Lucas 7

₁Nache So Jesús co'ollaq imat da ỹapaxagueetac so shiỹaxauapi, nache jec, taỹa ye nỹecpi le'enaxat Cafarnaúm. ₂Qaq netaña yemaye so huataxanaq lta'a maye lma' ye Roma, somaye huo'o so lamaxashec ỹataqta lauotaxat. Qaq se'eso lamaxashec sa no'on qataq mashe ileetapigui'.

₃Qaq se'eso lta'a na huataxanaq co'ollaq hua'axaỹapeguelec So Jesús, nache huo'oi soua ỹama'q nam lataxala'pi na judiopi, da ỹe'egueera'a So Jesús qataq 'enapega 'eeta': «Aỹem 'anqouaguec, 'auanaỹa na ima' da 'anataren ye ỹamaxashec.»

₄Nache soomaye je'c da nqo'oora So Jesús, nache ỹanema de'era na'aqta'c. Qataq nataqa'en nachoxoreetacoto, 'eeta': «Qomi' 'anqouagueque, 'auo'ot da lquiquiaxac ñi'iñi huataxanaq lta'a. Ñimaye taiguet da qaitauan, cha'aye ỹataqta no'on shiỹaxaua. ₅Qomi' judiopi ỹataqta qomi' ỹaỹamaxatte'; ¡qataq ivira'a da damaxasoxoolec da qano'oxoosheguem añi qanapaxaguenaxaqui!»

₆Nache So Jesús nnaicapegueto soomaye. Qalaxaye co'ollaq mashe qanayeetaua'a ca lma' so huataxanaq lta'a, nache somaye ỹama'q soua nauochaxau' da 'enapegalo So Jesús, 'eetra': «'Am Ỹataxala', saishet qome da ỹapactec da 'arhuogoxo, cha'aye sela'a da ỹataqta saq saiguet da 'aunoxonoigui na ima'. ₇Qataq nataqa'en aỹem sela'a da saishet da saiguet da 'am sepaca'a da 'am she'eguena'a. Nachaqrata da 'am ñachoxonnot da 'auauo'o ca 'ara'aqtac, da yaqto' no'oita ye ỹamaxashec, cha'aye aỹem sa'amaqten da yemaye ishet da no'oita. ₈Cha'aye aỹem mashe sanaỹa'ac da san ca ỹa'aqtac, nache qaỹalaxaguet. Da shenapega ñi 'oonolec na ñalleppi da sheeta': ‹¡'Asoma!›, nache aỹem ỹalaxaguet da jec. Qaq da shenapega ca lỹa da sheeta': ‹¡'Auanac!›, nache aỹem ỹalaxaguet da anac. Qaq da shenapega ca 'oonolec nam ỹamaxashecpi da sheeta': ‹¡'Auo'ot yi'iye!›, nache aỹem ỹalaxaguet da ỹo'ot.»

₉Nache So Jesús co'ollaq hua'axaỹa de'era la'aqtac se'eso huataxanaq lta'a, nache ỹataqta huo'o da la'aalaxa, nache 'enapega so shiỹaxauapi maye nnaictague', 'eeta': «'Enauac na Israel le'ecpi saishet da huo'o ca selalec da ỹataqta pi'iỹa'a Aỹem, da 'eeta'am que'eca huataxanaq lta'a maye Roma le'ec.»

₁₀Nache co'ollaq ỹe'eguelaxaua'a ca lma' se'esoua namaxa'she, nache ilaleguete se'eso namaxashec da mashe ỹataqta no'oita.

₁₁Qaq co'ollaq qaỹata'ague de'era, nache So Jesús qataq soua lapaxaguenataqa nqo'oora ye nỹecpi ye Naín. Qataq qalota so nnaictague' shiỹaxauapi. ₁₂Qaq co'ollaq mashe ivildeua'a so ñegueuo se'eso nỹecpi, nache ỹauaategueta soua ỹale't da ỹachetra'c so nsoqolec maye leuaxaic da ilayiñi. Se'eso saqca, somaye ỹataqta 'oonolec llalec aso pa'ai. Qaq qalota so shiỹaxauapi yi'iye qanayeeta'a da nnaictague' aso 'alo maye ỹataqta lta'araic da lachoxoyec.

