So Jesús hueta'a ye Nazaret
1So Jesús ca'ai ye hueta'a, nache taigue da Nazaret maye maiche lalamaxat lma', qaq soua lapaxaguenataqa, nache ca'ateguelo Somaye.
2Qaq co'ollaq iviteuga so na'a'q mataxaqui maye saishetapec na judiopi, nache Somaye dapaxaguenataxaatac, huaigui aso napaxaguenaxaqui na judiopi. Qaq ỹataqta qalota so shiỹaxauapi na'axaỹaxaatega, nache huo'o da la'aalaxa qataq nnattega't, 'eeta':
–¿Cam ỹachegoxota'ague da laỹaanec dam da'? Qataq ¿chaq ỹachegoxota'ague dam lauattonaxanaxac? Qataq ¿ca ỹachegoxota'ague da la'añaxac da ỹo'ot nam sa qaỹauanapega? 3¿Sa nachero' peta'a da qo'oipaq lo'o, maye llalec aso María qataq lqaỹa so Santiago, José, Judas qataq so Simón? Qataq ¿saq hueta'a peta'a nam souaqta'a soua lqaỹa't 'alol?
Nache So Jesús sa ỹaỹaten naqa'en ca 'eetec somayepi. 4Ime, nache Somaye ỹasat, 'eeta':
–Qaica ca na'aqtaxanaxanec da saq qaỹo'oxoren da hueta'a ca lỹa 'alhua, qalaxaye da hueta'a ca maiche lma', nache na lqaỹañecpi qataq na lauo' le'ecpi saishet da ỹo'oxoren camaye.
5Nache ỹashel-lec so sa no'onpi, nache huo'o so nataren, qalaxaye saishet da ỹo'ot ca lỹa na'anec, 6cha'aye ỹataqta lta'araic da la'aalaxa da se'eso shiỹaxauapi saishet da ỹa'amaqten Somaye.
So Jesús ỹama'q soua doce lamaxa'she
–So Jesús jec da taỹalo naua saq qaỹapigui lma'ate na shiỹaxauapi dapaxaguenataxaateguec da no'on na'axaỹaxac. 7Ime, nache ỹataxana't soua doce lamaxa'she, nache ỹama'q, dostega't naqa'en. Qataq ỹanema soomaye da na'añaxac da yaqto' ỹo'oldaue'c na saqcha'a na'añaxac leguemaxaicpi maye netaigui na shiỹaxauapi, 8qataq nataqa'en 'enapegalo soomaye, 'eeta':
«Qauache caua qarashelchelli', qalaxaye saishet da qauache ca qo'oqoi qataq caua qarachoxonaxaquilli' qataq aca qo'omi. 9Qa'aỹa'añiiyiñi caua qarapela'achilli', qalaxaye saishet da qauache caua lỹa't qo'ogolli'. 10Qataq 'enapegalo' soomaye, 'eeta':
–Qami' qom ivita da qaunoxoñiiua'a ca lma'pi ca shiỹaxauapi, nache qoviỹa'a ca 'oonolec nỹec cam qami' ỹaconegueta, choche ivitta'a da qoquiỹa'ai que'eca nỹecpi. 11Qaq da huo'o ca huaña da saishet da qami' qaỹaconegueta, qataq saishet da qami' qana'axaỹaxanalo, nache qoquiỹa'ai que'eca qoviita'a qataq qauchegoqoi naua qarapela'achilli', yaqto' de'era la'anaxat da huo'o ca naỹa'a camayepi.» [Qaq ỹataqta 'eesa de'era qami' sa'axatema da qom ivita da qanmit 'enauacna, nache da nhuaxanaguec co'ollaxa so Sodoma qataq so Gomorra saq 'amaqtaq, qaq saq 'ena'am ca nhuaxanaguec qome qanqa'en que'eca shiỹaxauapi maye saq qami' ỹaconegueta.]
12Nache soua napaxaguenataqa je'c, nache ỹachegoxottrot da da'aqtaxanem na shiỹaxauapi da iuen da ỹaxaañi da ỹo'ottac na lasouaxashetpi, nache ỹe'eguelaqot Ñim Lo'onatac 'Enauacna. 13Nataqa'en qalota so saqcha'a na'añaxac leguemaxaicpi ỹo'oldauec, qataq nataqa'en qalota so nataren sa no'onpi da'amnaxaatega na aceite maye chegaqaigui ana oliva.
