Lucas 4

₁Nache So Jesús ỹataqta nlaqchigui So Saqcha'a Na'añaxac Qui'itta, co'ollaq chegaqaama so tala Jordán, nache So Saqcha'a Na'añaxac ỹauec Somaye da taỹa naqa'en ye toolec 'alhua.

₂Huaña yemaye, nache hueta'a cuarenta na'axa'te, nache anac so pa'aguenataxanaxaic da ỹe'eguen. Qaq ỹataqta qaica ca chec Somaye se'esoua na'axa'te. Qaq co'ollaq, ime, nache nomteguet na lqouaxa.

₃Nache so pa'aguenataxanaxaic 'enapego' somaye, 'eeta':

–Qom ỹataqta 'eesa da 'am Llalec Ñim Lo'onatac 'Enauacna, qaq no'on da qonapega ne'ena coma' da nañigui ana nauole.

₄Nache So Jesús 'enapeco':

–Ana nere maye huetalec na la'aqtacpi Ñim Lo'onatac 'Enauacna, 'eeta': «Saishet da nachaqacata aca nauole da ỹa'añaqchet ca shiỹaxaua.»

₅Ime, nache so pa'aguenataxanaxaic qaltaq ỹaviguisheguema So Jesús aso qaỹoqotcheguemec 'alhua. Nache hualec asomaye da ỹachaxana, 'enauac na 'alhuapi maye hueta'a na sallaxanecpi qataq 'añaxaicpi. ₆Nache so pa'aguenataxanaxaic 'enapeco':

–Aỹem 'am sanem qome 'enauac de'era na'añaxac qataq da llo'oxoyec 'enauac na 'alhuapi, cha'aye aỹem mashe aỹem qoỹanem 'enauac damaye. Qaq ỹoqo'oye aỹem ishet da sami' cam taalec da sami'. ₇Qaq qom aỹem 'aua'aroto naua 'arllectel da aỹem 'anatamnot, nache aỹem 'am sami' da 'aralamaxat qome 'enauac namayepi.

₈Qalaxaye So Jesús 'enapeco':

Ana nere maye huetalec na la'aqtacpi Ñim Lo'onatac 'Enauacna, 'eeta': «'Avio'oxoren Ñim Nataxala' maye Lo'onatac 'Enauacna, qataq nachaqñita Ñimaye 'aualaxaguet.»

₉Qaq co'ollaq ime, nache so pa'aguenataxanaxaic qaltaq ỹauec Somaye, ỹauega ye nỹecpi le'enaxat Jerusalén, nache ỹaviguisheguemec na pa'asheguem aso no'onaxanaxaqui late'erai, nache 'enapego', 'eeta':

–Qom ỹataqta 'eesa da 'am Llalec Ñim Lo'onatac 'Enauacna, qaq 'auachegoqcheena'a qome da 'auparenaxanec, ₁₀cha'aye ana nere maye huetalec na la'aqtacpi Ñim Lo'onatac 'Enauacna, 'eeta':

₁₂Nache So Jesús 'enapeco':

–Nataqa'en ana nere maye huetalec na la'aqtacpi Ñim Lo'onatac 'Enauacna, 'eeta': «Saishet da 'avi'iguen Ñim Nataxala' maye Lo'onatac 'Enauacna.»

₁₃Nache so pa'aguenataxanaxaic co'ollaq saishet da ỹanata ca lỹa lataxac da ỹe'eguen So Jesús, nache cara'acolec da loiguilo naua na'axa'te da ca'ai Somaye.

_14-15So Jesús ỹe'eguelaxa ye 'alhua Galilea, ỹataqta nlaqchigui So Saqcha'a La'añaxac Ñim Lo'onatac 'Enauacna. Nache quetagui na lma'pi na shiỹaxauapi qataq dapaxaguenataxaatapoigui ana napaxaguenaxaquipi na judiopi, qaq 'enauac na shiỹaxauapi ỹataqta 'onaxaic da na'aqtaguec da detaqtega Somaye. Nache saqaỹaloq da 'enauac qaỹauatton Somaye yi'iye 'alhua.

