Qaỹaloqnaxanalo soua diez qa'añole
1De'era lo'onataxanaxac Ñim Lo'onatac 'Enauacna, damaye 'eeta'am da 'eetec se'eso pe co'ollaq huo'o so naronaxac. Nache huo'oi soua diez qa'añole ỹaconalo soua lcoỹaraxanaxaqui' maye lca'atoxo't na aceite. Nache huaqatra'aguet ca auonaxaua. 2Qaq cinco soomaye soua sa naỹamaxata'ape, qataq cinco soua naỹamaxatte'. 3Qaq se'esoua cinco maye saishet da naỹamaxata'ape qaica ca lqataxanata'c aceite da ivita da imeuo so le'ec soua lcoỹaraxanaxaqui'. 4Qalaxaye soua lỹa't cinco maye naỹamaxatte', soomaye ỹacheta'ape so lqataxanata'c aceite, yaqto' da ivita da imeuo na le'ec aso lcoỹaraxanaxaqui', nache qaltaq icoyingui.
5Qaq cha'aye ỹataqta qaỹaloqteguet se'eso auonaxaua, nache se'esoua diez qa'añole soomaye huo'o na lo'ochaqa' nache do'oche'. 6Qaq co'ollaq mashe laiñi so pe, nache qaỹa'axaỹa so nỹaxanaxac, 'eeta': «¡Mashe nvi' na auonaxaua, ña qampa'aiuec, qauqachiỹa'aguet!»
7Nache 'enauaque se'esoua qa'añel ñiyishegue'm, nache ỹaỹamaxaayiñi soua lcoỹaraxanaxaqui'. 8Nache soua cinco maye sa naỹamaxata'ape, 'eetegalo' soua lỹa't maye naỹamaxatte', 'eeta': «Ñaq qomi' qaỹa'añima ca laỹe na qarcoỹaraxanaxache maye qanacheetac. Ten, mashe huotaique da 'o'm naua qarcoỹaraxanaxaqui'.»
9Qalaxaye soua cinco qa'añole maye naỹamaxatte' 'ena'apo': «Saishet. Ten, saq 'amaqtaq na ñachoqtac aceite, 'onaxaic da qanqo'oñiỹa cam imeetac, nache qausheenaxañiỹa cam qarcoỹaraxanaxache.»
10Qalaxaye co'ollaq se'esoua cinco qa'añole maye qaica ca naỹamaxataxa'c, co'ollaq je'c da desheenaxaraique ca lcoỹaraxanaxa't, nache nvi' so auonaxaua. Nache soua qa'añel maye lhuotte' lỹatreuo somaye da pa'areua'a ca naronaxac. Qaq ime, nache qaỹapogui so lasom. 11Qaq co'ollaq qaỹata'ague, nache nvildeuo soua cinco maye sa naỹamaxata'ape, nache ila'a so lasom da mashe napochigui nache deỹaxaata'ape, 'eeta': «¡'Am Qarataxala'! ¡'Am Qarataxala'! Ña qomi' 'auauategueta.»
12Qalaxaye so auonaxaua 'enapeco': «Aque', qami' sa sauatto'n.»
13Nache So Jesús 'enapeco':
–Ỹoqo'oye qami' maye qami' ỹapaxaguenataqa, iuen, da nache 'eetai' da qanloitec, cha'aye saishet da qauaỹaañi ca na'a'q qataq ca laloqo' da Aỹem ñe'eguelaq.
Qaỹaloqnaxana aso anom maye huo'oi soua qaipataxagueta
14De'era lo'onataxanaxac Ñim Lo'onatac 'Enauacna, damaye 'eeta'am da 'eetec co'ollaxa so ỹale da huo'o da lhuennataxac da qaỹoqtegue ca taigue. Nache iỹaxaneugalo soua lamaxa'she, nache ipataxaleguete aso alom da iloregue.
15Qaq se'eso ỹale ỹataqta ỹaỹateeta ca ỹo'ot ñi 'oonolec soomaye. Ỹoqo'oye so 'oonolec soomaye ỹanem aso cinco mil anom lcat, qaq so lỹa qalaq ỹanem aso dos mil, qataq so lỹa ỹanem aso mil. Ime, nache jec.
16Nache so namaxashec maye ỹaconeguet aso cinco mil anom, somaye do'onataxangui asa'aso anom da nmen. Nache ivi' cinco mil aso laỹe laueque. 17Qaq nache 'eetec nataqa'en som ỹaconeguet asom dos mil anom, somaye ivi' dos mil aso laỹe laueque. 18Qalaxaye som ỹaconeguet aso mil anom, somaye jec nache ỹoxooñi aso alom so na'aco', ỹoxotoigui na 'alhua.
