Da qoỹoxottañi ỹamaxataxac da qaỹaconeua'a So Jesús
1Qaq So Jesús co'ollaq imat da lapaxaguenataxanaxac, nache 'enapegalo soua lapaxaguenataqa, 'eeta':
2«Qami' qauaỹaañi da qom inoxoore'c ne'enaua dos na'axa'te, nache nnoxoneuo ca Lapascua. Nache huaigui qome da Aỹem Shiỹaxaua Llalec Aỹem qaỹaconeua'a, qataq Aỹem qaỹalauat Aỹem qaiuaxaata'aguet ca ñepe'enaxaqui.»
3Nache se'eso na'a'q nam lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq nam lataxala'pi na judiopi dataỹa't, huaña ca lma' so lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna, le'enaxat Caifás. 4'Enauac somayepi naỹaana't da yaqto' huo'o ca qaỹe'eguenec So Jesús da chegoqchigui qanqa'en da qaỹauo'o ca lasouaxashet, nache qaỹaconeua'a qataq qaỹalauat. 5Qalaxaye somayepi huo'o na 'eeta' da la'aqtac:
«Saishet qome da huetoigui ñaqa'enaq naua na'axa'te maye naponaxaqui', yaqto' na shiỹaxauapi saishet da qomi' dalemataỹalo qataq saishet da lliỹa't namayepi.»
Aso 'alo maye icorelec so coraxat So Jesús
6So Jesús hueta'a ye nỹecpi le'enaxat Betania, hueta'a ye lma' so Simón maye nchega na lo'oc co'ollaxa. 7Qaq co'ollaq ñaq deque'etac So Jesús, nache nvireuo aso 'alo nachetac so coraxat maye ỹataqta qaỹoqteua'a da qaisheenaxana. Nache nquigueua'a Somaye, nache icorelec na lqaic so coraxat.
8Nache soua lapaxaguenataqa co'ollaq ỹauaachiguilo de'era, nache dalematai'. Nache ỹauo'o da la'aqta'c, 'eetra':
–¡Ỹataqta choche qaỹe'en dattaxa coraxat! 9Cha'aye de'era coraxat ishettaxa da qaimen, nache aca lasheue ishet da setaunaxanaqot da setauanaq na qalota choxoraqpi.
10Nache So Jesús hua'aqchigui de'era, nache sa naỹaloxon da 'eeta' da la'aqtac:
–Saishet da qoquiiteguelec ana'ana 'alo. Cha'aye de'era ỹo'ot anamaye, ỹachegoxotchigui da lta'araic lauotaxanaqtaic Aỹem. 11Cha'aye nache 'eetai' da huo'o na choxoraqpi da qaualliquiita'aguet, qalaxaye Aỹem saishet da nache 'eetai' qome da qami' soota'agueta. 12Ana'ana 'alo icorelec so coraxat na iqaic, qalaxaye saishet da ỹaỹaten da ỹaỹamaxattapiguiñi da ỹo'ocỹaxac maye taỹa'a da qailareñi. 13Qaq ỹataqta 'eesa de'era qami' sa'aqtaxanema, de'era ỹo'ot ana'ana 'alo nache 'eetai' qome da qaiuennatega 'enauaque naua 'aleu', maye huaña da qaỹa'axat da no'on na'axaỹaxac maye ỹa'axat Ñim Lo'onatac 'Enauacna.
So Judas ỹaneuo So Jesús
14Qaq nacheso se'eso na'a'q da so Judas Iscariote, som 'oonolec soua doce lapaxaguenataqa So Jesús, jec da detaxaỹapegue' som lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna. 15Nache 'enapego' somayepi, 'eeta':
«¿Chaq negue't aca lasheue da yaqto' qami' setaua'n da saconeua'a So Jesús?»
Nache somayepi ỹachaxanapecot somaye aso treinta anom lcatpiole maye chegaqaigui na lcat le'enaxat plata. 16Huaña, nache se'eso na'a'q so Judas nmittaique ca lataxac maye ỹaỹamaqchiguiñi da ỹaneuo So Jesús.
Da nquia'axac maye saishet da qaicoua'ai
17Qaq som la'auaxanec na'a'q se'eso naponaxac maye huetoigui da qanallec ana nauole 'ayiiña maye sa qaỹauo'o ana lalecte maye ỹasheeraxachigui, nache soua lapaxaguenataqa So Jesús inattrac Somaye, 'eetra':
–¿Chaq hua'ague ca 'anshetaique da huaña, da yaqto' seqataxanaqai' ca 'arquia'axac da nvireuo na Lapascua?