₁₃Nache So Jesús co'ollaq ila'a asomaye, nache ỹataqta huo'o da lchoxonnataxanaxa, nache 'enapega, 'eeta': «Saishet da 'anỹen.» ₁₄Nache So Jesús nquigueua'a da ipoteua'a so lmala' se'eso leuaxaic. Nache soua ỹale't maye ỹacheta'ape vi'iigueta. Nache So Jesús 'enapega so leuaxaic, 'eeta': «¡'Am nsoqolec, 'am shenapega da qoñisheguem!» ₁₅Nache se'eso nsoqolec ñesheguem qataq detaqa. Ime nache So Jesús ỹauec so nsoqolec ỹauega ca hueta'a aso late'e.

₁₆Qaq co'ollaq qaỹauaachigui de'era, nache 'enauac so shiỹaxauapi ỹataqta huo'o da lcolanaxa, nache chegoqchiguiña da ỹo'oxoreetac Ñim Lo'onatac 'Enauacna, 'eeta': «¡Huo'o da na'aqtaxanaxanec qomi' hueta'agueta! ¡Qaq nagui Ñim Lo'onatac 'Enauacna qomi' itaua'n!»

₁₇Nache na shiỹaxauapi maye hueta'a ye 'alhua Judea qataq na laỹepi maye lauoreuapi yemaye, imauec da qaỹaỹaten da ỹo'ot So Jesús.

₁₈Soua lapaxaguenataqa so Juan maye nachelaxanataxanaq je'c, da da'aqtaxanema somaye 'enauac nam ỹo'ottacpi So Jesús. Qaq ỹoqo'oye so Juan ỹama'q soua dos lapaxaguenataqa, ₁₉da yaqto' ina't So Jesús da nacheso So Lca'aguishec Ñim Lo'onatac 'Enauacna huo'otaq da qaiuataique ca lỹa.

₂₀Nache co'ollaq ivitra ca hueta'a So Jesús, nache inatta'ape Somaye, 'eetra':

–Ñi Juan maye nachelaxanataxanaq qomi' namaxalo 'am da 'am senataq, da nache 'am Lca'aguishec Ñim Lo'onatac 'Enauacna, huo'otaq da seuataqaique ca lỹa.

₂₁Nache huetoigui se'eso na'a'q da So Jesús nataren so qalota shiỹaxauapi maye sa no'on qataq ỹaguec da nque'eenaxac. Qataq nataqa'en nataren nam huo'o na netaigui saqcha'a na'añaxac leguemaxaicpi, nataqa'en qalota so qanamaicpi ỹe'eguelaxatem da nauaañi. ₂₂Ime, nache 'enapegalo' se'esoua dos ỹale't, 'eeta':

–Qauesomiỹa qome, qaua'aqtaxañim ca Juan 'enauac nam qauauañiichigui qataq qaua'aqaichigui.

₂₃¡Ñim Lo'onatac 'Enauacna ỹaalec da nqouagaxa qome nam saishet da Aỹem ỹalat souaxat da so'ottac de'era!

₂₄Qaq co'ollaq mashe je'c soua lapaxaguenataqa so Juan, nache So Jesús ỹachegoxottot da da'aqtaxaatapeguem so shiỹaxauapi, da 'eetec co'ollaxa so Juan, 'eeta':

