Soua lapaxaguenataqa So Jesús napocta'ape na ala na trigo so na'a'q mataxaqui
1Huo'o so na'a'q maye mataxaqui, nache So Jesús qataq soua lapaxaguenataqa ỹa'axasoxootrelec so nanqa' na trigo. Qaq soua lapaxaguenataqa ỹataqta huo'o na lqouaqa', nache napoctraigui na ala na trigo qataq chectra'c.
2Nache nam ỹalectaigui na fariseopi co'ollaq ỹauaachiguilo soua napaxaguenataqa da napoctrac na trigo, nache 'enapega So Jesús, 'eeta':
–¡Ña 'aula'a dam ỹo'ottac naua 'arapaxaguenataqa! ¡Damaye ỹataqta sa qaishetapec da qaỹo'ot ye na'a'q mataxaqui!
3Nache Somaye 'enapeco':
–¿Saisheto' peta'a da qautaxaỹaxañiỹapec da 'eetec so David co'ollaq huo'o so na'a'q somaye qataq soua lỹata'ape co'ollaq ỹataqta ỹaguec na lqouaqa'? 4Nache soomaye pa'aroigui so lma' Ñim Lo'onatac 'Enauacna, nache che'c soua nauole maye qoỹanot Ñim Lo'onatac 'Enauacna. Asom saishet da huo'o ca qaỹashenem da chec da huo'otaq 'eeta'ama soomaye. Nachaqnata nam ltaxaỹaxanaxanecpi na shiỹaxauapi da qaitaxaỹapegue' Ñim Lo'onatac 'Enauacna ishet da chec. 5Qataq qami' ¿saishet peta'a da qautaxaỹaxañiỹa'ape naua lamaxasoxonaxaco so Moisés da na ltaxaỹaxanaxanecpi na shiỹaxauapi maye do'onataxaatapoigui aso atamnaxaqui da namayepi saishet da nmatec ye na'a'q mataxaqui, qalaq ñaqaiyeta saishet da huo'o ca lasouaxashet? 6Qaq Aỹem qami' shenapegalo da huo'o na hueta'a ne'ena, maye ỹataqta napacalec da la'amaqchec acam choche atamnaxaqui. 7Qami' saishet da qauaỹachiñi cam naiguilo naua ñiyigui'she la'aqtaqa Ñim Lo'onatac 'Enauacna maye, 'eeta': «Aỹem ñeshetaique da qami' qauchoxonnataxañi, qaq saishet da nachera da qaỹa'añiiuo da qaỹavigaxat ca shiguiỹac da qarachetaqtaxanaqche.» Cha'aye da qami' qauaỹaañita de'era, qaq saishettaxa da qauauo'oi ca lasouaxashet cam qaica ca ỹasouaxat. 8Cha'aye Aỹem Shiỹaxaua Llalec, maiche Aỹem chegoqtot cam ishet da qaỹo'ot ye na'a'q mataxaqui, qataq cam saishet da qaỹo'ot.
So Jesús nataren so ỹale so na'a'q mataxaqui
9Nache So Jesús jec, nache taua'a aso napaxaguenaxaqui na judiopi yem qanayeuta'a. 10Qaq hueta'a asa'aso paxaguenaxaqui so ỹale maye daqaqta na lhuaq. Qaq nam fariseopi maye choche nmittaique ca lataxac da ỹachegoxotteua'a da huo'o ca lasouaxashet naqa'en So Jesús, nache inattac Somaye, 'eeta':
–¿Peta'a na lamaxasoxonaxacpi so Moisés maye qolaqtalec ỹasheeta da qanataren ca dalolaxaic ye na'a'q mataxaqui?
11Nache So Jesús 'enapeco':
–Da huo'o ca 'oonolec da qoñiita da tangui aca lcheque aca lalo qagueta ca na'a'q mataxaqui, nache ¿ishet peta'a da jec da nqatsheguem? ¡Aja' ishet! 12Qaq ¡cam shiỹaxaua ỹataqta napacalec da lashiichiỹaxac acam choche qagueta! Qaq ỹoqo'oye ishet da qaỹo'otec ca ỹaỹamaqchiguiñi ca shiỹaxaua ye na'a'q mataxaqui.
13Nache So Jesús 'enapega so ỹale, 'eeta':
–Ña 'aỹa'anec na 'arhuaq.
Qaq co'ollaq choche ỹanec na lhuaq so ỹale, nache no'oita, 'eeta'am so lỹa lhuaq. 14Nache so fariseopi huenoxonec da detaxaỹapigui ca lataxac da ỹalauat So Jesús.