18Nache So Jesús 'enapeco':
–Qanqo'oñiiua'a qome ye nỹecpi, nache qanmichiỹaique ca lma' ca qanauochaxaua maye qarauattonataqui, nache qaỹa'añim de'era ỹa'aqtac: «Ñim Qanapaxaguenaxala' 'eeta': mashe saqaỹapeque da ivita da seleu; ỹoqo'oye sauotaique da huaña na 'arma' da sequi'iỹa'a'isalo naua ỹapaxaguenataqa da sacheguenaq cam nallec na na'a'q Lapascua.»
19Qaq soua lapaxaguenataqa je'c nache ỹaỹamaxaayiñi 'enauac so nallec, ipagaqchiichigui dam damaxasoxoolec So Jesús.
20Qaq co'ollaq mashe napalchiguiñi, nache So Jesús qataq soua lapaxaguenataqa co'ollaq ñaq deque'eta'ape, 21nache Somaye 'enapeco':
–Huo'o ñi 'oonolec da qoñiita ñi Aỹem ỹaneua'a qome nam Aỹem ipa'agueetacpi.
22Nache soua lapaxaguenataqa ỹataqta daquicote', huaña, nache ñi 'oonolec inattac Somaye, 'eeta':
–'Am Qarataxala', ¿peta'a nachaỹem?
23Nache So Jesús 'enapeco':
–Ñim ỹauoltenaxanaxaua ne'ena iquia'axaqui, nacheñi qome ñim Aỹem ỹaneuo. 24Ana nere maye huetalec na la'aqtacpi Ñim Lo'onatac 'Enauacna ỹataqta ỹataqtegue da la'aqtaxanaxac da ỹa'axattac Aỹem maye Aỹem Shiỹaxaua Llalec da iuen da seleu. Qalaxaye ỹataqta qauem da talec qome ñim Aỹem ỹaneuo. ¡Ỹataqta 'onaxaictoxo' co'ollaxa da saishet da nañiguiñi ñimaye!
25Nache so Judas, maye nacheso so ỹaneuo co'ollaxa So Jesús, nataqa'en denataxano', 'eeta':
–'Am Napaxaguenataxanaq, ¿peta'a nachaỹem?
Nache So Jesús 'enapeco':
–Aja', nache 'am.
26Qaq co'ollaq ña deque'eta'ape, nache So Jesús ỹacona aso nauole 'ayiiña, nache ỹanot da na'achec Ñim Lo'onatac 'Enauacna. Ime, nache ncolaxaañi aso nauole qataq ỹanema soua lapaxaguenataqa nache, 'eeta':
«Qauacoñiiguet qataq qolliqui ana'ana, anamaye nachera da ỹo'ocỹaxac.»
27Qaq co'ollaq ime, nache ỹacona aso ỹomaxaqui nlaqchigui na lataxa, nache ỹanot da na'achec Ñim Lo'onatac 'Enauacna. Ime, nache ỹanema soua lapaxaguenataqa nache, 'eeta':
«Qanỹomiigui qome ne'ena lataxa 'enauac da qoñiita. 28Cha'aye nachenaua naua maiche itago'q qataq chegoqchiguilo naamaye da Ñim Lo'onatac 'Enauacna naỹamaxate' 'enauac da qoñiita. Ne'enaua itago'q chegoqchiguilo da qaỹapalaxat na qalota lasouaxashet na shiỹaxauapi. 29Qaq ne'ena na'a'q, nachena na pa'atec da ñeỹomgui ne'ena lataxa da qami' ñeỹomaxau'. Qalaxaye qom qaltaq salegaqta'a't da souaqtaigui da lo'onataxanaxac Ñim Ita'a, huaña nache ñeỹomaxagui ca dalaxaic lataxa.»
30Qaq co'ollaq ime, nache do'onaxaata'ape, ime nache taresheguemec aso qaỹoqotcheguemec 'alhua maye nanqa' ana Olivo.
So Pedro ỹan da la'aqtac da saishet da ỹalat So Jesús
31Qaq co'ollaq ivildesheguemec aso qaỹoqotcheguemec 'alhua maye nanqa' ana Olivo, nache So Jesús 'enapegalo soua lapaxaguenataqa, 'eeta':
–Ne'ena pe qami' deqat da qarpi'iỹaxaqui Aỹem. Cha'aye ana nere maye huetalec na la'aqtacpi Ñim Lo'onatac 'Enauacna, 'eeta':
«Salauat qome ñim ilotague' ana qagueta
nache ana qaguetapi qome nlagaxattac.»
32Qalaxaye qom Aỹem ỹe'eguelaxatem da ica'alaxa Ñim Lo'onatac 'Enauacna, nache Aỹem sa'auta'ague qome da Galilea.