Da l-leuaxa so Juan maye nachelaxanataxanaq
14So Jesús ỹataqta imauec da qaỹauatton, ivira'a so nta'a Herodes Antipas da hua'aqtapeguelec Somaye. Huo'o na 'eetega da So Jesús, nacheso so Juan maye nachelaxanataxanaq da ỹoltaq nca'alec, nache qalota na ỹo'ot na'anec maye sa qaỹauanapega. 15Qataq huo'o na 'eetega da Somaye, nacheso so na'aqtaxanaxanec maye le'enaxat Elías, qataq huo'o na 'eetega da nacheso so 'oonolec som hua'au na'aqtaxanaxanecpi.
16Qaq so nta'a Herodes co'ollaq hua'aqtapeguelec So Jesús, nache somaye ỹataqta 'eesa naqa'en da nacheso so Juan da qaỹa'axattac, nache 'enapeco': «Se'eso Jesús, nacheso so Juan maye samaxasoxoolec co'ollaxa da qaicheguec na lqaic, qalaxaye nagui qaltaq nca'alec.»
17-19Cha'aye so Herodes Antipas huaroneguet co'ollaxa aso Herodías maye lalamaqte lhua so lqaỹa Filipo, qaq so Juan co'ollaxa iviraxato'ot so Herodes, 'eeta' da la'aqtac: «Saishet da ỹaỹamaxañi da 'auauo'o 'arhua añi lalamaqte lhua so 'arqaỹa.»
Qaq de'era ỹataqta inogoqchet aso Herodías, ỹoqo'oye, nache chegoqchiguiña da huo'o da lhuennataxac da ỹalauat so Juan da huo'o ca llegueuo. Qalaxaye so Herodes nda'a't da damaxasoxoolec da qaicoñerai' somaye da qoỹanaigui aso ncoñetaxanaxaqui late'erai. 20Qaq so Herodes ỹataqta ñi'iỹa so Juan, ỹoqo'oye npaxattalec, cha'aye ỹaỹaten da so Juan ỹataqta no'on da lataxac, qataq qui'itta. Na'aictaxa so Herodes da saishet da ỹaỹaten ca 'eetec naxa da na'axaỹaxaatega da detaqtac somaye, qalaxaye saishet da saq na'axaỹaxana.
21Qaq co'ollaq ivita so na'a'q maye lañoxoqui, nache so nta'a Herodes ỹo'ot so lta'araic lquia'axac. Nache icoyeguen so nataxala'pi, qataq so lataxala'pi na huataxanaq qataq so shiỹaxauapi maye 'amaqtaqaicpi ye 'alhua Galilea. Qaq aso Herodías ila'a da se'eso na'a'q, nacheso so ishet da huetoigui da ỹalauat so Juan. 22Qaq co'ollaq ñaq deque'etac so shiỹaxauapi, nache aso llale aso Herodías, inoxoneua'a ca hueta'a somayepi, nache dasottac 'enauac da qaimeteetac. Nache so nta'a Herodes qataq so laỹepi shiỹaxauapi ỹataqta nqopita da lasotaxac asomaye, qaq ỹoqo'oye se'eso nta'a 'enapego' aso qa'añole, 'eeta':
–Aỹem 'auỹaxanot maicheye cam 'auỹaxanaique, qaq aỹem 'am sami'.
23Na'aictaxa da tachiguingui na laiñi nam 'alhuapi maye selotague' da 'auỹaxaneua'a, qalaxaye, nache 'ena'am san da ỹa'aqtac da 'am sami'.
24Nache aso qa'añole pa'auec, taỹa ca hueta'a aso late'e Herodías, nache inattaco', 'eeta':
–¿Negue't ca ishet da seỹaxanaique?
–Nache aso Herodías ỹasategueto' asomaye, 'eeta':
–'Auỹaxaneua'a ca lqaic ca Juan maye nachelaxanataxanaq.
25Nache aso qa'añole saqaỹaloq da ỹe'eguelaxaua'a ca hueta'a so nta'a. Nache 'enapego', 'eeta':
–Ñeshetaique da sa 'auaỹaloxon nagui da aỹem 'aỹa'anem ca nquia'axaqui, 'auachetangui ca lqaic ca Juan maye nachelaxanataxanaq.