Ñim Lo'onatac 'Enauacna lamaxashec So Jesús
15Qaq So Jesús co'ollaq ỹaỹaten da naỹamaxattapigui so fariseopi, nache ca'ai yi'iye hueta'a, nache ỹataqta qalota som shiỹaxauapi ca'ategue Somaye. Nache Somaye nataren 'enauac nam sa no'onpi. 16Nache 'enapega somayepi da saishet da ỹa'axat Somaye. 17Qaq 'eetec de'era, yaqto' ipacchigui co'olloxocheye dam la'aqtaxanaxac so la'aqtaxanaxanec Ñim Lo'onatac 'Enauacna maye le'enaxat Isaías co'ollaq, 'eeta':
18«¡Ñaq qauloỹa na ica'aguishec,
nam maiche seỹaxana da yaqto' Aỹem do'onataxanot!
Aỹem ỹataqta ỹauotaxat namaye.
Namaye ỹataqta Aỹem nlaxatchigui da ñetonaxac.
Qaq Aỹem sanaigui namaye da lta'araic Saqcha'a Ỹa'añaxac,
da yaqto' ỹa'axatem da nalochiguiñi lataxac,
'enauac nam ỹotta'a't shiỹaxauapi.
19Namaye saishet da huo'o ca ncotatague',
qataq saishet da ỹa'alaqtai',
¡qataq saishet da qaỹa'aqtega ca la'aqtac
da huangui na nqa'aicpi!
20Qataq saishet da nquigaxatec da nque'eenaxac
cam mashe nache 'eetai' da que'emaxaic,
qataq saishet da iviraxata'a da ỹalauat,
nam mashe ileetapigui'.
Nachaqrata da ỹa'añaqchet nam mashe qaica ca la'añaxac
qataq iviraxata'a da dauegaxan da 'eetapeguec Ñim Lo'onatac 'Enauacna.
21¡Nache 'enauac nam ỹotta'a't shiỹaxauapi maye huetalec ana 'alhua
ỹataqta huo'o da naquitaxac namaye!»
So Jesús qataq so lataxala' na saqcha'a na'añaxac leguemaxaicpi
22Huo'oi soua shiỹaxau' ỹauegueua'alo So Jesús so ỹale da yaqto' nataren. Somaye qanamaic qataq qaicaua naua la'aqtaqa, cha'aye huo'o so netaigui saqcha'a na'añaxac leguemaxaic. Nache So Jesús nataren, qaq se'eso ỹale ỹe'eguelaxa da nauaachiguiñi, qataq huo'oi naua la'aqtaqa.
23Nache 'enauac na shiỹaxauapi ỹataqta ỹa'aalac nam ỹo'otpi So Jesús, nache huo'o na 'eeta' da la'aqtac:
«¿De'era Jesús, nachera peta'a dam Lca'aguishec Ñim Lo'onatac 'Enauacna maye ỹachaxanapec da yaqto' qomi' nca'alaxatre'c?»
24Qalaxaye huo'o nam ỹalectaigui na fariseopi co'ollaq hua'axaỹa na shiỹaxauapi, nache 'eeta' da lhuennataxac:
«De'era Jesús ỹo'ottapeguec na saqcha'a na'añaxac leguemaxaicpi maye netaigui na shiỹaxauapi, cha'aye so Beelzebú maye lataxala' nam saqcha'a na'añaxacpi nacheso so ỹami' da la'añaxac damaye da yaqto' ỹo'ot de'era.»
25Nache So Jesús co'ollaq noma de'era lhuennataxac somayepi, nache 'enapega, 'eeta':
«Ca shiỹaxauapi maye hueta'a ca 'alhua da maiche npa'aguena't, nache taỹa'a da nlaguiñi. Qataq ca hueta'a ca nỹecpi da maiche npa'aguena't, nache que'eca nỹecpi taỹa'a da nlaguiñi. Qataq ca maiche nhuo' le'ecpi da maiche npa'aguena't, nache camayepi nataqa'en taỹa'a da nlaguiñi. 26Qaq nache 'eetec nataqa'en so pa'aguenataxanaxaic, da huo'otaq maiche mpa'agueeteguela't, nache maiche nlaxatteguiñi da lo'onataxanaxac. 27Qami' qoñiitega da so'otteguec na saqcha'a na'añaxac leguemaxaicpi da so'otaxaatega da la'añaxac so pa'aguenataxanaxaic. Qaq taxa da 'eesa de'era, nache ¿negue't ca ỹami' da la'añaxac nam qarapaxaguenataqui, da yaqto' ỹo'orauec na saqcha'a na'añaxacpi? Qaq qami' da qoñiỹapec da nacheñi Ñim Lo'onatac 'Enauacna da chegoqo'ot de'era na'añaxac, nache damaye ỹachaxan da qami' ỹataqta qausomiỹapec. 28Qaq Aỹem da so'orauec na saqcha'a na'añaxac leguemaxaicpi da so'otaxaatega da Saqcha'a La'añaxac Ñim Lo'onatac 'Enauacna. Qaq damaye ỹachaxan da lo'onataxanaxac Ñim Lo'onatac 'Enauacna da mashe hueta'a ne'ena.