33Nache so Pedro 'enapeco':
–Na'aictaxa da 'enauac 'am qaỹalata'a't, qalaxaye aỹem saishet da 'am salat.
34Nache So Jesús 'enapeco':
–Pedro, 'am saishet da 'eesa de'era 'ara'aqtac; cha'aye qom yaqta'a da nỹen ca 'olgaxa, qaq mashe tres qome da 'avi'eguelaxalec da qonetega Aỹem sa 'auauatton.
35Nache so Pedro 'enapeco':
–Na'aictaxa da 'am seleetañi', qalaxaye saishet qome da sheetega da 'am sa sauatton.
Nache 'enauaque soua lỹa't napaxaguenataqa ỹe'enaxatchigui da la'aqtac somaye.
So Jesús nqouagaxaueetac souaxat da laquicoxo
36Qaq co'ollaq ime, nache So Jesús qataq soua lapaxaguenataqa je'c da nqo'oora ye 'alhua le'enaxat Getsemaní, huaña nache 'enapegalo soomaye, 'eeta': «Qoviỹa'a ne'ena, Aỹem, qalaq saicra'atai' da ñeqouagaxauen.»
37Nache So Jesús ỹauec so Pedro, Santiago qataq so Juan da nnaicapegueto. Huaña, nache ỹataqta nomteguet da lta'araic laquicoxo, 38nache 'enapegalo' soomaye, 'eeta': «Aỹem ỹataqta ỹaguec da ỹaquicoxo, qataq ñanomteguet da saỹa'a da seleu, qoviita'a qome ne'ena, qataq saishet qome da qauo'oche.»
39Nache So Jesús taỹa ca qaỹata'a soomaye, nache ỹa'alyiñi naua l-llectel qataq iviraxata'aguet na latap na 'alhua, nache nqouagaxaunot Ñim Lo'onatac 'Enauacna, 'eeta': «'Am Ita'a, ¡ỹataqta huo'o da iyaxa da Aỹem 'antelaqna'aguet de'era que'eenaxac! Qalaxaye saishet da ipacchigui qome da maiche sheetapeguec, nachaqrata dam maiche qonetapeguec.»
40Ime, nache So Jesús nqo'ona ca huetra'a soua tres lapaxaguenataqa, nache ilaleguete soomaye da do'ochete'. Nache 'enapega so Pedro, 'eeta': «¿Saisheto' peta'a da qauañoxoche da cara'ac qanloitauec da qoñiita'am Aỹem? 41Saishet qome da qauo'oche, nachaqrata da qanqouagaxauñi, yaqto' ishet da qauataiỹa'aguet da qañe'eguenataguiiqui maye nayeetai'. Qami' ỹataqta qami' lhuotte' da qauo'oche ca ỹaỹamaqchiguiñi, qalaxaye saishet da qauañoxoche da qauroilec da maiche qara'añaxaqui.»
42Nache So Jesús qaltaq ỹe'eguelaq da qaltaq nqouagaxauen nache, 'eeta':
–'Am Ita'a, da sepaca'aguet de'era ñeque'eenaxac, nache Aỹem ỹataqta Aỹem lhuotta da 'am salaxaguet.
43Ime, nache So Jesús qaltaq ỹe'eguelaxa ca huetra'a soua tres lapaxaguenataqa, nache qaltaq ilaleguete da do'ochete', cha'aye soomaye ỹataqta nasamyiñi. 44Nache qaltaq ca'aisalo soomaye, nache qaltaq ỹe'eguelaxai' da nqouagaxauen, qaq huaña nache tres da ỹe'eguelaxalec da nache 'eetec de'era, qataq ỹe'eguelaxattalec da la'aqtac maye nasaxauec co'ollaq cheta'ague da nqouagaxauen. 45Ime, nache So Jesús qaltaq ỹe'eguelaxa ca huetra'a soua tres lapaxaguenataqa, nache 'enapegalo, 'eeta': «¿Ñaq qoquiito'ot da qanmacheeteguec qataq da qaro'ochaqai? Mashe anacta na 'etaxaloxoicpi da Aỹem ỹaconeua'a, Aỹem Shiỹaxaua Llalec. 46¡Qoñiisheguem qome, qolaq, mashe nvi' nam Aỹem ỹaneuo!»