26Nache so nta'a ỹataqta daquico, qalaxaye mashe ỹan so la'aqtac da hua'aqchigui naqa'en so lcoyeguenatacpi, ỹoqo'oye saishet da sa ipaguelec da ỹan dam qaiỹaxaneua'a. 27Nache sa ỹaỹaloxon da ỹamaq so 'oonolec huataxanaq le'ec da ndouo ca lqaic so Juan. Nache jec so huataxanaq le'ec da taua'a aso ncoñetaxanaxaqui, nache icheguec so lqaic so Juan, 28nache ndoua'a aso qa'añole ỹachetangui so nquia'axaqui, nache asomaye ỹanem aso late'e.
29Nache som lapaxaguenatacpi so Juan co'ollaq ỹaỹaten de'era, nache ỹe'eguenaua'a so lo'ocỹaxac so Juan, nache irouec da yaqto' ilayiñi.
So Jesús iquia'axan so qalota shiỹaxauapi
30Qaq co'ollaq ime de'era, nache soua namaxa'she datareguet So Jesús, nache soomaye ỹa'axattrapeguema 'enauac nam ỹo'otpi qataq nam dapaxaguenataxaatrapegue'c. 31Qalaxaye ỹataqta qaica ca ldaqa't soomaye da deque'e', cha'aye so shiỹaxauapi ỹataqta nmeeta'a't da nategueua'alo soomaye. Nache So Jesús 'enapegalo' soomaye, 'eeta':
«Qauanaqui, qolaq, ñeqo'onaxa ca ntochiguiñi da yaqto' ñemataxauec.»
32Nache So Jesús qataq soua lamaxa'she huenooyingui aso nllocta da nqo'oora ca 'alhua toolec. 33Qalaxaye qalota co'ollaxa so ỹauaategue, qataq ỹaỹaten da nacheso So Jesús som jec, qataq huo'o yem qaipeta'a 'alhua da taỹa, nache qalota som shiỹaxauapi maye neta'alo naua sa 'amaqtache nỹecpiolec ye 'alhua nqalgoxosheguem da yaqto' hua'auñi da ivira yem taỹa'a So Jesús.
34Nache So Jesús co'ollaq huenoteeguesop aso nllocta, nache ilaigui so qalota shiỹaxauapi maye lapoota'a't, nache ỹataqta lta'araic da lchoxonnataxanaxa, cha'aye somayepi 'eeta'am aca qagueta maye qaica ca ilotague'. Nache quetot da qalota na ỹapaxaguenec lataxacpi.
35Qaq co'ollaq mashe avit, nache soua lapaxaguenataqa nquiguereua'a Somaye. Nache qoỹeetega, qoỹeeta':
–Ne'ena souaqta'a ỹataqta toolec qataq mashe ỹataqta avit. 36Qaq no'on da 'ancoyeguene' na shiỹaxauapi da yaqto' jec da desheenaxanaique ca aloq taỹa nam netaleguete naua 'aleu' qataq na nỹecpiolec maye saqaỹapigui.
37Qalaxaye So Jesús, 'enapeco':
–Qami' maye qaỹa'añim taxa ca aloq namayepi.
Nache soomaye 'ena'apo':
–¿Ca 'eeteco' da sesheenaxanaqaique aca nauolepi da samiaxai' 'enauac ne'ena shiỹaxauapi? ¡Cha'aye qaiuen aca lasheue ca do'onataxan ye 'oonolec vi'i, da yaqto' ishet da qaisheenaxana aca qalota nauolepi!
38Nache So Jesús 'enapegalo soomaye, 'eeta':
–¿Ca lcate' caua nauole maye qami' hueto'oto? ¡Ña qaumichiñi'!
Nache soomaye je'c, qaỹata'ague qaltaq ñe'eguela'q, nache 'ena'apo':
–Huo'oi yeua cincole nauole qataq dos yeua nỹaxaye.
