So 'alpi maye itauaatac So Jesús
1Qaq co'ollaq mashe qaỹoqtegue de'era, nache So Jesús quetagui na saq 'amaqtaq nỹecpiolec qataq nam naña nam lta'araic nỹecpi da da'aqtaxaatapeguem na shiỹaxauapi da no'on na'axaỹaxac da lo'onataxanaxac Ñim Lo'onatac 'Enauacna. Qaq Somaye nnaictagueto soua doce lapaxaguenataqa, 2-3nataqa'en qalota so 'alpi. Se'eso 'alpi itauaateguec ana alom co'ollaxa So Jesús qataq soua lapaxaguenataqa. Huo'o asomayepi co'ollaxa da So Jesús, nataren na ỹotta'a't lalolaxapi qataq ỹo'orauec na saqcha'a na'añaxacpi leguemaxaicpi. Qaq ỹalectaigui asomayepi aso María maye Magdala lashe asom chegaqaigui co'olloxocheye soua siete saqcha'a na'añaxac leguemaxaicpi. Nataqa'en ỹalectauo aso Juana qataq aso Susana. Aso Juana lhua so le'enaxat Cuza, som ilotague' ca lma' qataq da lsallaxa so Herodes Antipas.
Qaỹaloqnaxana ca danaxaatac
4Qalota na shiỹaxauapi anac chegaqa'alo na ỹotta'a't saq 'amaqtaq nỹecpiolec da huotaique nauane' So Jesús. Nache Somaye ỹauo'o so daloqnaxana, 'eeta':
5«Huo'o so ỹale jec da danaxan, ỹaañi na trigo. Qaq co'ollaq ñaq danaxaatac, nache huo'o aso lañiguishe ala tatelec so nqa'aic. Nache na shiỹaxauapi maye quetapeegue somaye petapigui, qataq na qoỹopi chec asomaye. 6Qaq aso lỹa lañiguishe ala tatelec so 'alhua maye qalota na coma'. Ime, nache ana lañiguishe ñaxat, qalaxaye saqaỹaloq da deqaqa, cha'aye qaica ca laquitaxa na 'alhua. 7Qaq aso lỹa lañiguishe ala qalaq tatelec so lañaxataqa' ana ỹaxat. Qaq aso lañiguishe saqaỹaloq da ñaxat, qalaxaye ana ỹaxat ipataxañi, nache saishet da hua'aqta'a da lañaxataxac. 8Qaq aso lỹa lañiguishe ala tatelec so no'on 'alhua, nache co'ollaq ñaxat, nache ỹataqta 'onaxaic da lañaxataxac qataq 'onaxaic da alaỹaxac, ỹoqo'oye huo'o ana ivi' cien ana ala añi 'oonole lamo.»
Qaq co'ollaq ime, nache So Jesús nlamaxaren, 'eeta': «¡Qami' da ỹataqta 'eesa da huo'oi naua qartelai lauacolli', nache ỹataqta qana'axaỹaxañiichiguiñi!»
Dam 'eetec So Jesús da huo'omshe ỹauota'a na laloqnaxanaxatpi
9Ime, nache soua lapaxaguenataqa inattraco' Somaye 'eetra':
¿Chaq 'eetec ca naigui de'era 'aualoqnaxaatega?
10Nache So Jesús 'enapeco':
–Aỹem qami' sa'aqtaxaatema dam saqcha'a lataxac da lo'onataxanaxac Ñim Lo'onatac 'Enauacna. Qalaxaye nam laỹepi shiỹaxauapi, namayepi da sapaxaguen qalaq sauo'o na saloqnaxana. Qaq ỹoqo'oye na'aictaxa da demeenaxatac qalaq 'eeta'am da sanauaañi, qataq na'aictaxa da hua'aqtac, qalaxaye 'eeta'am da saishet da hua'aqa.