So Jesús qaỹaconeua'a da qaicoñe'
47Qaq co'ollaq ñaq detaqtac So Jesús, nache nvi' so Judas, som 'oonolec soua doce lapaxaguenataqa. Qaq somaye ỹataqta qalota so nnaictague' ỹalleppi na'atchigui na lainec qataq na npon 'epaq. Somayepi nache lamaxashecpi som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq nam nqueroxonecpi maye lataxala' na judiopi. 48Qaq so Judas mashe ỹauo'o da la'aqtac co'ollaxa, 'eeta': «Ca ñapigoxoi' qome, qaq nacheca ca Jesús; ¡qauacoñiiua'a qome nache qaucoñiye!»
49Nache so Judas nquicot So Jesús, nache iquin, 'eeta':
–¡La', 'am Napaxaguenataxanaq!
Nache napigoxoi'.
50Nache So Jesús 'enapego':
–'Am ñauochaxaua, cha'aye mashe qonetaina'a, qaq no'on da ñaq 'auỹalaxatapeguec da 'auo'ot cam huotaique da 'auo'ot.
Nache so ỹalleppi ỹaconeua'a So Jesús da icoñerai'. 51Huaña, nache so 'oonolec soua lỹa't So Jesús, somaye nqatsheguem so lainec. Nache iquesoxouec aso ltela lỹa so lamaxashec so lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna. 52Qalaxaye So Jesús 'enapega somaye, 'eeta':
«'Oxot na 'ainec, cha'aye ca dalaataxana ca ỹeelonec, nache camaye qaira'a nataqa'en ca ỹeelonec da qaỹalauat. 53¿Sa qauaỹachiñiỹo' da Aỹem ishet da seỹaxanot ñi Ita'a da Aỹem itauan, qaq Ñimaye ishet da Aỹem namaxa ca napacalec ca setenta mil maye lamaxashecpi? 54Qalaxaye ñaq 'aua'axaỹa'a damaye yaqto' ipacchigui, cha'aye da nache 'eetec de'era, nache ỹataqta ipacchigui dam 'enapec naua nanettralec ana nere maye huetalec na la'aqtacpi Ñim Lo'onatac 'Enauacna.»
55Nache So Jesús dataiguet so shiỹaxauapi nache, 'eeta': «¿Ta'ainco' qami' ye qauauoita'alo naua qa'ainaqalli' qataq naua qanpo'oñilli', da Aỹem qañe'egueñiỹauga, 'eeta'amo' da Aỹem laataxanaxaic? Qamaq 'enauaque naua na'axa'te qami', sapaxagueeta'ape da sootaigui añi no'onaxanaxaqui late'erai, qalaq saishet da Aỹem qauacoñiiua'a da Aỹem qaucoñiye. 56Qalaxaye 'enauac de'era iuen da huo'o, yaqto' ipacchigui dam ỹa'axat co'ollaxa so la'aqtaxanaxanecpi Ñim Lo'onatac 'Enauacna.»
Huaña, nache 'enauaque soua lapaxaguenataqa no'onaxatchiguilo So Jesús da datare'c.
So loicnatac na lataxaguesatpi nmit So Jesús
57-58So Pedro ca'attaueegue So Jesús, qalaxaye qaỹoqteueegue naqa'en choche ivittaua'a so nqasoxoc so lma' so nta'a. Huaña yemaye, nache nso'ooñi ỹalectaigui som nauaatac som qanayeuta'a da yaqto' saishet da huo'o ca sa ỹauangui. Qaq som ỹaconeua'api So Jesús qaỹauega Somaye ca lma' so Caifás maye lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna. Qaq yemaye hueta'a som dapaxaguenataxaatapeguec na namaxasoxonaxacpi qataq som lataxala'pi na judiopi.
59Nache som lataxala'pi na ntaxaỹaxanaxanecpi da qaitaxaỹapegue' Ñim Lo'onatac 'Enauacna qataq 'enauac som nmit na nasouaxashetpi, somayepi nmittaique da huo'o ca shiỹaxaua da huo'o ca latenataxanaxac da ỹasaxalec So Jesús, da yaqto' qaỹaconeua'a Somaye da qaỹalauat. 60Qalaxaye na'aictaxa da qalota so anac shiỹaxauapi da datenataxan, qalaxaye ñaqaiyeta saishet da qaỹañoxot da huo'o ca qaỹasaxalec lasouaxashet Somaye.
61Qaq choche ivitta'a da huo'oi soua dos ỹale't da 'ena'apo': «De'era ỹale 'eetega ishet da ilaxachigui añi no'onaxanaxaqui late'erai maye lalamaqte Ñim Lo'onatac 'Enauacna, qaq da qaltaq no'oxoosheguem, nache tres na'axa'te, nache imat.»
62Nache so lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna, 'enapego' So Jesús, 'eeta':
–¿'Aua'aqchigui dam 'am qaỹasaxalec 'arasouaxashet? ¿Ca 'eetec ca 'ara'aqtac da 'anhueela't?