29Cha'aye da huo'o ca huotaique da decachigui ca lma' ca ỹale maye 'añaxaic, nache iuen da hua'auñi da icoñerai' camaye. Ime, nache ishet da decachiỹa 'enauac na logoxot camaye.
30Ca saishet da Aỹem itauaatac, nache camaye Aỹem npa'agueetague'. Qataq ca saishet da Aỹem itauan da nauegueuo ca lỹa da yaqto' Aỹem ca'ategue, nache camaye 'ena'am da ilagaxattac nam huotaique da Aỹem ca'ategue.
31-32Qaq ỹoqta 'eesa da Ñim Lo'onatac 'Enauacna ỹapalaxat ca camachaqca nasouaxashet qataq 'enauac nam qauem maye qanasaqteguec. Na'aictaxa da huo'o ca qauema naua ltaxaỹaxaco da Aỹem detaqtega qalaq Ñim Lo'onatac 'Enauacna nache 'ena'am ichoxoren camaye. Qalaxaye ca sa iyacnapec So Saqcha'a Na'añaxac Qui'itta camaye qaica ca nchoxonnataguec. ¡Camaye ỹataqta qaica ca nchoxonnataguec!
Aca qo'oipaq qataq aca ala
33Aca qo'oipaq da huo'otaq no'on, nache acamaye ỹataqta no'on da alaỹaxac. Qataq aca qo'oipaq da huo'otaq qauem, qaq nataqa'en qauem da alaỹaxac. Qaq ỹoqo'oye da yaqto' qaỹaỹaten aca qo'oipaq da 'onaxai huo'otaq qauem, nache qaimeten da alaỹaxac. Qaq nache 'eetec nataqa'en ca shiỹaxaua da yaqto' qaỹauatton da 'onaxaic huo'otaq qauem, nache qaimeten nam ỹo'otpi. 34-35Nam qauapaxaguenataxañiitapeguec qami' ỹataqta qauem 'eeta'am na lshenataxanaxa na na'araxanaq. ¡Aja' ỹoqta 'eesa! Cha'aye ¿ta'ainco' taxa da qanasaqaiuec ca ỹaỹamaqchiguiñi ye qami' qauemaiqa? Cha'aye da huo'o ca no'on da lataxac, nache nataqa'en 'onaxaiqa naua la'aqtaqa, qataq ca qauemaic, nache nataqa'en ipacchigui da qauema naua la'aqtaqa. 36Qaq Aỹem ỹataqta 'eesa de'era qami' sa'aqtaxanema da que'eca na'a'q qom ivita da qanmit 'enauacna, nache 'enauac na shiỹaxauapi ỹa'axat da ta'ainco' co'ollaxa da detaxaỹa ca lỹa qalaq sa iyacnapec. 37Ñim Lo'onatac 'Enauacna nmit qome ñi 'oonolec naua ltaxaỹaxaco: Da huo'otaq 'onaxaiqa co'ollaxa naua ltaxaỹaxaco, nache qanca'alaxatec, qalaxaye da huo'otaq qauema co'ollaxa naua la'aqtaqa, nache qaỹauo'o ca nhuaxanaguec.»
Qaiỹaxaatacot So Jesús da ỹo'ot ca na'anec maye sa qaỹauanapega
38Nache huo'o nam ỹalectaigui na fariseopi qataq nam dapaxaguenataxaatapeguec na namaxasoxonaxacpi 'eetego' So Jesús, 'eeta':
–'Am Napaxaguenataxanaq, sauoqtaique da huo'o ca 'auo'ot, cam ishet da ỹa'axat da 'am lamaxashec Ñim Lo'onatac 'Enauacna.