So Jesús ỹa'axat da naigui som daloqnaxaatega maye danaxaatac
11Som saloqnaxaatega dam naigui 'eeta': Aso nañiguishe ala naigui da qaỹa'axattac da la'aqtac Ñim Lo'onatac 'Enauacna. 12Qaq asom nañiguishe maye tatelec so nqa'aic, qalaq naigui ca shiỹaxaua maye na'axaỹaxaatac. Qalaxaye anac som pa'aguenataxanaxaic, nache ỹo'otec da icoua'ai naqa'en som na'aqtac maye huetaigui añi lquiyaqte, yaqto' saishet da da'amqaanataxan qataq saishet da ỹaconeguet da nca'alaxa maye ỹachaxaatac Ñim Lo'onatac 'Enauacna. 13Qaq asom nañiguishe maye tatelec so 'alhua maye ỹalliigui na coma', qalaq naigui ca shiỹaxaua maye na'axaỹaxaatega da na'aqtac qalaq huo'o da ntonaxac. Qalaxaye ye saishet da ỹoqta ỹaỹateeta, nache da huo'o ye ivireguet lqalaic, nache saqaỹaloq da ỹaxanec da lpi'iỹaxac Ñim Lo'onatac 'Enauacna. 14Qaq asom nañiguishe maye tatelec som 'alhua maye huo'o ana ỹaxat, qalaq naigui ca shiỹaxaua maye na'axaỹaxaatega da na'aqtac. Qalaxaye saishet da hua'aqta'a damaye da naralaxat da nachaalataxac, nachaqrata da iuennatega nam yo'oqchigui lhuenaxanaxa da qanauec aca anom qataq da 'eetec da iqopitaxaatac da nachaalataxac. 15Qaq asom nañiguishe ala maye tatelec so 'onaxaic 'alhua, qalaq naigui nam na'axaỹaxaatega da la'aqtaxanaxac Ñim Lo'onatac 'Enauacna, qataq ỹaconeguet, qataq ỹalaxaguet, qataq huesota da lataxac. Qaq de'era pa'atec, ỹataqta qaica ca qochetega qataq 'enauac nam ỹo'otpi ỹataqta ỹaỹamaqchiguiñi.
Qaỹaloqnaxana aso ncoỹaraxanaxaqui
16Qaica ca ishet da ỹegueua'a aca lcoỹaraxanaxaqui, ime, qaq ỹapolec, huo'otaq ỹano'ot na pa'aguiñi ca lmala'. Nachaqrata da ỹanasheguem, yaqto' da huo'o ca inoxonoigui ca nỹec, qalaq yo'oqchiguiñi. 17Cha'aye 'enauac nam qoỹoxottapiguiñi ivira'a da qailalec, qataq 'enauac nam saq cha'api ivira'a da qaỹaỹaten.
18Qaq ỹoqo'oye ỹataqta qana'axaỹaxañiichiguiñi, cha'aye da huo'o ca ỹaỹaten dam saqcha'a lataxac da lo'onataxanaxac Ñim Lo'onatac 'Enauacna, nache camaye qaỹa'aqtaxanem na qalota laỹepi lataxac. Qalaxaye nam saishet da ỹaỹaten dam saqcha'a lataxac de'era no'onataxanaxac, nache Ñim Lo'onatac 'Enauacna, ỹo'otec namayepi da icoua'ai 'enauac nam ipi'itaxaatega da ỹaỹaten.
Aso late'e qataq soua lqaỹa't So Jesús
19Aso late'e qataq soua lqaỹa't So Jesús nvildeua'a ca hueta'a Somaye, qalaxaye saishet da qaiviraua'a Somaye souaxat da ỹataqta qalota na shiỹaxauapi. 20Nache huo'o so da'aqtaxanem So Jesús, 'eeta':
–Ara 'arate'e qataq daua 'arqaỹa't pa'atraue'c, huotaique da 'am detaxairapegue'.
