So Jesús dapaxaguenataxanec da lataxac da huo'o ca qoỹan
1Qami' da huo'otaq huo'o ca qauo'oche ỹaỹamaqchiguiñi, qalaq saishet da qaua'axacheeteua'alo: cha'aye da nache qoñiitec de'era, nache Ñim Lo'onatac 'Enauacna maye Qarta'ai saishet da ỹauo'o ca qansheetenaguiiqui.
2Da huo'o ca 'oonolec da qoñiita da itauan na choxoraqpi, nache saishet da ỹa'axatteua'alo ana paxaguenaxaquipi qataq naua ndaqa'ate maye sa ỹe'emaxat da nlectecot na shiỹaxauapi; cha'aye damaye nataqa'en ỹo'ottac nam saq ỹataxalec da lataxac, maye huotaique da na shiỹaxauapi ỹo'oxoreetac. Qaq Aỹem ỹataqta 'eesa dam shenapec da nachaqrata nsheetenaguec maye ỹaconeguet namayepi.
3Da huo'o ca 'oonolec da qoñiita da itauan na choxoraqpi, nache 'onaxaic da saishet da huo'o ca da'aqtaxanem. 4Yaqto' de'era ltaunaxanaxac saishet da qaỹaỹaten, qaq Ñim Lo'onatac 'Enauacna maye Nta'a, Ñim ỹaỹaten de'era saqcha'a, Ñimaye ỹauo'o ca nsheetenaguec.
So Jesús dapaxaguenataxanec da qouagaxaunaxac
5Qaq da ivita da qanqouagaxauñi, qalaq saishet qome da qoñiita'am nam saq ỹataxalec da lataxac. Namayepi choche lqopitaxat da qaimeteetac da nqouagaxaueetac. Ỹoqo'oye nachattañi da nqouagaxauen da huaigui ana napaxaguenaxaquipi na judiopi, qataq na ndaqa'pi maye sa ỹe'emaxat da nlectecot na shiỹaxauapi. Qaq Aỹem 'eesa de'era qami' sa'axatema da namayepi qaica ca lỹa nsheetenaguec.
6Qalaxaye da huo'o ca 'oonolec da qoñiita da nqouagaxauen, nache no'on da ndotec. Taigui ca lma', ime, nache ỹapogui ca lasom, nache qaica ca ỹaỹaten da na'aqtaxane' Ñim Lo'onatac 'Enauacna maye Lta'a, cha'aye Ñimaye ỹan cam qaiỹaxanaique, na'aictaxa da saqcha'a.
7Qaq da qanqouagaxauñi, nache saishet da logoraic ca qartaxaỹaxaqui, da qoñiita'am nam saishet da ỹoqta 'eesa da ỹauatton Ñim Lo'onatac 'Enauacna. Cha'aye namayepi ipi'itaxaatega da Ñimaye ỹalaxaguet souaxat da ỹataqta logoraic da nqouagaxaunaxac. 8Qaq saishet qome da qaue'enaxache namayepi, cha'aye Ñim Lo'onatac 'Enauacna maye Qarta'a, Ñimaye ỹaỹaten cam qaviñiitaique, na'aictaxa da saxanaxa da qauỹaxañiỹot.
9Qaq ỹoqo'oye da qanqouagaxauñi, qalaq qoñiita':
«'Am Qarta'a maye qoneto'ot na piguem,
'enauac qome da 'am qaỹauatton
da 'am 'oonolec maye 'Aro'onatac 'Enauacna.
10Ña 'auanac yaqto' 'am 'oonolec da
'am Qarta'a maye ỹataqta ỹactec da 'ara'amaqchec.
Yaqto' 'enauac na shiỹaxauapi maye huetalec ana 'alhua 'am ỹalaxaguet,
'eeta'am da lalaxayec nam hueto'ot na piguem.
11Ñaq qomi' 'aỹa'anema na na'a'q cam
sacheguenaq maye seuenaqtac.
12'Auapalaxat qome na qauem maye so'otaq,
'eeta'ama qomi' da mashe sapalaxataq 'enauac
nam qomi' qaỹo'oteque qauem.
13Qataq da qomi' nvitalo ca qañe'eguenataguec,
nache saishet da qomi' 'auashenegueta
da chegoqchigui camaye da 'am qolaqa'ai.
Qataq qomi' 'anca'alaxateeguesopa
da la'añaxac so pa'aguenataxanaxaic.»
[Cha'aye 'aralamaxat da no'onataxanaxac
qataq da na'añaxac qataq da ño'oxoyec
maye qaica ca loga't. Aja', nache 'eetec.]
14Cha'aye da qami' qauchoxoyiñi cam qarỹai maye qami' ỹo'oteque ca sa ỹaỹamaxañi, nache Ñim Lo'onatac 'Enauacna maye Qarta'ai maye neta'ague da piguem nataqa'en qami' ichoxore'n. 15Qalaxaye qami' da saishet da qauchoxoyiñi ca qarỹai, nache Ñim Qarta'ai nataqa'en saishet da qami' ichoxore'n da ỹapalaxat ca qarasouaxashechi.
Da lataxac da nqouaqchet ca shiỹaxaua
16Qaq da ivita da qanqouaqchichi, qalaq saishet qome da yo'oqta da daquico da qarasheguiỹaxaqui, da qoñiita'am nam shiỹaxauapi maye choche nachaxaatac. Namayepi 'eetec de'era, cha'aye huotaique da qaỹaỹaten da nqouaqchettac. Qaq Aỹem qami' shenapegalo da namayepi sogote huo'o da nsheetenaguec. 17Qalaxaye qami' da ivita da qanqouaqchichi, qalaq qanapilocheeta, qataq qantaquiichiguiñi na qaravi, 18yaqto' na shiỹaxauapi saishet da ỹaỹaten da qanqouaqchichiitac. Qaq nachaqñita Ñi Qarta'ai maye Lo'onatac 'Enauacna, Ñim ỹaỹaten nam saqcha'a, Ñimaye ỹauo'o ca qansheetenaguiiqui.