39Nache So Jesús 'enapeco':
–Qami' maye qami' qauemaiqa, qataq saishet da qaua'amaqchiñi Ñim Lo'onatac 'Enauacna, Aỹem qauỹaxañiitacot da qami' sanema ca la'anaxat da Aỹem Lamaxashec Ñim Lo'onatac 'Enauacna. Qalaxaye nachaqrata dam qami' sanema dam huaigui co'ollaxa so la'aqtaxanaxanec Ñim Lo'onatac 'Enauacna, le'enaxat Jonás: 40Cha'aye de'era 'eetec so Jonás co'ollaq ivi' naua tres na'axa'te qataq tres pe' da huetaigui na lauel aso late'e na nỹaq, qaq nachera qome da 'eetec nataqa'en Aỹem Shiỹaxaua Llalec da ivi' caua tres na'axa'te qataq tres pe' da sootaigui ana 'alhua. 41Qaq qom ivita da qanmit 'enauacna, nache so shiỹaxauapi maye lma' ye nỹecpi ye Nínive nachaañi qome da detaqa da qami' dataỹa'agueta, yaqto' Ñim Lo'onatac 'Enauacna ỹauo'o ca qanhuaxanaguiiqui. Cha'aye se'eso shiỹaxauapi naralaxat da lataxac co'ollaq hua'axaỹa da la'aqtaxanaxac so Jonás. Qalaxaye qami' na'aictaxa da qaua'aqaitega da ỹa'aqtaxanaxac, qalaxaye saishet da qanaralaxache da qarataxaqui, na'aictaxa da ỹactec da ỹa'amaqchec saq shena'am so Jonás.
42Aso nate'e maye neta'ague da taguiñi nataqa'en nachaañi qome da detaqa da qami' dataỹa'agueta. Cha'aye asomaye chegoqta'a co'ollaxa yem ỹataqta qaỹoqta 'alhua da na'axaỹaxana dam laỹaanec so nta'a Salomón. Qalaxaye qami' saishet da qauaỹamaxayiñi da qana'axaỹaxañiỹa da ỹapaxaguenataxanaxac, na'aictaxa da ñapacalec da la'amaqchec so Salomón.
Som saqcha'a na'añaxac leguemaxaic maye ñe'eguelaxa so lma'
43Ca saqcha'a na'añaxac leguemaxaic da ivita da huo'o ca ca'ai shiỹaxaua, nache jec, coleetapeguelec ca toolec 'alhua nmittaique ca nmataqa'. 44Qaq da saishet da ỹanata cam lanataqa' nache deuennataxan, 'eeta': «Aỹem no'on da she'eguelaxa ñi ima' maye sachegoqtoigui caillaye, nache qaltaq sonaigui ñimaye.» Qaq da ñe'eguelaxa, nache ilalec da qui'itchigui, qui'itta qataq qaỹaỹamaxatta. 45Ime, nache ỹe'eguelaqtec da ỹe'eguena'alo soua lỹa't siete saqcha'a na'añaxac leguemaxaiqa maye ỹataqta napacaleguete somaye, nache taigui que'eca shiỹaxaua. ¡Huaña, nache que'eca shiỹaxaua ỹataqta ỹactec da aloic, saq 'ena'am so hua'auchiguiñi co'ollaq 'oonolec so netaigui saqcha'a na'añaxac leguemaxaic! Qaq 'era da 'eetec nataqa'en qome ca qaviyeeguet, cha'aye qami' qauemaiqa.
Aso late'e qataq soua lqaỹa't So Jesús
46Qaq So Jesús ñaq na'aqtaxaatague' se'eso shiỹaxauapi co'ollaq nvireua'a ca hueta'a Somaye aso late'e qataq soua lqaỹa't, qaq soomaye pa'atraue'c, qaq huotraique da detaxairapegue' Somaye. 47Nache huo'o so icoyeguen So Jesús, 'eeta':
–Ara 'arate'e qataq daua 'arqaỹa't daamaye pa'atraue'c. Qaq huotraique da 'am detaxairapegue'.
48Qalaxaye Somaye denataxan, 'eeta':
–¿Negue't acam ỹataqta 'eesa da ỹate'e qataq ỹaqaỹañicpi?
49Nache So Jesús ỹectoiguilo soua lapaxaguenataqa nache, 'eeta':
50'Ena nam 'eeta'am aca ỹate'e qataq ca ỹaqaỹañicpi. Cha'aye camachaqca ca ỹalaxaguet na lamaxasoxonaxacpi ñi Ita'a maye neta'ague da piguem, qaq nacheca cam ỹaqaỹañicpi qataq ỹate'e.