21Qalaxaye So Jesús 'enapeco':
–Aca ỹate'e qataq ca ỹaqaỹañicpi, nachena nam na'axaỹaxaatega qataq ỹalaxaguet da la'aqtaxanaxac Ñim Lo'onatac 'Enauacna.
So Jesús vi'iiguet naqa'en so la'at lta'araic
22Qaq huo'o so na'a'q, nache So Jesús huenooñigui aso nllocta, lỹata'ape soua lapaxaguenataqa. Nache 'enapegalo', 'eeta': «Qolaq saxatague da lỹa le'ego ana lapel late'erai.» Ime, nache je'c. 23-24Qaq co'ollaq ñaq quetralec aso lapel, nache So Jesús do'oche. Nache nque'elaxatta da huo'o so la'at ỹataqta qapa'atteguet tatelec aso lapel, qaq ỹoqo'oye na 'etaxat tangui aso nllocta. Nache soua napaxaguenataqa co'ollaq ila'a da lchec maye taleguete, nache ỹa'alaxarelec So Jesús da nquetoxo'n, 'eetra':
–¡'Am Napaxaguenataxanaq, 'am Napaxaguenataxanaq, mashe huotaique da qomi' iyiiyiñi!
Nache So Jesús ñesheguem. Nache 'enapega so la'at qataq ana lapaxa so 'etaxat da nañaxaayiñi. Qaq nache ipacchigui da 'enauac ỹe'eguelaxa da ntochiguiñi. 25Ime, nache 'enapegalo soua lapaxaguenataqa, 'eeta':
–¡Qami' saishet da huo'o ca qarpi'iỹaxaqui Aỹem!
Qalaxaye soomaye ỹataqta ñi'i', qataq ỹataqta huo'o da la'aalaqa'. Nache ñi 'oonolec inattac ñi lỹa, 'eeta': «¿Negue't dam da' ỹale ye ivira'a na la'at qataq ana lapaxa na 'etaxat da ỹalaxaguet?»
So ỹale maye qalota so netaigui saqcha'a na'añaxac leguemaxaicpi
26So Jesús qataq soua lapaxaguenataqa ivittrague da lỹa le'ego aso lapel ye 'alhua le'enaxat Gerasa. 27Qaq co'ollaq mashe huenoteeguesop aso nllocta So Jesús, nache natena'aguet so ỹale maye lma' yi'iye 'alhua, somaye qalota so netaigui saqcha'a na'añaxac leguemaxaicpi.
–Se'eso ỹale, mashe saq hua'a ca lma', nachaqrata da huetauga ca pannaqa' qataq mashe qaỹoqteguelo soua vi'iye da saq ỹaayiñi naua alogo. 28-29Qaq souaxat naxa da so saqcha'a na'añaxacpi da qalota da deloquiaxanataxaatac, nache na shiỹaxauapi icoñera'a't naua lhua'q qataq naua lapia'ate se'eso ỹale, qataq qanauaatalec. Qalaxaye somaye ỹachipiaxattac na ncoñetaxanaxat lcat, nache se'eso saqcha'a na'añaxac leguemaxaic datauec naqa'en somaye, da tauga ca 'alhua maye toolec.
–Qaq se'eso ỹale co'ollaq ila'a So Jesús, nache ỹa'alaq, nache ỹa'aroto naua l-llectel Somaye. Nache So Jesús 'enapega se'eso saqcha'a na'añaxac leguemaxaicpi da ca'ai se'eso ỹale, qalaxaye somayepi ỹa'alaqtagui 'eeta':
–¡'Am Jesús maye 'am Llalec Ñim Lo'onatac 'Enauacna maye 'amaqtaqaic! ¿Negue't ca 'auauotaique da qomi' 'auo'oteque? 'Am ñachoxonnaqot nagui, da saishet qome da 'auauo'o ca qanque'eenaxac.
30Nache So Jesús inat se'eso ỹale, 'eeta':
–¿Ca 'eetec ca 'are'enaxat?
Nache somaye 'enapeco':
–Qomye ỹe'enaxat Qalota.
