Qaỹaloqnaxana so 'onataxanaxaicpi
1Da lo'onataxanaxac Ñim Lo'onatac 'Enauacna maye imattalecna, damaye 'eeta'am cam lalamaxat ca nanqa' ana uva maye 'ottauec da nte'etom da nmitaique ca lo'onataxanaxanecpi, da yaqto' nqat ana ala aso lañiguishe uva. 2Nache camaye naỹamaxate' que'eca 'onataxanaxaicpi da do'onataxaalec naqa'en añi lasheue ca 'oonolec na'a'q da do'onataxan ca ỹale. Ime, nache ỹamaxauga ca lanaxanaqa' da do'onataxan. 3Qaq co'ollaq mashe qaỹata'ague aso nala' se'eso nte'eta, nache qaltaq ỹe'eguelaxauec se'eso 'aco'. Nache somaye ilalec so laỹepi 'onataxanaxaicpi, somayepi hueta'a so nlagaqa' qaica ca lo'onatac. 4Nache 'enapega somayepi, 'eeta': «Qami' nataqa'en qanqo'oñiuga qome ye ỹanaxanqa' da qauo'onataxañi. Aỹem ỹataqta sepagaqchiichigui qome aca lasheue ca qaro'onataxanaxaqui.» Nache somayepi jec da do'onataxan. 5Qaq co'ollaq mashe na'a'q laiñi, nache qaltaq ỹe'eguelaxauec se'eso 'aco', nache qaltaq ilalec so laỹepi. Qataq so mashe dasheta aso nala', qaltaq ỹe'eguelaxauec, nache qaltaq ilalec so laỹepi. 6Qataq so mashe inoxootapiguiñi aso nala', nache qaltaq ỹe'eguelaxauga se'eso 'aco' so nlagaqa'. Nache qaltaq ilalec so laỹepi 'onataxanaxaicpi qaica ca lo'onatac. Nache 'enapega, 'eeta': «¿Ta'ainco' ye qoviita'a ne'ena na'axalom, qaica ca qauo'oche?»
7Nache somayepi 'enapeco': «¡Cha'aye qaica ca qomi' ỹo'onataxanaxa'n!»
Nache se'eso 'aco' 'enapeco': «Qami' nataqa'en qanqo'oñiuga qome ye ỹanaxanqa' da qauo'onataxañi.»
8Qaq co'ollaq mashe pe, nache se'eso 'aco' 'enapega som ilotague' de'era lo'onataxanaxac, 'eeta': «'Auỹaxaneuga ca ỹo'onataxanaxanecpi. Ime, qaq 'ausheeten, 'aua'auaxaachiguiñi qome da 'ausheeten cam pa'atec da do'onataxan, choche ivitta'a 'anqa'en nam hua'auchiguiñi da do'onataxan.»
9Ime, nache anac som do'onataxanpi co'ollaq mashe inoxootapiguiñi aso nala'. Nache ñi 'oonolec somayepi ỹaconeguet aso lasheue ye 'oonolec na'a'q da qaisheeten da lo'onataxanaxac ca ỹale. 10Qaq co'ollaq mashe iviteuga som la'auaxanecpi da do'onataxan, nache somayepi ipi'itaxano' da huo'otaq ỹactec qanqoỹen aca nsheetenaqte. Qalaxaye nataqa'en somayepi ỹaconeguet aso lasheue ye 'oonolec na'a'q da qaisheeten da lo'onataxanaxac ca ỹale. 11Qaq co'ollaq ỹaconeguet aso nsheetenaqte, nache se'eso 'onataxanaxaicpi denoỹa so na'aco'. Nache qauem na ỹasaxalec la'aqtacpi, 12nache qoỹeetega so 'aco': «Se'eso pa'atecpi da do'onataxan so mashe inoxootañi aso nala', somayepi nache 'ena'am 'anqa'en da qansheetenaguec qomi' maye so'onataxanaqtac so na'axalom, ñeque'eenaqtapigui so ntap. Qaq de'era saishet da ỹaỹamaxañi.»
13Qalaxaye se'eso 'aco' 'enapega so 'oonolec somayepi, 'eeta': «¡Ñaq aỹem 'ana'axaỹaxana 'am ñauochaxaua! Aỹem saishet da huo'o ca 'am so'otec saỹaỹamaxañi. 'Antoueeta'actaxa da qomi' co'ollaxa, ñaỹaanaqchigui da 'am 'auo'onataxaalec añi lasheue ca 'onataxanaxaic ye 'oonolec na'a'q. 14Qaq ỹoqo'oye 'am no'on da 'auaconeguet ana 'arasheue, ime, qaq qojec. De'era saishet da 'atapegueua'a, cha'aye aỹem ñeshetaique nataqa'en da 'eeta'am aso 'ansheetenaqte aca sanem som do'onataxanpi co'ollaq inoxootañi aso nala'. 15Cha'aye aỹem maiche soiqueetac ana aỹom cam sataxaateuga. ¿Ta'ainco' ye aỹem 'anquiỹatega souaxat da aỹem choxonnataxanaxaic?»
16Qaq dam pa'atec la'aqtac So Jesús, 'eeta': «Nache 'eetec nagui nam hua'auchiguiñi qalaq pa'atec; qaq nam pa'atec nagui qalaq nachena nam hua'auchiguiñi.»
