Mateo 7

₁Saishet da qanmichiitac ca qarỹai, yaqto' Ñim Lo'onatac 'Enauacna saishet da qami' nmi't. ₂Cha'aye da saishet da qaurenataxañi da qanmichi ca qarỹai, nache Ñim Lo'onatac 'Enauacna nataqa'en saishet da qami' ire'n da qami' nmi't. Ñimaye qami' ỹo'oteque nataqa'en cam qauo'ochec na laỹepi shiỹaxauapi.

₃Qataq ¿ta'ainco' ye 'aulotagui nam qauem maye ỹo'ot ca 'arỹa, qaq sa 'ananomo' peta'a nam qalota 'auo'otpi maye qauem? 'Eeta'am da 'aula'a ca ltagoxoshet 'auaqpi lte ca 'arỹa ana la'aite, qaq sa 'ananoma ca maiche 'artagoxoshet 'epaq laỹe. ₄¿Ta'ainco' da qonapega ca 'arqaỹa da qoneta': «Ỹaqaỹa, ña 'aua'aqta'a da ñeqat ye 'artagoxoshet 'auaqpi lte añi 'ara'aite», da 'am sa 'ananoma ye maiche 'artagoxoshet 'epaq laỹe añi 'ara'aite? ₅¡'Am tenataxanaxaic! 'Aua'auaxaañi da 'anqat ye maiche 'artagoxoshet 'epaq laỹe maye huetaigui añi 'ara'aite, yaqto' ỹoqta 'anauaachiguiñi da 'anqat ca ltagoxoshet 'auaqpi lte ca 'arqaỹa.

₆Saishet qome da qaỹa'añim na pioxoppi cam lalamaxat Ñim Lo'onatac 'Enauacna. Qataq saishet da qauasaqaiua'a aca cos late'epi ca 'otaxat maye no'on. Cha'aye saishet da huo'o ca 'oonolec caamaye da huo'o ca naigui naqa'en camaye, nachaqrata da petapigui, qataq ishet da ivira'a da qami' ina'c.

₇Qauỹaxañiỹot Ñim Lo'onatac 'Enauacna, qaq Ñimaye qami' ỹanema ca qauỹaxañiỹaique; qautaqỹapegue' Ñimaye, yaqto' qauanachiỹa ca qanmichiitaique; qataq qauaxañiỹa't naua qarhuaxayilli', yaqto' qami' ilo'ogueta. ₈Cha'aye cam pi'iỹa'a Ñim Lo'onatac 'Enauacna, qalaq ỹaconeguet cam iỹaxanaique; qataq ỹanata cam nmittaique, qataq da deỹaxan qalaq qailo'oguet.

₉Cha'aye ¿negue't ca 'oonolec da qoñiita da ishet da ỹami' ca coma' ca llalec, da huo'otaq iỹaxanaique aca nauole 'ayiiña? ₁₀¿Huo'otaq da iỹaxanaique ca nỹaq, qalaq ỹami' ca na'araxanaq?

₁₁Qami' matem qami' qauemaiqa, qalaq qauaỹachiñi da qaỹa'añim ca no'on cam qaỹa'alqui. Qaq ¡taloxocheyectoxo' da saq ỹactec Ñim Qarta'ai maye neta'ague da piguem da ishet da ỹanem ca no'on cam iỹaxanot Ñimaye!

₁₂Qaq ỹoqo'oye qami' cam no'on maye qansheetaique da qami' ỹo'oteque na shiỹaxauapi, qaq nacheca iuen da hua'auñi qome qauo'ochec 'enauac namayepi. Cha'aye nachera dam damaxasoxoolec nam lamaxasoxonaxacpi so Moisés qataq naua leregui'she so la'aqtaxanaxanecpi Ñim Lo'onatac 'Enauacna.

₁₃So nqa'aic maye taỹa'a da nleuaxa somaye ỹataqta qalotegue. Se'eso nqa'aic ỹataqta saqalaq da qanayeegue. ¡Qaq ỹoqo'oye qalota nam quetague' somaye! ₁₄Qalaxaye so nqa'aic maye taỹa'a da nca'alaxa somaye ỹataqta sa lca'ague. Qaq somaye ỹataqta huo'o da lqalaic da qanayeegue. Ỹoqo'oye sa lamai' na ỹanata de'era nca'alaxa. Ỹoqo'oye qoquiigue so nqa'aic maye sa lca'ague, cha'aye somaye qomi' ỹauecta'alo da nca'alaxa.