'Enapec de'era, cha'aye ỹataqta qalota so saqcha'a na'añaxac leguemaxaicpi, netaigui somaye.
31Nache se'eso saqcha'a na'añaxacpi, nachoxoreetacot So Jesús da yaqto' saishet da ỹamaxaña cam qaica ca loga't nhuaxanaqa' nam saqcha'a na'añaxac leguemaxaicpi.
32Qaq yi'iye qanayeeta'a saqaỹapeque aso lcomaraxalate, nache hueta'a aso qalota cos late'epi deque'etac. Nache se'eso saqcha'a na'añaxac leguemaxaicpi, nachoxoreetacot So Jesús da ỹasheetem da taigui asa'aso cos late'epi. Nache So Jesús ỹasheetem somayepi da taigui. 33Nache se'eso saqcha'a na'añaxac leguemaxaicpi ca'ai se'eso ỹale, nache taigui aso cos late'epi. Nache 'enauac asomayepi nqalgaqangui so tocot, nache tangui aso lapel late'erai, nache 'ogaxaipi.
34Nache soua ỹale't maye ilotrague' aso cos late'epi co'ollaq ỹauaachigui de'era 'eetec asomayepi, nache chegaqañi da nqo'oneua'a ca nỹecpiolec da da'aqtaxanem 'enauac de'era qanayeuaigui.
35Nache 'enauac som shiỹaxauapi demeenaxaneuga cam huaña de'era. Qaq co'ollaq ivita ca hueta'a So Jesús, nache ila'a se'eso ỹale maye netaigui co'ollaxa se'eso saqcha'a na'añaxac leguemaxaicpi. Se'eso ỹale, mashe ỹaatrañi soua alogo qataq ỹataqta ỹaỹamaqta da lataxac, nache na hueta'a yi'iye 'alhua ỹataqta huo'o da lcolanaxa.
36Nache 'enauac nam ỹauaachigui So Jesús co'ollaq nataren se'eso ỹale, nache quetot da da'aqtaxaatapeguem 'enauac na shiỹaxauapi. 37Nache 'enauac na shiỹaxauapi maye lma' ye Gerasa, nachoxoreetacot So Jesús da ca'ai yi'iye 'alhua, souaxat da ỹataqta lta'araic da lcolanaxa.
–Qaq co'ollaq So Jesús da huenooñigui aso nllocta da ỹe'eguelaxata ye Galilea, 38nache se'eso ỹale maye mashe no'oita, nachoxoreetacot Somaye da ishet da nasheeteguet da ca'ategue. Qalaxaye So Jesús 'eetega somaye, 'eeta': 39«'Avi'eguelaxaua'a ca 'arma'. Ime, qaq 'aua'axat 'enauac nam 'am ỹo'otec Ñim Lo'onatac 'Enauacna.»
Nache se'eso ỹale jec da nqo'ona so nỹecpi da da'aqtaxanem 'enauac na shiỹaxauapi dam ỹo'otec So Jesús somaye.
Aso llale so Jairo qataq aso 'alo maye ipoteua'a so lapo' So Jesús
40Qaq co'ollaq mashe nvitta So Jesús ye 'alhua Galilea, nache na shiỹaxauapi ỹataqta lta'araic da ntonaxac, cha'aye 'enauac qaiuattaique. 41Huaña, nache nvi' so ỹale le'enaxat Jairo, somaye nataxala' asom napaxaguenaxaqui na judiopi. Se'eso ỹale ỹa'aroto naua l-llectel So Jesús, nache nachoxoreetacot da ishet da nqo'ona ca lma'. 42Cha'aye aso 'oonole llale maye mashe ivi' naua doce vi'iye da llaxa, asomaye ileetapigui'. Nache So Jesús ca'ategue so Jairo, qaq ỹataqta qalota so ca'ategue Somaye, ivira'a da ỹataqta qanpataxagui.