63Qalaxaye So Jesús saishet da ỹasat, nache so lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna, 'enapega So Jesús, 'eeta':
–'Am serolec da le'enaxat Ñim Lo'onatac 'Enauacna maye nca'altauec, da ñaq 'anasaxauec ca 'eesa. 'Aua'axat da nache 'am maye 'am Lca'aguishec Ñim Lo'onatac 'Enauacna qataq 'am Llalec Ñimaye.
64Nache So Jesús 'enapeco':
–Aja', nachera dam 'anasaxauec. Ñaq 'ana'axaỹaxana dam ỹa'aqtac nagui. Da mashe saqaỹapeque ca na'a'q da qami' Aỹem qauloỹa'aguet Aỹem Shiỹaxaua Llalec da sootalec ca lo'oc na piguem da ñanactaigui da na'añaxac qataq da namaxasoxonaxac maye Aỹem ỹami' Ñim Lo'onatac 'Enauacna maye qaica ca ỹaqalanapec.
65Nache co'ollaq hua'aqchigui de'era som lataxala' na ntaxaỹaxanaxanecpi da qaitaxaỹapegue' Ñim Lo'onatac 'Enauacna, nache ncolaxata'aisalo soua alogo da la'anaxat da ỹataqta dalemata, nache 'enapeco':
–¡De'era ỹale, damaye ỹataqta isheueetac Ñim Lo'onatac 'Enauacna! Mashe qaica ca lỹa shiỹaxaua da seuenaq da da'aqtaxan. Cha'aye damaye 'eetega da nachera dam Lo'onatac 'Enauacna. 66Qaq ¿chaq 'eetec cam qara'aqtaqui?
–¡Qomye damaye qaỹalauat! 'Enapec somayepi.
67Nache huo'o na nqaigoxoigui na lashec Somaye, qataq huo'o na iuaxaatac. Qataq huo'o na iuaxanoigui na lashec. 68Nache qoỹeetega, qoỹeeta': «'Am maye 'am Lca'aguishec Ñim Lo'onatac 'Enauacna, ¡ña 'aua'axat negue't na 'am iuaxaatac!»
So Pedro 'eetega da sa ỹauatton So Jesús
69Qaq co'ollaq ñaq qanayeetaigui de'era, nache so Pedro nso'ootañi, netauga so nqasoxoc so lma' so nta'a. Nache anac aso namaxashe nquigueua'a somaye nache 'enapega, 'eeta':
–'Am nataqa'en 'annaictague' naxa da Jesús maye Galilea le'ec.
70Qalaxaye so Pedro hua'aqchigui naqa'en 'enauac so shiỹaxauapi co'ollaq nqoleguet, 'eeta'
–Aque', sa saỹaten dam 'aua'axattac.
71Nache so Pedro co'ollaq pa'auec, qalaxaye aso lỹa namaxashe ỹauaategue, nache asomaye 'enapego' som hueta'a so qasoxoc, 'eeta':
–De'era ỹale, damaye nataqa'en nnaictague' da Jesús maye Nazaret le'ec.
72Nache so Pedro qaltaq ỹe'eguelaxalec da nqoleguet, 'eeta':
–¡Aỹem san da ỹa'aqtac da ỹoqta 'eesa da saishet da sauatton de'era ỹale!
73Qaq co'ollaq qaỹata'ague de'era, nache som hueta'a se'eso qasoxoc, somayepi nqocheneua'a so Pedro, nache qoỹeetega, qoỹeeta':
–Ỹoqta 'eesa da 'am nataqa'en 'araỹepi nam ca'attague' da Jesús, cha'aye naua 'ara'aqtaqa 'eeta'ama naua la'aqtaqa na Galilea le'ecpi.
74Nache so Pedro ỹataqta na'axannec da nqoleguettac, 'eeta':
¡Mashe qami' sa'aqtaxaateguema da saishet da sauatton de'era ỹale! ¡Ñim Lo'onatac 'Enauacna ỹauo'o qome ca ñeuaxanaguec da saishet da 'eesa de'era ñasaxauec!
Nache co'ollaq ime da nasaxauec de'era nache nỹen so 'olgaxa, 75nache so Pedro tachigui lauel da la'aqtac So Jesús co'ollaq, 'eeta': «Qom yaqta'a da nỹen ca 'olgaxa, qaq 'am mashe sogote qome da tres 'avi'eguelaxalec da qonetega da Aỹem sa 'auauatton.» Nache so Pedro pa'auec, nache ỹataqta nỹeetac, qataq ỹataqta lta'araic da laquicoxo.