So Jesús qaltaq ỹa'axata'a da l-leuaxa
17Qaq So Jesús co'ollaq mashe tata'ague da Jerusalén, nache co'ollaq huangui so nqa'aic, nache ỹataxana't soua lapaxaguenataqa. Nache 'enapegalo, 'eeta':
18«Qami' qauaỹachiñi nagui da qomi' saqta'ague da Jerusalén. Qaq huaña qome yemaye, nache Aỹem Shiỹaxaua Llalec Aỹem qoỹaneua'a nam lataxala'pi na ltaxaỹaxanaxanecpi na shiỹaxauapi da qaitaxaỹapegue' Ñim Lo'onatac 'Enauacna qataq nam dapaxaguenataxaatapeguec na namaxasoxonaxacpi. Qaq nachena namayepi nam la'aqtac qome da Aỹem qaỹalauat, 19qataq Aỹem ỹaneua'a nam ỹaqa'a ca chegaqa'ague, da yaqto' Aỹem ỹe'en, qataq Aỹem iuaxaatac, ime, qaq Aỹem ỹalauat Aỹem iuaxaata'aguet ca ñepe'enaxaqui. Qalaxaye qom mashe inoxoore'c caua tres na'axa'te, nache qaltaq ñeca'alec.»
Dam iỹaxanaique aso late'e' soua Santiago qataq so Juan
20-21Qaq dos co'ollaxa soua napaxaguenataqa, Santiago qataq Juan nnaicapegueto aso late'e da nqo'ooreua'a So Jesús. Qaq co'ollaq ivildeua'a Somaye, nache aso late'e' soomaye ỹa'aldoto naua l-llectel So Jesús da nachoxonnot, nache So Jesús inat asomaye, 'eeta':
–¿Negue't cam qonetapeguec?
Nache asomaye 'eeta':
–Aỹem 'anqouaguec, da qom ivita ca laloqo' da 'anso'ongui aca 'anso'onaxaqui da 'am Nta'a, nache ne'enaua ỹalqa qome 'oonolec ca neta'ague da 'oic, qaq ca lỹa qalaq neta'ague da 'ane'emaq.
22Nache So Jesús 'enapeco':
–Qami' saishet da qauaỹaañi dam qauỹaxañiitapegueua'a. ¿Qami' lhuotte' peta'a da qanque'etaxañiigui na qauemsat maye Aỹem talec qome?
Nache soomaye 'ena'apo':
–Aja', seshetaq.
23Nache So Jesús 'enapeco':
–Aja', 'eesa qami' da qalota qome da qanque'eenaxaqui qoñiỹa'am Aỹem. Qalaxaye 'oonolec Ñim Ita'a maye ỹan ca la'aqtac da ỹanem da la'amaqchec cam taalec da ỹami'. Qaq de'era saishet da nache Aỹem da san ca ỹa'aqtac.
24Qaq soua lỹa't diez lapaxaguenataqa co'ollaq noma de'era, nache soomaye ỹataqta dalemataỹalo se'esoua dos nqaỹa't Santiago qataq Juan. 25Nache So Jesús iỹaxanalo 'enauaque soomaye, nache 'enapegalo, 'eeta':
«Ana 'alhua qauaỹaañita da lataxac na nataxala'pi maye saq judiopi maye ilotague' na shiỹaxauapi, saishet da huo'o ca ỹashenem da huo'o ca ỹo'ot da huo'otaq saishet da qaisoxon namayepi. Nataqa'en na nataxala'pi maye ỹo'oxoraicpi na 'alhuapi ỹataqta ỹachelec da la'añaxac ñi 'oonolec nam hueta'a que'eca 'alhua.
26Qalaxaye da qoñiita, saishet qome da qoñiitec de'era, nachaqrata da huo'o ca nshetaique da 'amaqtaqaic, nache camaye iuen da huapegue' na laỹepi. 27Qataq ca 'oonolec da qoñiita da nshetaique da la'auaxanec, qalaq camaye nacheca ca lamaxashec na laỹepi. 28Aỹem Shiỹaxaua Llalec, nache ỹataxac de'era, sa ñanaỹa ana 'alhua da yaqto' Aỹem qanhualaxaueetapegue', nachaqrata da Aỹem ñeualaxaueetac qataq ñanac da sesoueeguesop na lasouaxashetpi na shiỹaxauapi qataq san da ñachaalataxac da lasheue damaye.»
So Jesús natare'n soua dos qanamaiqa
29Qaq co'ollaq ca'ai ye Jericó So Jesús lỹata'ape soua lapaxaguenataqa, nache ỹataqta qalota so shiỹaxauapi ca'attague' Somaye. 30Qaq huo'oi soua dos qanamaiqa nso'ootrañi, netraua'a na laỹe so nqa'aic. Qaq soomaye co'ollaq hua'axairapegue' So Jesús da nateuga se'eso huetra'a, nache soomaye ỹa'ala'q, 'eetra':
«¡'Am Qarataxala' maye 'am Lca'aguishec Ñim Lo'onatac 'Enauacna, qomi' 'auchoxore'n, qataq qomi' 'autaua'n!»
31Qaq so shiỹaxauapi nlaqtegalo soomaye da yaqto' ỹe'emaqte'. Qalaxaye soomaye qaltaq nquigaxattre'c da la'alaxa'c, 'eetra':
«¡'Am Qarataxala' maye 'am Lca'aguishec Ñim Lo'onatac 'Enauacna, qomi' 'auchoxore'n, qataq qomi' 'autaua'n!»
32Nache So Jesús vi'iiguet, nache iỹaxanalo se'esoua qanamaiqa. Nache inatta'ape, 'eeta':
–¿Negue't ca qansheetaique da qami' so'oteque?
33Nache soomaye 'ena'apo':
–'Am Qarataxala', qomye sauoqtaique da ỹoltaq ỹe'eguelaxa da ñauanaxañi.
34Nache So Jesús ỹataqta huo'o da lchoxonnataxanaxa soomaye, nache ipoteua'alo naua la'ai'te. Nache saqaỹaloq da soua qanamaiqa qaltaq ỹe'eguelaxa da qaltaq nauaayiñi, ime nache ca'atregue So Jesús.