39Nache So Jesús 'enapega 'enauac so shiỹaxauapi da nso'ooñi huaxaỹapega't naqa'en, nso'oolec na 'auaqpi darala. 40Nache so shiỹaxauapi nso'ooñi, ỹaqauga ye huaña na cien qataq na cincuenta. 41Ime, nache So Jesús ỹaconalo soua cincole nauole qataq soua dos nỹaxaye, nache ỹamato'ot na piguem da ỹanot da na'achec Ñim Lo'onatac 'Enauacna. Ime, nache icolaxachiguilo soua nauole, nache ỹanoiguilo soua lapaxaguenataqa, da yaqto' soomaye ỹanoigui so shiỹaxauapi, qaq nache 'eetec nataqa'en soua dos nỹaxaye.
42Nache 'enauac somayepi deque'e qataq ivira'a da comaraxaicpi. 43Ime, nache soua lapaxaguenataqa laỹona't so ñi'iỹoxot nauole laỹepi qataq so nỹaq, nache ivi' doce soua no'oxona maye laỹe' na nallec da nlaxatchiguilo. 44¡Qaq se'eso deque'etacpi shiỹaxauapi napacalec ye cinco mil ye lcata!
So Jesús quetalec so 'etaxat
45Qaq co'ollaq ime de'era, nache So Jesús 'enapegalo soua lapaxaguenataqa da huenooyingui aso nllocta da ỹa'axasoxoorelec aso lapel, nache ilottra ye nỹecpi ye Betsaida, qaq Somaye no'onañi da ncoyegueetague' so shiỹaxauapi. 46Qaq co'ollaq ime da ncoyegueetague' somayepi, nache jec da tasheguemec aso qaỹoqotcheguemec 'alhua da nqouagaxauen.
47Qaq co'ollaq mashe pe, nache aso nllocta mashe vichiguingui na laiñi aso lapel, qaq So Jesús ñaq hueta'ata so lqaxaỹaqa'. 48Nache Somaye ilota'alo soua lapaxaguenataqa da ỹataqta huo'o da nqallegotaxa'c da delloctaxaata'ape, cha'aye soomaye ỹataqta datatreguet so la'at. Qaq co'ollaq mashe yaqta'a da yo'oxoñi, nache So Jesús jec da icaaleguete soomaye, petalec so 'etaxat. Qaq co'ollaq mashe saqaỹapigui soomaye, nache So Jesús ỹe'enaxat da napactaleguete soomaye. 49Qaq co'ollaq qaila'ague da quetalec na 'etaxat, nache soua lapaxaguenataqa ipettrego' da nqui'i, nache ỹa'alaqtaguilo, 50cha'aye ỹataqta huo'o da lcolanaqa', qalaxaye So Jesús saqaỹaloq da 'enapegalo, 'eeta': «Qaue'enaxañiitai' saishet da qayi'i. Nachaỹem.»
51Nache So Jesús huenooñigui aso nllocta, nache so la'at vi'iiguet. Nache soua lapaxaguenataqa ỹataqta huo'o da la'aalaqa'. 52Cha'aye da ntoonaxa'c soomaye saxanaxa da nauaayiñi, cha'aye saxanaxa da ỹoqta ỹaỹateete' ca naigui aso nauole maye nquicapeguec co'ollaxa.
So Jesús hueta'a ye Genesaret
53Qaq co'ollaq ime da ỹa'axasoxoorelec aso lapel, nache ivittra ye nỹecpi ye Genesaret, nache huaña da icoñerai'salo aso l-llocta' ỹaaro'ot so loigue. 54Qaq co'ollaq choche huenotreeguesop aso l-llocta', nache so shiỹaxauapi ỹauatton So Jesús, 55nache somayepi jec da coleelec 'enauac yi'iye 'alhua da yaqto' ndouo na sa no'onpi. Qaq da qaỹaỹaten da huo'o ye hueta'a So Jesús, nache qaỹachaleguete naua lmala'ate na sa no'onpi, nache qaira'a ca hueta'a Somaye. 56Nache cam taigue So Jesús, nam salamai' nỹecpiolec, huo'otaq na qalota nỹecpi, huo'otaq na huetauga na no'onaxa, na shiỹaxauapi ỹachangui na nqa'aicpi na sa no'onpi, nache Somaye naxa da nlectot, nache na sa no'onpi nachoxoreetacot da hua'aqta'a da ipoteua'a Somaye, na'aictoxo' da choche laỹe soua alogo, nache 'enauac nam ipoteua'a Somaye, nache no'oita.