Da nsallaxa maye ỹoqta 'eesa
19Saishet qome da qalapoñiitasheguem da qarsallaqai ana 'alhua, cha'aye damaye ishet da deqat qataq ilaxachigui na lalaxat, qataq nataqa'en na cachaxaicpi ishet da decachiỹa. 20Nachaqrato' da qauloxonaxañiichigui da qanachaalataxaqui dam nsallaxa maye ỹoqta 'eesa, maye hueta'a cam netaña Ñim Lo'onatac 'Enauacna, qataq ỹoqta 'itchiguiñi da qami' ỹaỹamaxaayiñi. Dam saishet da deqat qataq saishet da ilaxachigui na lalaxat. Nataqa'en na cachaxaicpi saishet da decachiỹa. 21Cha'aye qami' cam hueta'ague ca qarsallaqai, nache nataqa'en hueta'ague da qarhuennataxaqui.
22-23Ca shiỹaxaua huesota da lataxac, camaye nache 'eetai' da chetaqtaxanaxaic, qaq ỹoqo'oye camaye no'on da llecỹaxac qataq 'eeta'am da huetaigui na yo'oqchiguiñi. Qalaxaye ca shiỹaxaua da shemataqaic qataq quiỹaxanaqtaqaic, nache camaye, nache 'eetai' da qauem da tata'ague; 'eeta'am da huetaigui ca ỹataqta napalñi.
Da nsallaxa
24Qaica ca namaxashec da ishet da dos naqa'e'n caua na'aco'ye. Cha'aye ishet da ỹalaxaguet qataq ỹauotec ca 'oonolec, qaq ca lỹa qalaq saishet. Nache 'eetec nataqa'en da qoñiita da sa qauañoxoche da qauo'onataxañiỹot Ñim Lo'onatac 'Enauacna, nache nataqa'en qoquiito'ot da qauo'onataxañiitacot da nsallaxa.
Da nhuogoqchec
25Qaq ỹoqo'oye nagui qami' shenapegalo da saishet qome da nachaqrata da qauennacheetega cam qolliqui qataq cam qanỹomiigui, qataq cam qorogoxoche maye qaviñiitac. Cha'aye, ¿qaỹo'ot peta'a da achaalataxac da yaqto' nachaqrata da lquia'axac? Qataq ¿qaỹo'ot peta'a da no'ocỹaxac da nachaqrata da qano'otaxanaxaatac?
26Ñaq qauloỹa na maỹo maye huaỹotac queto'ot na pa'asheguem, da namayepi saishet da danaxan, qataq sa deqataxan, qataq saishet da choche ỹaỹamaxat na ala ca lañiguishec. Qalaxaye Ñim Lo'onatac 'Enauacna maye Qarta'ai maye neta'ague da piguem, Ñimaye ỹanem da lquia'axac namayepi. Qaq ¿qami' saisheto' da qanapacỹalec da la'amaqchec namayepi?
27Cha'aye ¿negue't ca 'oonolec da qoñiita da huo'otaq ỹapactec da lhuogoqchec, nache ishet da nquigaxat da lca'alaxa?
28Ña qauloỹa ana huoue maye huo'o ana lauoxo maye huetalec na no'onaxa. Anamayepi saishet da do'onataxan qataq saishet da ỹo'ot ca logoxot. 29Qalaxaye, Aỹem ỹataqta 'eesa de'era qami' sa'aqtaxanema da so nta'a Salomón co'ollaxa qaica ca 'ena'am da lsallaxa, qalaq saishet da ivi' da lyac anamayepi.
30Qaq Ñim Lo'onatac 'Enauacna da ỹami' da lyacỹaxac anam huoue nagui maye huetauga na no'onaxa, qamaq ca lỹa na'a'q nache deqaqa, qaq da nache 'eetec de'era nache ¿peta'a sa ỹacteco' cam qami' ỹo'oteque Ñimaye? ¡Aỹem sela'a da saxanaxa da qauaỹachiñi da ỹoqta qaupi'iỹa'ai Ñim Lo'onatac 'Enauacna!
31Qaq ỹoqo'oye saishet qome da nachaqrata da qauennacheetega ca qolliqui, qataq cam qanỹomiigui huo'otaq ca qorogoxoche maye qaviñiitac. 32Cha'aye nam sa ỹauatton Ñim Lo'onatac 'Enauacna maye ỹaquicoqchet da iuennatega de'era. Qalaxaye qami' saishet da qami' ỹaquicoqche't de'era, cha'aye Ñim Qarta'ai maye neta'ague da piguem, Ñimaye ỹaỹaten da qami' qaviñiitac 'enauac ne'enapi.
33Qaq ỹoqo'oye ỹactec da 'onaxaic da qauauattoñiita Ñim Lo'onatac 'Enauacna da nachaqñita ỹactec da la'amaqchec da Nta'a, qataq da qauo'oche dam 'eetapeguec Ñimaye. Nache 'enauac na laỹepi maye qaviñiitaique qami' ỹanema Ñimaye da ivita ca laloqo'. 34Qaq ỹoqo'oye saishet qome da leetapigui ye qarvilli cam huaigui ca lỹa na'a'q. Cha'aye ca lỹa na'a'q huo'o ca maiche lalamaxat da huaigui. Qauennachiỹa'a da mashe qalota na seviraxaguet lqalaicpi ye 'oonolec na'a'q.
