So Israel le'ecpi quetapeguelec Ñim Nataxala'
1Huo'o so na'a'q, nache so Israel le'ecpi quetapeguelec Ñim Nataxala', souaxat da huaigui nque'eenaxac somayepi. Nache Ñim Nataxala' hua'aqtega co'ollaxa somayepi, nache ỹataqta dalemata, huaña nache ỹavigoigui naqa'en naua loiguiye so lpe'lpi somayepi. 2Nache so nhuo' le'ecpi ỹa'alaqtagui co'ollaxa, nache iỹaxanot so Moisés da yaqto' itauan, nache so Moisés natamnot Ñim Nataxala', nache se'eso norec no'omñi. 3Ỹoqo'oye se'eso 'alhua qaỹamata'ac da Tabera maye naigui da ỹavic, cha'aye huaña co'ollaxa da 'eroigui so l-le' Ñim Nataxala', nache ỹavigaxat somayepi. 4Qaq souaxat so chegaqauecpi maye ỹaleeguet so Israel le'ecpi, maye ndotec da lquia'axac tatapigui lauel. Nache so Israel le'ecpi ỹe'enaxat co'ollaxa somayepi, nache qaltaq ỹe'eguelaxalec da nỹeetagui, nache detaqtac, 'eeta': «¡Negue'tom ca qomi' ỹanema nagui ca lapat! 5¡Qaq nagui qomi', tachigui qarhuel co'ollaq souaqta'a ye Egipto, qalaq saishet da sesheetenaq da sacheguenaq na nỹaq! Nataqa'en sacheguenaqtac ana pepinos, melones, puerros, sebollas, ajos. 6Qaq nagui mashe yaqta'a da qomi' ỹalaua't na qarqouaxa, qaica ca lỹa selaqa'a nda'a't ana maná.»
7Qaq aso maná 'eeta'am ana ala ana cilantro, qataq qovialec da lo'oxoỹaxac, 'eeta'am na qo'oipaq lcha'q. 8Qaq so shiỹaxauapi ỹe'egueetegueuga naxa aso maná, ime nache ilaxachigui ỹauota'a na coma', huo'otaq ana 'araxanaxaqui, qaq naxa da ime, nache ỹaneuaq ỹachangui ana taxaqui da ỹo'ot nauolepi. 9Qaq ye pe da naañi na 'aỹa, da talec so qanayeuta'a, nache naañi nataqa'en aso maná.
10Qaq so Moisés hua'aqtega co'ollaxa da nỹeetac so shiỹaxauapi, netañalo naua lleguereuo so lpe'lpi. Nache Ñim Nataxala' ỹataqta dalemata co'ollaxa, qaq nataqa'en so Moisés sa ỹaỹamaxaren co'ollaxa de'era, 11nache so Moisés 'enapega co'ollaxa Ñim Nataxala', 'eeta':
«¿Ta'ainco' ye aỹem 'auo'otec da sa ỹaỹamaxañi, ye aỹem 'aramaxashec? Qataq ¿Ta'ainco' da saishet da aỹem 'anqouaguec, ye nda'a't da aỹem 'aumatalec da lsallaxa ne'ena shiỹaxauapi? 12¿Peta'a nachaỹemo' lta'a, huo'otaq da aỹem late'e, da aỹem 'auamaqtalec da ñepeetague' namayepi da 'eeta'am ca nogotolec maye ña qaillepaxaatac, da seviraxatta'a ca 'alhua maye 'auachaxanapecot co'ollaxa da 'aỹa'anem so hua'au lta'alpi namayepi? 13Qaq ¿hua'ago' ca sachegoxota'ague ca lapat da yaqto' sanem namayepi? Cha'aye aỹem naua'a, nỹeetac, nache 'eeta': ‹Ña qomi' 'aỹa'anema ca lapat yaqto' sacheguenaq.› 14Aỹem, mashe saishet da ñerote' da sauectac ne'ena shiỹaxauapi, cha'aye mashe sa ñalo'oguet, ỹapac qapa'atta. 15Cha'aye da qoqueto'ot da aỹem 'auo'otec de'era, qaq no'ono' da aỹem 'auchoxoren da 'anqat da ñachaalataxac, qom 'eesa da aỹem 'auauotec. Yaqto' saishet da ñeque'etaxaachigui de'era qauem.»
16Qalaxaye Ñim Nataxala', 'eeta': «'Alaỹona't qome ca setenta nqueroxonecpi Israel le'ecpi, maye lataxala'pi ne'ena nhuo' le'ecpi, nache 'auauegueua'a ye ñegueuo ñi npe'l, nache camayepi qataq 'am, aỹem qauachiỹaique qome. 17Nache aỹem, senotec qome da 'am ña'aqtaxane', nache sanem camayepi ca laỹolec da na'añaxac maye 'am sanem co'ollaxa, yaqto' 'am itauan da 'auaueca'aguet ne'ena shiỹaxauapi yaqto' saishet da 'andotec. 18Qalaxaye qonapega qome ne'ena nhuo' le'ecpi da nqui'itaxatta qonte', yaqto' chec ca lapat. Cha'aye Ñim Nataxala' hua'aqtega da qannoinaxaqui qataq da qara'aqtaqui, maye 'eeta': ‹¡Negue'tom ca qomi' ỹanema ca lapat da yaqto' sacheguenaq da 'eeta'am co'ollaq sonaqtaña ye Egipto!› Qaq Ñim Nataxala' qami' ỹanema nagui ca lapat da yaqto' qollequiitac, 19qalaxaye saishet da 'oonolec, dos, cinco, diez huo'otaq veinte na'axa'te da qollequiitac camaye. 20Cha'aye ivittec qome ca 'oonolec ca'agoxoic, choche ivitta'a da ỹataqta qauaỹemequi qome, souaxat da qaica ca naigui qanqa'eñi Ñim Nataxala' maye qami' ỹalectaiguilo, qataq qami' ỹauaachiguilo da qanỹeñeetac qoñiita': ‹¿Che'eeto' co'ollaxa da qolqa'ai ye Egipto?›»
21Nache so Moisés 'eeta':
Aỹem salectaigui ne'ena seiscientos mil shiỹaxauapi, ¿qaq 'am qonapec da 'oonolec ca'agoxoic da 'aỹa'aata'am da chectac ca lapat namayepi? 22¿Hua'ague ca chegaqa'ague aca qalota qaguetapi, huacapi da yaqto' qaỹalauat da yaqto' nalotec da qoỹanec ca lapat? Huo'otaq da qalaỹona't da qoỹanem 'enauac na nỹaqpi maye huetangui ana auaxai, qalaq saishet da nalouec.