₁₅¡Qarvichiỹa'aguet nam tenataxanaxaicpi maye 'eetega da la'aqtaxanaxanecpi Ñim Lo'onatac 'Enauacna! Namayepi qami' naỹalo, nache ỹe'enaxat da lataxac ana qagueta, qalaxaye na pa'auo 'eeta'am da lataxac na shiguiỹac maye dequi'iỹapec. ₁₆Qalaxaye qami' ishet da qauauattoñi nam 'eetega da na'aqtaxanaxanecpi qalaxaye saq 'en souaxat nam ỹo'otpi. Cha'aye da qanqat ana ala ana nañiguishe uva, qataq ana ala ana nañiguishe higo qalaq saishet da qaỹachegoxotaigui aca qo'oipaq maye huo'o ana le. ₁₇Ana qo'oipaqpi maye no'on, anamayepi ipacchigui da no'on ana ala, qaq anam qo'oipaqpi maye qauem, nache ipacchigui da qauem ana ala. ₁₈Qaca aca qo'oipaq da 'onaxai, nache aca ala qauem, qataq nataqa'en qaca aca qo'oipaq da qauem, nache aca ala no'on. ₁₉Aca qo'oipaq maye saishet da ỹan aca no'on ala, acamaye qaiquesoq ime nache qaỹavigaxat. ₂₀¡Qaq qami' qauauattoñi ne'ena tenataxanaxaicpi souaxat nam ỹo'otpi!

₂₁Saishet da 'enauac nam iỹaxaatega da Aỹem Lataxala' da huenoxoneua'a da lo'onataxanaxac Ñim Lo'onatac 'Enauacna. Damaye saishet da nachaqrata, iuen da ỹalaxaguet na lamaxasoxonaxacpi Ñim Ita'a maye neta'ague da piguem. ₂₂Qaq qom ivita que'eca na'a'q da Ñim Lo'onatac 'Enauacna nmit 'enauac na shiỹaxauapi, nache qalota qome na 'enapec: «'Am Qarataxala' maye qomi' 'aralamqa'ate, qomi' naxa 'am sa'axataqtac da sa'aqtaxanaqteguem na laỹepi shiỹaxauapi. Qomi' so'onataxanaqtega da 'are'enaxat da so'oraqauec na saqcha'a na'añaxac leguemaxaicpi, qataq so'otaqtac na sa qaỹauanapegapi.» ₂₃Qalaxaye Aỹem shenapega qome namayepi, sheeta': ¡Aỹem saishet da qami' sategueua'alo! ¡Aỹem qoquiỹa'ai, qami' shiỹaxauapi maye qauo'ocheetac na sa ỹaỹamaxañi!

₂₄Qaq ỹoqo'oye cam ỹataqta Aỹem na'axaỹaxana qataq ỹo'ot da sheetega, qaq camaye 'eeta'am ca ỹale maye ỹataqta ỹaanaxanaxaic, maye no'oxootelec naqa'en ca ỹataqta ndota't coma' da no'oxoosheguem ca lma'. ₂₅Qaq da ivita da anac na auot, qataq da npaxaasheguem so tala, qataq da anac na la'at lta'araic, qalaq saishet da ỹañoxot da ỹa'axasoxooñi que'eca nỹec, cha'aye ỹataqta no'oxootelec naqa'en ca ỹataqta ndota't coma'.

₂₆Qaq cam Aỹem na'axaỹaxaatega qalaq saishet da ỹo'ot de'era sheetega, qalaq camaye 'eeta'am ca ỹale maye qaica ca ỹaỹaanapec, da no'oxootelec naqa'en ca lma' ca delec. ₂₇Qaq da ivita da anac na auot, qataq da npaxaasheguem so tala, qataq da anac na la'at lta'araic, nache ishet da ỹa'axasoxooñi que'eca nỹec, nache ỹataqta nlachiguiñi naqa'en.

₂₈Qaq So Jesús co'ollaq imat da la'aqtaxanaxac, nache 'enauac so shiỹaxauapi maye na'axaỹaxaatega ỹataqta huo'o da la'aalaxa da lapaxaguenataxanaxac Somaye, ₂₉cha'aye So Jesús da dapaxaguenataxaatac, qalaq ỹataqta huo'o naq 'ene'c naua la'aqtaqa. Qaq saishet da 'eeta'am nam dapaxaguenataxaatapeguec nam lamaxasoxonaxacpi so Moisés.