₁₆Ime, nache ỹe'eguelaxague da Nazaret yem ỹataqta lañaxataqa'. Qaq co'ollaq ivireuga so na'a'q mataxaqui, nache inoxoneua'a aso napaxaguenaxaqui na judiopi, cha'aye maiche lataxac Somaye. Qaq co'ollaq nachaañi da detaxaỹaxanataxan, ₁₇nache qoỹami' asom lereguishe so la'aqtaxanaxanec Ñim Lo'onatac 'Enauacna le'enaxat Isaías. Nache So Jesús ỹauachigui, ime, nache itaxaỹaxan som huetaña so nerec maye, 'eeta':

₂₀Ime, nache So Jesús lapaxa't aso nere, nache ỹami' som ilotague' asom napaxaguenaxaqui na judiopi. Ime, nache nso'ooñi, nache 'enauac nam huetaigui asom paxaguenaxaqui ỹataqta ilochigui Somaye. ₂₁Nache So Jesús detaqa, 'eeta':

«Nagui mashe ivita ye laloqo' da ipacchigui se'eso setaxaỹaxaatac maye qana'axaỹaxañeetega.»

₂₂Nache 'enauac qaỹo'oxoreetac So Jesús, qataq ỹataqta qaỹa'aalatapeguec souaxat naua la'aqtaqa ỹataqta ỹaguec da ỹaỹamaqchiyiñi. Nache nnattega't somayepi, 'eeta':

–De'era, ¿peta'a sa nachero' da llalec so José?

₂₃Nache So Jesús 'enapeco':

–Qami' yo'oqta qome da Aỹem qauroilec da na'aqtac naxa maye 'eeta': «¡'Am natannaxanaq, hua'auñi da maiche 'anatareela't!» Qami' qauaỹachiñiita nam so'otpi co'ollaq huaña ye Cafarnaúm, qaq ỹoqo'oye nagui Aỹem qauỹaxañiitacot da so'ot nataqa'en da huaña ne'ena. ₂₄Qalaxaye ỹoqta 'eesa de'era qami' sa'aqtaxanema da qaica ca la'aqtaxanaxanec Ñim Lo'onatac 'Enauacna da qaỹa'amaqten, qataq qaỹaconeguet da hueta'a ca maiche lalamaxat lma'. ₂₅Soua qaỹoqteguelo vi'iye co'ollaq ñaq nca'altauec so la'aqtaxanaxanec Ñim Lo'onatac 'Enauacna le'enaxat Elías, nache qaica ca auot soua tres vi'iye qataq soua seis ca'agoxoiqa, qaq na shiỹaxauapi, ilem na lqouaxa. Qaq na lma' na Israel le'ecpi qalota ana pa'aipi, ₂₆qalaxaye Ñim Lo'onatac 'Enauacna saishet da ỹamaq so Elías, da 'enauac itauan asomayepi. Nachaqasota aso 'oonole pa'ai maye lma' ye Sarepta, maye saqaỹapeque ye Sidón. ₂₇Se'eso na'a'q, nataqa'en na lma' na Israel le'ecpi ỹataqta qalota na sa no'on maye nchega na lo'oc, qalaxaye so Eliseo ndotec da nataren so Naamán maye lma' ye 'alhua le'enaxat Siria.

₂₈Nache co'ollaq qaỹa'aqchigui de'era ỹa'axattac, nache 'enauac nam huetaigui asom paxaguenaxaqui ỹataqta dalemata. ₂₉Ime, nache qanqateeguesop yi'iye So Jesús, nache qaỹaviguisheguema som loga't asom qaỹoqotcheguemec 'alhua maye netalec so nỹecpi, cha'aye qaỹauotaique da qaỹamaxauec Somaye da huaña yemaye. ₃₀Qalaxaye So Jesús ñe'eguelqot, nache tachiguingui na laiñi somayepi. Ime, nache ca'ai ye Nazaret.

₃₁Ime, nache So Jesús nqo'ona ye nỹecpi le'enaxat Cafarnaúm, yem huaigui ye 'alhua Galilea. Qaq co'ollaq huaña yemaye, nache ỹapaxagueetac so shiỹaxauapi so na'a'q mataxaqui. ₃₂Nache na shiỹaxauapi ỹataqta huo'o da la'aalaxa da lapaxaguenataxanaxac Somaye, cha'aye da detaqa, qalaq ỹataqta huo'o da 'ene'c naua la'aqtaqa.