–«¿Negue't som qaumeenaxañiitapeuga co'ollaxa yem toolec 'alhua? ¿Peta'a ỹale da 'eeta'am aca coqta da ỹacholaxaatac na la'at? ₂₅¿Peta'a 'onaxaiqa naua alogo se'eso ỹale? Qami' qauaỹaañi da na ỹaatrañi naua 'onaxaiqa anogo namayepi hueta'alo naua lma'ate na 'amaqtaqaicpi nta'alpi. ₂₆Qaq ¿chaq negue'to' qone' som qaumeenaxañiitapeuga? ¿Peta'a la'aqtaxanaxanec Ñim Lo'onatac 'Enauacna somaxa? Aja', ỹataqta 'eesa da so Juan napacalec cam la'aqtaxanaxanec Ñim Lo'onatac 'Enauacna; ₂₇nacheso som na'aqtaxanaxanec maye ỹa'axatta'aguet Ñim Lo'onatac 'Enauacna co'ollaq, 'eeta':

₂₈Ỹataqta 'eesa da ana'ana 'alhua qaica ca nañiguiñi ỹale da napacalec da la'amaqchec so Juan maye nachelaxanataxanaq. Qalaxaye nam ỹapactec da qaica ca la'amaqchec da huetaigui da lo'onataxanaxac Ñim Lo'onatac 'Enauacna, nachena na ỹataqta napacalec so Juan.»

₂₉Nam na'axaỹaxaatega co'ollaxa so Juan dequiguiỹo'ot somaye da yaqto' nachelaxan, ivira'a nataqa'en nam ỹacootapeeguet ana nsheetenaqte ca nta'a maye netaña ye Roma. Yaqto' somayepi ipaqueelec da ỹo'ot da 'eetapeguec Ñim Lo'onatac 'Enauacna. ₃₀Qalaxaye nam fariseopi, qataq nam dapaxaguenataxaatapeguec na namaxasoxonaxacpi saishet da ỹaỹamaxaren da ỹalaxaguet Ñim Lo'onatac 'Enauacna qataq saishet da ỹaỹamaxaren da nachelaxan so Juan.

_31-32So Jesús queto'ot da da'aqtaxaatac, 'eeta':

«Qami', maye qoviitaigui ne'ena na'a'q, qoñiita'am ca ñaqpiolec da nso'ootañi da'aistega't hueta'a ca nlagaqa', nache iỹaxaategueta ca laỹepi ñaqpiolec, 'eeta':

₃₃Cha'aye so Juan maye nachelaxanataxanaq, nqouaqchettac qataq saishet da nỹomgui na lataxa, nache qami' qoñiitega da huo'o ca netaigui saqcha'a na'añaxac leguemaxaic. ₃₄Ime, qataq ñevi', Aỹem Shiỹaxaua Llalec, nache seque'etac qataq ñeỹomtac qalaq qami' qoñiitega da Aỹem quia'aqchaqaic, qataq Aỹem taxaic, qataq ñauochaxaua na shiỹaxauapi maye qauem da na'aqtaguec, qataq na ỹacootapeeguet ana nsheetenaqte ca nta'a maye netaña ye Roma. ₃₅Qalaxaye da laỹaanec Ñim Lo'onatac 'Enauacna yo'oq, chegoqchigui nam ỹo'otpi.»

₃₆Huo'o so ỹalectaigui na fariseopi le'enaxat Simón, iỹaxana So Jesús da huotaique lquia'axaua da huaña ca lma'. Nache So Jesús ỹasateguet, nache co'ollaq mashe datataleguete ca nquia'axala', ₃₇nache huo'o aso 'alo maye qauem da na'aqtaguec maye hueta'a nataqa'en yi'iye qanayeeta'a. Asomaye co'ollaq ỹaỹaten da So Jesús deque'etac hueta'a ca lma' so Simón. Nache ỹacona aso laỹe' na coraxat maye ỹataqta no'on, nache taỹa ca hueta'a Somaye.

₃₈Nache aso 'alo pa'auo, nache ỹa'alyiñi naua l-llectel, hua'aqtaua'alo naua lchel So Jesús, nache asomaye ye ỹaguec da nnoinaxac, nache naua lache' taleguete naua lchel So Jesús. Ime, nache ỹaqaxaỹaxa't naua lchel Somaye ỹauota'a na laue qataq napigoqta'ape, ime, nache icoreleguete som coraxat maye ỹachetac.