23Qalaxaye Ñim Nataxala' 'enapeco': ¿Peta'a 'aupi'itaxaatega da saq 'amaqtaq da ỹa'añaxac? Qaq nagui nache 'auauaachigui qome da 'eesa, huo'otaq saishet da 'en de'era shenapec.
24Nache so Moisés pa'auec da da'aqtaxanem se'eso nhuo' le'ecpi de'era la'aqtac Ñim Nataxala'. Ime, nache laỹona't so setenta nqueroxonecpi Israel le'ecpi, nache coleesop naqa'en so npe'l. 25Nache Ñim Nataxala' huenotec huetaigui so lo'oc, nache detaxaỹapegue' so Moisés, ime nache ỹacona so laỹe so saqcha'a la'añaxac maye ỹanem co'ollaxa so Moisés, nache ỹanem so setenta nqueroxonecpi. Qaq co'ollaq taigui somayepi se'eso saqcha'a na'añaxac, nache detaqa somayepi 'eeta'am ca na'aqtaxanaxanec. Qalaxaye co'ollaq ime, nache saishet da qaltaq ỹe'eguelaxa da detaqtac da 'eeta'am ca na'aqtaxanaxanec.
26Nache se'eso qanayeuta'a npe'lpi, dos soua no'oirañi nqueroxonqa maye ỹalectaiguilo se'eso setenta nca'aguishecpi, nache saishet da taua'alo so npe'l maye huaña da qanauane' Ñim Nataxala'. Qaq 'oonolec so le'enaxat da Eldad, qaq so lỹa Medad, soomaye nataqa'en taiguilo so laỹe so Saqcha'a La'añaxac Ñim Nataxala', nache da'aqtaxaata'ape soomaye 'eeta'ama ca na'aqtaxanaxanec. 27Nache so nsoqolec naloxo co'ollaxa da taua'a so Moisés, nache da'aqtaxanem 'eeta':
¡Da Eldad qataq da Medad da'aqtaxaata'ape, 'eeta'ama ca na'aqtaxanaxanec, netañalo ye qanayeuta'a npe'lpi!
28Nache so Josué, som llalec so Nun, maye ltaua so Moisés, 'eeta': ¡'Am ỹataxala' Moisés, saishet taxa da 'auashenema da da'aqtaxaata'ape caamaye!
29Nache so Moisés 'eeta': ¿Peta'a aỹem 'auca'alaxaatapeguelec? ¡Qamaq da iyaxa ctaxa da 'enauac ne'ena nhuo' le'ecpi, talec so laỹe so Saqcha'a La'añaxac Ñim Nataxala', nache 'enauac da na'aqtaxanaxanecpi!
30Ime, nache so Moisés qataq so nqueroxonecpi Israel le'ecpi, ỹe'eguelaxauga so qanayeuta'a nanataqa'.
So dachemipi
31Ñim Nataxala' anac naqa'en so la'at lta'araic, chegaqangui aso auaxai, nache nactaigui naqa'en so ỹataqta qalota dachemipi. Nache talec naqa'en so saqaỹapeque so nanataqa', qaq ye lcachiguiñi so huaña so dachemipi ivi', 'oonolec na'a'q da qanayectalec, nache so dachemipi lapootasheguem, ivi' ye un metro ye loquitcheguema. 32Nache 'enauac se'eso na'a'q qataq so pe, qataq iviraigui so lỹa na'a'q da se'eso nhuo' le'ecpi laỹootac somayepi. Nache na saq 'amaqtaq na ỹache, qaq ivi' diez so laponecpi dachemipi, qataq ỹachaña na pa'auec so lanataqa'pi da iqaxaỹaxat na lapat. 33Qalaxaye so Israel le'ecpi co'ollaq mashe huetaigui na alap so dachemi lapat, qalaxaye saxanaxa da inaigui, nache Ñim Nataxala' ỹataqta dalemataỹa somayepi, nache qalota so ileu naqa'en. 34Ỹoqo'oye yi'iye 'alhua qailonec da Quibrot Hatavá, cha'aye qailareña co'ollaxa 'enauac so nhuo' le'ecpi maye ndotec da lquia'axac tatapigui lauel. 35Qaq se'eso nhuo' le'ecpi co'ollaq jec, nache chegoqchiguiña ye Quibrot Hatavá nache ivitta'a ye Haserot, qaq nache hua'a yemaye.
