' ishet da qauachaxañiỹapecot da lactapiguiñi. ¡Saishet da qavi'iguelaqailec da nache qoñiitec de'era, nachaqrata da qantoñiiteguec añi qansheetenaqchi!
15Nache 'enauac na shiỹaxauapi ỹataqta huo'o da la'aalaxa, qataq huotaique da ỹaỹaten da so Juan nacheso So Lca'aguishec Ñim Lo'onatac 'Enauacna maye qaiuattaique. 16Qalaxaye so Juan 'enapega 'enauac so shiỹaxauapi, 'eeta':
–Aỹem 'eesa da qami' ñachelaxanguilo nagui na 'etaxat, qalaxaye huo'o na aỹem nca'attalec maye ỹataqta ỹactec da la'añaxac napacalec aỹem. Namaye qami' nachelaxanguilo So Saqcha'a Na'añaxac Qui'itta qataq norec. ¡Aỹem ỹataqta sa yaloua'a Namaye na'aictaxa da choche aỹem l-latac! 17Ne'ena aỹem nca'attalec, namaye iỹotauga na no'on da lataxac qataq na qauem da lataxac. Na no'on da lataxac, nache nca'alaxatec, qaq nam qauem da lataxac qalaq ỹasaxangui ca norec maye saishet da 'om.
18Qaq 'era da 'eetec da ltaxaỹaxac so Juan co'ollaq ỹa'axattapeguem 'enauac so shiỹaxauapi da no'on na'axaỹaxac. 19Nataqa'en iviraxato'ot so nta'a Herodes souaxat da huaroneguet aso Herodías, maye lhua so lqaỹa Filipo, qataq nataqa'en souaxat nam laỹepi ỹo'otpi maye sa ỹaỹamaxañi. 20Qalaxaye so Herodes, na'aictaxa da qalota na ỹo'ot sa ỹaỹamaxañi, qalaq nache 'ena'am qaltaq nquigaxattec da ỹo'ot maye ỹataqta qauem, cha'aye ỹamaxaigui aso ncoñetaxanaxaqui so Juan.
So Juan nachelaxan So Jesús
21Qaq co'ollaq so Juan imat da nachelaxaatac 'enauac so shiỹaxauapi, nache anac nataqa'en So Jesús da yaqto' qanachelaxan. Qaq So Jesús co'ollaq ña nqouagaxaueetac, nache na piguem nauatoigui, 22qaq So Saqcha'a Na'añaxac Qui'itta naỹaña Somaye, 'eeta'am na qoto' ỹataqta yo'oqta. Ime, nache chemqot na piguem so na'aqtac, 'eeta':
«'Am maye nache 'am ỹalamaxat Ỹalec, 'am ỹauotaxat, Aỹem ỹataqta 'am ñetootapeguec.»
So chegoxoguet lta'alpi So Jesús
23So Jesús mashe ivi' soua treinta vi'iye da llaxa co'ollaq cot da do'onataxan. Qaq Somaye na shiỹaxauapi 'eetega llalec so José. Qaq 'ana ana lmalate som chegoxoguetpi Somaye: so José, nache lta'a so Elí, 24qaq so Elí, nache lta'a so Matat, qaq so Matat, nache lta'a so Leví, som llalec so Melqui, qaq so Melqui, nache lta'a so Janaí som llalec so José, 25qaq so José, nache lta'a so Matatías, qaq so Matatías, nache lta'a so Amós, qaq so Amós, nache lta'a so Nahúm, qaq so Nahúm, nache lta'a so Esli som llalec so Nagay, 26qaq so Nagay, nache lta'a so Mat, qaq so Mat, nache lta'a so Matatías, qaq so Matatías, nache lta'a so Semei, qaq so Semei, nache lta'a so Jose som llalec so Yodá, 27qaq somaye, nache lta'a so Joana, qaq so Joana, nache lta'a so Resa, qaq so Resa, nache lta'a so Zorobabel, qaq so Zorobabel, nache lta'a so Salatiel som llalec so Nerí, 28qaq so Nerí, nache lta'a so Melqui, qaq so Melqui, nache lta'a so Adí, qaq so Adí, nache lta'a so Cosán, qaq so Cosán, nache lta'a so Elmodam som llalec so Er, 29qaq so Er, nache lta'a so Josué, qaq so Josué, nache lta'a so Eliezer, qaq so Eliezer, nache lta'a so Jorín som llalec so Matat, 30qaq so Matat, nache lta'a so Leví, qaq so Leví, nache lta'a so Simeón, qaq so Simeón, nache lta'a so Judá, qaq so Judá, nache lta'a so José, qaq so José, nache lta'a so Jonán som llalec so Eliaquín, 31qaq so Eliaquín, nache lta'a so Melea, qaq so Melea, nache lta'a so Mainán, qaq so Mainán, nache lta'a so Matata som llalec so Natán, 32qaq so Natán, nache lta'a so David, qaq so David, nache lta'a so Yesé, qaq so Yesé, nache lta'a so Obed, qaq so Obed, nache lta'a so Booz, qaq so Booz, nache lta'a so Salmón som llalec so Nasón, 33qaq so Nasón, nache lta'a so Aminadab, qaq so Aminadab, nache lta'a so Aram, qaq so Aram, nache lta'a so Esrón, qaq so Esrón nache lta'a so Fares, qaq so Fares, nache lta'a so Judá, 34qaq so Judá, nache lta'a so Jacob, qaq so Jacob, nache lta'a so Isaac, qaq so Isaac, nache lta'a so Abraham, qaq so Abraham, nache lta'a so Téraj, qaq so Téraj, nache lta'a so Najor, 35qaq so Najor, nache lta'a so Serug, qaq so Serug, nache lta'a so Ragau, qaq so Ragau, nache lta'a so Peleg, qaq so Peleg, nache lta'a so Éber som llalec so Sala, 36qaq so Sala, nache lta'a so Cainán, qaq so Cainán, nache lta'a so Arfaxad, qaq so Arfaxad, nache lta'a so Sem, qaq so Sem, nache lta'a so Noé som llalec so Lamec, 37qaq so Lamec, nache lta'a so Matusalén, qaq so Matusalén, nache lta'a so Henoc, qaq so Henoc, nache lta'a so Yared, qaq so Yared, nache lta'a so Malalel, qaq so Malalel, nache lta'a so Cainán, 38qaq so Cainán, nache lta'a so Enós, qaq so Enós, nache lta'a so Set, qaq so Set, nache lta'a so Adán som llalec Ñim Lo'onatac 'Enauacna.