43Qaq se'eso shiỹaxauapi ỹalectaigui aso 'alo sa no'on. Asomaye mashe ivi' naua doce vi'iye da nque'eenaxac da anactac na ltago'q. Qaq asomaye mashe imeuo 'enauac nam logoxoshetpi, souaxat da isheetetac na natannaxanaqpi, qalaq saishet da huo'o ca ishet da ỹañoxot da nataren da lalolaxa. 44Qaq asomaye queteuo'oguet na l-laq So Jesús, nache ipoteua'a na laỹe so lapo'. Huaña, nache asomaye no'oita. 45Nache So Jesús denataxangui so shiỹaxauapi, 'eeta':
–¿Negue't ca Aỹem ipoteua'a?
Qalaxaye ye qaica ca ishet da ỹasat da 'eetega ipoteua'a Somaye, nache so Pedro 'enapeco':
–'Am Napaxaguenataxanaq, ¿Sa 'auaỹateno' da na shiỹaxauapi 'am qaicoleesop qataq 'am qanpataxagui?
46Qalaxaye So Jesús qaltaq ỹe'eguelaxalec da 'enapec:
–Ỹoqta 'eesa da huo'o ca Aỹem ipoteua'a, cha'aye Aỹem ñanomteueegue da jec so ỹa'añaxac.
47Nache aso 'alo co'ollaq ila'a da mashe saishet da ỹañoxot da nqañoxottapiguiñi, nache iviloxol da lcolanaxa. Ime, nache ỹa'aroto naua l-llectel So Jesús. Nache ỹauaachigui 'enauac so shiỹaxauapi co'ollaq asomaye da'aqtaxanem dam huo'omshe ipoteua'a so lapo' So Jesús, qataq da 'eetec da saqaỹaloq da no'oita asomaye.
48Nache So Jesús 'enapego' aso 'alo, 'eeta':
–'Am ỹalole, nagui mashe 'am no'oita, cha'aye huo'o da 'arpi'iỹaxac Aỹem. 'Aue, qojec, saqca ca da.
49Qaq co'ollaq ña detaqtac So Jesús, nache huo'o so nvi', chegaqa'a ca lma' so Jairo som nataxala' asom napaxaguenaxaqui na judiopi. Nache da'aqtaxanem somaye, 'eeta':
–Aye 'aỹa'ale mashe ileu. No'on da 'aua'aqta'a da Napaxaguenataxanaq.
50Nache So Jesús co'ollaq hua'aqchigui de'era, nache 'enapega so Jairo, 'eeta':
–Saishet qome da 'añi'i. Nachaqrata da 'aupi'iỹa'a Aỹem, nache acamaye nca'alec.
51-53Qaq co'ollaq ivireua'a so nỹec, nache 'enauac so shiỹaxauapi nỹeetagui, souaxat da l-leuaxa aso nogotole, qalaxaye So Jesús 'enapego' somayepi 'eeta': «¡Saishet qome da qanỹiñiitac! Aye nogotole saishet da ileu; ayemaye choche do'ocheta.» Nache so shiỹaxauapi ỹe'eetac So Jesús, cha'aye ỹaỹaten da aso nogotole mashe ileu. Nache So Jesús pa'auo lỹateuo so Pedro, qataq so Santiago, qataq so Juan, qataq so Jairo qataq aso late'e aso nogotole, nache saishet da huo'o ca lỹa ỹasheneuo da pa'auo. 54Ime, nache ỹacona na lhuaq aso nogotole, nache 'enapega 'eeta': «¡'Am nogotole, qoñisheguem!»
55Nache aso nogotole qaltaq ỹe'eguelaxalec da nca'alec, nache sa naỹaloxon da ñesheguem. Nache So Jesús damaxasoxoolec da qoỹanem ca aloq asomaye. 56Nache soua lta'al ỹataqta huo'o da la'aalaqa', qalaxaye So Jesús 'enapegalo soomaye da saishet da huo'o ca da'aqtaxaarem de'era.
