Nehemías 10

₁Qaq 'ena na le'enaxatpi so nanereñipi co'ollaxa: Nehemías, som llalec so Jacalías, maye nta'a co'ollaxa, qataq Sedequías, ₂Seraías, Azarías, Jeremías, ₃Pasjur, Amarías, Malquías, ₄Jatús, Sebanías, Maluc, ₅Jarín, Meremot, Abdías, ₆Daniel, Ginetón, Baruc, ₇Mesulán, Abías, Mijamín, ₈Magasías, Bilgay qataq so Semaías, qaq somayepi ntaxaỹaxanaxanecpi co'ollaxa.

₉Qaq so leviitapi maye nanereñipi, Josué, som llalec so Azarías, Binuy, som chegoxoguet so Henadad, qataq so Cadmiel, ₁₀nataqa'en soua lqaỹa't, Sebanías, Hodías, Kelaía, Pelaía, Janán, ₁₁Micaía, Rejob, Jasabías, ₁₂Zacur, Serebías, Sebanías ₁₃Hodías, Bani qataq so Beninu.

₁₄Qaq so lataxala'pi so maiche nhuo' le'ecpi: Paros, Pajat Moab, Elam, Zatu, Bani, ₁₅Binuy, Azgad, Bebay, ₁₆Adonías, Bigvay, Adín, ₁₇Ater, Ezequías, Azur, ₁₈Hodías, Jasún, Besay, ₁₉Jarif, Anatot, Nebay, ₂₀Magpías, Mesulán, Hezir, ₂₁Mezesabel, Sadoc, Jadúa, ₂₂Pelatías, Janán, Anaías, ₂₃Oseas, Jananías, Jasub, ₂₄Halojés, Piljá, Sobec, ₂₅Rejún, Jasabná, Maseías, ₂₆Ajías, Janán, Anán, ₂₇Maluc, Jarín qataq so Baná.

₂₈Qaq so laỹepi se'eso nhuo' le'ecpi, ntaxaỹaxanaxanecpi, leviitapi, qataq so ilotague' so ñegueuopi, no'onaxanaxanecpi, qataq so ilotague' aso atamnaxaqui qataq 'enauac so ỹaxanec so laỹepi shiỹaxauapi, maye lma' yi'iye 'alhua da yaqto' quegue na lamaxasoxonaxacpi Ñim Lo'onatac 'Enauacna, lỹateuo aso lamoxouapi, llalaqpi, qataq aso llalpi 'alpi, qataq 'enauac so mashe ỹaỹaten da na'axaỹaxan, ₂₉qataq huaxaiguet so lauo' le'ecpi, qataq so lataxala'pi somayepi, nache ỹan so la'aqtac da yaqto' ipactelec 'enauac na lqataxacpi Ñim Lo'onatac 'Enauacna, maye ỹachegoxotchigui co'ollaxa so lamaxashec Moisés, qataq da ỹalaxaguet na lamaxasoxonaxacpi, qataq da llec na lqataxacpi Ñim Nataxala' maye Qanatamnaxala'. ₃₀Nataqa'en sanaq so qara'aqtac da saishet da sashenaxaguet aso qoyalepi da huaroneguet ca ỹaqa'a ca chegaqa'a 'alhua, qataq aca llalepi camayepi saishet da huaroneguet ñaqa'enaq na qoyalaqpi. ₃₁Qataq da anac camayepi da qomi' imenoto ca camachaqca lmenec, nallec huo'otaq nogoxoshet da huetoigui ca na'a'q mataxaqui, huo'otaq da huetoigui ca naponaxac, nache qomi' saishet da sesheenaxanaxa. Nataqa'en sanaq so qara'aqtac da ivireuga ca siete vi'i nache saishet da ña'araxasheguem na qana'alhuapi, qataq sapalaxataq 'enauac ana navigaxaistepi.