19Qaq co'ollaq mashe qaỹoqteguelo soua vi'iye, nache ñe'eguelaq se'eso ỹale. Nache somaye huotaique da naloqna't da lo'onataxanaxa'c soua lamaxa'she. 20Nache nvireuo som ỹaconeguet co'ollaxa aso cinco mil anom, nache ỹaneuo asomaye lỹateuo naqa'en aso laỹe cinco mil nache, 'eeta': «'Am ỹataxala', aỹem 'aỹa'anem co'ollaxa aso cinco mil 'om. Qaq nagui 'ana ana laỹe cinco mil maye ỹaueque.»
21Nache so ỹale 'enapeco': «¡Ỹataqta 'am ỹo'oxoraq! Cha'aye 'am no'on namaxashec, qataq ishet da 'am qaipi'iỹa'a. Cha'aye 'am ỹataqta 'antela'a som saq 'amaqtaq maye 'am sami', qaq nagui aỹem 'am sepataxalec cam ỹactec da llo'oxoyec. Qaq nagui, nache no'on da sauoqo'o ca qayo'oxonnataxanaxac.»
22Ime, nache qaltaq nvireuo so namaxashec maye ỹaconeguet co'ollaxa aso dos mil anom, nache 'enapeco': «'Am ỹataxala', aỹem 'aỹa'anem co'ollaxa aso dos mil aso 'om. Qaq nagui 'ana ana lỹa dos mil maye ỹaueque.»
23Nache se'eso ỹale 'enapeco': «¡Ỹataqta 'am ỹo'oxoraq! Cha'aye 'am no'on namaxashec, qataq ishet da 'am qaipi'iỹa'a. Cha'aye 'am ỹataqta 'antela'a som saq 'amaqtaq maye 'am sami', qaq nagui aỹem 'am sepataxalec cam ỹactec da llo'oxoyec. Qaq nagui, nache no'on da sauoqo'o ca qayo'oxonnataxanaxac.»
24Qaq pa'atec co'ollaxa nache nvireuo so namaxashec maye ỹaconeguet aso mil anom nache, 'eeta': «'Am ỹataxala', aỹem saỹaten da ỹataqta 'am qaramchigui, qataq ivira'a da 'auỹaxaneua'a ca ỹataqta huo'o da lqalaic. 25Qaq ỹoqo'oye aỹem huo'o da icolanaxa, nache aỹem soxooñi ana 'om soxotoigui na 'alhua, qalaxaye 'ana ana mil maye 'om, 'am she'eguelaxatem anamaye ỹataqta nalota't.»
26Nache se'eso ỹale 'enapeco': «'Am namaxashec qauemaic qataq hualaic, cha'aye 'auaỹaten da aỹem qaramchigui, 27qalaq ¿ta'ainco' co'ollaxa da saq 'aroua'a añi laỹe' ana anom anamaye? Yaqto' naguictaxa da ñevi', nache ishettaxa da saconeguet ana aỹom qataq aca laueque.»
28Nache se'eso ỹale 'enapega som ltauapi, 'eeta': «Ña qauacoñiỹa qome aram mil anom maye hueto'ot damaye. Ime, qaq qaỹa'añim dam hueto'ot aram diez mil. 29Cha'aye cam qalota ca hueto'ot, qalaq camaye qanquigaxattec ca qoỹanem, nache ỹataqta qaica ca iueetac, qalaxaye cam qaica ca hueto'ot, qalaq camaye ivira'a cam saq 'amaqtaqolec maye hueto'ot qaỹacona. 30Qaq de'era namaxashec maye qaica ca taiguet, damaye qauo'oyiỹauga na napalaxa, huaña qome, nache ỹataqta ỹaguec da lcolanaxa, nache nỹeetac qataq ỹataqta inaga't naua lhue da nqui'ic.»
Qom qanmit 'enauacna
31Qaq Aỹem Shiỹaxaua Llalec qom ivita da ñe'eguelaq, nache ca iviraxac 'eeta'am da lviraxac ca nta'a 'añaxaic, Aỹem coleesop na ỹamaxashecpi nache ñeso'ongui aca ñeso'onaxaqui da Aỹem Nta'a. 32Qaq 'enauac nam ỹotta'a't shiỹaxauapi maye netalec ana 'alhua, anac da nachaateua'a Aỹem, nache seỹotauga na qauem da lataxac da saishet da ỹalectaigui ñaqa'en nam no'on da lataxac, 'eeta'am ca ilotague' ana qagueta da iỹotauga ana quetaq da saishet da ỹalecta'aguet naqa'en anamayepi. 33Nache sepa'axanegue da aỹoic na no'on da lataxac, qaq na qauem da lataxac qalaq sepa'axanegue da ñe'emaq. 34Nache Aỹem maye Aỹem Nta'a shenapega nam no'on da lataxac, sheeta': «¡Ñi Ita'a qami' taaleguete da lqouagaxanaqtaic! ¡Qauanaqui, qaualliquiiua'a da lo'onataxanaxac ñi Ita'a maye, nache 'eetai' da iqataxaatapigui' co'ollaq saxanaxa da ỹo'ot ana 'alhua! 35Cha'aye co'ollaq huo'o na iqouaxa, qalaq Aỹem qaỹa'añim so anoq, qataq co'ollaq huo'o na ỹaquip qalaq Aỹem qaỹa'añim so ỹaquip, qataq co'ollaq sheca'ai ye ỹalamaxat ima', nache qami' Aỹem qauacoñiiguet, 36qataq co'ollaq qaica ca ñapogoña, qalaq qami' Aỹem qaỹa'añim, qataq co'ollaq Aỹem saq no'on, nache Aỹem qanamaqaitegueua'a, qataq co'ollaq sootaigui añi ncoñetaxanaxaqui qalaq Aỹem qanqo'oñiiua'a da yaqto' Aỹem qanauañi'.»