₃₃Nache aso napaxaguenaxaqui nam judiopi, huo'o so ỹale maye huo'o so netaigui saqcha'a na'añaxac leguemaxaic. Qaq se'eso saqcha'a na'añaxac ỹa'alaxalec So Jesús, 'eeta':

₃₄–¡'Am Jesús Nazaret le'ec! ¿Negue't ca 'auauotaique da qomi' 'auo'oteque? ¿Qomi' 'auanaỹalo peta'a da qomi' 'aulaxachiguilo? Aỹem 'am sauatton. ¡'Am nache 'am Llalec Ñim Lo'onatac 'Enauacna!

₃₅Nache So Jesús nlaxa so saqcha'a na'añaxac leguemaxaic, 'eeta':

–¡'Aue'enaxaatai'! ¡Qoca'ai ne'ena ỹale!

Nache se'eso saqcha'a na'añaxac leguemaxaic, huañi naqa'en so ỹale, taqtoigui naqa'en somayepi. Ime, nache ca'ai so ỹale, qalaxaye saishet da ỹañoxot da huo'o ca 'ena'ac.

₃₆Nache 'enauac so shiỹaxauapi ỹataqta huo'o da lcolanaxa, nache detaqtega't, 'eeta':

«¿Negue't de'era na'añaxac maye hueto'ot de'era ỹale? Ye dam da' ỹale ỹataqta huo'o naq 'enec, qataq huo'o da la'añaxa'c naua la'aqtaqa da ỹamaq so saqcha'a na'añaxac leguemaxaicpi, nache somayepi ỹalaq da jec.»

₃₇Nache qana'aqtaxaatapigui So Jesús qataq na ỹo'otpi 'enauaque naua laỹel yi'iye 'alhua.

₃₈Huaña, nache So Jesús ca'ai aso napaxaguenaxaqui na judiopi, nache taua'a so lma' so Simón. Qaq co'ollaq pa'aigui so nỹec, nache qaỹa'aqtaxanem da aso lachoro so Simón sa no'on ỹataqta ỹaguec na le'eraxa. ₃₉Nache So Jesús nqo'oneua'a asomaye, nache 'enapega se'eso ne'eraxa da jec. Nache se'eso ne'eraxa jec. Ime, nache saqaỹaloq da ñesheguem asomaye, nache iquia'axan 'enauac so hueta'a se'eso lma'.

₄₀Qaq co'ollaq mashe inoxooñi aso nala', nache 'enauac na shiỹaxauapi maye ỹotta'a't na lalolaxapi, qandoua'a So Jesús. Qaq So Jesús ỹashel-lec ñi 'oonolec somayepi, nache no'oita naqa'en. ₄₁Qaq nam saqcha'a na'añaxacpi maye ca'ai na shiỹaxauapi ỹa'alaqtagui, 'eeta':

–¡Nache 'am maye 'am Llalec Ñim Lo'onatac 'Enauacna!

Qalaxaye So Jesús nlaxa ne'ena saqcha'a na'añaxac leguemaxaicpi, qataq sa ỹashenem da detaqa, cha'aye namayepi ỹaỹaten da Somaye, nacheso So Lca'aguishec Ñim Lo'onatac 'Enauacna.

₄₂Qaq co'ollaq mashe yaqta'a da yo'oxoñi, nache So Jesús tauga ca pa'auec so nỹecpi da nqo'oneuga som toolec 'alhua. Qalaxaye na shiỹaxauapi nmittaique, choche ivittauga ca hueta'a Somaye. Nache qaỹauotaique da qanllañi, da yaqto' saishet da jec. ₄₃Qalaxaye So Jesús 'enapeco':

«Ñim Lo'onatac 'Enauacna Aỹem namaq da sa'axatem 'enauac na shiỹaxauapi ne'ena 'alhua da no'on na'axaỹaxac maye ỹa'axat da lo'onataxanaxac Ñimaye. Qaq ỹoqo'oye Aỹem, iuen da ñeqo'ona na laỹepi lma'pi na shiỹaxauapi.»

₄₄Nache So Jesús jec da nqo'ona ana napaxaguenaxaquipi na judiopi 'enauac yi'iye 'alhua, ỹa'axattac da no'on na'axaỹaxac.