₃₉Qaq co'ollaq ỹauaachigui de'era so Simón, nache deuennataxaataco', 'eeta': «Ñi'iñi ỹale da ỹoqta 'eesa taxa da la'aqtaxanaxanec Ñim Lo'onatac 'Enauacna, nache ishettaxa da ỹauatton añim 'alo maye ipottaua'alo naua lchel da añimaye qauem da na'aqtaguec.»

₄₀Nache So Jesús 'enapega so fariseo, 'eeta':

–Simón, huo'o da huotaique 'am sa'aqtaxanem.

Nache som fariseo 'enapeco':

–Aja', 'am ña'axaỹaxana 'am Napaxaguenataxanaq.

₄₁Nache So Jesús ỹauo'o de'era daloqnaxana, 'eeta':

–Huo'oi soua dos shiỹaxau', huo'o aso lavigaxaiste' anom neto'ot so lavigaqtaxanaxala't. So 'oonolec soomaye aso lavigaxaiste ivi' da lashiichiỹaxac caua quinientos na'axa'te da do'onataxaatac ca ỹale, qaq so lỹa qalaq aso lavigaxaiste ivi' da lashiichiỹaxac caua cincuenta na'axa'te da do'onataxaatac ca ỹale. ₄₂Qaq soomaye saishet da ỹañoxo't da isheete'n asa'aso lavigaxaiste', nache se'eso navigaqtaxanaxala' ichoxore'n soomaye da ỹapalaxat asa'aso lavigaxaiste'. Qaq nagui Aỹem 'aua'aqtaxanem, ¿chaq negue't soomaye ca ỹoqta qaỹauotec?

₄₃Nache so Simón 'enapeco':

–Qomye 'eeta'am da nacheso som ỹale maye ỹactec aso lavigaxaiste.

Nache So Jesús 'enapeco':

–Aja', 'eesa da 'ara'aqtac.

₄₄Nache So Jesús ỹamato'ot aso 'alo. Ime, qaq 'enapega so Simón, 'eeta':

–¿'Am peta'a 'aulota'a ana'ana 'alo? Can ñenoxonoigui na 'arma', qalaq saishet da Aỹem 'aỹa'anem ca 'etaxat da seỹoi' naua ichel. Qaq ana'ana 'alo anamaye iỹota'ape naua ichel, deỹoxonalo naua lache', qataq ỹaqaxaỹaxa't, ỹauota'a na laue. ₄₅Qataq 'am saishet da Aỹem 'anapigoxoi' da Aỹem 'auquin, qalaq añimaye so choche ñenoxonoigui na 'arma', qalaq saq 'imgui da napigoqta'ape naua ichel. ₄₆Nataqa'en saishet da 'aucorelec na ỹaqaic ca coraxat, qalaxaye añimaye icoreleguete naua ichel so coraxat ama na laita. ₄₇Añimaye ỹataqta lta'araic da lauotaxanaqtaic Aỹem, cha'aye ỹaỹaten da na qalota lasouaxashetpi mashe qaỹapalaxat. Qalaxaye ca saq 'amaqtaq na lasouaxashetpi maye qaỹapalaxat, camaye saq 'amaqtaq da lauotaxanaqtaic.

₄₈Ime, nache So Jesús 'enapega aso 'alo, 'eeta': «Na 'arasouaxashetpi nagui 'enauac mashe qaỹapalaxat.»

₄₉Nache so nhuanaxauapi Somaye maye nso'oota'ai' deuennataxaatac, 'eeta': «¿Ta'ainco' Ñimaye ye ivira'a nam nasouaxashetpi da 'eetega ishet da ỹapalaxat?»

₅₀Qalaxaye So Jesús 'enapega aso 'alo, 'eeta': «'Am nagui 'anca'alec, cha'aye Aỹem 'aua'amaqten. 'Aue, qojec, nagui 'aulactapiguiñi.»