₃₂Qaq ye 'oonolec vi'i nache sanaxauo aca qarachetaqtaxanaqte maye ivi' cuatro gramos ca lcat plata da yaqto' lasheue 'enauac ca lhuenecpi aso atamnaxaqui maye lalamaqte Ñim Lo'onatac 'Enauacna maye Qanatamnaxala', ₃₃qataq yaqto' qaisheenaxana aca nauole 'ayiiña maye qoỹanot Ñim Lo'onatac 'Enauacna, qataq aca nachetaqtaxanaqte maye qaỹavigaxatta qataq aca ala na nañiguishec, qataq ca nachetaqtaxanaxat shiguiỹacpi maye qoỹaneuo ye na'a'q, qataq aca nachetaqtaxanaqte maye qoỹaneuo ca na'a'q mataxaqui, qataq aca qoỹaneuo da dalaxaic so ca'agoxoic, qataq aca nachetaqtaxanaqte maye sa imauaq da qaỹavigaxat da yaqto' qaỹapalaxat na nasouaxashetpi, qataq 'enauac aca laỹe nachetaqtaxanaqtepi da huo'o ca naponaxac.

₃₄Qaq so nachetaqtaxanaxat qo'oipaqpi maye norec lashec, somaye ñalletaxagui qomi' ntaxaỹaxanaxanecpi qataq leviitapi, nataqa'en 'enauac se'eso maiche nhuo' le'ecpi, da yaqto' qaỹaỹaten negue't ca talec da ndouo ca qo'oipaq se'eso maiche nalamaxat ñalaqpi, qataq yaqto' da ivireuga ca laloqo' so 'oonolec vi'i, nache que'eca qo'oipaqpi qandoua'a añi atamnaxaqui maye lalamaqte Ñim Nataxala' maye Qanatamnaxala', da yaqto' qaỹaloolec ca norec aso lca'atoxonaxalate, da yaqto' qaipacchiguilo naua 'ena'ape na nqataxacpi maye nanettañi. ₃₅Nataqa'en ye 'oonolec vi'i nache seroxoua'a aso atamnaxaqui maye lalamaqte Ñim Nataxala', ca la'auaxanec ala ca nañiguishec qataq 'enauac ca no'on ala ana qo'oipaq. ₃₆Nataqa'en seroxoua'a so ntaxaỹaxanaxanecpi so qara'auaxanec qoyalaqpi, da yaqto' qoỹanot Ñim Lo'onatac 'Enauacna. Nataqa'en seroxoua'a so la'auaxanec llalaqpi so qana'atetpi, huaca, qataq aso qagueta da yaqto' qaipacchigui da 'enapec naua nanettrañi nqataxaco. ₃₇Nataqa'en ñasataxagui da seroxoua'a so laponqa' so nallec maye naña aso atamnaxaqui maye lalamaqte Ñim Lo'onatac 'Enauacna, so qarachetaqtaxanaxat la'auaxanec 'ayiiña, qataq aso la'auaxana ala aso qo'oipaqpi, lataxa, qataq so aceite, da yaqto' qoỹanem so ntaxaỹaxanaxanecpi. Nataqa'en ñasataxagui da sanaxam so leviitapi aso diezmo maye chegaqaigui na ala so qorañiguishecpi. Cha'aye nacheso somayepi so laỹootega't naxa 'enauac ana qarachetaqtaxnaqte naua souaqta'alo qaro'onataxanaqa'te. ₃₈Qalaxaye 'oonolec ca ntaxaỹaxanaxanec chegoxoguet so Aarón da nnaictague' na leviitapi, qom ỹe'eguenauga aca diezmo maye chegaqaigui na nachetaqtaxanaxatpi nache qoỹanem so leviitapi, nache ỹachaigui so maiche laponqa' somaye maye naña aso atamnaxaqui maye lalamaqte Ñim Qanatamnaxala'.

₃₉Qaq so Israel le'ecpi qataq so leviitapi, iroua'a aso naponaxanaxaqui maye naña aso atamnaxaqui, asa'aso nachetaqtaxanaqtepi ala na trigo, lataxa, qataq aceite, cha'aye nache netaigui som nogoxoshetpi maye sa qaishetapec, qataq so ntaxaỹaxanaxanecpi, qataq so lasom lo'opi, qataq so 'onaxanaxaicpi.

Qaq 'era da 'eetec so qarasataxac da saishet da salataq aso atamnaxaqui maye lalamaqte Ñim Qanatamnaxala'.