37Nache nam no'on da lataxac Aỹem inat, 'eeta': «'Am Qarataxala', ¿ca hua'ague co'ollaxa da 'am seloqta'a da 'auqouat, nache 'am samiaxai' ca 'oq? Qataq ¿lagui co'ollaxa da ỹaguec na 'araquip, nache 'am samiaxai' ca 'etaxat da yaqto' 'anỹomgui? 38Qataq ¿huo'o ca huaña co'ollaxa da qoca'ai ye ỹoqta 'aralamaxat 'arma', ime nache 'am saconaxaguet da huaña ca qaralamaxat qarma', qataq co'ollaxa da 'am seloqta'a da qaica ca 'aỹa'aañi, qalaq 'am sanaxam ca 'ogoxot? 39Qomi' saishet da ñetoonaxac da huo'o co'ollaxa ca huaña da 'am sa no'on, huo'otaq da qonetaigui añi ncoñetaxanaxaqui, ime, nache 'am ñamaxasoqtegueua'a.»
40Qaq Aỹem maye Aỹem Nta'a, sheeta': «Dam qauo'ochec na shiỹaxauapi maye qaica ca la'amaqchec ana 'alhua, qataq nam samata'ac da ỹataqta ỹaqaỹañicpi, nache damaye 'eeta'am da nache Aỹem da Aỹem qauo'ochec.»
41Ime, nache shenapega na qauem da lataxac, sheeta': «¡Aỹem qoquiỹa'ai! Cha'aye Ñim Lo'onatac 'Enauacna 'oonolec da iqataxaatapigui' qauem maye qami' taleguete. Qanqo'oñiuga yem chochaq tatec norec maye iqataxaatai' Ñim Lo'onatac 'Enauacna, da yaqto' ỹasaxangui so pa'aguenataxanaxaic qataq nam lamaxashecpi. 42Cha'aye co'ollaq huo'o na iqouaxa, qalaq qami' saishet da Aỹem qaỹa'añim ca anoq, qataq co'ollaq huo'o na ỹaquip, qalaq qami' saishet da Aỹem qanỹomaxañi, 43qataq co'ollaq sheca'ai ye ỹalamaxat ima', nache qami' saishet da Aỹem qauacoñiiguet da huaña ca qarmaye, qataq co'ollaq qaica ca ñapogoña qalaq qami' saishet da Aỹem qaỹa'añim ca ỹogoxot, qataq co'ollaq Aỹem sa no'on qataq sootaigui añi ncoñetaxanaxaqui qalaq saishet da Aỹem qanqo'oñiiua'a da yaqto' Aỹem qanauañi'.»
44Nache namayepi 'enapec qome: «'Am Qarataxala', sa ỹauano' da 'am seloqta'a da 'auqouat, qataq da ỹaguec na 'araquip. Qataq saishet da sa'axasoqtapeguelec da huo'o ca huaña da qoca'ai ye 'aralamaxat 'arma', qataq saishet da 'am seloqta'a da qaica ca 'aỹa'aañi. Nataqa'en saishet da sa'axasoqtapeguelec da 'am sa no'on huo'otaq da qonetaigui añi ncoñetaxanaxaqui. Ỹoqo'oye saishet da 'am setauanaq.»
45Nache Aỹem sheeta': «Qaq cha'aye qami' ye sa qautauañi nam shiỹaxauapi maye qaica ca la'amaqchec ana 'alhua, qaq ỹoqo'oye Aỹem shenapec da nataqa'en saishet da Aỹem qautauañi.»
46Ne'ena shiỹaxauapi maye qauemaicpi ỹaconeguet ca nhuaxanaguec maye saishet da huo'o ca loga't, qalaxaye nam ỹalaxaguet Ñim Lo'onatac 'Enauacna, ỹaconeguet ca nca'alaxa maye chochaq tatec.
